Jehovap qanoq isigaanga?
1. Biibili qanoq ililluni tarrarsuutitut ippa?
1 Qanoq akulikitsigisumik tarrarsortarpit? Amerlanerusugut ullut tamaasa arlaatigut aaqqitassaqassasoraluta tarrarsortarpugut. Biibili tarrarsuummut assersuunneqarpoq. Guutip oqaasianik atuaraangatta ilorlikkut qanoq ittuunersugut, inuk Jehovap isigisaa, takusarparput. (1 Sam 16:7; Jaak 1:22-24) Guutip oqaasianit ‘uummatip eqqarsaatai isumaalu eqqartuunneqartarput.’ (Hebr 4:12) Ullut tamaasa Biibilimik atuartarnerput eqqarsaatiginneqqissaartarnerpullu oqaluussisartutsialanngornissatsinnut qanoq iluaqutigisinnaavavut? — Tuss 1:1-3.
2. Imminut misissornitsinnik Biibili qanoq iluaqutigisinnaavarput?
2 Biibili tarrarsuutitut atoruk. Kiffat aalajaatsut pissusii pillugit Biibilimi atuartarnikkut suut Jehovamut iluarinartuunersut paasisinnaavavut. Assersuutigalugu Daavip Guutip aqqanik ilungersuussisuunini ersersippaa. (1 Sam 17:45, 46) Atukkani erloqinartuni Esaja kajumilluni sapiillunilu oqaluussinissaminut sassarpoq. (Es 6:8, 9) Jiisusip Ataataminut qilammiusumut asanningaarnini pissutigalugu kiffartornini artornartutut isiginagu nakussatsinnartutut nalerisimaarnartutullu isigaa. (Joh 4:34) Ukiuni hundredini siullerni kristumiut kajumingaarlutik Jehova tatigalugu tunniutiinnarumanatillu oqaluussisarsimapput. (ApS 5:41, 42; 2 Kor 4:1; 2 Tim 4:17) Taakkua iliuuserisimasaannik eqqarsaatiginneqqissaarnitsigut kiffartornitsinnik illernartumik pitsaanerulersitsisinnaavugut.
3. Sooq allannguinissatsinnut nangaassanngilagut?
3 Iluarsisariaqartut iluarsikkit. Tarrarsornitsinni iluarsisassat isiginngitsuusaarutsigit taava tarrarsornerput soorunami iluaqutaanavianngilaq. Imminut misissornitsinnik pisariaqartunillu allannguinissatsinnik ikioqqulluta Jehova qinnuigisinnaavarput. (Tuss 139:23, 24; Luk 11:13) Piffissaq sivikilleqimmat inuunerlu aarlerinartorsiormat pisariaqartunik allannguinissatsinnut nangaassanngilagut. — 1 Kor 7:29; 1 Tim 4:16.
4. Guutip oqaasianut tarrarsortoq takusaminillu iluarsisaqartoq qanoq atugaqalissava?
4 Inuup ilorlikkut qanoq ittuussusia isikkuaninngarnit Jehovap maluginiarnerusarpaa. (1 Petr 3:3, 4) Guutip oqaasianut tarrarsortoq takusaminillu iluarsisaqartoq qanoq atugaqalissava? Jaakup allagaani 1:25-mi ima allassimavoq: “Tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq”. Aap, ‘Jehovap naalannassusia assigilerutsigu’ pillualissaagut kiffartornitsinnilu sunniuteqarluarnerulerluta. — 2 Kor 3:18.