Atuagaasiviit angallattakkat atorlugit qanoq oqaluussisoqartartoq

Atuagaasiviit angallattakkat atorlugit oqaluussineq eqqortuliorusuttut sallusuissummik soqutiginnilersinnissaannut iluaqutaangaarpoq. (Joh 6:44) Taamaattumik utoqqaanertat pisuinnaat aqqutaanni angallaffiulluartartuni tamanut oqaluussinermik aaqqissuusseqqullugit kajumissaarneqarsimapput. Atuagaasiviit angallattagaammata oqartussaasunut akuersissutinik pissarsiniartoqartariaqanngilaq. Kikkut peqataasinnaappat? Oqaluussisartut naliliisinnaassuseqarluartut, pissuserissut oqaloqatikkuminartullu. Tulliuttut iliuuserineqartussat iliuuserineqaqqusaanngitsullu oqaluussisartut iluatsilluarnissaannut iluaqutaassapput.

Uku iliuuserikkit:

Ikinngutinnersuullutillu ilakkuminartuullutillu saneqquttunut ikiuukkumatuujugit. Oqaluussisartut ilaat saamarpasillutik qungujoriarlutik inussiarnersumik ilassinnittarput. Saneqquttup atuagaasivik angallattagaq isigippagu ima oqarsinnaavutit: “Tiguserusukkuit.”
Atuagaasivimmit angallattakkamit qanoq ungasitsigalutit nikorfassavit? Sumiiffiit ilaanni oqaluussisartut atuagaasiviup angallattakkap eqqaani nikorfagaangamik angusaqarluartarput. Sumiiffinni allani periuseq tamanna atorneqaraangat saneqquttut unissanerlutik nalornisoorutigisarpaat, taamaattumik oqaluussisartut atuagaasiviup eqqaani unittoqarnissaata tungaanut avinngarusimanerulaarlutik nikorfasarput. Inuit atuagaasivimmut angallattakkamut qanillisut oqaloqatiginiartakkit, soorlu ima aperinerisigut: “Apeqqut tamanna eqqarsaatiginikuuiuk?”
Sapinngisamik Biibili atortaruk.
Biibililersaarutinik atuaqqissaarnermi atorneqartartunik, soorlu atuakkamik Biibilimi ajoqersuutigineqartut-mik, tigusisut Biibilimik atuaqqissaarneq pillugu nassuiaatikkit. Aperiuk filmi Sooq Biibilimik atuaqqissaartariaqarpit? atortorissaarut elektroniskiusoq atorlugu takutissinnaanerlugu.
Sapinngisamik soqutiginnittup attaviginissaanut paasissutissanik pissarsiniartarit. Oqaloqatigisat oqaluussiffigisartakkanni najugaqanngippat attaviginissaanut paasissutissat allakkit allatsimullu piaarnerpaamik tunniullugit.