Tusarnaagassiat – Qanoq atorneqartassasut
1. Biibililersaarutit naqitat saniatigut suut iluaqutigisinnaavavut?
1 Inuppassuit sallusuissutip oqaasiinik eqquissunik ilumoortunillu peqqusersuitsunik atuarnissamut jw.org iluaqutigisarpaat. (Oqal 12:10) Tusarnaagassialli atornikuuigit? Taakku atorlugit nittartakkatsinni paasissutissat tusarnaarsinnaavavut. Tusarnaagassiat qanoq iluaqutigisinnaavavut?
2. Tusarnaagassiat nammineq ilaqutariittulluunniit atuaqqissaarnermi qanoq atorsinnaavavut?
2 Nammineq ilaqutariittulluunniit atuaqqissaarnitsinni. Angalanermi ulluinnarniluunniit Biibilimik, atuagassianik Biibililersaarummilluunniit immiussamik tusarnaarneq piffissatsinnik atorluaanissatsinnut iluaqutigisinnaavarput. (Ef 5:15, 16) Biibililersaarutitsinni malinnaajutigaluni atuffassinernik immiussanik tusarnaartarneq ilaqutariittut atuaqqissaaqatigiinnermik allanngorartitsinermut iluaqutaasinnaavoq. Ingammik atuffarissinerorusukkutta allamiulluunniit oqaasiinik ilinniarusukkutta tusarnaagassianik tusarnaartarneq iluaqutigisinnaavarput.
3. Oqaluussiffigisartakkatsinni kikkut tusarnaagassiat iluaqutigisinnaavaat?
3 Oqaluussinermi. Oqaluussiffigisartakkatsinni inuit atuarnissaminnut ulapippallaarsorisut tusarnaagassianik tusarnaarnissaminnut piumassuseqarsinnaapput. Imaluunniit allamiutut oqaasillit “namminneq oqaatsitik atorlugit” Naalagaaffimmik tusarliussamut tusarnaarusunnerusut naammattoorsinnaavavut. (ApS 2:6-8) Sumiiffiit ilaanni tusarnaarneq kulturimut pingaaruteqarpoq. Assersuutigalugu hmongimiutut oqaluttut oqaluttuarisaanertik inuusuttunut oqaluttuarisarpaat tusakkatillu eqqaamalluartarlugit. Afrikamiorpassuit oqaluttuanik tusarnaarneq nuannarisarpaat.
4. Oqaluussiffigisartakkatsinni inunnik ikiuiniarnitsinni imminut qanoq aperisinnaavugut?
4 Oqaluussiffigisartakkanni pulaakkap oqaasii atorlugit tusarnaagassiamik tusarnaartitsinissaq iluaqutaasinnaava? Allap Biibililersaarutinik immiussanik e-mailikkut nassinneqarnini iluaqutigisinnaavaa? Biibililersaarut immiunneqarsimasoq CD-mut nuussinnaavarput immaqalu Biibililersaarutip naqitartaa ilanngullugu pulaakkamut soqutiginnittumut tunniullugu? Atuakkat, quppersakkat, atuagassiat naqitaaqqallu elektroniskiusut tamarmik oqaluussinermi tunniussavut nalunaarusiamut allanneqarsinnaapput. Tusarnaagassiat nammineq atuaqqissaarnitsinni Naalagaaffimmillu sallusuissutip naatsiiassartaanik ikkussuinissamut iluaqutissatut suliarineqarsimapput. – 1 Kor 3:6.