Jehovap ileqqorissaarnermik najoqqutassiai aalajangiusimakkit

Jehova Guuti inuit maleruagassaannik ileqqorissaarneq pillugu najoqqutassialiorpoq. Assersuutigalugu angut arnarlu katittut qaqugorsuarmut aappariinnissaat nalunaarutigaa. (Matt 19:4-6, 9) Kinguaassiuutitigut inuunerlunnerit suulluunniit avoqqaarai. (1 Kor 6:9, 10) Innuttani allanit allaaneruniassammata atisalersornermut isikkorissartarnermullu tunngatillugu allaat najoqqutassialiorpoq. – 5 Mos 22:5; 1 Tim 2:9, 10.

Nalitsinni inuppassuit Jehovap najoqqutassiai suusupagaat. (Rom 1:18-32) Atisalersornermut, isikkorissarnermut pissusilersornermullu tunngatillugu isummat nalinginnaasut malittarpaat. Inuppassuit ingasattumik ajortuliortarnertik oqarataarutigisarpaat inuillu allat najoqqutassianik allanik maleruaasut isorisarlugit. – 1 Petr 4:3, 4.

Jehovap Nalunaajaasuisut Guutip ileqqorissaarneq pillugu najoqqutassiai sapiilluta aalajangiusimasariaqarpavut. (Rom 12:9) Qanoq? Periaaserilluta taassuma akuerinartutut isigisai ilisimaneqalersittariaqarpavut. Aammali inuunitsinni najoqqutassiat qutsissut aalajangiusimasariaqarpavut. Assersuutigalugu atisanut isikkorissarnermullu tunngatillugu aalajangiileraangatta imminut ima aperisarsinnaavugut: ‘Aalajangeeriaatsikkut Jehovap imaluunniit silarsuup najoqqutassiai malillugit ersersippara? Atisalersoriaatsikkut isikkorissariaatsikkullu ersersittarpara kristumiuullunga Guutimik mianerinnittoq?’ Imaluunniit filmimik isiginnaagassatsinnik toqqaaniarnitsinni imminut ima aperisinnaavugut: ‘Jehovap filmi taanna akuerissavaa? Kia ileqqorissaarnermik najoqqutassiaanik siuarsaava? Aliikkutatut toqqakkama ileqqorissaarnermik najoqqutassianik maleruaanissara sapernarnerulersissavaa? (Tuss 101:3) Toqqagara ilaquttannut allanulluunniit naakkiussutaasinnaava?’ – 1 Kor 10:31-33.

Jehovap ileqqorissaarneq pillugu najoqqutassiaanik aalajangiusimanninneq sooq pingaaruteqarpa? Qanittukkut Kristusip Jiisusip inuiaat ajussuserlu suujunnaarsissavai. (Ez 9:4-7) Guutip piumasaatut iliortut kisimik aniguissapput. (1 Joh 2:15-17) Taamaattumik Jehovap ileqqorissaarneq pillugu najoqqutassiai illersortigit pissuserinnitsinnik takunnittut Guuti unnersiutiginiassammassuk. – 1 Petr 2:11, 12.

FILMI BLIV JEHOVAS VEN – ÉN MAND, ÉN KVINDE ISIGINNAARIARLUGU APEQQUTIT UKU EQQARSAATIGIKKIT:

• Sooq Jehovap najoqqutassiaanik maleruaaneq silatusaarnerua?

• Sooq angajoqqaat qitornatik ukiukitsuuneranniilli Jehovap ileqqorissaarneq pillugu najoqqutassiaanik ilinniartittariaqarpaat?

• Inuusuttut utoqqaallu inuit Guutip ajunngisaarneranik iluaqutiginneqqullugit qanoq ikiorsinnaavaat?