Apeqquteqarfik

◼ Sooq atisalersoriaaserput qallikkullu pikisimanerput immikkut soqutigisariqarparput Peqatigiiffiup qullersaqarfianut imaluunniit immikkoortortaqarfiinut nunarsuarmi sumi tamaaniittunut takornariaraangatta?

Kristumiut pissuserissuunissaat naatsorsuutigineqarpoq. Piffissakkut sukkulluunniit atisalersoriaasitsigut qallikkullu pikisimanitsigut ileqqorissuunermik ataqqinassuseqarnermillu Jehova Guutip kiffaasa ilisarnaatigisariaqagaannik ersersitsisariaqarpugut. Tamanna minnerunngitsumik atortussaavoq Peqatigiiffiup qullersaqarfianut imaluunniit immikkoortortaqarfiinut nunarsuarmi sumi tamaaniittunut takornariarnermi.

1998-imi nunap immikkoortortaqarfiani aamma inuiannit tamalaanit peqataaffigineqartunit ataatsimeersuartoqassaaq. Qatanngutivut tuusintilikkuutaat nunanit assigiinngitsorpassuarnit Peqatigiiffiup qullersaqarfia New Yorkimiittoq immikkoortortaqarfiillu nunani allaniittut takornariassavaat. Tamakku takornariaraangatsigik, aap piffissap qanoq inneraniluunniit, ’Guutip kiffaasut malunnartinniartariaqarpugut’, aamma atisalersoriaatsitsigut qallikkullu pikisimanitsigut. — 2 Kor. 6:3, 4.

Organiseret til at fuldføre vor tjeneste-mi erseqqissarneqarpoq oqaluussigaangatta kristumiullu ataatsimiinnerini najuukkaangatta timikkut eqqiluisaarnissap, pilimanianngitsumik atisalersoriaaseqarnissap qallikkullu pikilluarsimanissap pingaaruteqassusiinik. Qupperneq 127-mi immikkoortoq 1-imi, ilaatigut ima oqaasertaqarpoq: „Aamma taamaappoq Brooklynimi angerlarsimaffiit betelit imaluunniit Peqatigiiffiup immikkoortortaqarfiisa arlaannut pulaaraangatta. Eqqaamajuk oqaaseq Betel isumaqarmat ’Guutip illua’; taamaattumik Betelimiinnitsinni atisalersoriaaserput, qallikkullu pikisimanerput aamma ileqquvut Naalagaaffilersaartarfimmi ataatsimiinnernut najuukkaangatta naatsorsuutigineqartutut ittariaqarput.“ Nalissaq qutsissoq tamanna oqaluussisartut, qanittumi ungasissumilluunniit najugallit tamarmik, Betelit takornariaraangamikkik betelimilu ilaqutaariit ilagigaangamikkit attattariaqarpaat.

Jehovamut ilumoortumik pallorfiginninnermik allat isiginnittaasiat atisalersoriaasitta ajunngitsumik sunnertariaqarpaa. Maluginiarneqarsimavorli qatanngutit angutit arnallu ilaat tamakkununnga pulaaraangamik pingaartitserpasinngippallaartumik atisalersoriaaseqartartut. Taamatut atisalersorneq naleqqutinngilaq Betelimik angerlarsimaffinnut pulaarnermi. Tamatumani allatigullu tamatigut kristumiutut inuunitsinni najoqqutassat qutsissut Guutip innuttaasa silarsuarmit immikkoorutigisaat maleruarusuppavut, taamaalilluta iliuutsivut tamarmik Guutip ataqqinaatigissavai. (Rum. 12:2; 1 Kor. 10:31) Pitsaassaaq Biibilimik atuaqqissaaqatigisartakkavut allallu immaqa siullerpaamik Betelimut pulaarniartut atisalersoriaatsip qallikkullu pikisimanerup pingaaruteqassusianik oqaluttuukkutsigik.

Betelimut pulaarnermut atatillugu immitsinnut aperisariaqarpugut: ’Atisalersoriaatsima qallikkullu pikisimanerma pilimanianngitsuunera nalunaarnerpaa? (Naleqqiuguk Mika 6:8.) Guuti kiffartorfigisara pillugu ajunngitsumik ersersitsiva? Isikkunnit pissusilersorninnilluunniit allat eqqissisimajunnaassappat imaluunniit mamiatsassappat? Immaqa aatsaat siullerpaamik pulaartunut eqqortumik maligassiuinerpunga?’ Tamatigut kissaatigaarput, aamma atisalersoriaaserput qallikkullu pikisimanerput eqqarsaatigalugit, ’Guutip annaassisitta ajoqersuutaata tamatigut naalannarsisinnissaa’. — Tit. 2:10.