UUMISSUINEQ QANOQ UNITSINNEQARSINNAASOQ

1 | Kikkut tamaasa assigiimmik pisakkit

Biibilimi allassimavoq:

‘Guutip kikkut tamaasa assigiimmik pisarpai, imminillu mianerinnittut eqqortuliortartullu sumiuunerat apeqqutaatinnagu [tamaasa] iluarisarpai.’ – APUSTILIT SULIAAT 10:34, 35.

Isumaa:

Jehovapa Guutip sumiuunerput, kikkunnik naggueqarnerput, amitta qalipaataa kulturerpulluunniit tunngavigalugit isummerfigineq ajorpaatigut. Pingaarnerli, tassa qamuuna qanoq ittuunerput, isiginiarnerusarpaa. “Inuimmi isiminnut saqqumisuinnaat isigisarpaat, Naalakkalli inuup uummataa isigisarpaa.” – Samuelimik 1. 16:7.

Qanoq iliorsinnaasutit:

Inuit uummammiui takusinnaanngikkaluarlugit allat assigiimmik pisarnerisigut Guuti ilaarniarsinnaavarput. Inuit eqimattatut isiginagit tamaasa assigiinngitsutut isiginiakkit. Allat – immaqa naggueqatigiinnit nunamilluunniit allamit pisut – ajortumik misigissuseqarfigigukkit Guutimut qinunikkut taama misigiunnaarnissamut ikioqqugit. (Tussiaat 139:23, 24) Jehova kinaassusersiortuunnginnissamut nukissannik ilumoorlutit qinnuigigukku qularinngissinnaavat tusarnaarlutillu ikiussagaatit. – Petrusimit 1. 3:12.

a Biibili naapertorlugu Guuti Jehovamik ateqarpoq, nutsikkanilu allani ateq Jahve atorneqarpoq. – Tussiaat 83:19; Saqqummersitat 15:4.

“Qaqortumik amilik eqqissillunga issiaqatiginikuunngisaannarpara, maannalu … qatanngutigiit ilumoortut nunani tamalaaniittut ilagilerpakka.” – TITUS

Misigisalikkersaarut – TITUS

Uumissuiunnaartoq

Titus inatsisit immikkoortitsisut naqisimannittullu pissutigalugit inupilunnut nakuusertartunut ilannguppoq. Ima oqaluttuarpoq: “Pagginnermik aallartitsiniaannarluta illoqarfimmi qernertormiut isersimaffigeqqusaanngisaannut, soorlu akunnittarfinnut imerniartarfinnullu, isertarpugut.” Titusip uumissuineq pissutigalugu kamarujussuartarluni eqqaavaa imalu nangilluni: “Angummik arnamilluunniit assortuuteqateqaraangama siulliullunga tillueriartuaannarpunga.”

Titus Jehovap Nalunaajaasuinik Biibilimik misissueqateqartalerami allanngoriartulerpoq. Biibilimik atuartalerami eqqarsartaatsini allanngortippaa. ‘Toqup, aliasunnerup, nillianerup anniarnerullu atuukkunnaarnissaannik’ neriorsuut assut killinneqaatigaa. – Saqqummersitat 21:3, 4.

Titusip aallaqqaammut uumissuiunnaarnissani sapernarteqaa. Oqarpoq: “Eqqarsartaatsima iliuuserisartakkamalu allanngortinnissaat sapernarteqaara.” Apustilit Suliaat 10:34, 35-milu “Guutip kikkut tamaasa assigiimmik pisarai” pillugit allassimasut iluaqutigai.

Qanoq kinguneqarpa? Titus ima nassuiaavoq: “Jehovap Nalunaajaasuisa ammip qalipaataa sumiuunerlu apeqqutaatinnagit asannittuliortarnerat takugakku ilumoortumik upperisaqarnerat qulariunnaarpara. Allaat suli Nalunaajaasutut imermut morsutsitaanngitsunga qaqortumik amillip ilagiinniittup imminut neriartoqquaanga. Allaanngilaq sinnattuinnarluni. Qaqortumik amilik eqqissillunga issiaqatiginikuunngisaannarpara, maannalu angerlarsimaffiani nereqatigaara. Qatanngutigiit ilumoortut nunani tamalaaniittut ilagilerpakka.”