UUMISSUINEQ QANOQ UNITSINNEQARSINNAASOQ

4 | Guutip ikiuineratigut uumissuiunnaarit

Biibilimi allassimavoq:

‘Anersaap inerititai tassaapput asanninneq, nuannaarneq, eqqissineq, naammagittarneq, inussiarnisaarneq, ajunngissuseq, upperneq, saamaneq imminullu aqussinnaaneq.’ – GALAATIAMIUT 5:22, 23.

Isumaa

Guutip ikiuineratigut uumissuineq unitsinneqarsinnaavoq. Anersaava illernartoq pissutsinik nammineerluta ineriartortissinnaanngisatsinnik ineriartortitsisinnaavoq. Taamaattumik uumissuineq nammineq unitsinniarsarinagu Guutip ikiuinera tatigigutsigu silatusaassaagut. Taamaaliorutta apustilitut Paulusitut ima allattutut misigisaqassaagut: “Guutip pissatsittarmanga suulluunniit nukissaqarfigaakka.” (Filippimiut 4:13) Aap, ima oqarsinnaassaagut: “Ikiorsiissutissara pissaaq Naalakkamit.” – Tussiaat 121:2.

Qanoq iliorsinnaasutit:

“Jehovap nakuusertartumiit eqqissisimasumut allanngortippaanga.” – WALDO

Jehova ilumoorlutit qinnuigiuk anersaamik illernartumik tuneqqullutit. (Lukkarsi 11:13) Pissuserissuunissamut ikioqqullutit qinnuigiuk. Uumissuinermik peersitsisinnaasut – soorlu asanninneq, eqqissineq, naammagittarneq imminullu aqussinnaaneq – pillugit Biibilimi allassimasut misissukkit. Pissutsinik taakkuninnga ineriartortitsinissamut periarfissarsiorit. Taamalu pissuseqarniartuartut ilagisakkit. Ikinngutit taamaattut ‘asannittuliornissamut ajunngitsuliornissamullu kajumissaarsinnaavaatsit’. – Hebræerit 10:24.

Misigisalikkersaarut – WALDO

Uumissuilluni nakuusertarunnaartoq

Waldo peroriartornermini atugarliortarami uumissuisunngorpoq. Ima oqaluttuarpoq: “Ikiaroornartunik tuniniaasut aqqusinermi paakulasarpakka. … Akeqqatta taamaallutik inuussutissarsiutigalugu inuartartoq akilerpaat toqoqqullunga, savimmilli ataasiaannarlunga kapitereerlunga qimaavunga.”

Waldop nuliami Jehovamik Nalunaajaasut ilagalugit Biibilimik misissuisalernera nuannarinngilaa. Ima oqarpoq: “Nalunaajaasut uumigaakka, arlaleriarlungalu suanngassortarpakka. Eqqissisimallutilli akiuaannarpaannga.”

Piffissap ingerlanerani Waldo Biibilimik misissuisalerpoq. Ima oqarpoq: “Ilikkakkama maleruarnissaat sapernartippara. Qularinngikkaluarpara kamajanersuara aqussinnaassanagu.” Biibilimilli ilikkakkani sunnerneqaatigingaarpaa.

Waldo nassuiaavoq: “Ilinniartitsisuma Alejandrop Galaatiamiut 5:22, 23-millu atuaqquaanga. … Alejandrop nassuiaappaanga pissutsinik taakkuninnga nammineq ineriartortitsisinnaanngitsunga, kisianni Guutip anersaavata illernartup ikiussagaanga. Tamanna isiginnittaatsinnik allannguilluinnarpoq!”

Waldop Guutimit ikiorneqarnissani tatigigamiuk uumissuisarunnaarpoq. Oqarpoq: “Ilaquttama ikinngutigisimasamalu taama allanngortigisimanera upperiuminaatsippaat.” Ima nangippoq: “Jehovap nakuusertartumiit eqqissisimasumut allanngortippaanga.”