Nunani tamani isumakkut peqqiilliornerit
“Kisimiikkaluaraangamaluunniit nanertisimariataartarpunga.”
“Ajunngikkaluarlunga ajorseriataarnissara ernumagisarpara. Nalunnginnakku nuannaarujussuaraangama nikallorujussuartussaallunga.”
“Ullut ataasiakkaarniarsarisarpakka tassaanngaannarli ilaannikkut nanertisimaleriataartarpunga.”
Eqqarsartaatsimikkut unamminiagaqartut taakkua oqaasii ilisarisinnaavigit? Illit qanigisalluunniit taamatut nalaataqarsimavisi?
Taamaappat kisimiinngilatit. Inuppassuit nammineq qanigisaalluunniit eqqarsartaatsikkut nappaammik eqqugaasimapput.
Ersarippoq pissutsit ‘anigoruminaallutillu erloqinartuusut’. (Timuutiusimut 2. 3:1) Misissuinermi ersersinneqarpoq nunarsuaq tamakkerlugu inuit arfineq-pingasuugaangata inuk ataaseq eqqarsartaatsikkut nappaateqartoq. COVID-19 atuutsillugu 2020-mi inuit nanertisimanermik nappaatillit 2019-imut naleqqiullugu 26 procentimik isumatsaqqarujussuartullu 28 procentimik amerleriarsimapput.
Eqqarsartaatsikkut peqqissuserput kisitsisit atorlugit naatsorsorneqarsinnaanngilaq. Pingaaruteqarporli illit asasatillu eqqarsartaatsikkut sapinngisamik peqqissuunissarsi.
Eqqarsartaatsikkut peqqissuuneq
Eqqarsartaatsikkut peqqissut misigissutsikkut nalerisimaarlutillu ilorrisimaartarput. Ulapittaraluarlutik nalerisimaarsinnaapput.
Eqqarsartaatsikkut nappaat …
TASSAANNGILAQ inuttut sanngiinnermut ersiutaasoq.
TASSAAVORLI eqqarsartaatsikkut nanertisimaneq inuup eqqarsaataanut, misigissusaanut iliuusaanullu sunniuteqartoq.
Allanut attaveqarniarnermut ulluinnarnilu iliuusissanut sapernartitsisinnaavoq.
Inuit qassinilluunniit ukiullit kulturiat, tunuliaqutaat, upperisaat, ilinniagaqarsimanerat isertitaallu apeqqutaatinnagit atugarilersinnaavaat.
Eqqarsartaatsikkut nappaateqalernermi ikiortissarsiorneq
Illit inuttut allannguuteqaruit – soorlu sinissaaruttaleruit nerisarnerilluunniit allannguuteqarpat aamma annikilliuuteqarnerit, nanertisimanerit aliasunnerilluunniit sivitsorpat – suna pissutaanersoq paasiniarlugu ikiorneqarnissat pisariaqalersinnaavoq. Sumulli ikiortissarsiorsinnaavit?
Inuk ilisimassuseqarnerpaaq, Jiisusi Kristusi, ima oqarpoq: “Peqqissut pinnatik napparsimasulli nakorsamik pisariaqartitsipput.” (Matiusi 9:12) Peqqiilliortut nakorsamit ikiorneqarunik nakorsaatitorunillu nappaatimik sunniutai annikillisarsinnaavaat inuunertillu nuannaarutigalugu. Ersiutit ajorsivallaannginneranni sivitsorpallaannginneranniluunniit ikiortissarsiornissaq kinguarsanngikkaanni silatusaarnerussaaq.a
Biibili nakorsaariaatsimut najoqqutassiaanngikkaluartoq imarisai eqqarsartaatsikkut peqqissutsimut iluaqutaasinnaapput. Eqqarsartaatsikkut peqqissutsimut Biibilimi iluaqutaasinnaasut allaaserisani tulliuttuni sammineqarput, kajumissaarpatsigillu misissuataaqqullugit.
a Napasuliaq Alapernaarsuiffik nakorsaariaatsimut aalajangersimasumut innersuussineq ajorpoq. Inuit tamarmik immikkut periarfissat assigiinngitsut eqqarsaatigeqqissaartariaqarpaat namminerlu aalajangerlutik.