Ilaat suut tunngavigalugit aalajangiisarpat?

Inuit amerlanersaasa toqutsineq, pinngitsaaliilluni atoqateqarneq meeqqanil­luunniit atornerluineq ajorluin­nartutut isigisarpaat, paarlat­tuanillu ajunngitsuliorneq, inussiarnerneq misigin­neqataanerlu eqqortuliornertut isigisarlugit. Inuilli ilaasa atoqatigiinneq, unneqqarinneq meeqqanillu perorsaaneq eqqarsaatigalugit aalajangikkat suulluunniit akuersaar­neqarsin­naasoraat. Inuit namminneq qanoq misiginertik inuillu allat misigissusii eqqarsaatigalugit aalajangiisarput. Taamaalior­tarnerli pitsaanerpaava?

QANOQ MISIGINERPUT

Suup eqqortuuneranik eqqunngitsuuneranillu misigisaaterput, tassa nalunngeqatigin­nissuterput, aallaavigalugu iliuuseqarajuppugut. (Romamiut 2:14, 15) Meeqqat mikinerminniilli allat pissusilersornerat ajunnginnersoq ajornersorluunniit takusin­naasarpaat eqqunngitsulioraangamillu ilerasus­sinnaasarlutik. Piffissap ingerlanerani nalunngeqatigin­nissuterput inunnit ilagisar­takkatsinnit upperisatsinnillu ilusilersor­neqartarpoq. Aalajangiiniar­tilluta nalunngeqatigin­nissutitta paasitit­tarpaatigut aalajangiun­niagarput eqqortulior­nerunersoq eqqunngitsulior­nerunersorluunniit.

Nalunngeqatigin­nissuterput allat misigeqatiginis­saannut, qujamasuf­figinis­saannut ajunngitsuliorfiginis­saannullu kajumis­sissutigisin­naavarput. Aamma asasatta annersin­naveersaar­nissaannut kanngusuutigisatsin­nilluunniit ilerasuutigisin­naasatsinnillu iliuuseqar­naveersaar­nissamut iluaqutigisin­naavarput.

Qanoq misiginerput tunngavis­saqqissuujuaannarpa? Garrick inuusut­tuulluni nammineq kissaatini malillugit inuusimavoq. Paasilerpaali nammineq eqqortuusorisamisut iliortarnini kingunerluttartoq. Pilluaalluni inuunerarpoq inuunini inuunerlunnermik, ikiaroor­nartumik, imigassamik nakuuser­nermillu ulikkaarmat.

INUIT ALLAT MISIGISSUSII

Aalajangiiniaraangatta allat qanoq isumaqarnersut eqqarsaatigigajupparput. Taamaalioraangatta allat misilittagaat ilisimas­suseqar­nerallu iluaqutigisarpagut. Ilaquttatta, ikinngutitta ilisarisimasattalu eqqortuusorisaannik ilioraangatta ataqqineqaler­tarpugut.

Allat misigissusii tunngavis­saqqissuujuaannarpat? Priscila inuusut­tuulluni ikinngutimi ilarpassuisa iliortar­nerattut katissimanani atoqateqartarpoq. Allalli eqqortuusorisaannik iliortarnini pillualis­sutiginngilaa. Ima oqaluttuarpoq: “Allat tamarmik iliuuserisar­tagaannik iliortarnera iluaqutigin­ngilara. Sianiil­liortarlungalu imminut navianar­torsior­tittarpunga.”

PITSAANERUSUMIK PERIAASEQARPA?

Eqqortumik eqqunngitsumillu immikkoor­titsiniar­nitsinni qanoq misiginerput allallu misigissusii iluaqutigisarpagut. Tamannali ajunngitsumik kinguneqar­tuaannarneq ajorpoq. Uungaannaq isigilersoorsin­naavugut aalajangikkatta uagutsinnut allanullu ajoqutaasin­naanerat takusinnaaneq ajorlugu. (Ussatit 14:12) Aamma eqqortuusorisatsinnik allallu eqqortuusorisaannik ilioraluarut­taluunniit naggataatigut ajoqutigisin­naavarput. Eqqortuusorisallu allanngorsin­naapput. Eqqunngitsulior­nertummi isigineqar­tarsimasut ilaat ullumikkut akuersaar­neqarput, iliuutsillu siornatigut akuersaar­neqartut ilaat maanna naleqqutin­ngitsutut isigineqarput.

Suup eqqortuuneranik eqqunngitsuuneranillu aalajangiinissamut pitsaanerusumik najoqqutas­saqarpa? Ullumikkut atoriaan­naasumik siunissamilu pakatsis­sutiginavian­ngisatsinnik najoqqutas­saqarpa?

Aap, kikkut tamarmik sumiluunniit najugaqaraluartut iluaqutigisin­naasaannik allanngujuitsunik tutsuiginar­tunillu najoqqutas­saqarpoq. Allaaserisami tulliuttumi sumi pitsaanerpaanik najoqqutas­sarsisin­naanersugut sammineqarpoq.