Itsaq Israalimi kunngit qanoq ilinniarfigisin­naagigut

1-2. Israalimi kunngiusimasut ilaat Biibilimi qanoq oqaluttuarineqarpat?

ISRAALIMI kunngiusimasut 40-t sinnerlugit Biibilimi oqaluttuarineqarput.a Iliuusii isertuun­neqaratik oqaluttuarineqarput. Assersuutigalugu paasitin­neqarpugut kunngit ajunngitsut ilaannikkut ajortumik iliuuseqartartut. Daavi kunngiul­luartoq pillugu Jehova ima oqarpoq: ‘Kiffara Daavi uummatimigut iluunngarluni uannik malinnippoq tamatigut uanga isinni eqqortuusumik iliuuseqarluni.’ (Kng 1. 14:8) Daavilli arnaq uilik allasiorfigaa uialu sorsunnermi toqutaatillugu. – Sam 2. 11:4, 14, 15.

² Aammali kunngit ajortut ilaasa ajunngitsulior­tarnerat Biibilimi oqaluttuarineqarpoq. Assersuutigalugu Rehabeammi Jehovap isaani “ajortumik inuuseqarpoq”. (Nal 2. 12:14) Kisianni Rehabeammi aamma ajunngitsuliortarpoq. Assersuutigalugu Jehovamit peqquneqarami Israalip naggueqatigiissortai qulit allamik kunngeqarusuttut sorsuffigis­sanngikkai naalappoq. Aamma inuiaat iluaqutigisaannik illoqarfiit ilaat pallitaalisaliorpai. – Kng 1. 12:21-24; Nal 2. 11:5-12.

3. Suna apeqqutaalerpa, allaaserisamilu matumani suut sammissavagut?

³ Israalip kunngii ajunngitsuliorlutillu ajortulior­tarmata suna tunngavigalugu Jehovap nalilertarpaa kunngi aalajaannersoq? Tamanna akissutis­sarsigutsigu paasissavarput Jehovamit iluarisaas­sagutta qanoq iliortariaqar­nersugut. Itsaq Jehovap kunnginik naliliinermini uku pingasut pingaartippai: Uummat tamakkerlugu kiffartornersut, peqqissiminersut aamma guutisiorneq ilumoortoq aalajangiusimaneraat. Taakku ataasiak­kaarlugit sammeriartigit.

UUMMAT TAMAKKERLUGU JEHOVA KIFFARTORFIGAAT

4. Kunngit Jehovamut aalajaatsut ilumoorfigin­ninngitsullu suna assigiin­ngissutigaat?

⁴ Kunngit uummat tamakkerlugu Jehovamut kiffartortut Jehovap iluarai.b Josafatsip kunngiul­luartup ‘uummatimigut iluunngarluni Jehova ujarpaa’. (Nal 2. 22:9) Josijalu pillugu Biibilimi ima allassimavoq: “Siornatigut kunngeqarsimanngilaq Josijatut uummammigut iluunngarluni … Naalakkamut saanniarsimasumik.” (Kng 2. 23:25) Taavami Saalumuut naggataatigut ajortulior­talersimasoq? Taanna ‘Guutiminut uummammigut iluunngarluni ilumoorun­naarpoq’. (Kng 1. 11:4) Abija, kunngi ilumoorfigin­ninngitsoq alla, pillugu allassimavoq: “Guutini uummammigut iluunngarluni ilumoorfiginngilaa.” – Kng 1. 15:3.

5. Jehovamut uummatikkut iluunngarluni kiffartorneq qanoq isumaqarnersoq nassuiaruk.

⁵ Jehovamut uummatikkut iluunngarluni kiffartorneq qanoq isumaqarpa? Inuup uummammigut iluunngarluni kiffartortup Guuti qamannga pisumik asagamiuk ataqqigamiullu guutisiorfigisarpaa, imaanngitsoq guutisiorfigisariaqaramiuk. Aamma inuunini naallugu Jehova asallugulu ataqqiuarpaa.

6. Qanoq Jehova uummat tamakkerlugu asajuarsin­naavarput? (Ussatit 4:23; Matiusi 5:29, 30)

⁶ Kunngit uummat tamakkerlugu Jehovamik asannittut qanoq ilaarsin­naavagut? Ajortumik sunniuteqarsinnaasut ingalas­simanerisigut. Assersuutigalugu aliikkutassat ineriar­tornanngitsut aamma ikinngutipalaat pigisaleritunerlu Jehovamik asannin­nikillis­sutigisin­naavagut. Paasigutsigu asannin­nikillisimalluta ingerlaannaq allannguiumalluta pissutaasorlu peerniarlugu iliuuseqarisa! – Ussatit 4:23; Matiusi 5:29, 30 atuakkit.

7. Sooq ajortumik sunniuteqarsinnaasut ingalas­simanissaat pingaaruteqarpa?

⁷ Uummaterput paarilluar­tariaqarparput. Mianersun­ngikkutta imminut salloqit­tarluta isumaqalersin­naavugut Jehovamut kiffartornermi ulapputeqarutta ajortumik sunniuteqarsinnaasut ajoqutiginaviarnagit. Takorlooruk issittumi anorlersumilu silamiillutit. Angerlaravit kiassaatit sakkortusivatit. Tamannali iluaqutaassava matu ammatiin­narukku? Naamik, illup ilua nillertipal­lassaaq. Tamanna Jehovamut attaveqar­nitsinnut assersuun­neqarsinnaavoq. Jehovamut qanillis­sutigisin­naasatsinnik iliuuseqar­tarnitta saniatigut aamma Jehovamik asannin­nitsinnik nillertun­ngortitsisinnaasut suulluunniit uummatitsinnut isertis­sanngilagut. – Ef 2:2.

AJORTULIATIK PEQQISSIMIS­SUTIGAAT

8-9. Kunngi Daavi aamma kunngi Hizkia naqqinneqaramik qanoq qisuariarpat? (Asseq takuuk).

⁸ Paaseriik­katsitut kunngi Daavi ingasattumik ajortuliorpoq. Pruffiitimilli Naatammit naqqinneqarami Daavi maniguulluni peqqissimivoq. (Sam 2. 12:13) Imaanngilaq Naatat salloqit­tarniarlugu pillarneqar­nissaniluunniit pinngitsoor­tinniaan­narlugu peqqissimisuusaartoq. Daavi ilumoorluni peqqissimivoq. Tamannalu Tussiaat 51-imi allataanit paasisin­naavarput. – Tuss 51:1, 2, 5, 6, 19.

⁹ Aamma kunngi Hizkia Jehovamut ajortuliorpoq. Taanna pillugu Biibilimi ima allassimavoq: “Makitasuun­ngorpoq, taamaat­tumillu nammineq Judalu Jerusalemilu kamannermik eqqorneqarput.” (Nal 2. 32:25) Sooq Hizkia makitalerpa? Imaassinnaavoq pisuujunini, Assyriamiunut ajugaanini imaluunniit tupinnar­tuliornikkut ajorunnaarsin­neqarnini pissutigalugu allanit pingaar­nerusutut misigilersimasoq. Immaqa makitanini pissutigalugu pisuussutini Babylon­nimiunut takutis­simavai, tamatumalu kingunerisaanik pruffiitimit Iisaajamit naqqinneqarpoq. (Kng 2. 20:12-18) Daavili assigalugu Hizkia maniguulluni peqqissimivoq. (Nal 2. 32:26) Jehovap naggataatigut qanoq nalilerpaa? Biibilimi allassimavoq ‘Jehovap isaani ajunngitsumik iliortoq’. – Kng 2. 18:3.

10. Kunngi Amasja naqqinneqarami qanoq qisuariarpa?

¹⁰ Juudami kunngi Amasja Jehovap isaani eqqortumik iliorpoq, kisianni Daavi Hizkialu assiginagit “uummammigut ilumoorluinnarani” taamaaliorpoq. (Nal 2. 25:2) Sugami? Jehovap ikiuineratigut Edomikkut ajugaaf­figereerlugit taakkua guutiliaat Amasjap guutisiorfigisalerpai.c Jehovap pruffiitianit naqqinneqarami Amasjap tusarumanagu ingerlaqquaa. – Nal 2. 25:14-16.

11. Korintimiunut allakkat aappaat 7:9, 11-lu naapertorlugit Jehovamit isumakkeerfigineqas­sagutta qanoq iliortariaqarpugut? (Aamma assit takukkit).

¹¹ Kunngit sammeriikkagut qanoq ilinniarfigisin­naavagut? Ajortuliagut peqqissimis­sutigisariaqarpagut sapinngisatsinnillu iliuusereq­qinnaveersaarlugit. Taavami pingaaruteqarsorin­ngisatsinnut tunngatillugu utoqqaanertanit siunnersor­neqarutta? Eqqarsas­sanngilagut Jehovap asajunnaaraatigut imaluunniit utoqqaanertat nuannarin­ngikkaatigut. Allaat Israalimi kunngit ajunngitsut siunnersor­neqarnissartik naqqinneqar­nissartillu pisariaqar­tittarpaat. (Hebr 12:6) Naqqinneqarutta oqaaqqis­saarneqarut­taluunniit (1) maniguulluta akueris­savarput, (2) pisariaqartumik allannguissaagut aamma (3) uummaterput tamakkerlugu Jehova kiffartorfigiuarlugu. Ajortuliagut peqqissimis­sutigigutsigit Jehovap isumakkeerfigis­savaatigut. – Korintimiunut 2. 7:9, 11 atuakkit.

GUUTISIORNEQ ILUMOORTOQ AALAJANGIUSIMAVAAT

12. Kunngit ajunngitsut ingammik suna ilisarnaatigaat?

¹² Kunngit Jehovap iluarisaasa Jehovamut aalajaallutik guutisiorneq ilumoortoq aalajangiusimavaat. Aamma innuttatik taamaalioq­qullugit kajumis­saartarpaat. Paaseriik­katsitut soorunami kukkusarput. Jehovali kisiat guutisiorfigaat sapinngisaminnillu guutipiluit nunaminni piuneerun­niartarlugit.d

13. Sooq Jehovap kunngi Akabi aalajaan­ngitsutut isigaa?

¹³ Sooq Jehovap kunngit ilaat aalajaan­ngitsutut isigisarpai? Imaanngilaq iliuusii tamavimmik ajortuusut. Allaat kunngi ajortoq Akabi Nabotip toqutaaneranut pisooqataanerminik paasitin­neqarami maniguutilerlunilu aliasulerpoq. (Kng 1. 21:27-29) Aamma illoqarfiliortarpoq Israalillu akeraanut ajugaasarluni. (Kng 1. 20:21, 29; 22:39) Kisianni nuliaminit sunnerneqarluni guutipilus­siorneq siuarsaramiuk ajortorujus­suarmik iliorpoq. Ajoraluar­tumillu Akabip tamanna peqqissimis­sutiginngilaa. – Kng 1. 21:25, 26.

14. (a) Sooq Jehovap kunngi Rehabeammi aalajaan­ngitsutut isigaa? (b) Kunngit ajortut suna ilisarnaatigaat?

¹⁴ Sammeriik­katsitut kunngi ajortoq Rehabeammi naalakkersuinermini ajunngitsumik iliortarpoq. Kunngius­sutsinili aalajaal­lisereeramiuk Jehovap inatsisai tunullugit guutipilus­siortalerpoq. (Nal 2. 12:1) Tamatuma kingorna Jehova ilaannikkut guutisiorfigisarpaa ilaannikkullu guutipilus­siortarluni. (Kng 1. 14:21-24) Israalimi kunngit amerlanersaasa Jehova eqqortumik guutisiorfigiun­naarlugu guutipilunnut saapput aamma allat taamaalioq­qullugit kajumis­saarlugit. Ersarippoq Jehovap kunngi ajunngitsuunersoq ajortuunersorluunniit naliliinermini guutisiornermik ilumoortumik aalajangiusiman­ninnera pingaar­tingaaraa.

15. Sooq guutisiornermik ilumoortumik aalajangiusimanninneq Jehovamut pingaaruteqarpa?

¹⁵ Sooq guutisiornermik ilumoortumik aalajangiusimanninneq Jehovamut pingaaruteqarpa? Siullertut, kunngit Guutip innuttai guutisiornermi ilumoortumi siulersor­tussaam­matigit. Aamma guutipilus­siorneq allatigut ingasattumik ajortuliornermik inunnillu allanik ajortumik pinninnermik kinguneqartarpoq. (Hos 4:1, 2) Eqqaamas­savarpullu kunngit innuttaasullu Jehovamut tunniul­luinnarsimammata. Taamaattumik Jehovap guutipilus­siorneq allasiornertut isigaa. (Jer 3:8, 9) Inuup allasiortup aappani ajortuliorfigalugu uummatikkut annersillugu aliasuutis­singaarpaa. Taamatuttaaq Jehovamut tunniul­luinnarsimasup guutipilus­siortalersup Jehova toqqaan­nartumik ajortuliorfigaa uummataatigullu annersillugu.e – Mos 5. 4:23, 24.

16. Inuit naapertuil­luartut ajortullu Jehovap isaani ingammik suna assigiin­ngissutigaat?

¹⁶ Sumik ilikkagaqarpugut? Upperisarsiornermut eqqunngitsumut tunngasut suulluunniit ingalas­simanissaat pingaaruteqarpoq. Aammali guutisiorneq ilumoortoq aalajangiusimasariaqarparput Jehovamullu kiffartor­nitsinni ulapputeqar­tarluta. Pruffiitip Malakip nassuiarpaa inuup ajunngitsup ajortullu Jehovap isaani suna assigiin­ngissutigineraat. Ima allappoq: “Taava kingumut immikkoor­tissinnaan­ngussavarsi iluartoq iluanngitsumit, tassa Guutimik kiffartuussisoq kiffartuus­sisuunngitsumit.” (Mal 3:18) Jehovamit naapertuil­luartutut isigineqarusukkatta sunaluunniit – aamma kukkussutigut – nikallus­sutiginagillu Jehovamut kiffartorun­naassutigerusun­ngilagut. Jehovamut kiffartorun­naarneq immini ingasattumik ajortulior­neruvoq.

17. Sooq kina katissanerlugu aalajangiiniarnerput eqqarsaatigil­luartariaqarparput?

¹⁷ Aappaqan­ngitsuuguit katinnissallu kissaatigigukku aappaal­luarsin­naasumik toqqaaniarninni Malakip allatai iluaqutigisin­naavatit. Nuannarisat ajunngitsumik pissuseqaraluarluni Guutimut ilumoortumut kiffartor­tuunngikkuni Jehovamit naapertuil­luartutut isigineqarpa? (Kor 2. 6:14) Katissagaluarukku Jehovamut qanillinissannut ikiussavaatit? Una eqqarsaatigiuk: Kunngip Saalumuup nuliai allamiut nuannersunik pissuseqarsimasin­naapput. Jehovali guutisiorfigin­nginnamikku Saalumuup uummataa piffissap ingerlanerani guutinut allanut saatsippaat. – Kng 1. 11:1, 4.

18. Angajoqqaat meeqqatik sumik ilinniar­tissavaat?

¹⁸ Angajoq­qaajuguit Israalimi kunngit pillugit Biibilimi oqaluttuarineqartut atorluarsin­naavatit meeqqavit Jehovamut kiffartorusuler­nissaannut ikiorniar­neranni. Paasitikkit kunngit Jehovap iluarisai tassaasut taassuminnga guutisiortut innuttaasunillu aamma taamaalior­nissaannik kajumis­saarisut. Meeqqatit oqaatsikkut iliuutsikkullu ilinniar­tittariaqarpatit Jehovamut qanimut attaveqalis­sutaasartut – soorlu Biibilimik misissuisarneq, ataatsimiigiartarneq oqaluus­seqataasarnerlu – inuunermi pingaar­nerpaajusut. (Mat 6:33) Taamaaliun­ngikkuit immaqa meeqqatit isumaqassapput namminneq Jehovamut attaveqan­ngikkaluarlutik angajoqqaamik uppernerat pissutigiin­narlugu Nalunaajaasuusin­naallutik. Namminneq Jehovamut attaveqan­ngikkunik immaqa Jehovamik guutisiorneq pingaar­nerpaatis­sanngilaat immaqalu allaat Jehovamut kiffartorun­naarlutik.

19. Jehovamut kiffartorun­naarsimasoq neriuutis­saaruppa? (Aamma ungalusaq “Illit Jehovamut utersin­naavutit!” takuuk).

¹⁹ Jehovamut kiffartorun­naarsimasoq neriuutis­saaruppa? Naamik, peqqisimisin­naavormi Jehovamullu uterluni. Taamaalius­sagunili maniguut­tariaqarpoq utoqqaaner­tanillu ikiorneqarnini akueralugu. (Jaak 5:14) Tamanna ilungersor­narsinnaagaluartoq Jehovamut ikinngutaaleq­qikkuni ilungersornera asuliin­nassanngilaq!

20. Kunngit aalajaatsut ilaarutsigit Jehovap qanoq isigissavaatigut?

²⁰ Allaaserisami matumani sumik ilikkagaqarpugut? Jehova uummaterput tamakkerlugu kiffartorfigigutsigu kunngit aalajaatsut assigisin­naavagut. Kukkussutigut ilinniutigisartigit peqqissimillutalu pisariaqartumik allannguilluta. Guutisior­nermillu ilumoortumik aalajangiusiman­ninnitta pingaaruteqarnera eqqaamajuartigu. Jehovamut ikinngutaanerit pingaar­nerpaatikkukku eqqortumik iliussaatit, Jehovallu illit aalajaatsutut isigissavaatit.