Atuartartut apeqqutaat

Naalakkap unnukkorsior­titsinera Jiisusip pilersimmagu ilinniartitat 70-t siusinnerusukkut oqaluus­siartortitai sumiippat? Qimassimavaat?

Naalakkap unnukkorsior­titsinera Jiisusip pilersimmagu ilinniartitat 70-t najuutin­ngikkaluartut isummis­sanngilagut taakku iluarineqarun­naarlutil­luunniit Jiisusi qimassimagaat. Unnummi tamatumani Jiisusip apustilini ilagerusuppai.

Aqqaneq-marluk aamma oqaluus­siartortitani 70-t tamaasa Jiisusip ilinniar­titarivai. Jiisusip ilinniar­titarpassuami ilaat aqqaneq-marluk toqqarlugit apustilinik taavai. (Luk 6:12-16) ‘Aqqaneq-marluk qaaqqugamigit Guutillu kunngeqarfia pillugu oqaluus­seqqullugit ajorunnaarsitsisaq­qullugillu aallartik­kamigit’ Galiliiamiippoq. (Luk 9:1-6) Kingusin­nerusukkut ‘70-t allat toqqarlugit marlukkuutaar­tillugillu’ aallartik­kamigit Judiiamiippoq. (Luk 9:51; 10:1) Tassa sumiiffinni assigiin­ngitsuni oqaluus­sisartunik ilinniar­titaqarpoq.

Juutit ilinniar­titanngortut ukiut tamaasa ulloq qaangiiffik, ilaquttatik ilagigunarlugit, nalliut­torsiutigisarpaat. (Mos 2. 12:6-11, 17-20) Jiisusi ullualuit qaangiuttut toqusus­saalluni apustilinilu Jerusalem­miliarput. Kisianni ilinniartitani tamaasa – Judiiameersut, Galiliiameersut Peræameersullu – nalliut­torsioqatiginiarlugit qaaqqunngilai. Ersarippoq Jiisusip apustilini najorusukkai. Ima oqarfigai: “Naalliun­nginninni qaangiiffimmi unnukkorsioqatiginissarsi assut qilanaarisimavara.” – Luk 22:15.

Tamatumunnga pissutis­saqarluarpoq. Jiisusi, “Guutip savaaraa inuit ajortiliunerannik peersisussaq”, qanittukkut toqusussaavoq. (Joh 1:29) Tamanna Jerusalemmimi ukiorpassuarni Guutimut pilliif­fiusarsimasumi pisussaavoq. Savaaraq ullormi qaangiiffimmi nerineqartartoq Jehovap Egyptenimit aniguisin­neqarnerminnik Israalikkut eqqaasis­sutigaat. Jiisusilli pilliutaa annertunerungaartumik kinguneqar­tussaavoq, inuimmi ajortimit toqumillu aniguisissavai. (Kor 1. 5:7, 8) Jiisusip pilliutaa pissutigalugu apustilit aqqaneq-marluk ilagiinnut kristumiunut tunngavin­ngorput. (Ef 2:20-22) Soqutiginartumik illoqarfik illernartoq Jerusalemmi “ujaqqanik aqqaneq-marlunnik tunngaveqarpoq, taakkunanilu atit aqqaneq-marluk, Savaaqqap apustiliisa aqqaneq-marluk atii, allassimapput”. (Saqq 21:10-14) Aap, apustilit aalajaatsut Guutip siunertaata naammas­siniarnerani pingaaruteqangaarput. Taamaattumik paasinarpoq Jiisusip naggammik ullormik qaangiiffimmik nalliut­torsior­nermini kinguninngualu Naalakkap unnukkorsior­titsineranik pilersitsinermini apustilit taakku ilagerusummagit.

Jiisusip 70-t ilinniar­titallu allat unnummi tassani ilaginngilai. Taamaak­kaluartoq ilinniartitat aalajaatsut tamarmik Naalakkap unnukkorsior­titsinera iluaqutigissavaat. Piffissap ingerlanerani tanitan­ngortut Kunngeqarfik pillugu isumaqatigiissummut Jiisusip unnummi tamatumani apustilinut eqqaasaanut ilaasus­saapput. – Luk 22:29, 30.