Sorsuttoqaraluartoq qamuuna eqqissineq
Gary, sakkutuujusimasoq, ima oqarpoq: “Biibilimik misissuisalinngikkallarama naluara sooq naakkittaannerit, ajortumik pineqarnerit eqqissiviilliornerillu taama ingasatsiginersut. Maannali qamuuna eqqissisimavunga nalunnginnakku Jehovap Guutip nunarsuaq toqqissisimaffiulersissagaa.”
Aamma allat Garytut misigisaqarsimapput. Taakkua Biibili qanoq iluaqutigisimagaat paasiniaruk.
BIIBILIMI ALLASSIMAVOQ: “Naalagaq, [illit] ajunngitsuuvutit isumakkeerfiginnikkumasarlutillu.” – Tussiaat 86:5.
QANOQ ILUAQUTAASOQ: “Allassimaffimmi paasitinneqarpunga Jehova nallittuisuusoq. Taamaattumik nalunngilara sakkutuujugallarama iliuuserisimasannik isumakkeerfigerusukkaanga.” – Wilmar, Colombia.
BIIBILIMI ALLASSIMAVOQ: “Qilak nutaaq nunalu nutaaq pinngortissavakka; pereersut eqqaamaneerutissapput eqqaaqqinneqarnatillu.” – Esaja 65:17.
QANOQ ILUAQUTAASOQ: “Sakkutuujugallarama misigisimasakka pissutigalugit PTSD-mik isumatsarujussuarnermillu nappaateqarpunga. Allassimaffimmili neriorsorneqarpunga Jehovap ikiuineratigut eqqaamasakka nuanniitsut taakku siunissami puiorluinnassagikka. Eqqaamaneerutissapput. Tunissut tamanna nuanningaarami!” – Zafirah, USA.
BIIBILIMI ALLASSIMAVOQ: “Iluarneq inerilluarumaarpoq, eqqissineqangaarumaarlunilu qaammat peerutserlugu.” – Tussiaat 72:7.
QANOQ ILUAQUTAASOQ: “Oqaatsit taakku eqqarsaatigikulavakka. Qanittukkut sorsunnerit kingunipiluilu peerutissapput. Aamma asasatta ajoquserneqarnissaat isumakuluutigisariaarutissavarput.” – Oleksandra, Ukraine.
BIIBILIMI ALLASSIMAVOQ: “Toqusortatit uummassapput, … issumi sinippaartusi itissaasi qiimmattassallusilu.” – Esaja 26:19.
QANOQ ILUAQUTAASOQ: “Naggueqatigiinnik tutsikkunnik toqoraanermi ilaquttama amerlanersaat toqunneqarput. Allassimaffimmili neriorsorneqarpunga takoqqissagikka. Makititaareerpata nuannaarpaluttut tusaanissaat qilanaareqaara.” – Marie, Rwanda.
BIIBILIMI ALLASSIMAVOQ: “Iluanngitsoq erniinnaq peeruttussaavoq. … Kisianni qanilaartut nuna kingornutissavaat pilluangaarnertillu nuannaarutigissallugu.” – Tussiaat 37:10, 11.
QANOQ ILUAQUTAASOQ: “Maani sorsuttoqarunnaareeraluartoq suli naapertuilluanngitsuliortoqarlunilu inupiloqarpoq. Allassimaffiit taakku iluaqutigingaarpakka. Jehovap paasisarpaanga pissutsillu atukkakka tamaasa takusarlugit. Neriorsuivoq qanittukkut naalliunnerit tamarmik atuukkunnaarlutillu puiorneqassasut.” – Daler, Tadsjikistani.
Allaaserisami matumani inuit issuarneqartut Jehovap Nalunaajaasuisa millionillit Biibili iluaqutigalugu qamuuna eqqissisimalersimasut ilagaat. Paasisimavaat ammip qalipaataa, sumiuuneq, naggueqatigiinnit sorlermeerneq allalluunniit pissutigalugit uumissuinerit qanoq qaangersinnaanerlugit. (Efesossimiut 4:31, 32) Jehovap Nalunaajaasui politikkimut akuliunnaveersaartuupput sorsoqataanerlu ajorlutik. – Johannesi 18:36.
Jehovap Nalunaajaasui aamma nunarsuaq tamakkerlugu uppeqatigiittut tapersersoqatigiittarput. (Johannesi 13:35) Assersuutigalugu Oleksandra, issuariigarput, angajunilu sorsunneq pissutigalugu nunamut allamut qimaasariaqarsimapput. Ima oqarpoq: “Nunap killeqarfia ikaaratsigu ingerlaannaq Nalunaajaasut tikilluaqqusiartortut takuagut. Taakkunannga tapersersorneqaratta nunagilikkatsinni qimaasutut inuunerput sungiutiaarparput.”
Ataatsimiinnitsinni qamuuna qanoq eqqissisimasoqarsinnaasoq siunissamilu nunarsuaq tamakkerlugu eqqissinissamik neriorsuut Biibilimeersoq pillugit ilinniartinneqartarpugut. Taakkununnga tikilluaqqusaangaarputit! Nittartagaq jw.org alakkaruk sumi ataatsimiittoqartarnersoq paasiumallugu. Tassani aamma Jehovap Nalunaajaasuisa ilaat ilagalugu atuagaq Naassaanngitsumik pilluarsinnaavutit! atorlugu Biibilimik pikkorissarneq akeqanngitsoq qinnutigisinnaavat.