Jehovap pinertusaar­nissamut qanoq ikiortaraatigut

1. Sooq pinertusaar­nissarput pisariaqarpa, aamma pinertusaar­nissamut qanoq ikiorneqarpugut? (Petrusimit 1. 5:10)

ULLUNI kingullerni ilungersunartuni makkunani Jehovap innuttai pinertusaar­tariaqarput. Ilaat katsorsar­neqarsin­naanngitsumik nappaateqarput. Allat asasaminnik annaasaqaramik aliasupput. Suli allat ilaquttaminnit oqartus­saasunil­luunniit malersugaapput. (Mat 10:18, 36, 37) Illit qanorluunniit ajornar­torsiuteqaraluaruit Jehovap pinertusaar­nissamut ikiussavaatit. – Petrusimit 1. 5:10 atuaruk.

2. Sooq pinertusaarsin­naavugut?

² Kristumiup pinertusaarnera tassaavoq ajornar­torsiornermi, malersor­neqarnermi misilin­neqarnermilu nuannaarluni aalajaallunilu Jehovamut kiffartor­tuarnera. Kristumiup pinertusaarnera Jehovameersuuvoq. Jehovammi ‘pissaanermik nalingin­naanngitsumik’ tunisarpaatigut. (Kor 2. 4:7) Allaaserisami matumani sammissavarput pinertusaar­nissamut iluaqutigisin­naasagut suut Jehovap tunniukkai. Aamma sammineqassaaq taakku iluaqutigiumallugit susariaqartugut.

QINUNEQ

3. Sooq qinuneq tupinnar­tuliatut taaneqarsinnaava?

³ Jehovap pinertusaar­nissamut iluaqutigisin­naasatsinnik tupinnangaartumik tunisimavaatigut. Ajortiliugaluarluta Jehova qinunikkut saaffigisin­naavarput, tusarnaar­tarpaatigullu. (Hebr 4:16) Uku eqqarsaatigeriakkit: Sunaluunniit pillugu qaquguk­kulluunniit qinusarsin­naavugut. Sumiutul­luunniit oqalukkaluarutta paasisin­naavaatigut. Sumiikkaluar­tugulluunniit – mattussaagaluarutta parnaarus­saaqqagaluarut­taluunniit – tusarsin­naavaatigut. (Jon 2:2, 3; ApS 16:25, 26) Allaat ernumangaaratta qanoq misiginerluta oqaasin­nguinis­satsinnut nalugaluarlutigu Jehovap qanorpiaq misiginersugut paasisinnaavaa. (Rom 8:26, 27) Qinusinnaaneq tupinnar­tuliaavoq asseqan­ngitsoq, ilaa?

4. Qanoq nalunngilarput pinertusaar­nissamut ikioqqunigut Jehovap piumasaanut naapertuuttut?

⁴ Jehovap oqaatsimini neriorsorpaatigut ‘piumasaminut naapertuuttumik qinnuigigutsinni tusassalluta’. (Joh 1. 5:14) Taava Jehova pinertusaar­nissamut ikioqqulluta qinnuigisin­naavarput? Ilaana! Tamannami piumasaanut naapertuuppoq. Qanoq nalunngilarput? Misilin­neqarnerni pinertusaarluta Guutimut aalajaat­tuarutta Jehovap aalajaannerput Saatanimut – ‘mitallersiminut’ – akissutitut atorsinnaavaa. (Uss 27:11) Aamma Biibilimi allassimavoq Jehovap “uummatimikkut iluunngarlutik imminik tunaarinnittut pissaanermigut” ikiorusungaarai. (Nal 2. 16:9) Taamaattumik upperil­luinnarsin­naavarput Jehova pinertusaar­nissamut ikiuinis­saminut pissaaneqarlunilu piumassuseqartoq. – Es 30:18; 41:10; Luk 11:13.

5. Qinuneq qamuuna eqqissinissamut qanoq iluaqutigaarput? (Esaja 26:3)

⁵ Biibili naapertorlugu Jehovamut qamannga pisumik qinugaangatta ‘Guutip eqqissinerata inuit paasisin­naasaannit annerungaartup uummaterput isumarpullu paarisarpai’. (Flp 4:7) Tamanna ilinnut qanoq isumaqartoq eqqarsaatigeriaruk. Inuit Jehovamut kiffartun­ngitsut qamuuna eqqissineq ilungersorlutik anguniar­tarpaat. Assersuutigalugu isumakuluk­kunnaar­niarlutik ‘isumartik imaarniar­tarpaat’. Tamannali anersaakkut navianarsinnaavoq. (Aamma takukkit Matiusi 12:43-45). Eqqissinerli Jehovap tunnius­sinnaasaa inuit namminneq angusin­naasaannit pitsaanerungaarpoq. Jehovamut qinugaangatta ersersit­tarparput tatigil­luinnarlugu, eqqissisit­tuassavaatigullu. (Esaja 26:3 atuaruk). Jehovap qanoq ililluni eqqissinermik tunisin­naavaatigut? Assersuutigalugu allassimaffiit tuppallersaataasut eqqaamanis­saannut ikiortarpaatigut. Allassimaffiit taakku iluaqutigalugit eqqaasin­neqartarpugut Jehovap ikiorusungaaraatigut qanorlu asatigigaatigut. Tamannalu qamuuna eqqissisimalis­sutigisin­naavarput. – Tuss 62:2, 3.

6. Qinusin­naanermik tunissut tamakkiisumik iluaqutigiumallugu susinnaavit? (Aamma asseq takuuk).

⁶ Qanoq iliorsin­naasutit. Misilin­neqarninni ‘nanertuutigisat Jehovamut tunniuguk’ eqqissinermillu tuneqqullutit qinnuigalugu. (Tuss 55:23) Aamma qanoq iliornissannut ilisimas­suseqaq­qullutit qinnuigiuk. (Uss 2:10, 11) Kiisalu Jehovamut qujanissaq puioqinagu. (Flp 4:6) Ullut tamaasa pinertusaar­nissamut qanoq ikiortaraatit maluginiartaruk, ilinnullu ajunngitsuliorneri pillugit qujaffigisaruk. Misilin­neqarninni artornar­torsioraluaruit puiussanngilat Jehovap assigiin­ngitsorpas­suartigut qanoq ikioreersimagaatit. – Tuss 16:5, 6.

GUUTIP OQAASIA

7. Sooq Biibilimik atuaqqis­saarneq pinertusaar­nissamut iluaqutigisin­naavarput?

⁷ Jehovap pinertusaar­nissamut ikiorumalluta Oqaatsiminik tunisimavaatigut. Biibilimi arlaleriarluni erseqqis­sarneqartarpoq Jehovap ikiorusun­ngaaraatigut. Assersuuteqariarta. Matiusi 6:8-mi ima allassimavoq: “Ataatassimi suli qinnuigin­ngikkissinni pisariaqartitasi nalunngereertarpai.” Jiisusi Jehovamik ilisarisiman­nilluinnartoq taama oqarpoq. Taamaattumik artornar­torsior­nitsinni pisariaqar­titatsinnik Jehovap ilisiman­ninnera uagutsinnillu ikiuerusunnera upperil­luinnarsin­naavarput. Aap, pinertusaar­nissamut nakussatsis­sutigisin­naasatsinnik Biibilimi allassimaf­fippassuaqarpoq. – Tuss 94:19.

8. (a) Biibilimi najoqqutassiamik assersuuteqarit. (b) Biibilimi najoqqutassiat eqqaamal­luarumallugit susinnaavugut?

⁸ Biibilimi pinertusaar­nissamut iluaqutigisin­naasatsinnik najoqqutas­siaqarpoq. Taakku maleruarutsigit silatusaartumik aalajangiisin­naavugut. (Uss 2:6, 7) Assersuutigalugu Biibilimi allassimavoq aqagussaq isumakuluutigis­sanngikkipput. Isumakuluuteqarpal­laanngin­nissamut Jehovallu tatiginissaanut kajumis­saarneqarpugut. (Mat 6:34) Ullut tamaasa Biibilimi atuartarutta atuakkagullu eqqarsaatigisarutsigit najoqqutassiat iluaqutigisin­naasagut inuunermi pisariaqar­titsiffitsinni eqqaamal­luarnerulis­savagut.

9. Biibilimi oqaluttuat Jehovap ikiuineranut qanoq uppernikkut nakussatsis­sutigisin­naavagut?

⁹ Jehovamik tatiginnittut inuusimasut uagutsitut ittut qanoq Jehovamit ikiorneqar­tarnerat Biibilimi oqaluttuarineqarpoq. (Hebr 11:32-34; Jaak 5:17) Oqaluttuat taakku eqqarsaatigeq­qissaar­tarutsigit qularun­naarsin­neqarsin­naavugut Jehova tassaasoq “qimarnguffipput nakuussuterpullu, tamatigut ikiuiserput annikil­liornartuni”. (Tuss 46:2) Itsaq Jehovap kiffai annikil­liungaaraluarlutik qanoq aalajaallutik upperluartut maluginiarutsigu taakkua ilaarnis­saannut kajumis­sissutigis­savarput. – Jaak 5:10, 11.

10. Guutip oqaasia tamakkiisumik iluaqutigiumallugu susinnaavit?

¹⁰ Qanoq iliorsin­naasutit. Ullut tamaasa Biibilimik atuartarit allassimaffiillu iluaqutigisin­naasatit allattorlugit. Amerlasuut ullormut allassimaffik ullaakkut atuartarpaat. Taamaaliornikkut ineriar­tornartoq Guutip oqaasianeersoq ulloq naallugu eqqarsaatigisarsin­naavaat. Qatanngut arnaq Mariea qanoq misigisoq maluginiaruk. Angajoqqaavi kræftimik napparsimapput, toqunissaallu tikillugu qaammatialuit isumagisariaqarpai. Pinertusaar­nissamut suna iluaqutigaa? Ima oqarpoq: “Ullaat tamaasa Ullut tamaasa Allakkat misissortakkit atuartarpakka ullormullu allassimaffik eqqarsaatigeq­qissaarlugu. Taamaaliortarama ajornar­torsiutikka pinnagit Jehova taassumalu oqaasiani ilinniar­titsissutigisai nuannersut ullut tamaasa eqqarsaatigisarsin­naavakka.” – Tuss 61:3.

UPPEQATIGUT

11. Sooq uppeqatitta misilin­neqarnermi pinertusaar­nerannik eqqarsaatiginninneq qiimmaal­laatigisarparput?

¹¹ Jehovap pinertusaar­nissamut ikiorumalluta anersaakkut qatanngutigiis­suarnik tunisimavaatigut. ‘Nunani tamalaani qatanngutigut tamarmik uagutsitulli naalliuuteqartartut’ nalunngin­natsigu uagutsinnut tuppallernaqaaq. (Pet 1. 5:9) Tamannami isumaqarpoq qanorluunniit ajornar­torsiuteqaraluarluta uagutsinnut assingusumik atugaqartunik uppeqateqartugut. Taakkulu pinertusaarmata uaguttaaq pinertusaarsin­naavugut! – ApS 14:22.

12. Uppeqatitta qanoq ikiorsin­naavaatigut, uagullu taakku qanoq ikiorsin­naavagut? (Korintimiunut 2. 1:3, 4)

¹² Uppeqatitta oqaatsimikkut iliuutsimikkullu pinertusaar­nissamut qiimmas­sarsinnaavaatigut. Apustilip Paulusip tamanna misigaa. Illuminit aneqqusaan­nginnermini qatanngutinit ikiorneqarpoq, taakkualu atii allakkamini eqqaavai. Taakkua Paulusi tuppallersarpaat qiimmas­sarlugu kiffartuullugulu. (Flp 2:25, 29, 30; Kol 4:10, 11) Uaguttaaq assingusumik misigisaqar­tarpugut. Artornar­torsioraangatta qatanngutitta tuppallersar­tarpaatigut; taakkulu ajornar­torsioraangata uagut tapersersor­tarpagut. – Korintimiunut 2. 1:3, 4 atuakkit.

13. Qatanngutip arnap Majap pinertusaar­nissamut suna iluaqutigaa?

¹³ Ruslandimi qatanngut arnaq Majamik atilik uppeqatiminit qiimmas­sarneqangaarpoq. 2020-mi angerlarsimaffia politiinit misissoq­qissaar­neqarpoq, upperisanilu pillugu allanut ingerlatitseq­qiisimagami kingusin­nerusukkut eqqartuus­sivimmi imminut illersor­tariaqarpoq. Ima oqarpoq: “Tamatuma nalaani misigis­sutsikkut artorsaqaanga. Qatanngutima asanninnertik ersersin­niarlugu sianerfigisarlungalu allaffigisarpaannga. Tamatigut nalunngik­kaluarpara asannittunik qatannguteqarlunga, 2020-miilli tamanna ingammik maluginiar­nikuuara.”

14. Uppeqatigut pinertusaar­nissatsinnut iluaqutigiumallugit sussaagut? (Aamma asseq takuuk).

¹⁴ Qanoq iliorsin­naasutit. Misilin­neqarninni uppeqativit ilagisar­nissaat pingaaruteqarpoq. Utoqqaanertat saaffiginis­saannut tunuarsimaaqinak. Taakkuami “assigissavaat anorersuarmut oqquiffik sialussuarmullu oqqiffik”. (Es 32:2) Eqqaamajuk uppeqatitit aamma annikil­liortarmata. Taakku ajunngitsuliorfigisarukkit nammineq pinertusaarninnut iluaqutigissavat pilluar­nerulis­sutigis­sallugulu. – ApS 20:35.

NERIUUTERPUT

15. Jiisusip neriuutini qanoq iluaqutigaa, uagullu neriuuterput qanoq iluaqutigaarput? (Hebræerit 12:2)

¹⁵ Jehovap pinertusaar­nissamut ikiorumalluta tutsuigisin­naasatsinnik upperil­luinnarsin­naasatsinnillu neriuuteqar­tippaatigut. (Rom 15:13) Eqqaamajuk Jiisusip siunissamut neriuutini ullormi naalliuuteqar­nerpaaf­figisamini pinertusaar­nissamut iluaqutigisimagaa. (Hebræerit 12:2 atuaruk). Jiisusip nalunngilaa aalajaat­tuaruni Jehovap aqqa illernarsisis­sinnaallugu. Aamma qilaliaruni Ataatami najornissaa kunngin­ngorunilu qatanngutimi tanitat naalakkersueqatiginissaat qilanaaraa. Tamatumunnga assingusumik paratiisimi naassaan­ngitsumik inuunissamik neriuuterput iluaqutigalugu Saatanip silarsuaani qanorluunniit ajornar­torsioraluarluta pinertusaarsin­naavugut.

16. Qatanngutip arnap neriuutini pinertusaar­nissamut qanoq iluaqutigaa, aamma illit qanoq ilinniarfigaajuk?

¹⁶ Maluginiaruk Ruslandimi qatanngutip arnap Annamik atillip paratiisimi inuunissamik neriuutini qanoq iluaqutigigaa. Uia politiinit tigusarineqarmat Anna ima oqarpoq: “Jehovap neriorsuutaa pillugu qinukulasarama siunissarlu eqqarsaatigisarakku nikallungaval­laanngilanga. Nalunngilara ajornar­torsiutigut aaqqinneqarumaartut. Naggataatigut Jehova ajugaajumaarpoq aniguisik­kumaarlutalu.”

17. Jehovap uagutsinnik neriuuteqalersitsineranut qujamasunnerput qanoq ersersis­sinnaavarput? (Aamma asseq takuuk).

¹⁷ Qanoq iliorsin­naasutit. Jehovap siunissamut neriorsuutigisai nuannersut eqqarsaatigisakkit. Takorlooruk paratiisimi inuullutit qanorlu ikkumaarnersoq. Siunissami naassaan­ngitsumik inuunissamut sanilliullugu maanna misilin­neqarnerput ‘sivikillunilu annikippoq’. (Kor 2. 4:17) Aamma neriuuterput pillugu allanut oqaluus­sisarit. Inuit Jehovamut kiffaan­ngitsut inuunerminni qanoq ajornar­torsior­tiginersut eqqarsaatigeriaruk. Ajornar­torsiuterpas­suaqarput, Jehovalli neriorsuutai assissaqan­ngitsut ilisiman­ngilaat. Immaqa illit taakkununnga oqaaseqalaarnikkut Guutip kunngeqarfianik soqutigin­nilersitsisin­naavutit.

18. Sooq Jehovap neriorsuutai upperil­luinnarsin­naavagut?

¹⁸ Juubi misilin­neqangaar­nermini pinertusaarami Jehovamut ima oqarpoq: “Paasivara tamanik sapigaqan­ngitsutit, iliuuseriumasannik tamanik ilinnut ajornar­toqanngitsoq.” (Job 42:2) Juubip paasivaa Jehovap siunertaminik naammas­sinninnissaa akornuser­neqarsin­naanngitsoq. Ilumoortoq tamanna eqqaamajuarutsigu pinertusaar­nissamut iluaqutigis­savarput. Arnaq napparsimasoq assersuutigeriartigu. Nakorsarpas­suarnit katsorsar­neqarsin­naannginnami nikallorsimavoq. Kisianni suna nappaatigigaa nakorsap misilit­tagaqarluartup tatigisaasup paasivaa oqarfigalugulu katsorsar­niarlugu. Tamanna paasigamiuk arnaq tuallaqaaq, naak sivisuumik katsorsar­neqartus­saagaluarluni. Pinertusaarsin­naangorpoq pitsannguuminis­saminut neriuutis­saqalerami. Taamatuttaaq paratiisip pilersin­neqarnissaanik neriuuterput qularin­ngikkutsigu pinertusaar­nissamut iluaqutigisin­naavarput.

19. Pinertusaar­tuarumalluta susariaqarpugut?

¹⁹ Sammeriik­katsitut qinuneq, Biibili, uppeqatigut neriuuterpullu iluaqutigalugit Jehovap pinertusaar­nissamut ikiortarpaatigut. Tunniussai taakku tamakkiisumik iluaqutigigutsigit Jehovap ikiussavaatigut. Taava Saatanip silarsuaata suujunnaar­nissaanut annikil­liuutillu tamarmik peerneqar­nissaata tungaanut pinertusaarsin­naavugut. – Flp 4:13.