“Utoqqaanertanik aggeqqusili”

1. Qanoq erserpa Jehovap ‘savaatini’ pingaar­tingaarai?

JEHOVAP ilagiinni ‘savaatini’ pingaar­tingaarpai. Jiisusip aavanik pisiarisimavai utoqqaanertallu taakkuninnga paarsisussatut akisussaaf­filerlugit. (ApS 20:28) Guutip kissaatigaa ilagiit asannittumik pineqassasut. Jehovamut aalajaat­tuarnias­sammata utoqqaanertat Kristusimit siulersor­neqarlutik ilagiit illersorlugillu qiimmas­sartarpaat. – Es 32:1, 2.

2. Kikkut Jehovap ingammik soqutigai? (Ezekieli 34:15, 16)

² Jehovap kiffani tamaasa, ingammillu naalliuutillit, soqutigingaarpai. Jehovallu utoqqaanertat atorlugit anersaakkut naalliuttut ikiortarpai. (Ezekieli 34:15, 16 atuakkit). Pisariaqarpalli nammineq ikioqqunissarput Jehovap kissaatigaa. Guutimut qamannga pisumik ikioqqunitta saniatigut aamma ilagiinni ‘savanik paarsisunut ilinniar­titsisunullu’ ikioqqusin­naavugut. – Ef 4:11, 12.

3. Sooq utoqqaanertat ikiuisar­nerannik maanna eqqartuissaagut?

³ Allaaserisami matumani Jehovap utoqqaanertat aqqutigalugit anersaakkut ikiuisarnera sammissavarput. Apeqqutit uku akissutis­sarsissavagut: Qaqugukkut utoqqaanertanut ikioqqusassaagut? Sooq taamaaliussaagut? Qanorlu ikiorsin­naavaatigut? Utoqqaanertat ikiuinerat maannak­korpiaq pisariaqar­tinngik­kaluarlugu apeqqutit taakkua akissutaat iluaqutigalugit Jehovap aaqqissuussaa qujamasuutiginerulis­savarput, aamma siunissami ikiorneqar­tariaqarutta qanoq iliussanerluta ilisimalis­savarput.

QAQUGUKKUT UTOQQAANERTANUT IKIOQQUSASSAAGUT?

4. Qanoq nalunngilarput Jaakup allakkamini anersaakkut napparsimaneq pigaa? (Jaaku 5:14-16, 19, 20) (Aamma assit takukkit).

⁴ Guutip ilagiinni anersaakkut ikiueriaasia ilinniartitap Jaakup allaatigaa. Ima allappoq: “Arlarsi napparsimava? Ilagiinni utoqqaanertanik aggeqqusili.” (Jaaku 5:14-16, 19, 20 atuakkit). Versit ataqatigiin­neranni erserpoq anersaakkut napparsimaneq pigaa. Assersuutigalugu ‘napparsimasup’ utoqqaanertat aggeqqussavai, nakorsaq pinnagu. Aamma isumakkeerfigineqar­nermigut peqqissisin­neqarnissaanit erserpoq anersaakkut napparsimaneq pineqartoq. Timikkulli napparsimaneq anersaakkullu napparsimaneq ilaatigut assigiis­suteqarput. Nakorsar­tikkaangatta nappaatitta ersiutai nassuiar­tarpagut nakorsallu ilitsersuutai maleruar­tarlugit. Tamatumunnga assingusumik anersaakkut sanngiil­ligaangatta qanoq innerput utoqqaanertamut nassuiar­tariaqarparput siunnersuutaalu Biibilimeersoq maleruar­tarlugu.

5. Anersaakkut napparsimanerluta qanoq paasisin­naavarput?

⁵ Jehovamut qanimut ikinnguteqarnerput annaajar­torlugu misigigutta utoqqaanertanik oqaloqateqar­nissamut Jaaku kapitali 5-imi kajumis­saarneqarpugut. Jehovamik ikinnguteqarnitta innarlin­nginnerani ikiorneqar­nissarput pingaaruteqarpoq! Imminut unneqqarif­figisariaqarpugut. Anersaakkut peqqissuserput pillugu imminut salloqit­tariataar­nissamut tunngatillugu Biibilimi mianersoq­quneqarpugut. (Jaak 1:22) Sardessimi kristumiut tamanna kukkussutigisimavaat. Jiisusillu oqarfigai Jehovamit iluarineqan­ngitsut. (Saqq 3:1, 2) Anersaakkut peqqissuserput qanoq misissorsin­naavarput? Ilaatigut taamaaliorsin­naavugut morsutsin­neqarlaajulluta Jehovamut qanoq misigisimanerput maannamut naleqqiuk­kutsigu. (Saqq 2:4, 5) Apeqqutit uku eqqarsaatigisin­naavagut: ‘Biibilimik atuartarneq atuakkannillu eqqarsaatigin­neqqissaartarneq suli nuannaarutigaakka? Ilagiit ataatsimiin­nerinut taamaallaat ilaannakuusumik piareersar­tarpunga? Oqaluus­sisarnera nuannarerpiarun­naarsimavara? Piffissara nuannaar­niutinut pigisanullu atorneruara?’ Apeqqutit taakku ilaat angerukkit imaassinnaavoq Jehovamut ikinngutaanerit sakkukil­lisimasoq, iliuuseqan­ngikkuillu ajorsigalut­tuinnassaaq. Nammineerluta Jehovamut qanimut ikinnguteqarnerput sakkortusisin­naanngik­kutsigu imaluunniit ilisimagutsigu Jehovap iluarin­ngisaanik iliuuseqarsimalluta utoqqaanertanut ikiortis­sarsior­tariaqarpugut.

6. Ingasattumik ajortuliorsimasut qanoq iliortariaqarpat?

⁶ Soorunami kristumiu ilagiinnit peerneqar­nissaminik kinguneqar­titsisin­naasumik ajortuliorsimasoq utoqqaanertamut saaffigin­nittariaqarpoq. (Kor 1. 5:11-13) Ingasattumik ajortuliortup nammineerluni Jehovamut ikinngutaanini aaqqissin­naanngilaa. Utertitsissut aqqutigalugu Jehovamit isumakkeerfigineqar­niaraanni ‘peqqissiminermut naapertuuttumik iliuuseqar­toqartariaqarpoq’. (ApS 26:20) Ingasattumik ajortuliorsimagutta iliuuserisassatta ilagaat utoqqaanertanut saaffiginninneq.

7. Kikkut aamma utoqqaanertanit ikiorneqar­tariaqarpat?

⁷ Utoqqaanertat ingasattumik ajortuliorsimasunik ikiuiin­naratik aammali anersaakkut sanngiitsut ikiortarpaat. (ApS 20:35) Assersuutigalugu imaassinnaavoq pileris­susipilunnut nakkaan­narnissat ernumas­sutigigit. Jehovamut kiffanngun­nginninni immaqa aanngaajaaniutinik pornografiimil­luunniit pinngitsuuisin­naajunnaarnermik akiugaqarsimavutit, imaluunniit kinguaas­siuutitigut inuunerlut­tuusimavutit. Kisimiillutit akiuisutut misigisariaqan­ngilatit. Utoqqaanertaq tatigisat oqaloqatigisinnaavat. Taanna isumakuluutinnut tusarnaaq­qissaarsinnaavoq, aamma pileris­susipilunnik akiuiniarninni qanoq iliorsin­naasutit siunnersorsin­naavaatit, kiisalu eqqaasis­sinnaavaatit kissaatipalaat akiorukkit Jehova qanoq nuannaar­tigissanersoq. (Oqal 4:12) Akiuunninni nikallorsimaguit utoqqaanertat eqqaasis­sinnaavaatsit ikiortis­sarsiornerit Jehovap iluarigaa. Taamaaliornerpit ersersippaa maniguut­tuusutit Jehovallu qanoq isumaqarnera pingaartikkit nuannaar­tikkusukkillu. – Kor 1. 10:12.

8. Kukkussutigut tamaasa pillugit utoqqaanertanik oqaloqateqar­tassaagut?

⁸ Kukkussuteeqqagut tamaasa utoqqaanertanut eqqaasariaqan­ngilagut. Assersuutigalugu, qatanngummut ajuallan­nartumik oqarputit, imaluunniit allaat kamapputit. Utoqqaanertamut saaffiginninnak Jiisusip qatanngutinik eqqisseqateqar­nissamut siunnersuutaa maleruarsinnaavat. (Mat 5:23, 24) Atuagas­siaatitsinni saamaneq naammagit­tartuuneq imminullu aqussinnaaneq pillugit misissuisin­naavutit. Soorunami illit nammineq ajornar­torsiutit aaqqissin­naanngikkukku utoqqaanertanut ikioqqusin­naavutit. Apustili Paulusi Filippimiunut allakkamini qatanngut angut atiisigut taaneqan­ngitsoq siunnersorpaa Euudia Syntykilu ajornar­torsiutiminnik namminneq aaqqiisin­naanngitsut ikiussagai. Aamma illit ilagiinni ilaaffigisanni assingusumik utoqqaanertamit ikiorneqarsin­naavutit. – Flp 4:2, 3.

SOOQ UTOQQAANERTANUT IKIOQQUSSAAGUT?

9. Sooq utoqqaanertanut ikioqqunissamut kanngusunneq aporfiutis­sanngilarput? (Ussatit 28:13)

⁹ Ingasattumik ajortuliorutta sanngiis­sutinil­luunniit akiuinitsinni sapersutut misigigutta ikioqqunissamut upperneq sapiissuserlu pisariaqar­tissavagut. Kanngusuk­kaluarut­taluunniit utoqqaanertanut ikioqqussaagut. Sooq? Jehovap utoqqaanertat aqqutigalugit anersaakkut ikiuinissamik aaqqissuus­saaneranik ataqqin­ninnitsigut ersersit­tarparput Jehova tatigalugulu naalakkipput. Aamma ersersit­tarparput eqqortuliorusulluta Jehovamit ikiorneqar­tariaqarluta. (Tuss 94:18) Aamma ajortuliorsimagutta ajortuliatta nassuerutiginerisigut soraarun­nerisigullu Guutimit nallittor­neqarsin­naavugut. – Ussatit 28:13 atuaruk.

10. Ajortulianik isertuiniarsarigutta qanoq kinguneqarsinnaava?

¹⁰ Utoqqaanertanik ikiortis­sarsioraangatta Jehovamit pilluaq­quneqar­tarpugut. Ajortulianilli isertuiniarsarigutta kingunipiloqarsinnaavoq. Kunngi Daavi ajortulianik isertuiniarsarigami anersaakkut, misigis­sutsikkut allaallu timikkut naalliuppoq. (Tuss 32:3-5) Timikkut nappaateqarneq assigalugu anersaakkut nappaateqarneq iliuuseqarfigineqan­ngikkuni ajornerulersinnaavoq. Jehovap tamanna nalunnginnamiuk kajumis­saarpaatigut utoqqaanertat oqaloqatiginerisigut anersaakkut aaqqitassat aaqqeqqullugit. – Es 1:5, 6, 18.

11. Ingasattumik ajortuliorsimanerput isertuuk­kutsigu allanut qanoq sunniuteqassava?

¹¹ Ingasattumik ajortuliorutta tamannalu isertuuk­kutsigu aamma allanut sunniuteqassaaq. Guutip anersaavanik ilagiinnut tunniussaanik akornusiisin­naavugut ilagiinnilu eqqissinermik navianar­torsior­titsilluta. (Ef 4:30) Aamma ilagiinnittoq ingasattumik ajortuliorsimasoq paasigutsigu tamanna pillugu utoqqaanertanik oqaloqateqar­nissaanut kajumis­saassavarput.a Allap ajortuliaa isertuuk­kutsigu uaguttaaq ajortuliussaagut. (Mos 3. 5:1) Jehova asagatsigu sapiilluta ilumoortumik oqaluttassaagut. Taamaalioraangatta ilagiinni qatanngutigut illersor­tarpagut ajortuliortorlu Jehovamut attaveqarluaq­qilernissaanut ikiortarlutigu.

UTOQQAANERTAT QANOQ IKIORSIN­NAAVAATIGUT?

12. Utoqqaanertat anersaakkut sanngiitsunik qanoq ikiuisarpat?

¹² Utoqqaanertat anersaakkut sanngiitsunik isumagin­ninnissamut Biibilimi kajumis­saarneqarput. (Tes 1. 5:14) Ajortulioruit imaassinnaavoq utoqqaanertat eqqarsaatitit misigis­sutsitillu paasiniarlugit apeqquteqarfigis­sagaatsit. (Uss 20:5) Kanngusuusaaruit imaluunniit pisimasoq kanngusuutigigukku taakkununnga ammasumik oqalunnissat ajornakusoor­tissinnaavat. Kisianni sunik ajornar­torsiuteqar­nerlutit oqaluttuaruit utoqqaanertat paasinnin­nissaminnut iluaqutigissavaat. “Isumaatsutut” oqaaseqaraluaruit ernumas­sanngilatit. (Job 6:3) Utoqqaanertat inerniliipal­lassanngillat, kisianni tamatumunnga tunngas­suteqartut tamaasa paasiumallugit siunnersuin­nginnerminni tusarnaaq­qissaas­savaatsit. (Uss 18:13) Nalunngin­namikku naammattumik ikiuinissamut piffissaqar­tariaqassasoq ilimagin­ngilaat ataasiaan­narluni oqaloqatigiinnermi suut tamarmik aaqqinneqassasut.

13. Utoqqaanertat qinnutaat Biibililu tunngavigalugu siunnersuutaat qanoq iluaqutigaagut? (Aamma assit takukkit).

¹³ Utoqqaanertat pisuusutut misiginerit ajornerulersik­kusunnagu qinnukkusup­paatsit. Qinnussinerup ‘sunniuteqangaarnera’ immaqa ilimagin­ngikkaluarlugu tuppallersaatigissavat. Aamma ‘Jehovap aqqani uuliamik tanissin­naavaatsit’. (Jaak 5:14-16) ‘Uulia’ tamanna Guutip oqaasianut innersuus­sutaavoq. Taamaattumik Biibilimi allassimaffiit eqqartor­nerisigut utoqqaanertat tuppallersarlutillu Guutimut attaveqarlualer­nissannut ikiorsin­naavaatsit. (Es 57:18) Aamma siunnersuutaat Biibilimeersut eqqortulior­tuarnissannut nakussatsis­sutigis­savatit. Taakku aqqutigalugit Jehovap ima oqarfigis­savaatillusooq: ‘Aajuna aqqusineq, taanna ingerlavigissavat.’ – Es 30:21.

14. Galaatiamiut 6:1 naapertorlugu utoqqaanertat ‘kukkusumik toraagaqalersoq’ qanoq ikiorsin­naavaat? (Aamma assit takukkit).

¹⁴ Galaatiamiut 6:1 atuaruk. Kristumiup ‘kukkusumik toraagaqalersup’ Jehovap najoqqutassiai naapertuil­luartut maleruanngilai. Kukkussut tamanna tassaasinnaavoq naliliinerlunneq imaluunniit Guutip inatsisaanik unioqqutitsineq ingasattoq. Utoqqaanertat asanninneq kajumis­sissutigalugu uppeqatertik ‘eqqortumik toraagaqaleq­qullugu saamasumik ikiorniassavaat’. Grækerisut oqaatsimi uani atorneqartumi aamma pineqarsinnaavoq nakorsap saaneq naffakoq inuup napisimasup ataavartumik ajoqutigilis­sanngisaanik qanoq inissit­tarneraa. Soorlu nakorsap pikkorissup napineq mianersorluni aaqqittaraa taamattuttaaq utoqqaanertat ajortuliortoq asannillutik ikiorniar­tarpaat. Utoqqaanertat aamma peqquneqarput ‘namminneq usserneqaq­qunatik mianersussasut’. Allat silatusaartumik aalajangiinis­saannut ikioraangamikkit eqqarsaatigisarpaat namminneq kukkusarlutik. Taamaattumik allanit pitsaanerusorin­nginnamik sakkortuumik isornar­torsiuineq ajorput, maniguul­lutilli misigin­neqataasarput. – Pet 1. 3:8.

15. Ajornar­torsiuteqarutta susinnaavugut?

¹⁵ Ilagiinni utoqqaanertat tatigisin­naavagut. Uagut pilluta allat susassarin­ngisaannik allanut oqaluttuan­nginnissamik Jehovamit ilinniar­tinneqarput. Aamma namminneq isumartik tunngaviginagu Biibilili tunngavigalugu siunnersuinissamik ikiuiuar­nissamillu ilinniar­tinneqarput. (Uss 11:13; Gal 6:2) Utoqqaanertat assigiin­ngitsunik inuttut piginnaaneqaraluartut ilaallu allanit misilit­tagaqar­nerugaluartut utoqqaanertaq kinaluunniit ajornar­torsiutigut pillugit saaffigisin­naavarput. Imaanngilarli nammineq tusarusutagut kisiisa tusarumallugit utoqqaanertanut assigiin­ngitsunut siunnersor­tissarsius­sasugut. Taamatut ‘tusarusutatsinnik ilinniar­titsisartunik ujartuisarutta’ ‘ilinniar­titsisummik ineriar­tornartumik tusaruman­ngitsutut’ ilissaagut. (Tim 2. 4:3) Ajornar­torsiuterput pillugu utoqqaanertaq saaffigigutsigu immaqa aperissavaatigut utoqqaanertaq alla oqaloqatigisimaneripput taassumalu qanoq siunnersorsimaneraatigut. Aamma anneruniajuitsuugami siunnersuin­nginnermini utoqqaanertamut allamut siunnersor­tissarsiorsinnaavoq. – Uss 13:10.

IMMIKKUT TAMATTA AKISUSSAAFFIPPUT

16. Immikkut tamatta suna akisussaaf­figaarput?

¹⁶ Utoqqaanertat Guutip savaataanik nakkutil­liisuugaluarlutik qanoq iliornis­satsinnik peqquneq ajorpaatigut. Immikkut tamatta Guutimut tunniusimalluta inooriaaserput nammineq akisussaaf­figaarput. Oqaatsigut iliuutsigullu Guutimut akisussaaf­figaagut. (Rom 14:12) Taassuma ikiuineratigut aalajaat­tuarsin­naavugut. Utoqqaanertalli qanoq iliussanersugut oqarfigiin­narnavian­ngilaatigut. Nammineq aalajangersin­naanias­sagatta Jehovap isiginnit­taasianik paasinneq­qulluta ikiussavaatigut. Biibili tunngavigalugu siunnersuutaat maleruarutsigit ‘naliliisin­naassuserput’ sungiusarsin­naavarput namminerlu silatusaartumik aalajangiisin­naalluta. – Hebr 5:14.

17. Suna aalajangiusimasariaqarparput?

¹⁷ Jehovap savaataanut ilaanerput nuannaarutigeqaarput! Jehovap “savanik paarsisuul­luartoq”, Jiisusi, utertitsis­sutitut pilliutissatut aallartippaa naassaan­ngitsumik inuunissamik periarfis­saqarsin­naaqqulluta. (Joh 10:11) Aamma utoqqaanertat ilagiinnut tunniuppai ima neriorsuinermisut: “Paarsisoqar­tikkumaarpassi uummamma iluarisaanik, taakkualu paarissavaasi ilisiman­nillutik paasisiman­nillutillu.” (Jer 3:15) Anersaakkut sanngiil­ligaangatta napparsimagaangat­taluunniit nangaanata utoqqaanertanut ikioqqusariaqarpugut. Taava Jehovap taakku aqqutigalugit ikiuinera misigiumaarparput.