Naapertuil­luanngitsuliornerit qanoq qisuariarfigis­savagut?

1-2. Naapertuil­luanngitsulior­toqaraangat inuppassuit qanoq qisuariartarpat, sunalu sammissavarput?

NUNARSUARMI naapertuil­luanngitsuliorfiusumi inuuvugut. Inuit assigiin­ngitsunik pissuteqarlutik – soorlu piitsuunertik, suiaassusertik, sumiuunertik imaluunniit ammip qalipaataa pissutigalugit – ajortumik pineqartarput. Niuernikkut pisortat pisuut naalakkersuisullu peqquserluttut aningaasatigut iluanaar­nissartik pingaar­nerpaatimmassuk inuppassuit naalliuttarput. Tamanna tamatsinnut sunniuteqartarpoq, toqqaan­nartumik toqqaan­nanngitsumil­luunniit.

² Tamatta ajunngitsumik pineqarusut­tarpugut toqqissisimallutalu inoorusulluta. Taamaattumik tupinnanngilaq inuppassuit naapertuil­luanngitsuliornerit kamaatigisarmatigit. Inuit ilaasa nunarsuarmi nunamin­niluunniit ajornar­torsiutit aaqqinniar­tarpaat. Naalakkersuisunut akerlius­sutsimik takutitsisarput, atsiortuisitsisarput politik­kikkullu siuttut partiil­luunniit ajornar­torsiutinik aaqqiiniarlutik neriorsuisut tapersersor­tarlugit. Uagulli kristumiuugatta ‘inunnit allanit allaaneruvugut’, aamma Guutip kunngeqarfiata naapertuil­luanngitsuliornernik atuukkun­naarsitsinissaa utaqqivarput. (Joh 17:16) Kisianni inuit ajortumik pineqartut takugaangatsigu soorunami aliasuutigisin­naavarput allaallu kamaatigisin­naallugu. Immaqa ima eqqarsarpugut: ‘Ajortumik pinnittoqaraangat qanoq qisuariar­tassaanga? Arlaatigut maannakkut ikiuisin­naavunga?’ Apeqqutit taakku akissutis­sarsissavagut, paaseqqaariartiguli Jehovap Jiisusillu naapertuil­luanngitsuliornerit qanoq isumaqarfigineraat.

JEHOVAP JIISUSILLU NAAPERTUIL­LUANNGITSULIORNEQ UUMIGAAT

3. Naapertuil­luanngitsuliornerit kamaatigigutsigit sooq tupinnanngila? (Esaja 5:7)

³ Biibilimi nassuiar­neqarpoq sooq naapertuil­luanngitsuliornerit nuannarin­ngikkigut. Allassimavoq Jehovap ‘naapertuil­luarneq nuannarigaa’ taannalu assilillugu pinngor­titaasugut. (Tuss 33:5; Mos 1. 1:26) Eqqunngitsumik iliunngisaannarpoq, kissaatigin­ngilaalu inuit allanik ajortumik pinnittassasut. (Mos 5. 32:3, 4; Mika 6:8; Zak 7:9) Assersuutigalugu pruffiitip Iisaajap nalaani Israalikkut nunaqqatiminnit eqqunngitsumik pineqaramik ‘naalliullutik nillianerat’ Jehovap tusaavaa. (Esaja 5:7, New World Translation atuaruk).a Jehovap inatsisiminik maleruaajuman­ngittuartut allanillu eqqunngitsumik pinnittuartut pillarpai. – Es 5:5, 13.

4. Inuit ajortumik pineqaraangata Jiisusi qanoq misigisarpa? (Aamma asseq takuuk).

⁴ Jiisusip naapertuil­luarneq Jehovatulli nuannaraa naapertuil­luanngitsuliornerlu uumigalugu. Nunarsuarmiitilluni angut nukillaarsimasumik assalik takuaa. Jiisusip angut nalligalugu ajorunnaarsippaa, upperisarsior­nikkulli siuttut tamanna takugamikku kamalerput. Angutip innarluutaarunnera soqutiginagu oqarput Jiisusip ulloq qasuersaarfik pillugu inatsit unioqqutikkaa. Taama qisuariarmata Jiisusi qanoq misigiva? ‘Uummatimikkut misigit­taatsuunerat aliasuutigingaarpaa’. – Mak 3:1-6.

5. Naapertuil­luanngitsuliornerit kamaatigilerutsigit suna eqqaamas­savarput?

⁵ Jehovap Jiisusillu naapertuil­luanngitsuliornerit kamaatigisarpaat, aamma uagut taamatut misigisarnerput ajortulior­nerunngilaq. (Ef 4:26; aamma studienote “bliver vrede” qallunaatuuaniittoq takuuk). Taamaattorli puiussan­ngilarput pissutis­saqaraluarluta kamakkutta kamanneq naapertuil­luanngitsuliornernik aaqqiisin­naanngitsoq. Aamma sivisuumik kamassimajuarutta napparsimalis­sutigisin­naavarput isumatsarujus­sualerlutaluunniit. (Tuss 37:1, 8; Jaak 1:20) Naapertuil­luanngitsuliornerit qanoq qisuariarfigis­savagut? Jiisusi ilinniarfigisin­naavarput.

JIISUSIP NAAPERTUIL­LUANNGITSULIORNERIT QANOQ QISUARIARFIGISARAI

6. Jiisusi nunarsuarmiimmat naapertuil­luanngitsuliornerit suut nalingin­naappat? (Aamma asseq takuuk).

⁶ Jiisusi nunarsuarmiitilluni inuit ajortumik pineqartut takusarpai. Inuit upperisarsiornikkut siuttunit naqisimaneqar­tarnerat takusarpaa. (Mat 23:2-4) Aamma inuit oqartus­saasunit Romamiuusunit peqqarniitsumik pineqar­tarnerat takusarpaa. Juuterpassuit Romamiunit naalakkersor­neqarun­naarusupput. Tamanna angujumallugu allaat sorsuttoqarumavoq. Jiisusili taamatut anguniagalinnut ilaanngilaq. Ilaanni paasigamiuk inunnit kunngin­ngortin­niarneqarluni taakkunannga qimaguppoq. – Joh 6:15.

7-8. Jiisusi nunarsuarmiitilluni sooq naapertuil­luanngitsuliornernik atuukkun­naarsitsiniarsarinngila? (Johannesi 18:36)

⁷ Jiisusi nunarsuarmiitilluni ajornar­torsiutit aaqqinniarlugit politikkimut akuliutinngilaq. Sooq? Nalunnginnamiuk inuit inoqatiminnut naalakkersuinissamut piginnaasaqar­natillu pisinnaatitaan­ngitsut. (Tuss 146:3; Jer 10:23) Aamma naapertuil­luanngitsuliornernut pissutaanerpaaq peersin­naanngilaat. Tassami nunarsuaq Saatanimit Diaavulumit aqunneqarpoq. Taanna naakkit­taatsuuvoq, inuillu aamma taamaat­tuunissaannut sunnertarpai. (Joh 8:44; Ef 2:2) Inuillu ajunngitsumik siunertaqaraluartut naammal­luinnan­ngitsuugamik naapertuil­luanngitsulior­toortarput. – Oqal 7:20.

⁸ Jiisusip nalunngilaa taamaallaat Guutip kunngeqarfiata naapertuil­luanngitsuliornermut pissutaasut tamaasa atorunnaarsis­sinnaagai. Taamaattumik aallussil­luarluni “Guutip kunngeqarfianik nutaarsiassat nuannersut pillugit [oqaluus­sisarpoq].” (Luk 8:1) Aamma “eqqortulior­nissamik qamannga pisumik kissaateqartut” neriorsorpai nunarsuarmi eqqunngitsuliornerit naalliuutillu atorunnaassasut. (Mat 5:6; aamma studienote qallunaatuuaniittoq takuuk; Luk 18:7, 8) Nunarsuarmi naalakkersuisut kikkulluunniit taamatut allannguisitsisin­naanngillat. Taamaallaat Guutip kunngeqarfia taamaaliorsinnaavoq, taannalu “nunarsuarmeersuunngilaq”. – Johannesi 18:36 atuaruk.

AJORTUMIK PINNITTOQARAANGAT JIISUSI ILAARTARUK

9. Sooq qularin­ngiliuk Guutip kunngeqarfia kisimi naapertuil­luanngitsuliornernik atorunnaarsitsisinnaasoq?

⁹ “Ulluni kingullerni” inuuvugut, taamaattumik Jiisusip nunarsuarmiin­neraniit nalitsinni naalliut­toqarneruvoq. Sulilu naalliunnernut pissutaasut tassaapput Saatani aamma inuit naammal­luinnan­ngitsut taassumannga sunnerneqartut. (Tim 2. 3:1-5, 13; Saqq 12:12) Jiisusitulli nalunngilarput taamaallaat Guutip kunngeqarfiata naapertuil­luanngitsuliornernut pissutaasut peersinnaagai. Kunngeqarfik tapersersoratsigu naapertuil­luanngitsuliornernik unitsitsiniaallutik iliuuseqartunut, soorlu akerlius­sutsimik takutitsisunut, ilaaneq ajorpugut. Qatanngut arnaq Stacymik atilikb Nalunaajaasun­ngunngik­kallarami akerlius­sutsimik takutitsisartunut ilaasarsimavoq. Qularilerpaali iliuuserisar­takkani ilumut iluaqutaanersut. Ima oqarpoq: “Akerlius­sutsimik takutitseqataagaangama aaqqiis­sutissaq eqqortoq tapersersor­nerlugu qularisalerpara. Maannali nalunnginnakku Guutip kunngeqarfia ajornar­torsiutinik tamanik aaqqiiumaartoq taanna tapersersorpara. Nalunngilara Jehovap naqisimaneqartut ikiorluar­nerpaasinnaagai.” – Tuss 72:1, 4.

10. Akerlius­sutsimik takutitsinerit sooq Jiisusip ilinniar­titsissutigisaanut naapertuutin­ngillat? (Matiusi 5:43-48) (Aamma asseq takuuk).

¹⁰ Allanik naalakkersuisoqarusullutik allannguisitsiniartut amerlaqaat. Taakkua ilarpassui ima kamatsigiler­taramik inatsisinik unioqqutitsil­lutillu inoqatiminnik ajoqusiisarput. Taamaaliorneq Jiisusip ilinniar­titsissutigisaanut naapertuutin­ngilluinnarpoq. (Ef 4:31) Qatanngut angut Jeffreymik atilik ima oqarpoq: “Nalunngilara akerlius­sutsimik takutitsiniartut eqqissisimaniaraluar­tulluunniit tassanngaannaq nakuuser­talersinnaasut pigisanillu ajoqusiisin­naallutillu tillittalersinnaasut.” Jiisusilli ilinniar­tippaatigut inuit tamaasa, allaat isumaqatigin­ngisagut uagutsinnillu malersuisartut, inussiar­nersumik pisassagigut. (Matiusi 5:43-48 atuakkit). Kristumiuugatta Jiisusip ilinniar­titsissutigisaanut naapertuutin­ngitsumik iliuuseqar­naveersaar­tarpugut.

11. Sooq ilaannikkut Jiisusimik ilaarsineq imaannaan­ngitsuusarpa?

¹¹ Nalunngik­kaluarlugu Guutip kunngeqarfiata naalliuutit atuukkun­naarsissagai uagut nammineq ajortumik pineqarutta Jiisusip ilaarnissaa ajornakusoor­tissinnaavarput. Qatanngut arnaq Janiyamik atilik ammip qalipaataa pissutigalugu ajortumik pineqarami taamatut misigivoq. Ima oqarpoq: “Inuit oqaasii aliasuutigeqaakka, aammali kamangaarpunga inuillu taakkua pillarneqar­nissaat kissaatigalugu. Taamaattumik allanik nagguilinnik uumissuinermut akerlius­sutsimik takutitsisartut tapersersor­niarlugit eqqarsaatigisalerpara. Isumaqarpunga taamaalioruma arlaatigut iluaqutaassasoq.” Piffissalli ingerlanerani Janiyap paasivaa eqqarsar­taatsini allanngor­tittariaqarlugu. Ima oqarpoq: “Paasivara Jehova tatigiun­naarlugu inuit tatigilersimallugit oqaasiilu upperisalerlugit. Taamaattumik akerlius­sutsimik takutitsisartut attaveqarfigiun­naarpakka.” Uagut ajortumik pineqarnerput allalluunniit ajortumik pineqarnerat kamaatigisin­naagaluarlugu imminut aquttariaqarpugut politik­kimullu akuliun­naveersaarluta. – Joh 15:19.

12. Suna atuartar­nerlugu, isiginnaar­tarnerlugu tusarnaar­tarnerluguluunniit sooq mianersuutigisariaqarparput?

¹² Naapertuil­luanngitsulior­toqartillugu eqqissisimaan­narnissamut suna iluaqutigis­savarput? Inuppassuit iluaqutigisimavaat atuartak­kaminnik, tusarnaar­takkaminnik isiginnaar­takkaminnillu mianersuutigin­ninnertik. Internetikkut attaveqaqatigiit­tarfinni inuit ilaat oqartus­saasunik ajorinnilersitsiniaallutik uissuum­minartunik ikkussisarput. Tusagas­siortut ilaat piviusut saqqummiunnagit nammineq isummatik tunngavigalugit saqqummius­sisarput. Saqqummiun­neqartut piviusuugaluarpataluunniit taakku pillugit atuaqat­taarutta iluaqutiginavian­ngilarput. Tassami piffissarujussuaq taakkununnga atorutsigu kamaatigilersin­naavagut sapiissuseerullutalu. (Uss 24:10) Sulilu ajornerussaaq Guutip kunngeqarfia salliuk­kunnaarutsigu taassumalu naalliuutit atuukkun­naarsissagai puiorlugu.

13. Ullut tamaasa Biibilimik atuartarneq naapertuil­luanngitsuliornerit pillugit eqqortumik isiginnit­taaseqar­nissamut qanoq iluaqutaasarpa?

¹³ Ullut tamaasa Biibilimik atuartarneq eqqarsaatigin­neqqissaar­tarnerlu naapertuil­luanngitsulior­toqartillugu pitsaanerpaamik qisuariar­nissamut iluaqutaavoq. Qatanngut arnaq Aliamik atilik inunnik ajortumik pinnittoqar­tarnera pissutigalugu eqqissisimajun­naartarsimavoq. Ajortumik pinnittartut pillarneqan­nginnerat kamaatigaa. Ima oqarpoq: “Unikaal­lattariaqarsimavunga unalu eqqarsaatigalugu: ‘Ilumut upperivara Jehovap ajornar­torsiutit aaqqikkumaarai?’ Tamatuma nalaani Jobi 34:22-29 atuarpakka. Allassimaffinnit taakkunannga eqqaasin­neqarpunga kinaluunniit Jehovamut isertorsin­naanngitsoq. Jehovami kisimi inunnik eqqorluartumik eqqartuus­sisinnaavoq ajornar­torsiutinillu tamanik aaqqiisin­naalluni.” Guutilli kunngeqarfiata ajornar­torsiutinik tamanik aaqqiinissaa utaqqitillugu maanna susinnaavugut?

MAANNA SUSINNAAVUGUT?

14. Maanna ilaatigut susinnaavugut? (Kolossimiut 3:10, 11)

¹⁴ Inuit allat iliuuseriniagaat aqussin­naanngilagut, namminerli allanik ajunngitsumik pinnittarsin­naavugut. Sammeriik­katsitut asanninnermik ersersitsisarnikkut Jiisusi ilaarsin­naavarput. Asannikkutta inoqatigut, allaat ajortumik pinnittartut, ataqqin­nittumik pissavagut. (Mat 7:12; Rom 12:17) Kikkut tamaasa inussiar­nersumik ajunngitsumillu pigaangatsigit Jehovap nuannaarutigisarpaa. – Kolossimiut 3:10, 11 atuaruk.

15. Biibili pillugu oqaluus­sinerput qanoq sunniuteqartarpa?

¹⁵ Inuit Jehova pillugu ilinniar­tikkaangatsigit pitsaanerpaamik ikiortarpagut. Sooq taama oqarsin­naavugut? Inuk nakuusertartoq kamajasorlu Jehova pillugu ilisimasaqaleruni inussiar­nersunngorsinnaavoq eqqissisimasun­ngorlunilu. (Es 11:6, 7, 9) Jemal Nalunaajaasun­ngunngik­kallarami nunamini naalakkersuisut naqisiman­nissorigamigit pikitsitsillutik akiuuttunut ilannguppoq. Ima oqarpoq: “Inuit pinngitsaalillugit allanngor­tinneqarsin­naanngillat. Uanga Biibilimiit ilumoortut ilikkakkakka allanngus­sutigaakka, pinngitsaalineqarnanga.” Jemalip ilikkakkani akiuuteqataajun­naarnis­saminut kajumis­sissutigai. Inuit Biibilimit ilikkakkatik tunngavigalugit allanngortut amerliar­tortillugit naapertuil­luanngitsuliortut ikiliar­tussapput.

16. Sooq Guutip kunngeqarfianik neriuuterput oqaluus­sissutigerusuppiuk?

¹⁶ Jiisusi ilaarlugu Guutip kunngeqarfiata ajornar­torsiutinik ataavartumik aaqqiis­sutissatuaanera inunnut oqaluus­sissutigerusungaarparput. Ajortumik pineqarsimasut neriuut tamanna qiimmaal­laatigisin­naavaat. (Jer 29:11) Stacy, issuariigarput, ima nassuiaavoq: “Ilumoortoq Biibilimeersoq ilikkarakku naapertuil­luanngitsuliornerit takusama namminerlu misigisama naammagalugit atornis­saannut iluaqutigaara. Jehova Biibilimi oqariartuut atorlugu tuppallersaasarpoq.” Naapertuil­luanngitsuliornernut aaqqiis­sutissaq Biibilimi allaatigineqartoq oqaluus­sissutigis­sagukku piareersarluarsimasariaqarputit. Ilumoortut Biibilimeersut allaaserisami matumani eqqaaneqartut nammineq upperil­luinnarukkit periaaserillutit atuaqatinnut suleqatin­nulluunniit eqqartorsin­naavatit.c

17. Naapertuil­luanngitsuliornerit naammagalugit atornis­saannut Jehovap qanoq ikiortarpaatigut?

¹⁷ Nalunngilarput Saatani nunarsuarmik naalakkersuisuutillugu naapertuil­luanngitsulior­toqartuassasoq. Kisianni Jehovap maanna ikiortarmatigut aamma Saatani ajussuserlu suujunnaarsis­sallugit neriorsuutigisimammagu neriuuteqarpugut. (Joh 12:31) Biibilimi Jehovap oqaluttuup­paatigut sooq taama naapertuil­luanngitsulior­toqartigisoq aamma naalliunnerput qanoq misigis­suseqarfigalugu. (Tuss 34:18-20) Jiisusip maligassiaa iluaqutigalugu paasivarput ajortumik pineqar­nitsinni qanoq qisuarias­sanerluta. Qanittukkut Kunngeqarfiup naalliunneq naassaan­ngitsumik atuukkun­naarsissavaa. (Pet 2. 3:13) Taamaattumik Kunngeqarfik pillugu nutaarsiassat nuannersut aallussil­luarluta oqaluus­sissutigiuartigit nunarsuarmi naapertuil­luassuseqalernissaa qilanaariitigalugu. – Es 9:6.