Allat ataqqikkit

1. Sooq ataqqineqarneq inuit tamarmik nuannarisarpaat? (Ussatit 22:1)

ALLAT ataqqigaangatsit nuannarisan­nguatsiarpat. Sooq taamaappa? Ataqqineqarneq tunngaviusumik pisariaqar­tillugulu iluarisaratsigu. Taamaattumik Biibilimi allassimavoq ataqqineqarneq ‘sølviuteqarnermit kuultiuteqar­nermillu pitsaanerusoq’. – Ussatit 22:1 atuaruk.

2-3. Sooq allanik ataqqin­ninnissaq oqitsuinnaaneq ajorpa, allaaserisamilu suna sammissavarput?

² Allanik ataqqin­ninnissaq oqitsuinnaaneq ajorpoq, inoqatittami kukkussutaat maluginian­ngitsoorsin­naasanngilagut. Aamma nalitsinni ataqqin­ninngitsunik inuppas­suaqarpoq. Uagulli allaanerusariaqarpugut, Jehovammi kissaatigaa ‘inuit tamalaat ataqqis­sagigut’. – Pet 1. 2:17.

³ Allaaserisami sammissavarput ataqqinninneq qanoq paasisariaqarnersoq ukulu qanoq ataqqisin­naanerigut: (1) Ilaquttagut, (2) uppeqatigut aamma (3) uppeqatigin­ngisagut. Pingaartumik eqqartus­savarput sapernaraluaraangal­luunniit ataqqin­ninnermik qanoq ersersitsisin­naanersugut.

ATAQQINNINNEQ QANOQ PAASISARIAQARPA?

4. Ataqqinninneq qanoq paasisariaqarpa?

⁴ Ataqqinninneq qanoq paasiviuk? Allanik ataqqinninneq isiginnit­taasiullunilu iliuutsikkut takutin­neqartarpoq. Allat ataqqigaangatsigit soqutigalugit maluginiar­tarpagut, pingaar­tittarpagut qajassuul­lugillu. Assersuutigalugu inuk ajunngitsunik pissuseqartoq, ajunngitsuliorsimasoq, akisussaaf­feqartorluunniit ataqqisarparput. Allat ataqqigaangatsigit malugineqartutut pingaar­tinneqar­tutullu misigilersit­tarpagut. Soorunalimi qamannga pisumik ilumoor­tumillu allanik ataqqin­ninnissarput pingaaruteqarpoq. – Mat 15:8.

5. Allanik ataqqin­ninnissamut suna kajumis­sissutigisin­naavarput?

⁵ Jehovap kissaatigaa allanik ataqqin­nissasugut. Assersuutigalugu oqartus­saasunut ataqqin­nissasugut piumasaraa. (Rom 13:1, 7) Immaqali ilaat oqassapput: “Allat ataqqerusuk­kaluarpakka, aatsaalli iluamik iliuuseqar­nermikkut ataqqineqar­tariaqarnertik takutippassuk taamaaliussaanga.” Taama eqqarsarneq eqqortuua? Naamik, Jehovamut kiffartor­tuusugut paasivarput allat qanoq ittuunerat apeqqutaatinnagu ataqqin­nissasugut. Jehovamik asanninnerput nuannaar­titserusun­nerpullu pingaarnermik kajumis­sissutigalugit allanik ataqqin­nittarpugut. – Jos 4:14; Pet 1. 3:15.

6. Inunnik ataqqin­ninngitsunik ataqqin­nittoqarsinnaava? Nassuiaruk. (Aamma asseq takuuk).

⁶ Ilaat immaqa eqqarsarput: ‘Uannik ataqqin­ninngitsunik ataqqin­ninnissaq sapernar­teqaara.’ Ataqqin­ninngitsunik ataqqin­nittoqarsinnaava? Aap! Assersuutit uku eqqarsaatigeriakkit. Kunngip Saulip ernini Jonatani sorraatsuliorfigaa. (Sam 1. 20:30-34) Jonatanilli ataatani Sauli inuutillugu ataqqiuarpaa sorsugiaraangallu ikiortarlugu. (Mos 2. 20:12; Sam 2. 1:23) Palasiunerup Elip Hanna aalakoorsoralugu oqarfigaa. (Sam 1. 1:12-14) Taamaak­kaluartoq Hannap ataqqin­nilluni oqaluuppaa, naak Elip ataatatut palasiunertullu kukkussutigisimasai Israalimi naluneqan­ngikkaluartut. (Sam 1. 1:15-18; 2:22-24) Angutillu Athenimiut ilaasa Paulusi ‘makkuluin­nartukasittut’ taallugu ajuallatsippaat. (ApS 17:18) Paulusilli ataqqin­nittumik oqaluuppai. (ApS 17:22) Maligas­saalluartut taakkua takutippaat Jehovamik asanningaarnerput aliasutsitserusun­nginnerpullu kajumis­sissutigalugu sapernaraluaraangal­luunniit allanik ataqqin­nissinnaasugut. Maanna sammeriartigu kikkut ataqqisariaqar­nerigut qanorlu taamaaliorsin­naanersugut.

ILAQUTTATIT ATAQQIKKIT

7. Sooq ilaquttatta ataqqinissaat ilaannikkut ajornakusoor­tissinnaavarput?

⁷ Sooq imaannaan­ngitsoq. Ilaquttagut ilisarisimal­luaratsigit nukittussutaat sanngiis­sutaallu nalunngil­luinnarpagut. Ilaquttatta ilaat annilaanganermik allamil­luunniit nappaateqarpata imaassinnaavoq ataqqin­nittumik isumagiuar­nissaat sapernar­tissinnaagipput. Imaassin­naavorluunniit oqaatsikkut iliuutsik­kulluunniit uagutsinnik aliasulersitsisartumik ilaqutaqartugut. Ilaqutariit eqqisseqatigiillutik inooqatigiit­tussaagaluarput. Ataqqin­ninngitsuliornerli eqqissiviil­liornermik ajornar­torsior­nermillu kinguneqarsinnaavoq, ilaqutariillu ataasioqatigiik­kunnaarsin­naapput. Ilaqutariit timimut assersuun­neqarsin­naapput. Soorlu gigtip timi eqarsitis­sinnaagaa, ilaqutariit ataqqeqatigiik­kunnaarunik suleqatigiil­luarunnaarsin­naapput. Gigtili nammineerluta katsorsarsin­naanngisarput assiginagu ilaqutariittut ataqqeqatigiin­nissarput ilinniarsin­naavarput.

8. Sooq ilaquttatsinnik ataqqin­ninnissarput pingaaruteqarpa? (Timuutiusimut 1. 5:4, 8)

⁸ Sooq ataqqin­nissaagut? (Timuutiusimut 1. 5:4, 8 atuakkit). Ilaqutariit qanoq isumassoqatigiis­sanersut pillugu Paulusip Timuutiusi allaffigaa. Nassuiaavoq pingaarnertut ‘Guutimut tunniusimanerput’ pissutigalugu ataqqeqatigiis­sasugut, peqquneqarnerput pissutigiin­narnagu. Tassa Jehova asagatsigu ataqqin­ninnerlu guutisior­nitsinnut ilaasoq paasigatsigu ilaquttatsinnik ataqqin­nippugut. Jehovami ilaqutariinnik pilersitsisuuvoq. (Ef 3:14, 15) Taamaattumik ilaquttagut ataqqigaangatsigit Jehova ataqqillugu ersersit­tarparput. (Timuutiusimut 1. 5:4-mut studienotit qallunaatuuaniittut takukkit). Tamanna ilaquttatta tamarmik ataqqinis­saannut pissutis­saalluangaarami, ilaa?

9. Aappariit ataqqeqatigiinnertik qanoq takutis­sinnaavaat? (Aamma assit takukkit).

⁹ Qanoq ataqqin­nissinnaasugut. Uiusup nuliaminik ataqqinnittup kisimiik­kaangamik allanil­luunniit ilaqaraangamik asanninnini takutittarpaa. (Uss 31:28; Pet 1. 3:7) Annersar­tanngilaa, nikassar­tanngilaa naleqan­ngitsutullu misigitit­tarnagu. Qatanngut angut Argentinami najugalik ima oqarpoq: “Nuliara nappaateqarami uannut ajuallan­nartunik oqaaseqariataartarpoq. Taamaaligaangat imminut eqqaasit­tarpunga nappaataajuna ‘oqaluttoq’, oqaasiilu inuttut qanoq ittuuneranik ersersitsin­ngitsut. Pisoq pigalut­tuinnaleraangat Korintimiunut allakkat siulliit 13:5 eqqarsaatigisarpara. Nuliannik ataqqin­nittuar­nissannut kajumis­sissutigisarpara, kamappalul­lungalu oqaluun­naveersaar­tarpara.” (Uss 19:11) Nuliaasup uini ataqqin­nittumik eqqartoraangamiuk takutittarpaa ataqqillugu. (Ef 5:33) Uiminik ataqqinnittup illaruaatiginagulu isornar­torsiorneq ajorpaa. Uiminik nikassaas­sanngilaq. Paasivaa taamaaliornerup aappariinneq mannger­tornertut aseroriar­torsinnaagaa. (Uss 14:1) Qatanngut arnaq Italiamiu uini annilaangajasoq isumakulut­tuaannartoq pillugu oqarpoq: “Isumaqar­tarpunga uiga pisariaqan­ngitsumik isumakulup­pallaartartoq. Siornatigut kiinarsornikkut oqaatsikkullu ataqqin­nippallaan­nginnera ersarissumik takuneqarsin­naasarpoq. Ataqqin­nittumilli oqaluttartut ilagisarneri uinnik ataqqin­ninneruler­nissannut iluaqutigisimavara.”

10. Meeqqat inuusuttullu qanoq takutis­sinnaavaat angajoqqaatik ataqqillugit?

¹⁰ Inuusut­tuuguit ilaqutariissinni maleruagassat maleruartakkit. (Ef 6:1-3) Angajoq­qaannut ataqqin­nittumik oqaluttarit. (Mos 2. 21:17) Angajoqqaavit utoqqalinerujar­tortillutik immaqa ilinnit ikiorneqar­neruler­nissartik pisariaqar­tissavaat. Sapinngisannik isumagil­luakkit. Maríaa ilinniarfigil­luarsin­naavarput. Ataataa Nalunaajaasuunngilaq, napparsimalermallu isumaginissaa oqitsuin­naanngilaq ajuallan­nartumik oqaaseqartarmat. María ima oqarpoq: “Ataatannik qamuuna ataqqin­ninnissannut qinullunga ikioqquin­nanngilanga, aamma ersersin­nissaanut Jehovamut ikioqqusarpunga. Eqqarsarpunga Jehovap angajoq­qaannik ataqqin­ninnissannik piumaffigiguninga aamma taamaalior­nissannut nakussatsis­sinnaagaanga. Paasiar­torpara imaanngitsoq ataataga ataqqis­sagukku allanngoq­qaartariaqartoq.” Ilaquttagut sanngiif­feqaraluartut ataqqigaangatsigit takutit­tarparput Jehova, ilaqutariinnik pilersitsisuusoq, ataqqigipput.

UPPEQATITIT ATAQQIKKIT

11. Sooq uppeqatitta ataqqinissaat ilaannikkut ajornakusoor­tissinnaavarput?

¹¹ Sooq imaannaan­ngitsoq. Uppeqatigut sapinngisartik tamaat Biibili malillugu inuuniarsaripput. Taamaak­kaluartorli imaassinnaavoq ilaatigooriarlutik inussiar­niitsumik pisaraatigut, uagut pilluta eqqunngitsumik isummertartut iluaallior­tillutaluunniit. Uppeqatitta ilaata iliuusii pissutigalugit ‘naammagit­taallior­nissamut pissutis­saqarutta’ ataqqin­nittumik piuarnissaa sapernar­tissinnaavarput. (Kol 3:13) Sunami iluaqutigisin­naavarput?

12. Sooq uppeqatitsinnik ataqqin­ninnissarput pingaaruteqarpa? (Petrusimit 2. 2:9-12)

¹² Sooq ataqqin­nissaagut? (Petrusimit 2. 2:9-12 atuakkit). Petrusip allakkami aappaanni eqqaavaa kristumiut siulliit ilaat ataqqin­ninngitsumik oqaaseqarlutik “Guutimit ataqqineqartunik”, tassa utoqqaanertanik, asissuisartut. Inngilit tamanna takugamikku qanoq qisuariarpat? “Jehova ataqqigamikku” eqqunngitsuliortut taakku pillugit ataqqin­ninngitsumik oqaaseqan­ngilluinnarput unnerluutiginagil­luunniit. Nalunngilaat Jehovap eqqartuul­lugillu avoqqaarissagai. (Rom 14:10-12; aamma takuuk Juudarsi 9). Inngilit ilinniarfigil­luarsin­naavagut. Akerlilersuisut ataqqin­ninngitsumik pisassan­ngikkutsigit soorunami uppeqatigut Jehovamik asannittut taama pinavian­ngilagut. ‘Siulliulluta ataqqin­nittulior­tassaagut.’ (Rom 12:10) Taamaaliorutta takutis­savarput Jehova ataqqigipput.

13-14. Ilagiinni ataqqinninneq qanoq takutin­neqarsinnaava? Assersuuteqarit. (Aamma assit takukkit).

¹³ Qanoq ataqqin­nissinnaasugut. Utoqqaaner­taaguit asanninneq tunngavigalugu ilinniar­titsisarit. (Flm 8, 9) Uumitsannak inussiar­nersumik siunnersuil­lutillu oqaaqqis­saarisarit. Ilissi qatanngutaasusi arnat, ilagiinni ataqqeqatigiin­nerulersitsisin­naavusi allat ajortumik eqqunngitsumil­luunniit oqaluuserin­ngikkussigit. (Tit 2:3-5) Tamatta utoqqaanertat suleqatiginerisigut ataqqin­ninnermik ersersitsivigisin­naavagut. Aamma paasitis­sinnaavagut qujamasuutigalugit ataatsimiinnerni aqutsil­luartarmata, oqaluus­sinermi maligas­siuilluar­tuummata ‘kukkusumillu toraagaqalersut’ ikiorniarlugit iliuuseqangaar­tarmata. – Gal 6:1; Tim 1. 5:17.

¹⁴ Qatanngutip arnap Rocíomik atillip utoqqaanertamit siunnersor­neqarnini pissutigalugu taassuma ataqqinissaa sapernar­tilerpaa. Ima oqarpoq: “Misigivunga ingasat­tajaarfigigaanga. Angerlarsimaffinni ajortumik oqaluuserivara. Ajunngin­nerpaamik kissaakkaanga qularilerpara, takutin­naveersaarparali. Siunnersuutaalu maleruarusun­ngilara.” Suna iluaqutigaa? Ima oqarpoq: “Biibilimik atuarninni Tessaluunikamiunut allakkat siulliit 5:12, 13-ilu atuarakkit paasivara utoqqaanertaq taanna ataqqin­ngikkiga, tamannalu ilerasuutigilerpara. Isiginnit­taasera allanngor­tissinnaaq­qullugu Jehovamut ikioqquvunga Biibililersaarutitsinnilu misissuillunga. Paasiar­tulerpara utoqqaanertaq taanna ajornar­torsiutaanani uanga nammineq makitanera ajornar­torsiutaasoq. Maanna nalunngilara allat ataqqis­sagukkit maniguut­tuusariaqarlunga. Suli sulissutis­saqarpunga, sapinngisarali tamaat allanik ataqqin­ninniar­tarpunga. Taamaalior­taramalu misigivunga Jehova eqqisseqatigalugu.”

UPPEQATIGIN­NGISATIT ATAQQIKKIT

15. Sooq Jehovamik Nalunaajaasuun­ngitsut ataqqinissaat ilaannikkut ajornakusoor­tissinnaavarput?

¹⁵ Sooq imaannaan­ngitsoq. Oqaluus­sinermi Guutimik Biibilimillu soqutigin­ninngip­pasittut naapikulasarpagut. (Ef 4:18) Ilaasa peroriar­tornerminni tusakkatik pissutigalugit tusarnaarusun­ngilaatigut. Aamma imaassinnaavoq inussiar­niitsunik suleqateqartugut atuaqateqarlutaluunniit, imaluunniit uagutsinnut iluarin­nilersik­kuminaatsunik sulisitsisoqartugut ilinniar­titsisoqarlutaluunniit. Piffissap ingerlanerani inuit taamaattut ataqqiun­naartoorsin­naavagut pineqarusun­nitsitullu piunnaarlugit.

16. Sooq Jehovamut suli kiffartulin­ngitsunik ataqqinninneq pingaaruteqarpa? (Petrusimit 1. 2:12; 3:15)

¹⁶ Sooq ataqqin­nissaagut? Eqqaamajuk Jehovap imminut kiffartor­tuunngitsunik qanoq pinnittar­nersugut maluginiartaraa. Petrusip kristumioqatini eqqaasippai ileqqoris­saarnerat inuit takugunikku ilaasa Guuti unnersiutigilersin­naagaat. Taamaattumik kajumis­saarpai upperisartik ‘saamallutik ataqqin­ningaarlutillu’ nassuiar­tassagaat. (Petrusimit 1. 2:12; 3:15 atuakkit). Eqqartuussisoq upperisarput pillugu nassuiaaf­figissagutsigu soorunami ataqqin­nittumik taamaaliussaagut, inullu oqaluus­sinermi naapitarput kinaluunniit aamma ataqqin­nittumik nassuiaaf­figissavarput. Jehovami pisunut malinnaalluni oqaatsigut oqaloriaaserpullu tusarnaartarpai. Tamanna uppeqatigin­ngisatta ataqqinis­saannut pissutaal­luangaarami!

17. Uppeqatigin­ngisagut qanoq ataqqin­ninnermik ersersitsivigisin­naavagut?

¹⁷ Qanoq ataqqin­nissinnaasugut. Oqaluus­sinermi Biibilimik ilisimasakin­nerusunik oqaloqateqarutta misigitin­naveersaas­savagut taakkunannga pikkorin­nerulluta. Jehovap pingaartikkai eqqaamagutsigu uagutsinniit pingaar­nerusutut isigissavagut. (Hagg 2:7; Flp 2:3) Upperisat pillugu sorraatsumik akerartor­neqaruit appiussuinaveersaarit. (Pet 1. 2:23) Peqqissimis­sutigisannik oqartooruit ingerlaannaq utoqqatserit. Suliffinni qanoq ataqqin­nissinnaavit? Peqqissaarlutit eqiasuitsuul­lutillu sulisarit. Aamma suleqatinnut sulisitsisunnullu ajunngitsumik isiginnit­taaseqar­niartuarit. (Tit 2:9, 10) Unneqqarillutit sulilluar­taraluarlutit kikkut tamaasa nuannaar­tissinnaan­ngilatit, eqqaamas­savalli Jehovap iluaralutit nuannaarutigis­sagaatit. – Kol 3:22, 23.

18. Allanik ataqqinninneq qanoq ajunngitsumik kinguneqartarpa?

¹⁸ Sammeriik­katsitut allat ataqqiuar­nissaannut pissutis­sarpassuaqarpugut! Ilaquttagut ataqqigaangatsigit Jehova, ilaqutariinnik pilersitsisuusoq, ataqqillugu takutit­tarparput. Aamma anersaakkut ilaquttatta ataqqinerisigut Ataatarput qilammiusoq, Jehova, ataqqisarparput. Uppeqatigin­ngisatsinnik ataqqin­nikkaangatta pitsaanerpaamik periarfis­sittarpagut namminneerlutik Jehovamik ataqqin­nilernis­saannut unnersiutigin­nilernis­saannullu. Naak inuit ilaannit ataqqineqan­ngikkaluarluta uagut ataqqin­nittuassaagut. Sooq? Jehovap tamanna maluginiar­tarmagu iluaralugulu. Ima neriorsuivoq: ‘Ataqqin­nitsikka ataqqis­savakka.’ – Sam 1. 2:30.