1925 – Ukiut hundredit matuma siorna

ILIMAGISAATTUT PISOQAN­NGITSOORPOQ

Biibilimik Atuaqqis­saartartut ilarpassuisa upperigaluarpaat nunarsuarmi paratiisi 1925-mi piviusun­ngussasoq. Tamanna qatanngutip Albert Schroederip, kingusin­nerusukkut Siulersuisoqatigiinnut ilaasor­tanngortup, ima nassuiarpaa: “Upperigaluarparput 1925-mi tanitat qilaliar­tinneqassasut aamma itsaq aalajaas­simasut, soorlu Aaperaat aamma Daavi, nunarsuarmi makitin­neqarlutik siulersuisuussasut.” 1925-mili ilimagisaattut pisoqan­ngimmat qatanngutit ilaat pakatsipput. – Uss 13:12.

Pakatsigaluarlutik Biibilimik Atuaqqis­saartartut amerlanersaat oqaluus­siuarput. Paasiar­tulerpaat Jehova pillugu oqaluus­sinertik pingaar­nerpaatut suliassaralugu. Inuit suli amerlanerit angusin­naajumallugit radio qanoq atorsimaneraat paasiniariartigu.

AALLAKAATITSIVIIT AMERLIGAAT

1924-mi inuppassuit radio WBBR tusarnaar­tarpaat. Taamaattumik 1925-mi Biibilimik Atuaqqis­saartartut radioqarfimmik nutaamik pilersitsinialerput, tamatumuuna Illinoisimi Chicagop eqqaani. Radioqarfit­taassaq taanna WORD-imik (“Oqaaseq”) taaguserpaat. Ralph Leffler, radioqarfimmik pilersitseqataasoq, oqarpoq ukiukkut taarsigaangat inuppassuit radioqarfiup aallakaatitaanik tusarnaar­tarsimasut. Assersuutigalugu ilaqutariit ataatsit 5.000 kilometerisut ungasitsigisumi Pilot Stationimi Alaskamiittumi najugallit aallakaatitat siulliit ilaannut tusarnaarsimapput. Kinguninngua ilaqutariit anersaakkut qiimmal­laatigisimasaminnik aallakaatitsisoqar­neranik qujaniarlutik radioqarfimmut sulisunut allagaqarput.

The Watch Tower decembarip aallaqqaataat 1925-moortumi nassuiar­neqarpoq sooq aallakaatitat taama amerlatigisunit tusarnaar­neqarsin­naasimasut. “Radioqarfik WORD 5.000 watt-inik sakkortus­susilimmik aallakaatitsis­sutilik USA-mi radioqarfiit sakkortunerpaat ilagaat. USA-p kitaanit kangianut aamma Cubami allaallu Alaskap avannaarsuani najugallit aallakaatitat tusarnaarsin­naavaat. Siornatigut sallusuissummik tusagaqarsiman­ngitsut radiukkut tusarnaarlutik soqutigin­nilersimapput.”

Tamatuma nalaani aamma Canadami Biibilimik Atuaqqis­saartartut radio aqqutigalugu nutaarsiassat nuannersut siaruar­terusuppaat. 1924-mi aallakaatitsivik CHUC Saskatoonimi Saskatchewanimiittumi sanavaat. Canadami upperisamut tunngasunik aallakaatitsisartut siulliit ilagaat. 1925-mi aallakaatitsiveerannguaq allamut nuuttariaqalerpoq. Taamaattumik Napasuliaq Alapernaarsuiffiup Peqatigiiffiata Saskatoonimi isiginnaar­titsivitoqaq, Regent Building, pisiareriarlugu aallakaatitsivissatut nutarsarpaat.

Saskatchewanip avinngarusimasortaani najugallit taamaalillutik nutaarsiassat nuannersut siullerpaamik tusarpaat. Assersuutigalugu Mrs. Graham illoqarfimmi avinngarusimasumi aallakaatitassiamut tusarnaareerluni Biibililersaarutinik qinulluni allappoq. Qatanngut George Naish oqaluttuarpoq arnaq taanna ilungersuum­mersimangaarluni ikioqqummat atuakkat ataqatigiit Studier i Skriften tamaasa ingerlaannaq nassius­simallugit. Mrs. Grahamip ilikkakkani allanut ungasin­nerusumi najugalinnut kingunitsianngua oqaluttuarisalerpai.

ILUMOORTOQ PINGAARUTILIK PAASIVARPUT

The Watch Tower-imi marsip aallaqqaataat 1925-moortumi pingaarutilimmik allaaserisaqarpoq qulequtalimmik “Birth of the Nation” (Inuiaqatigiit nutaat pinngornerat). Sooq taama pingaaruteqartigaa? Biibilimik Atuaqqis­saartartut paasereersimavaat anersaapiluit nunarsuarmilu upperisarsiorneq eqqunngitsoq, politikkikkut niuernikkullu aaqqissuus­saanerit Saatanip aqutarigai. Allaaserisarli aqqutigalugu ‘inussiap aalajaallunilu silatuup’ qatanngutit paasitippai Jehovap qilammi nunarsuarmilu kiffai ataasius­suseqartut. Saatanip silarsuaanit immikkoorluin­nartuupput suleqatigiil­lutillu Jehova illersorlugu Saatanili taassumalu ilii akiorlugit. (Mat 24:45) Tamatuma saniatigut nassuiar­neqarpoq Guutip kunngeqarfia 1914-imi pilersin­neqarsimasoq ukiumilu tamatumani, qilammi sorsuttoqarnerata kingunerisaanik, Saatani inngilipiluilu qilammiit anisitaasimasut nunarsuarmullu igitaallutik. – Saqq 12:7-9.

Biibilimik Atuaqqis­saartartut ilaasa nassuiaat tamanna akueriuminaatsippaat. Taamaattumik allaaserisami ima allassimavoq: “Watch Tower-imik atuartartuni allassimasunut isumaqataan­ngitsoqarpat taakku kajumis­saarusuppagut naammagit­tarlutik minguitsumillu uummateqarlutik Jehova tatigalugu kiffartorfigiin­nassagaat.”

Tom Eyrep, pionerip Tuluit Nunaanneersup, Biibilimik Atuaqqis­saartartut amerlanerit allaaserisaq taanna pillugu qanoq isumaqarnerat oqaluttuaraa: “Saqqummersitat kapitali 12-ip nassuiar­neqarnera nuannaarutigeqaat. Kunngeqarfik qilammi pilersin­neqarsimasoq paasigatsigu allanut oqaluttuarinissaa qilanaareqaarput. Oqaluus­sinermi iliuuseqar­nerunissamut kajumis­suseqar­nerungaalerpugut takusin­naalerlugulu Jehovap innuttaminik siulersuineratigut nuannersorpas­suarnik pisoqarumaartoq.”

JEHOVA PILLUGU ILISIMAN­NITTUTUT NALUNAAJAASUS­SAAPPUT

Ullumikkut Jehovap innuttaasa Esaja 43:10-mi Jehovap oqaasii uku ilisimal­luarpaat: “Ilissi uanga ilisiman­nitsigaassi, … kiffara qinersimasara.” 1925-li sioqqullugu allassimaffik taanna Biibililersaarutaatitsinni sammineqarpiar­nikuunngilaq. Allanngor­toqarporli. 1925-p ingerlanerani Esaja 43:10 aamma versi 12 atuagassiani The Watch Tower-ini aqqaniliusuni sammineqarpoq!

1925-mi aggustip naalernerani Biibilimik Atuaqqis­saartartut Indianapolisimi Indianamiittumi ataatsimeersuarput. Qatanngutip Rutherfordip ataatsimeersuarnermi najuuttut tikilluaq­qullugit programmimi allatai imaapput: “Naalakkamit nakussatsin­neqarsimalluta ilisiman­nittutut oqaluus­seqqiler­niassagatta ataatsimeersuarnermi matumani katersuuppugut.” Ataatsimeersuarnermi ulluni arfineq-pingasunik sivisus­susilimmi najuuttut kajumis­saarneqarput periarfissatik tamaasa atorlugit Jehova pillugu nalunaajaasaq­qullugit.

Arfinin­ngornermi aggustip 29-anni qatanngut Rutherford oqalugiarpoq ima qulequtalimmik “Iliuuseqar­nissamut kajumissaarut”. Erseqqissarpaa oqaluus­sinerup qanoq pingaaruteqar­tiginera ima oqarluni: “Jehova innuttaminut oqarpoq …: ‘Ilissi ilisiman­nitsigaassi, uanga tassa Guuti.’ Taava paatsuugas­saanngitsumik ima peqqussuteqarpoq: ‘Katinngat inuiaqatigiinnut qullarsiuk!’ [Guutip innuttarimmagit] nunarsuarmi taakkutuaapput anersaavanik ikiorneqarlutik Jehova pillugu nalunaajaasinnaasut.” – Es 43:12; 62:10.

Qatanngut Rutherford oqalugiareersoq najuuttut aalajangersagaq “Message of Hope,” (Neriuummik oqariartuut) isumaqatigiillutik akuersis­sutigaat. Aalajangersakkami erseqqis­sarneqarpoq inuit eqqissineq, siumukarneq, kiffaan­ngissuseq, peqqissuseq naassaan­ngitsumillu inuuneq pilluarnerlu pilluaq­qussutigis­sagunikkit Guutip kunngeqarfia neriuutis­satuarigaat. Kingusin­nerusukkut aalajangersagaq oqaatsinut assigiin­ngitsunut nutserneqarpoq naqiter­neqarlunilu. Naqitaaqqat 40 millioningajaat agguaaneqarsimapput.

Aatsaat ukiut arlallit qaangiummata Biibilimik Atuaqqis­saartartut taaguut “Jehovap Nalunaajaasui” taaguutigilerpaat. Paasillualeriar­torpaalli ilisiman­nittutut Jehova pillugu nalunaajaaneq qanoq pingaaruteqar­tigisoq.

PULAAQQIISARNEQ PINGAAR­NERUTIN­NEQARTOQ

Nunarsuaq tamakkerlugu Biibilimik Atuaqqis­saartartut amerlanerujar­tortillugit Biibililersaarutinik agguaas­siinnarnatik soqutigin­nittunut uteqqit­taqqullugit kajumis­saarneqar­nerulerput. Message of Hope-mik agguaas­sereernerup kingorna saqqummersitami Bulletin-imia ima allassimasoqarpoq: “Inuit naqitaaqqamik Message of Hope-mik tigusisimasut uterfigisigit.”

Bulletin-imi januaari 1925-moortumi Planomi Texasimiittumi Biibilimik Atuaqqis­saartartoq ima nalunaaruteqarpoq: “Tupigusuutigisarparput oqaluus­siffigisar­takkamut arlaleriarluni oqaluus­siffigineqareersumut oqaluus­seqqinniarluta uteraangatta suli oqaluus­siffigineqan­ngitsumut naleqqiullugu tusarnaarusuttut amerlanerusartut. Najukkatsinni illoqarfeeraq ukiut qulit kingulliit tallimariarluni oqaluus­siffigineqartarpoq. … Qanittukkut qatanngut Hendrix anaanagalu illoqarfimmi tassani illumiit illumut oqaluus­sitillutik atuakkat aatsaat taama amerlatigisut agguaas­simavaat.”

Panamami piffissaq tamaat oqaluus­sisartoq ima allappoq: “Kasuttorfigisimasakka aallaqqaammut tusarusun­ngitsut amerlasuut aappassaannik pingajus­saanilluunniit uterfigeq­qikkaangakkit soqutigin­nilersimasarput. Ukioq manna pulaareersimasannut pulaaqqiisarneq suliarineruara. Ilaallu nuannersunik misigisaqarfigisarpakka.”

SIUMUT ISIGINEQ

1925-p naanerani qatanngutip Rutherfordip ukiumi tamatumani angusimasat siunissamilu angusassat allaaseralugit pionerit allaffigai. Ima allappoq: “Ukiup siuliani [1925-mi] nutaarsiassat nuannersut oqaluus­sissutigalugit amerlasuunik tuppallersaaneq aallussimavarsi. Suliaq qamannga nuannaalis­sutigisimavarsi … Ukiumi aggersumi Guuti taassumalu kunngeqarfia pillugu nalunaajaanissamut kikkullu kiffarinerai takutitsinissamut periarfis­sarpassuaqalissaaq. … Tamatta ataasius­suseqarluta Guuterput Kunngerpullu unnersiutigalugu niperput annitsigu.”

1925-p naalernerani qatanngutit Brooklynimi Betelimik alliliinissaq pilersaarutigilerpaat. 1926-mi Guutip innuttai sanaartornermik aatsaat taama annertutigisumik aallarnisaapput.