Utoqqalininni nuannaar­tuarsin­naavutit

1-2. Jehovap kiffani aalajaatsut utoqqaat qanoq isiginnit­taaseqarfigai? (Tussiaat 92:13-15; aamma asseq takuuk).

INUIT utoqqaliar­tornertik assigiin­ngitsumik qisuariarfigisarpaat. Assersuutigalugu eqqaamaviuk qiinissimallutit maluginiaq­qaarakku? Allanit takuneqaqqunagu nusukkusus­simassagunarpat. Paasivalli qiit nutsuttaraluarlugit amerliar­tuinnartut. Tamatuma ersersippaa utoqqaliartorneq qanoq akueriuminaatsigisinnaasoq.

² Ataatattali qilammiusup kiffani utoqqaat allaanerusumik isiginnit­taaseqarfigai. (Uss 16:31) ‘Orpinnut uummaasunut qorsuusunut’ assersuuppai. (Tussiaat 92:13-15 atuakkit). Sooq taama assersuusiorpa? Orpiit pisoqqat kusanar­torujus­suusarmata, taakkumi pilutarpas­suaqarlutillu sikkerneqarajupput. Assersuutigalugu Japanimi kirsebærequtit kusanangaartarput, taakkualu kusanar­nerpaat ilaat ukiut 1.000-t sinnerlugit pisoqaas­suseqarput. Guutimut kiffaasut aalajaatsut utoqqaat orpittut taakkunatulli pinnertigipput Jehovamullu naleqangaarlutik. Utoqqaat pissusii nuannersut Jehovap nuannaarutigisarpai. Annikil­liortaraluarlutik ukiorpassuarni aalajaallutik taassumunnga kiffartorput.

3. Jehovap siunertani naammas­siumallugu utoqqaat qanoq atortarsimavai?

³ Utoqqalisimasoq Jehovap isaani nalikin­nerulerneq ajorpoq.a Jehovammi siunertani naammas­siumallugu utoqqaat atortarpai. Assersuutigalugu Saara utoqqalereersoq Jehovap nalunaarutigaa kinguaassai inuiassuan­ngorumaartut Missiarsilu kinguaarissagaa. (Mos 1. 17:15-19) Jehovap Israalikkunnik Egyptenimit aniguisitsinermini Moorsisi utoqqalisimasoq siulersuisussatut toqqarpaa. (Mos 2. 7:6, 7) Aamma apustili Johannesi utoqqaalluni Biibilip atuagartaanik tallimanik Jehovamit isumassarsisitaalluni allappoq.

4. Ussatit 15:15 naapertorlugu utoqqaat ajornar­torsioraluarlutik pinertusaar­nissamut suna iluaqutigissavaat? (Aamma asseq takuuk).

⁴ Utoqqalineq ajornar­torsiutinik nassataqartarpoq. Qatanngut arnaq utoqqaq ima oqarpoq: “Utoqqalinermi sapiitsuuneq pisariaqarpoq.” Utoqqaalli ajornar­torsioraluarlutik nuannaar­tuarunikb pinertusaarsin­naapput. (Ussatit 15:15 atuaruk). Allaaserisami matumani utoqqaat nuannaar­tuassagunik susinnaasut sammissavarput. Aamma sammissavarput ilagiin­niittut allat uppeqatitik utoqqaat qanoq ikiorsin­naagaat. Sammeqqaariartiguli sooq utoqqaliar­tornermi nuannaar­tuarnissaq sapernar­tissinnaagipput.

UTOQQALINERMI SOOQ NUANNAARNISSAQ SAPERNAR­TISSINNAAGIPPUT

5. Utoqqaat ilaat sooq nikallungasarpat?

⁵ Immaqa siornatigut iliuuserisar­takkatit iliuuserisin­naajunnaarakkit nikallungavutit. Imaassinnaavoq inuusuk­kallaravit peqqissuunittut peqqissoorusuk­kaluartutit. (Oqal 7:10) Assersuutigalugu qatanngut arnaq Rubymik atilik ima oqarpoq: “Anniartarama aalassarlukkamalu atisalersornissaq sapernar­tittarpara. Isikkakka kivippiarsin­naannginnakkit allaat alersilersornissaq ilungersunartarpoq. Gigternera pissutigalugu assakka anniarigakkit annikitsunil­luunniit iliuuseqar­nissara sapernar­tittarpara.” Harold Betelimi kiffartorsimasoq ima oqarpoq: “Nuannaarutigalugu iliuuserisarsimasakka iliuuserisin­naajunnaarakkit ilaannikkut imminut paamitsaat­tarpunga. Inuusuk­kallarama timersul­laqqippunga. Baseballerneq nuannarinerpaanikuuara. Allat ima oqartar­nikuupput: ‘Arsaq Haroldimut miloriussiuk, taassumami ajugaatis­savaatigut.’ Maannali arsaq milorius­sinnaan­ngilaraluunniit.”

6. (a) Utoqqaat suut allat nikallus­sutigisin­naavaat? (b) Utoqqaat biilertarun­naassanerlutik aalajangiiniar­nerminni suna iluaqutigisin­naavaat? (Atuagassiami matumani allaaserisaq “Biilinik aquttarun­naassaanga?” takuuk).

⁶ Imaassinnaavoq nammineerlutit iliuuserisin­naasavit killeqalernerat nikallus­sutigigit. Ingammik iliuuserisassanut aalajangersimasunut ikiorneqar­tariaqaleruit imaluunniit utoqqaat illuanni qitornan­niluunniit najugaqar­tariaqaruit taamatut misigisin­naavutit. Aamma imaassinnaavoq peqqiil­liulernerit isigiarsuler­nerilluunniit pissutigalugu nammineerlutit angalasin­naajunnaaravit biilersin­naajunnaaravil­luunniit pakatseq­qasutit. Nikallor­narsimassaaq! Kisianni iluaqutigisinnaavat eqqamagukku ikiorneqar­tariaqaraluaruit biilertarun­naarsimagaluaruil­luunniit Jehovap allallu naleqar­tittuas­sagaatsit. Qularis­sanngilallu Jehovap misigis­sutsitit paasigai. Qamuuna qanoq ittuunerit taassumunnga pingaar­nerpaavoq. Nalunngilaami imminerminut qatanngutinullu qanoq asannitsigisutit. – Sam 1. 16:7.

7. Harmagedonnimik angumersin­ngitsuus­sasoralutik nikallungasut suna eqqarsaatigisin­naavaat?

⁷ Imaassinnaavoq Harmagedonnimik angumersin­ngitsuus­sasorigavit nikallungasutit. Taama misigiguit suna eqqarsaatigisin­naaviuk? Eqqaamajuk Jehova utaqqinis­saminut pissutis­saqarluartoq. (Es 30:18) Sooq Jehova naammagit­tarluni utaqqiva? Inuit amerlanerpaat imminut ilisarisiman­nilernis­saannut kiffartuler­nissaannullu periarfis­sikkusuk­kamigit. (Pet 2. 3:9) Taamaattumik nikallungagaangavit eqqarsaatiginiartaruk inuit qanoq amerlatigisut Jehovap naammagit­tartuunera pissutigalugu ajortimit toqumillu aniguiumaartut. Ilaquttavit ilaat aniguisut ilagissavaat?

8. Utoqqaat napparsimagaangamik anniaraangamillu qanoq iliortoorsin­naasarpat?

⁸ Qanorluunniit ukioqaraluarutta napparsimagaangatta anniaraangattalu peqqissimis­sutigisatsinnik oqartoorlutalu iliuuseqar­toorsin­naavugut. (Mos 5. 28:34; Jaak 3:2) Assersuutigalugu Juubi aalajaatsoq naalliun­nermini ‘isumaatsutut oqaluppoq’. (Jobi 6:1-3) Tamatuma saniatigut nappaat nakorsaal­luunniit pissutigalugu utoqqaq kinaassutsimigut allanngorsin­naagami ilisarnan­ngitsumik oqaaseqarsinnaavoq iliuuseqarsin­naalluniluunniit. Soorunami utoqqaaneq nappaateqar­nerluunniit inussiar­niitsuunissamut piumasaqarpal­laarnis­samulluunniit utoqqatsis­sutaassanngilaq. Aamma paasigutsigu asannin­ngitsumik oqalussimalluta utoqqatser­nissamut nangaas­sanngilagut. – Mat 5:23, 24.

QANOQ NUANNAAR­TUARSIN­NAASUTIT

9. Sooq allanit ikiorneqarnissat akuerissaviuk? (Aamma assit takukkit).

⁹ Allanit ikiorneqarnissat akueriuk. (Gal 6:2) Aallaqqaammut immaqa tamanna sapernar­tissavat. Qatanngut arnaq Gretlimik atilik ima oqarpoq: “Allanit ikiorneqar­nissara ilaannikkut nuannarineq ajorpara misigisarama taakkununnga nanertuutaas­sallunga. Kiisamili eqqarsariar­taasera allanngor­tippara maniguul­lungalu ikiorneqar­tariaqarnera akueralugu.” Eqqaamajuk ilinnik ikiuisut tunisinerup pilluarnartua misigissagaat. (ApS 20:35) Aamma illit allanit isumagineqarnerit asaneqar­nerillu nuannaarutigis­savatit.

10. Sooq qujamasunnerit ersersit­tassaviuk? (Aamma asseq takuuk).

¹⁰ Qujamasunnerit ersersittaruk. (Kol 3:15) Allanit ikiorneqaraangatta qujamasut­tarpugut, ersersin­nissaali puiorsin­naasarparput. Ikinngutigulli qungujuf­figalugillu qujaffigigutsigit pingaar­tinneqartutut misigissapput. Leah Betelimi utoqqarnik ikiuisartoq ima oqarpoq: “Qatanngutip arnap ikiortakkama ilaata allagan­nguanik qujassutinik tunisarpaanga. Naatsun­nguugaluarlutik asannip­palungaartarput. Ikiuinera pingaartikkaa nalunagu nuannarisarpara.”

11. Allat qanoq ikiortarsin­naavigit? (Aamma asseq takuuk).

¹¹ Sapinngisannik allanik ikiuisarit. Allat qanoq ikiorsin­naanerlugit eqqarsaatigisarukku nammineq ajornar­torsiutitit eqqarsaatigival­laassan­ngilatit. Afrikami oqariar­taatsimi utoqqaat atuakkanut pingaarutilinnik ilinniutis­sartalinnut assersuun­neqarput. Inuilli atuakkat taakku atuanngik­kunikkit ilinniarfigisin­naanngilaat. Tamatumunnga assingusumik inuusun­nerusut ilinniarfigisin­naanngilaatsit ilisimasatit pillugit oqaluunneq ajorukkit. Inuusun­nerusut ilisarisimal­lualernerujumallugit aperisarlugillu tusarnaartakkit. Nassuiaakkit sooq Jehovap najoqqutas­siaanik maleruaaneq inooriaasiusoq pitsaanerpaaq. Ikinngutitit inuusun­nerusut tuppallersarlugillu nakussas­sartarukkit qularnan­ngitsumik nuannaarutigissavat. – Tuss 71:18.

12. Esaja 46:4 naapertorlugu Jehovap utoqqaat qanoq neriorsorpai? (Aamma asseq takuuk).

¹² Nakussatseq­qullutit Jehova qinnuigisaruk. Ilaannikkut qasullutillu sanngiitsutut misigisin­naasarnerit nikallor­narsinnaavoq. Eqqaamajulli Jehova pissaaneqangaartoq. Biibilimi allassimavoq ‘qasussananilu nukillaarneq ajortoq’. (Es 40:28) Taamaattumik pisariaqartumik nakussatsis­sinnaavaatit. (Es 40:29-31) Allaat neriorsuivoq ikiussallutit. (Esaja 46:4 atuaruk). Jehovallu neriorsuutini eqqortit­tuaannarpai. (Jos 23:14; Es 55:10, 11) Qinoreerlutit Jehovap asanninnera ikiuineralu malugigaangakku nuannaalis­sutigisassavat.

13. Korintimiunut allakkat aappaat 4:16-18 naapertorlugit suna eqqaamas­savarput? (Aamma asseq takuuk).

¹³ Eqqaamajuk inuusut­tunngoq­qikkumaartutit. Eqqaamagutsigu ajornar­torsiutit qanittukkut qaanger­neqassasut pinertusaarnissaq ajornan­nginnerussaaq. Biibilimi neriorsor­neqarpugut siunissami utoqqalisarun­naarlutalu napparsimasarun­naassasugut. (Jobi 33:25; Es 33:24) Taamaattumik nalunnginnakku siunissami inuuneq massakkut siornatigullu atukkannit pitsaanerungaassasoq nuannaarsin­naavutit. (Korintimiunut 2. 4:16-18 atuakkit). Taavami allat qanoq ikiorsin­naavaatsit?

ALLAT QANOQ IKIUISINNAASUT

14. Utoqqaat pulaartar­nissaat sianerfigisar­nissaallu sooq pingaaruteqarpa?

¹⁴ Qatanngutit utoqqaat pulaartarlugillu sianerfigisakkit. (Hebr 13:16) Utoqqaat kiserliorsin­naasarput. Qatanngut angut angerlarsimaf­fimminiit anisinnaan­ngitsoq ima oqarpoq: “Ulloq naallugu isersimaan­nartariaqartarama pikkunaal­liorlungalu isumatsaq­qasarpunga.” Utoqqaat pulaaraangatsigit qularun­naarsit­tarpagut pingaar­tillugillu asagigut. Immaqa ilaannikkut utoqqaq sianerfiginiarlugu pulaarniarluguluunniit eqqarsaatigisarparput angumerin­ngitsoorluguli. Tamattami ulapittarpugut. Taamaappat pingaar­nerpaat iliuuserinis­saannut, assersuutigalugu utoqqaat pulaarnis­saannut, qanoq piffissaqarsin­naavugut? (Flp 1:10) Ullorsiutinni allattorsinnaavat qaqugu ilagiinni utoqqaq allaffigis­sanerlugu sianerfigis­sanerluguluunniit. Aamma pulaarnissaa puiunngin­niassagakku pilersaarusiorsinnaavat.

15. Inuusuttut utoqqaallu sunik sammisaqaqatigiis­sinnaappat?

¹⁵ Inuusut­tuuguit immaqa isumakuluutigivat utoqqaat suna pillugu oqaloqatigis­sanerlugit sulereqatigis­sanerlugil­luunniit. Isumakuluuteqarpal­laaqinalli, ikinngutaal­luaannarsin­naavutit. (Uss 17:17) Ataatsimiinnerup siorna kingornalu oqaloqatigisakkit. Immaqa aperisin­naavatit allassimaffik sorleq nuannarinerpaaneraat imaluunniit inuusut­tuunerminni quianartumik misigisaqarsimanersut. Aamma JW Broadcasting^®-imik isiginnaaqatigiis­sinnaavusi. Taakkua namminneq iliuuserisin­naanngisaannik ikiorsin­naavatit. Assersuutigalugu atortoris­saarutaat elektroniskiusut opdaterersin­naavatit Biibililersaarutillu nutaat aasinnaallugit. Qatanngut arnaq Carolimik atilik ima oqarpoq: “Illit nuannarisannik utoqqaat ilagalugit iliuuseqartarit. Utoqqaagaluarlunga nuannisaarusut­tarpunga. Pisiniarujoorneq, neriartorneq asimiinnerlu nuannarisarpakka.” Aamma qatanngut arnaq Mairamik atilik ima oqarpoq: “Ikinngutima ilaat 90-inik ukioqarpoq. Ukiunik 57-inik nikingavugut. Tamannali eqqarsaatigineq ajorpara illaqatigiit­taratta filminillu isiginnaaqatigiit­tarluta. Arlarput ajornar­torsiuteqaraangat immitsinnut siunnersuutis­sarsiorfigisarpugut.”

16. Utoqqaat nakorsiartut ilaginissaat sooq iluaqutaasinnaava?

¹⁶ Nakorsiaraangata ilagisakkit. Utoqqarnik biilius­sisarnerpit saniatigut napparsim­mavimmi sullinneqarluar­nissaat qulakkeer­niarsinnaavat. (Es 1:17) Immaqa nakorsap oqaasii allattorsin­naavatit. Qatanngut arnaq utoqqaq Ruthimik atilik ima oqarpoq: “Kisimiillunga nakorsiaraangama amerlanertigut nakorsat oqaaserisakka upperineq ajorpaat. Ilaannikkut oqarfigisarpaannga napparsimasoriin­nartunga. Ilagisaqaraangamali nakorsat ajunngin­nerujus­suarmik pisarpaannga. Qatanngutikka piffissartik uannut atortarmassuk qujamasuf­figaakka.”

17. Utoqqaat qanoq oqaluus­seqatigisin­naavigit?

¹⁷ Oqaluus­seqatigisakkit. Utoqqaat ilaat illumiit illumut oqaluus­sinissamut nukissaqarneq ajorput. Kisianni immaqa atuagaasiviit angallattakkat atorlugit utoqqaq oqaluus­seqatigisinnaavat. Immaqa allaat issiavimmik nassaas­sinnaavat. Imaluunniit Biibilimik misissueqateqarninni utoqqaq ilaasinnaava? Immaqa taassuma angerlarsimaffiani misissueqatigiis­sinnaavusi. Utoqqaat ilaat angerlarsimaf­fimminni katersuut­toqarnissaa oqaluus­sinissaminnut iluaqutigisin­naavaat. Taamaappat utoqqaanertat tamanna pilersaarusiorsin­naavaat. Utoqqaat ataqqiniarlugit ilungersornigut Jehovap nuannaarutigai. – Uss 3:27; Rom 12:10.

18. Allaaserisami tulliuttumi suna sammissavarput?

¹⁸ Allaaserisami matumani eqqaasin­neqarpugut Jehovap utoqqaat asallugillu naleqartikkai. Uaguttaaq utoqqaat asavagut! Utoqqaasutit, ajornar­torsiuterpas­suaqaraluarlutit Jehovap ikiuineratigut nuannaar­tuarsin­naavutit. (Tuss 37:25) Qiimmaal­lannaqaaq nalunagu siunissami inuuneq massakkut siornatigullu atukkannit pitsaanerungaassasoq! Taavami ilaquttaminnik utoqqalisimasumik, meeqqamik ikinngum­milluunniit napparsimasumik isumaginnittut qanoq nuannaar­tuarsin­naappat? Apeqqut tamanna allaaserisami tulliuttumi akissutis­sarsissavarput.