Biilertarun­naassaanga?

Tamanna ilisaraajuk? Illiusimasuuppammi, qanoq paasisin­naaviuk biilertarun­naassanerlutit?

Nunat ilaanni biilertartut aalajangersimasunik ukioqaleraangamik biilertarnertik ingerlatiin­narsinnaaneraat nalilersor­tinniarlugu nakorsamit misissor­neqaqqaartarput. Kristumiut nunani taakkunaniittut soorunami inatsisit malittarpaat. (Rom 13:1) Nunamili najugaqarfinni taamaattunik inatsiseqan­ngikkaluarpal­luunniit suli isumannaatsumik biilersin­naanerlutit nalilersor­tarukku silatusaassaatit.

BIILERTARNERIT NALILERSORTARUK

Peqatigiiffik utoqqaat atugaris­saarnis­saannut paasissutis­siisartoqa siunnersuivoq utoqqaat apeqqutit uku eqqarsaatigisassagaat:

• Aqqusinerni nalunaaqutsersuutit atuaruminaatsit­tarpakka, taartumiluunniit biileraangama isigiarsut­tarpunga?

• Tunumut qiviariataar­nissara tarrarsuutillu atorluar­nerisigut misissueq­qissaar­nissara ajornakusoor­tittalersimavakka?

• Qisuariarsin­naanera, soorlu sukkalisaammiit unittaammut periataar­tarnera, arriinnerulersimava?

• Allaniit arriinnerujus­suarmik biilertarpunga?

• Ajutumiingajat­tarsimavunga imaluunniit arlaannut aportarsimagama biilikka kigarneqarpat singarneqarlutil­luunniit?

• Biileriaasera pillugu politiinit unitsin­neqarsimavunga?

• Biilinik aqutsillunga sinilingajas­simavunga?

• Biilinik ingerlatsininnut sunniuteqarsin­naasumik nakorsaatitor­tarpunga?

• Ilaquttakka ikinngutik­kaluunniit biileriaasera pillugu ernumanerarsimappat?

Apeqqutit taakkua ilaat ataaseq marlulluunniit angerukkit immaqa allannguisariaqassaatit. Assersuutigalugu aalajangersin­naavutit biilerpal­laarunnaar­niarlutit, ingammik taartumi. Isumannaatsumik biilertuarsin­naanerlutit nalilersortaruk. Ilaquttat ikinngutil­luunniit aperisinnaavat biilertarnerit qanoq isumaqarfigineraa. Aamma eqqarsaatigisinnaavat biilernermut pikkoris­sassanerlutit. Kisianni apeqqutit marluk sinnerlugit angerukkit immaqa biilertarun­naarnissannut piffissan­ngorsimavoq.b

BIIBILI AALAJANGIIL­LUARNISSANNUT ILUAQUTIGISINNAAVAT

Immaqa biilinik ingerlatsil­luarunnaarsimanerit maluginngilat. Immaqalu biilertarun­naarnissat eqqarsaatigilerukku aliasulissaatit pakatsil­lutillu. Taavami eqqarsarluar­nissannut silatusaar­tumillu aalajangiinissannut Biibili qanoq iluaqutigisin­naaviuk? Najoqqutassiat marluk sammilaariartigit.

Anneruniajuitsuugit. (Uss 11:2) Utoqqaliar­tornitsinni isigiarsulersin­naavugut, tutsarlulersin­naavugut aamma qisuariar­tarnigut arriinnerulersin­naapput nukigullu sanngiin­neruleriar­torlutik. Taamaattumik amerlasuut utoqqaligaangamik aalajangersimasumik timersorun­naartarput ajoqusersin­naanertik paasigaangamikku. Aamma biilernermut tunngatillugu taamaappoq. Inuup anneruniajuitsuusup pisinnaasami killeqarnerat nassuerutigisaramigit paasilissavaa qaqugu biilertarun­naartariaqarluni imminut navianarsimmat. (Uss 22:3) Allallu isumakuluutigippassuk maniguulluni biilertarnini pillugu qanoq oqaaseqarnersut tusarnaarumassavai. – Aamma takukkit Samuelimik 2. 21:15-17.

Allanik ajoquseerusun­ngilatit. (Mos 5. 22:8) Biilit ajoquseerujus­suarsin­naapput. Isumannaatsumik biilersin­naajunnaareeraluarluni biilerniinnartoq inuunerminik allallu inuunerannik navianar­torsior­titsivoq, allaallu ajunaarnermi toqusoqarpat pisuussutigisin­naallugu.

Biilertarun­naartariaqassaguit imaanngilaq inuttut naleqarun­naartutit. Jehovap qamuuna qanoq ittuunerit pillugu asavaatit. Nuannaarutigeqaa anneruniajuitsuul­lutillu maniguukkavit allallu isumannaatsumik pinissaat pingaar­tikkakku. Neriorsorpaatit tapersersorumallutit tuppallersarusul­lutillu. (Es 46:4) Qimanngisaan­nassavaatit. Taamaattumik ilisimas­susermik naliliil­luarsin­naanermillu tuneqqullutit qinnuigisaruk, taamaalillutit silatusaartumik aalajangiisin­naanias­sagavit.