Jehova, Guuti qiimmassaasartoq, ilaaruk

1. Adami Evalu pikitsitsim­mata Jehova inuian­nik qanoq qiim­mas­saal­lunilu neriuuteqalersitsiva?

INUIT ajor­tuliormatali naam­mal­luin­nar­tuujun­naarmatalu Jehovap Guutiul­luni qiim­mas­saajuar­toq up­per­narsar­paa. Al­laat Adami Evalu Guutimut pikitsitsinerisa kingunitsian­ngua Jehovap siulit­tuut, siunis­sami inun­ngor­tus­sanit paasineqaruni qiim­mas­saataal­lunilu neriuuteqalersitsisus­saq, oqaatigaa. Siulit­tuum­mi tas­sani Mosesimik al­lak­kat siul­liit 3:15-imi al­las­simasumi neriorsuutigineqar­poq Saatani Diaavulu ajor­tuliaalu tamarmik suujun­naarsin­neqas­sasut. – 1 Joh 3:8; Saqq 12:9.

ITSAQ JEHOVAP KIFFANI QIIMMASSARPAI

2. Jehovap Noa qanoq qiim­mas­sar­paa?

² Jehova kif­faminik Noamik qanoq qiim­mas­saasoq eq­qarsaatigiuk. Taamani inuit nakuuser­tarlutil­lu kinguaas­siuutitigut inuunerlut­tut akor­nan­ni Noa ilaqutaalu kisiar­taal­lutik Jehovamik pal­lorfigin­nip­put. Noa nikal­lorsimasin­naagaluar­poq. (1 Mos 6:4, 5, 11; Jud 6) Jehoval­li Noa im­minik pal­lorfigin­nit­tuaq­qul­lugu eq­qor­tulior­tuaq­qul­lugulu pisariaqar­titaanik qiim­mas­sar­paa. (1 Mos 6:9) Jehovap silarsuaq ajor­toq suujun­naarsin­niaramiuk Noa nas­suiaap­paa ilaqut­tanilu aniguiumal­luni qanoq ilior­tariaqar­toq. (1 Mos 6:13-18) Jehova Noamut Guutiuvoq qiim­mas­saasar­toq.

3. Jehovap Josva qanoq qiim­mas­sar­paa? (Al­laaserisap aal­laq­qaataani as­siliaq takuuk).

³ Kingusin­nerusuk­kut Jehovap kif­fani Josva, an­ner­tuumik sulias­saqar­toq, qiim­mas­sar­paa. Guutip in­nut­tai Josvap nunamut neriorsuutigisamut siulersor­tus­saal­lugil­lu inuiaqatigiit tas­sani najugaqar­tut sak­kutuui pis­sarsuit ajugaaf­figisus­saavai. Josva an­nilaanganis­samut pis­sutis­saqarluar­toq Jehovap nalun­ngin­namiuk Mosesi ima oqarfigaa: “Josva siulersuisun­ngor­tiguk sapiis­suseqalersil­lugu pis­satsil­lugulu! Taas­suma Israelik­kut siulersorlugit ikaar­tis­savai, nunalu maan­na takusas­sat taak­kunun­nga pis­sarsiaritis­savaa.” (5 Mos 3:28) Taava Jehovap nam­mineq Josva ima oqarluni qiim­mas­sar­paa: “Uangami iver­tis­simavak­kit; tup­pal­lerit pis­satsil­lutil­lu! Erseqinak nikal­lor­nal­luun­niit; uangami Naalagaq, tas­saasunga Guuti, najor­pak­kit qanoq ilior­nin­ni tamani.” (Jos 1:1, 9) Josva taama oqarfigineqarami qanoq misigisimas­sasoraajuk?

4, 5. (a) Itsaq Jehovap in­nut­tani qanoq qiim­mas­sar­pai? (b) Jehovap er­nini qanoq qiim­mas­sar­paa?

⁴ Jehovap in­nut­tani eqimat­tatut aam­ma qiim­mas­sar­pai. As­sersuutigalugu nalun­ngin­namiuk juutit Babylonimi aal­larus­saaq­qanermin­ni qiim­mas­sar­neqar­tariaqar­tut qiim­maal­lan­nar­tumik ima siulit­tuivoq: “Siooraqinak ilagigak­kit, erseqinak, uangaagama il­lit Guutit. Nakus­satsip­pak­kit ikiorlutil­lu, as­san­nik ajugaasar­tumik najum­mivak­kit.” (Es 41:10) Kingusin­nerusuk­kut Jehovap kristumiut siul­liit qiim­mas­sar­pai, aam­ma taamatut uatsin­nik qiim­mas­saasar­poq. – 2 Korinthimiut 1:3, 4 atuakkit.

⁵ Jehovap aam­ma er­nini qiim­mas­sar­paa. Jiisusip kuisereerluni nipi qilam­mit ima tutsiut­toq tusar­paa: “Tas­sa er­nera asasara, nuan­narisara.” (Matt 3:17) Oqaatsit taak­kua Jiisusip nunarsuarmi kif­far­tor­nermini qanoq nakus­satsis­sutigitiginerai takorloorsin­naaviuk?

JIISUSIP ALLAT QIIMMASSARPAI

6. Jiisusip talentit pil­lugit as­sersuusiaa qanoq qiim­maal­laatigisin­naavar­put?

⁶ Jiisusip al­lat aalajaaq­qul­lugit qiim­mas­sar­nerisigut Ataatani ilaar­paa. Talentit pil­lugit as­sersuusiamini taamaalior­poq, tas­sani naalak­kap kif­fat aalajaatsut tamaasa ima oqarfigai: “Ajun­ngilaq, kif­faasutit pitsaasoq ilumoor­torlu, an­nikitsutigut ilumoorsimagavit amerlasuunut pisor­tan­ngor­tis­savak­kit. Naalak­kavit tipaatsuf­fianut iserit.” (Matt 25:21, 23) Oqaatsit taak­kua ajoqersuk­kat aalajaal­lutik Jehovamut kif­far­tor­tuar­nis­samut nakus­satsis­sutigaat!

7. Jiisusip apustilini, pingaar­tumik Petrusi, qanoq qiim­mas­sar­pai?

⁷ Jiisusip apustilit ilaan­nik­kut pakatsisit­taraluaraan­ni qiim­mas­sar­tuar­pai. Kina arlar­tik an­nerunersoq oq­qas­sutigiuaraluaraat Jiisusip kamagit­tarluni al­lanut naalagaaniaq­qunagit maniguut­tooq­qul­lugil­li al­lanul­lu kif­far­toq­qul­lugit kajumis­saar­pai. (Luk 22:24-26) Petrusi arlaleriarluni kuk­kul­lunilu Jiisusimik pakatsisitsivoq. (Matt 16:21-23; 26:31-35, 75) Jiisusil­li Petrusi ajat­tun­ngisaan­nar­paa. Qiim­mas­sar­paali al­laal­lu al­lanik nakus­satsitsinis­samik sulias­sil­lugu. – Joh 21:16.

ITSAQ QIIMMASSAASUT

8. Hizkijap sak­kutuut naalagaaner­taat Judak­kul­lu qanoq qiim­mas­sar­pai?

⁸ Jiisusip nunarsuarmi qiim­mas­saanermik maligas­siuinera al­laat sioq­qul­lugu Jehovap kif­faasa nalun­ngilaat al­lanik qiim­mas­saasariaqarlutik. Hizkija eq­qarsaatigiuk. Taas­suma As­syriamiut Jerusalemimik saas­sus­silermata sak­kutuut naalagaaner­taat inuil­lu katersor­tip­pai qiim­mas­sar­niarlugit, inuil­lu Hizkijap oqaasii ‘nakus­satsis­sutigaat’. – 2 Nalunaarsuutit 32:6-8 atuakkit.

9. Qiim­mas­saaneq pil­lugu Jobi qanoq ilin­niarfigisin­naavar­put?

⁹ Qiim­mas­saaneq pil­lugu aam­ma Jobi ilin­niarfigisin­naavar­put. Qiim­mas­sar­neqar­nis­sani pisariaqar­tik­kaluarlugu al­lat qanoq qiim­mas­saanis­saan­nik ilin­niar­tip­pai. Jobip angutit im­minik tup­pal­lersaajar­tor­tut oqarfigai nam­mineq tup­pal­lersar­tus­saasuugunigit nikal­lus­sutigisaan­nik oqarfiginagit nakus­satsis­sutigisaan­nik nuan­naalis­sutigisaan­nil­lu oqarfigis­sal­lugit. (Job 16:1-5) Naggataatigul­li Jobi Elihumit Jehovamil­lu qiim­mas­sar­neqar­poq. – Job 33:24, 25; 36:1, 11; 42:7, 10.

10, 11. (a) Sooq Jeftap pania qiim­mas­sar­neqar­tariaqar­pa? (b) Kik­kut qiim­mas­sarsin­naavavut?

¹⁰ Jeftap pania aam­ma qiim­mas­sar­neqar­tariaqar­poq. Angutaa, eq­qar­tuus­sisoq Jefta, Am­monik­kun­nut sorsugiar­tus­saavoq. Taas­suma Jehova neriorsor­paa sorsun­nermi ajugaanis­samut ikior­pani angerlaruni im­minik parsiaasoq siul­leq Tupermi Naapeqatigiit­tarfim­mi Jehovamut kif­far­tor­tus­satut tun­niun­neqas­sasoq. Israeli sorsun­nermi ajugaavoq, Jeftamil­lu parsiaasoq siul­leq tas­saavoq pania, qitor­natuaa. Jefta aliasungaar­poq. Neriorsuutinili eq­qor­til­lugu panini inuunermi sin­nera Tupermi Naapeqatigiit­tarfim­mi kif­far­tor­tus­satut aal­lar­tip­paa. – Eqq 11:30-35.

¹¹ Taman­na Jeftamut ar­tor­naraluar­toq panianut suli ar­tor­nar­nerusimas­saaq. Paniali ataatami neriorsuisimaneratut iliorusup­poq. (Eqq 11:36, 37, tastamantitoĸaĸ) Neriorsuutaa pis­sutigalugu aap­par­taan­ngisaan­narlunilu meerar­taan­ngisaan­nas­saaq. Kinguaariit atiat ingerlateq­qin­neqarsin­naajun­naas­saaq. Tup­pal­lersar­neqar­nis­sani qiim­mas­sar­neqar­nis­sanilu pisariaqar­tingaar­paa. Biibilimi al­las­simavoq Israelimi ileq­quulersoq ar­nat Israelik­kuusut ukiut tamaasa ul­luni sisamani Jeftap panianik un­nersiutigin­nik­kiar­tor­tar­nerat. (Eqq 11:39, 40, tastamantitoĸaĸ) Jeftap pania nalitsin­ni kristumiunik Jehovamut iliuuseqar­nerujumal­lutik aap­paqan­ngitsunik eq­qaasitsis­sutigaar­put. Taak­ku nersualaarlugil­lu qiim­mas­sarsin­naavavut? – 1 Kor 7:32-35.

APUSTILIT QATANNGUTITIK QIIMMASSARPAAT

12, 13. Petrusip ‘qatan­ngutini qanoq qiim­mas­sar­pai’?

¹² Jiisusip un­nuk­kut toqus­si aqagut­toq apustili Petrusi ima oqarfigaa: “Siimuut, Siimuut! Saatanip piumavaasi qajuusias­satut nak­kalatserumal­lusi, uangali qin­nup­pak­kit up­persutsit soraaq­qunagu. Qaqugulu saak­kuit qatan­ngutitit nakus­satsik­kigit.” – Luk 22:31, 32.

¹³ Petrusi kristumiut siul­liit ilagiivini siulersuisut ilagaat. (Gal 2:9) Piinsip ul­luani tamatumalu kingor­na sapiil­luni iliuuseqar­nermigut qatan­ngutini qiim­mas­sar­pai. Ukior­pas­suar­ni kif­far­toreerluni qatan­ngutini ima al­laf­figai: “Taama naak­kaluar­tumik al­laf­figaas­si ... qiim­mas­sarumal­lusi up­per­narsarumal­lugulu taman­na tas­saasoq Guutip saam­maan­nera piviusuusoq; taan­na aalajangiun­niarsiuk.” (1 Petr 5:12) Kristumiut siul­liit Petrusip al­lagai qiim­mas­saatigaat. Uagut­taaq Jehovap neriorsuutaasa tamak­kiisumik eq­quun­nis­saat utaq­qitil­lugit qiim­mas­saatigaavut! – 2 Petr 3:13.

14, 15. Biibilimi apustilip Johan­nesip al­lagai qanoq qiim­mas­saatigaavut?

¹⁴ Aam­ma apustili Johan­nesi kristumiut siul­liit ilagiivini siulersuisut ilagaat. Taas­suma Jiisusip kif­far­tor­nera pil­lugu iivangkiiliu pis­sanganar­toq al­lap­paa. Biibilimi atuagaq taan­na ukiuni hundredilin­ni kristumiunut qiim­mas­saataasoq suli qiim­mas­saatigisar­par­put. As­sersuutigalugu Jiisusip ajoqersuk­kat ilumoor­tut asan­nin­nermik ilisar­naateqar­nis­saan­nik oqaasii Johan­nesip iivangkiiliuani taamaal­laat atuarsin­naavavut. – Johannesi 13:34, 35 atuakkit.

¹⁵ Johan­nesip al­lagai pingasut aam­ma sal­lusuis­sutinik erlin­nar­tunik imaqar­put. Kuk­kus­sutivut pis­sutigalugit nikal­lungagaangat­ta Jiisusip uter­titsis­sutitut pil­liutaata ‘tamanik ajor­taajas­sagaatigut’ atuarlugu nuan­naajal­lat­tar­pugut. (1 Joh 1:7) Uum­matit­talu pil­lagas­saatit­tuar­patigut ‘Guutip uum­matitsin­nit an­nerunera’ pil­lugu atuar­neq tup­pal­lersaatigis­savar­put. (1 Joh 3:20) Biibilimik al­laqataasuni Johan­nesi kisiar­taal­luni al­lap­poq ‘Guuti tas­saasoq asan­nin­neq’. (1 Joh 4:8, 16) Al­lak­kami aap­paan­ni pingajuinilu kristumiut “sal­lusuis­sum­mi inuusut” nersualaar­pai. – 3 Joh 3, 4; 2 Joh 4.

16, 17. Apustilip Paulusip kristumiut siul­liit qanoq qiim­mas­sar­pai?

¹⁶ Apustili Paulusi qatan­ngutinik qiim­mas­saanermut tun­ngatil­lugu maligas­saal­luar­poq. Jiisusip toqunerata kingunitsian­ngua apustilit amerlanerit siulersuisoqatigiit Jerusalemimi il­loqarfeqatigaat. (ApS 8:14; 15:2) Judæami kristumiut inun­nut Guutimut up­per­tooreersunut Kristusi pil­lugu oqaluus­sip­put. Anersaal­li il­ler­nar­tup Paulusi grækerinut, Romamiunut al­lanul­lu guuter­pas­suar­nik pal­lorfigin­nit­tunut aal­lar­tip­paa. – Gal 2:7-9; 1 Tim 2:7.

¹⁷ Paulusi nunami maan­na Tyrkiamik taaneqar­tar­tumi aam­ma Grækenlandimi Italiamilu angalavoq juutiun­ngitsunut oqaluus­sil­lunilu kristumiut ilagiivinik pilersitsisarluni. Kristumiun­ngorlaat inuunerat imaan­naan­ngilaq. Nunaq­qatimin­nit malersor­neqaramik qiim­mas­sar­neqar­tariaqar­put. (1 Th 2:14) Ukiup 50-ip mis­saani Paulusip Thes­salonikami ilagiit pilersin­neqaq­qam­mersut qiim­mas­sar­niarlugit ima al­laf­figai: “Tamas­si Guutimut qujas­sutigisaan­nar­pas­si qinul­luta taagaangas­si kipisuitsumil­lu ... eq­qaaniar­tarlugit up­per­nermi suliasi, asan­nin­nermi as­soroor­nersi nikal­lujuin­nersilu.” (1 Th 1:2, 3) Aam­ma im­min­nut nakus­satsit­taq­quai ima al­laf­figalugit: “Tup­pal­lersaqatigiigitsi ineriar­tor­teqatigiigitsilu.” – 1 Th 5:11.

SIULERSUISOQATIGIIT QIIMMASSAASARPUT

18. Kristumiut siul­liit nalaan­ni siulersuisoqatigiit qanoq Filipi qiim­mas­sar­paat?

¹⁸ Kristumiut siul­liit nalaan­ni siulersuisoqatigiit ilagiin­ni siulersuisunik kristumioqatimin­nil­lu qiim­mas­saasar­put. Filipi Samariamiunut Kristusi pil­lugu oqaluus­sim­mat siulersuisoqatigiit tapersersor­paat. Ilaasor­taqatitik marluk, Petrusi Johan­nesilu, kristumiun­ngorlaat anersaamik il­ler­nar­tumik peqaleq­qul­lugit qin­nus­sinias­sam­mata aal­lar­tip­paat. (ApS 8:5, 14-17) Filipi qatan­ngutil­lu kuiserlaat siulersuisoqatigiin­nit tapersersor­neqar­ner­tik as­sut qiim­maal­laatigaat!

19. Kristumiut siul­liit siulersuisoqatigiin­nit al­lak­kat atuaramik­kit qanoq misigip­pat?

¹⁹ Kingusin­nerusuk­kut siulersuisoqatigiit pingaarutilim­mik aalajangiisariaqaler­put. Kristumiut hebræeriun­ngitsut Mosesip inatsisai malil­lugit juutit pisar­nerat­tut kipineqar­tas­sap­pat? (ApS 15:1, 2) Siulersuisoqatigiit anersaaq il­ler­nar­toq qin­nutigereerlugu Al­lak­kal­lu Il­ler­nar­tut eq­qarsaatigeq­qis­saareerlugit aalajanger­put taman­na pisariaarut­toq. Aalajangius­sar­tik nas­suiarlugu al­lap­put al­lak­katil­lu ilagiin­nut tun­niuteq­qul­lugit qatan­ngutit angutit aal­lar­til­lugit. Kristumiut al­lak­kat qiim­maal­lan­nar­tut “nuan­naarutigaat”. – ApS 15:27-32.

20. (a) Nalitsin­ni Siulersuisoqatigiit tamatsin­nik qanoq qiim­mas­saasar­pat? (b) Apeq­qut suna al­laaserisap tul­liani eq­qar­tus­savar­put?

²⁰ Nalitsin­ni Jehovap Nalunaajaasuisa Siulersuisoqatigiivi Betelimi kif­far­tor­tunik, im­mik­kut it­tumik pif­fis­saq tamaat kif­far­tor­tunik tamatsin­nil­lu qiim­mas­saasar­put. Kristumiut siul­liit pisimanerat­tut qiim­mas­sar­neqar­neq nuan­naarutigisar­par­put! Aam­ma sal­lusuis­sum­mik qimatsisimasut uter­nis­samut kajumis­saar­niarlugit Siulersuisoqatigiit 2015-imi qup­persagaq Jehovamut uterit saq­qum­mersip­paat. Qatan­ngutil­li angutit siulersuisut kisimik qiim­mas­saasas­sap­pat imaluun­niit tamat­ta taamaalior­tas­saagut? Apeq­qut taan­na al­laaserisap tul­liani eq­qar­tus­savar­put.