“Qiimmassaqatigiitta, pingaartumik maanna”

1. Sooq apustilip Paulusip kristumiut hebræerit siul­liit “pingaar­tumik maan­na” qiim­mas­saqatigiit­tar­nis­samik kajumis­saar­pai?

APUSTILIP Paulusip kristumiut hebræerit siul­liit ima siun­nersor­pai: “Asaqatigiin­nis­samut ajun­ngitsulior­nis­samul­lu kajumis­saaqatigiin­nias­sagat­ta isumas­soqatigiit­ta. Ilaasa pisar­nerat­tut ataatsimiigian­ngitsoor­tarata kisian­ni qiim­mas­saqatigiit­ta, pingaar­tumik maan­na ulloq qanillisoq takusinnaagassiuk.” (Hebr 10:24, 25, NW) Qatan­ngutit eq­qarsaatigisimas­savaat sooq Paulusip suli an­nerusumik qiim­mas­saqatigiit­taq­qugaatsik. Ukiut tal­limat qaangiutin­ngitsul­luun­niit pis­sutaasoq paasinarsivoq. Taamani Jehovap ul­loq Jerusalemimik eq­qar­tuus­sif­fiata nal­liutingajaler­nera takuaat. Paasivaat Jiisusip oqarsimaneratut il­loqarfim­mit qimaasariaqarlutik. (ApS 2:19, 20; Luk 21:20-22) Jehovap ul­lua ukiumi 70-imi, Romamiut Jerusalemi piujun­naarsim­mas­suk, nal­liup­poq.

2. Sooq ul­lumik­kut qiim­mas­saqatigiin­nis­sar­put eq­qarsaatiginerusariaqar­par­put?

² Uagut­taaq Jehovap ‘ul­luata angeqisup siooranaqisul­lu’ nal­liutingajaler­nerata up­perinis­saanut pis­sutis­saqarluar­pugut. (Joel 2:11) Pruf­fiitip Sefaniap al­latai aam­ma nalitsin­nut tun­ngap­put: “Qanil­livoq Naalak­kap ul­lus­sarsua; qanil­liar­tuler­toqaaq!” (Sef 1:14) Taman­na pis­sutigalugu ‘asaqatigiin­nis­samut ajun­ngitsulior­nis­samul­lu kajumis­saaqatigiin­nias­sagat­ta isumas­soqatigiit­tariaqar­pugut’. (Hebr 10:24, NW) Qatan­ngutivut pisariaqar­titsigaangata qiim­mas­sarsin­naanias­sagatsigit suli an­nerusumik soqutigisariaqar­pavut.

KIKKUT QIIMMASSARNEQARNISSAMIK PISARIAQARTITSIPPAT?

3. Apustili Paulusi qiim­mas­saaneq pil­lugu qanoq al­lap­pa? (Al­laaserisap aal­laq­qaataani as­siliaq takuuk).

³ “Isumakuluuteqar­nerup inuup uum­mataa ar­torsaatis­sit­tar­paa, qiim­mas­saal­lunili oqaaserisat nuan­naalersit­tar­paat.” (Uss 12:25) Tamat­ta qiim­mas­sar­neqar­nis­sar­put pisariaqar­tit­tar­par­put. Paulusi erseq­qis­sumik al­lap­poq al­laat al­lanik qiim­mas­saanis­samik akisus­saaf­fil­lit qiim­mas­sar­neqar­tariaqar­tut. Qatan­ngutini Romamiut ima al­laf­figai: “[Takorusuk­kaluaqaas­si] ilangiisik­kumal­lusi Anersaap tunis­sutaanik, nakus­satsitaaq­qul­lusi, tas­sa: ilis­si uangalu up­perisaqaqatigiin­nitsigut ilis­sin­ni kajumis­saaqatigiis­sin­naaq­qul­luta.” (Rom 1:11, 12) Aap, al­laat apustilip Paulusip qiim­mas­sar­neqar­nis­sani pisariaqar­tit­tar­paa. – Romamiut 15:30-32 atuakkit.

4, 5. Ul­lumik­kut kik­kun­nik qiim­mas­saasin­naavugut, aam­ma sooq?

⁴ Ul­lumik­kut pif­fis­saq tamaat Jehovamut kif­far­tor­tut, soorlu pionerit aalajaatsut, qiim­mas­sarsin­naavavut. Taak­kua ilar­pas­suisa pioneriujumal­lutik inuunermin­ni nuan­narisatik pil­liutigisimavaat. Aam­ma ajoqersuiar­tor­titat, Betelimi kif­far­tor­tut, ilagiin­nik nak­kutil­liisut nuliaal­lu aam­ma nutserivin­ni kif­far­tor­tut taamaaliorsimap­put. Taak­ku tamarmik pif­fis­saq an­nerusoq Jehovamut kif­far­tor­nermut atorumal­lugu pil­liuteqarsimap­put. Taamaat­tumik qiim­mas­sar­tariaqar­pavut. Aam­ma amerlasuut pif­fis­saq tamaat kif­far­torusuk­kaluarlutik taamaalior­nis­samut periarfis­saqarun­naarsimap­put. Taak­ku aam­ma qiim­mas­sar­neqar­ner­tik qujamasuutigisar­paat.

⁵ Kik­kut aam­ma qiim­mas­sar­neqar­tariaqar­pat? Qatan­nguter­pas­suit angutit ar­nal­lu Jehovamut naalak­kusun­ner­tik aam­ma “Naalak­kami” taamaal­laat katik­kusun­ner­tik pis­sutigalugit aap­paqar­niar­natik aalajangersimasut qiim­mas­sarsin­naavavut. (1 Kor 7:39) Nuliaasut uimin­nit asaneqarlutik oqarfigineqaraangamik iliuutsitil­lu pil­lugit qujamasun­nermik ersersitsivigineqaraangamik qiim­maal­lat­tar­put. (Uss 31:28, 31) Kristumiut malersor­neqar­nermin­ni nap­parsimanermin­niluun­niit piner­tusaar­tut aam­ma qiim­mas­sar­neqar­tariaqar­put. (2 Th 1:3-5) Jehova Jiisusilu taak­kunin­nga aalajaatsunik tamanik tup­pal­lersaasar­put. – 2 Thessalonikamiut 2:16, 17 atuakkit.

UTOQQAANERTAT QIIMMASSARSINNAAVAATIGUT

6. Esaja 32:1, 2-milu utoq­qaaner­tat pil­lugit suna ilik­kar­par­put?

⁶ Esaja 32:1, 2 atuakkit. Pif­fis­sami erloqinar­tumi inuugat­ta isumatsariaan­naal­lutalu nikal­loriaan­naavugut. Jiisusip Kristusip ‘naalagar­tat’ aalajaatsut, utoq­qaaner­tat angutit tanitat savanul­lu al­lanut ilaasut, atorlugit qiim­mas­sar­tar­paatigut. Ilagiin­ni utoq­qaaner­tat taak­ku ‘up­per­nitsin­nut naalagaan­ngil­lat, nuan­naar­tuar­nis­sar­pul­li suleqataaf­figaat’. Nuan­naaq­qul­luta aalajaaq­qul­lutalu ikiorusup­paatigut. – 2 Kor 1:24.

7, 8. Utoq­qaaner­tat oqaatsimik­kut iliuutsimik­kul­lu al­lanik qanoq qiim­mas­saasin­naap­pat?

⁷ Utoq­qaaner­tat apustili Paulusi, qatan­ngutiminik qiim­mas­saaniar­tuar­toq, ilaarsin­naavaat. Paulusip Thes­salonikami kristumiut malersugaasut ima al­laf­figai: “Asal­lusi kis­saatigisimavar­put Guutip iivangkiiliuanik tuniin­narasi aam­mat­taaq inuuner­put tun­niutis­sal­lugu, nuan­narisarilersimagas­simi.” – 1 Th 2:8.

⁸ Utoq­qaaner­tat oqaatsimik­kut qiim­mas­saangaarsin­naap­put. Taman­nali tamatigut naam­mat­tar­pa? Paulusip Efesosimi utoq­qaaner­tat oqarfigai “san­ngiitsut isumagisariaqar­tut Naalak­kal­lu Jiisusip nam­mineq oqaasii imaat­tut eq­qaamasariaqar­tut: ‘Tunisineq pil­luar­nar­neruvoq tigusinermit.’” (ApS 20:35) Paulusip qatan­ngutini pil­lugit ‘suna tamaat atorumavaa al­laat nungul­luni ator­neqarumal­luni’. (2 Kor 12:15) Taamatut­taaq utoq­qaaner­tat qatan­ngutitik oqaatsimik­kuin­naan­ngitsoq kisian­ni aam­ma iliuutsimik­kut qiim­mas­sarlugil­lu tup­pal­lersar­tariaqar­paat. Tamatuman­nga uagutsin­nik soqutigin­ningaar­nerat erser­poq. – 1 Kor 14:3.

9. Utoq­qaaner­tat qiim­maal­laataasumik qanoq naq­qiisin­naap­pat?

⁹ Qatan­ngutit nakus­satsik­kumal­lugit ilaan­nik­kut utoq­qaaner­tat naq­qiisariaqar­tar­put. Utoq­qaaner­tat qiim­maal­laataasumik qanoq taamaaliorsin­naanerlutik Biibilimi paasisin­naavaat. Jiisusi toqunermi kingor­na makititaareerluni Asiaaq­qami ilagiit tusarleramigit naq­qiinermut tun­ngatil­lugu maligas­saal­luar­poq. Efesosimi, Pergamonimi Thyatiramilu ilagiit sukan­nersumik naq­qip­pai. Naq­qiin­ngin­nerminili ajun­ngitsuliar­pas­sui pil­lugit nersualaaq­qaar­pai. (Saqq 2:1-5, 12, 13, 18, 19) Jiisusip Laodikeami ilagiit ima paasitip­pai: “Asasak­ka tamaasa pil­larlugil­lu anusin­ngorsar­tar­pak­ka. Ilungersorit al­lamil­lu isumataarlutit!” (Saqq 3:19) Utoq­qaaner­tat naq­qiigaangamik Kristusi ilaar­niar­tar­paat.

QIIMMASSAANISSAQ UTOQQAANERTAT KISIMIK AKISUSSAAFFIGINNGILAAT

10. Tamat­ta qanoq nakus­satseqatigiis­sin­naavugut?

¹⁰ Utoq­qaaner­tat kisimik al­lanik qiim­mas­saasus­saan­ngil­lat. Paulusip kristumiut tamaasa ima kajumis­saar­pai: “[Oqaatsinik] ajun­ngitsuin­nar­nik aniatitaqaritsi ineriar­tor­nis­samut pisariaqar­tunik, tamak­ku tusar­tunut pil­luaatis­saaq­qul­lugit.” (Ef 4:29) Tamat­ta al­lat ikiorsin­naajumal­lugit pisariaqar­titaat eq­qumaf­figisariaqar­pavut. Paulusip kristumiut hebræerit ima al­laf­figai: “As­saat qasusut seeq­qul­lu nukil­laar­tut pis­satsis­sigit, narlumuin­narlu pisul­lusi ingerlagitsi nukil­laarsimasoq pil­lut­tooq­qunagu ajorun­naarsitaaq­qul­luguli.” (Hebr 12:12, 13) Tamat­ta, al­laat meeraagaluarut­ta, oqaatsitigut nakus­satseqatigiis­sin­naal­lutalu qiim­mas­saqatigiis­sin­naavugut.

11. Mar­thap isumatsaq­qangaar­nermini suna iluaqutigaa?

¹¹ Qatan­ngut ar­naq Mar­tha pif­fis­sap ilaani isumatsaq­qangaar­poq.a Ima al­lap­poq: “Qiim­mas­sar­neqarusul­lunga qinoreerlunga qatan­ngutip utoq­qaap ar­nap asan­nin­nermik misigin­neqatigin­nin­nermil­lu, taamani pisariaqar­til­luin­nak­kan­nik, ersersitsivigaanga. Aam­ma tamatumun­nga as­singusumik misilin­neqarsimanerminik oqalut­tuum­manga kisimiin­ngin­nerusutut misigivunga.” Qatan­ngutip ar­nap tas­saqa ilisimavaa oqaatsini Mar­thap qanoq iluaqutigisimatigigai!

12, 13. Siun­nersuut Filip­pimiut 2:1-4 al­las­simasoq qanoq maleruarsin­naavar­put?

¹² Paulusip Filip­pimi kristumiut ima al­laf­figai: “Kristusimi tup­pal­lersagaaneq pingaaruteqar­pat, asan­nit­tumik qiim­mas­saasoqar­pat, Anersaak­kut ilagiis­soqar­pat, asan­nit­tumik misigin­neqataaneq pingaaruteqar­pat, taava tipaatsus­susera naam­matsis­siuk ataasiusumik isumaliorlusi, ataasiusumik asan­nis­suseqarlusi, isum­mas­sigul­lu ataasiul­lusi. Nam­minis­sarsior­neq im­minul­luun­niit angisuutin­neq tun­ngavigalugit iliuuseqar­taqinasi, makitajuitsuunis­sigul­li al­lat ilis­sin­nit an­nerutis­sigit. Tamas­si im­mik­kut nam­mineq iluaqutis­sarsi pin­nagu inoqatis­sis­saaq iluaqutis­saat isumagisiuk.” – Fil 2:1-4.

¹³ Tamat­ta ikiuinis­samut periarfis­sarsior­tariaqar­pugut. Qatan­ngutivut qiim­mas­sarumal­lugit ‘asan­nit­tumik qiim­mas­saasin­naavugut’, ‘anersaak­kut ilagiis­sin­naavugut’, tas­sa isumas­suinermik ersersitsisin­naavugut, aam­ma ‘asan­nit­tumik misigin­neqataasin­naavugut’.

QIIMMASSAARIAATSIT ILAAT

14. Qanoq aam­ma qiim­mas­saasin­naavugut?

¹⁴ Siusin­nerusuk­kut ikiorsimasat­ta aalajaat­tuar­nerat tusarlugu nuan­naarutigisar­par­put. Apustili Johan­nesi ima al­lap­poq: “Qitor­nak­ka sal­lusuis­sum­mi inuusut tusarlugit tas­sa tamanit uan­nut nuan­ner­ner­paaq.” (3 Joh 4) Pionerit amerlasuut sal­lusuis­sum­mik ilin­niar­tis­simasamik aalajaal­lutik Jehovamut kif­far­tor­tuar­nerat, im­maqa al­laat pioneriunerat, tusarlugu nuan­naarutigingaar­tar­paat. Taamaat­tumik pionerit nikal­lungap­pata al­lat ikior­niarlugit ajun­ngitsuliar­pas­sui pil­lugit eq­qaasis­sin­naavavut.

15. Aalajaal­lutik kif­far­tor­tut qiim­mas­sar­niarlugit susin­naavugut?

¹⁵ Ilagiin­nik nak­kutil­liisut amerlasuut oqar­put ilagiin­nut tikeraareerlutik al­lak­kamik qujas­sum­mik nas­sitsivigineqar­ner­tik nuliatil­lu qiim­maal­laatigisarlugu. Taman­na aam­ma utoq­qaaner­tanut, ajoqersuiar­tor­titanut, pionerinut Betelimilu kif­far­tor­tunut, Jehovamut aalajaal­lutik kif­far­tor­tunut tamanut, atuup­poq. Qutsaviginerisigut im­maqa nalusatsin­nik qiim­maal­latsingaarsin­naavavut.

TAMATTA QANOQ QIIMMASSAASINNAASUGUT

16. Al­lanik qiim­mas­saaneq qanoq ajor­nan­ngitsigisin­naava?

¹⁶ Taavami al­lat qanoq misigis­suseqarfiginerlugit oqarfigis­sal­lugit saper­nar­tik­kutsigu? Al­lanik qiim­mas­saaneq saper­nar­pal­laan­ngilaq. Misilil­lugu al­lat qungujuf­figik­kit. Qungujuf­figin­ngip­patsit im­maqa ajor­nar­torsiuteqar­put oqaloqateqar­nis­samil­lu pisariaqar­titsil­lutik. Tusar­naagin­nar­nerisigut tup­pal­lersarsin­naavatit. – Jaak 1:19.

17. Qatan­ngutip angutip inuusut­tup suut qiim­mas­saatigai?

¹⁷ Qatan­ngut inuusut­toq angut Henrimik atilik qanigisani arlal­lit, ilaatigut ataataa utoq­qaaner­taasimasoq, Jehovamut kif­far­torun­naarmata aliasungaar­poq. Ilagiin­nik nak­kutil­liisup Henri aliasut­toq maluginiaramiuk kaf­fisoriaqatigaa. Henri misigis­sutsiminik oqaasin­ngor­titsisoq tusar­naaq­qis­saar­paa. Henrip paasivaa taamaal­laat aalajaan­nermigut ilaqut­tani sal­lusuis­sum­mut uter­nis­samut ikiorsin­naal­lugit. Aam­ma Tus­siaat 46, Sefania 3:17 aam­ma Markusi 10:29, 30-lu atuarlugit tup­pal­lersaatigaa.

18. (a) Qiim­mas­saaneq pil­lugu kun­ngi Salomo qanoq al­lap­pa? (b) Apustili Paulusi qanoq siun­nersuiva?

¹⁸ Mar­thap Henril­lu misigisaat qanoq ilin­niarfigisin­naavavut? Tamat­ta qatan­ngum­mik tup­pal­lersar­neqar­nis­samik pisariaqar­titsisumik qiim­mas­saasin­naavugut. Kun­ngi Salomo ima al­lap­poq: “Ila ajun­ngit­tas­susia oqaasis­sat pif­fis­saasigut anil­lugit! Isit qaam­marin­nerata uum­mat nuan­naalersit­tar­paa, tusak­kap nuan­nersup timi nakus­satsit­tar­paa.” (Uss 15:23, 30) Nikal­lungasumik aliasut­tumil­luun­niit nalun­ngisaqar­pit? Soormi Napasuliaq Alapernaarsuiffik-mit nit­tar­tak­katsin­nil­luun­niit atuf­fak­kuk­ku? Aam­ma Paulusip erinarsuutit Naalagaaf­filersaarutit qiim­mas­saatigisin­naagivut ilin­niar­titsis­sutigaa. Ima al­lap­poq: “Im­mis­sin­nut ajoqersoqatigiit­taritsi oqaaq­qis­saaqatigiil­lusilu tus­siutit un­nersiutigin­nis­sutil­lu tus­siutaasal­lu atorlugit Guuti qujaniarfigalugu uum­matis­sin­ni.” – Kol 3:16; ApS 16:25.

19. Sooq qiim­mas­saqatigiin­neq qanit­tuk­kut suli pingaaruteqar­nerulis­sava, qanorlu ilior­tariaqar­pugut?

¹⁹ Jehovap ul­lua qanil­liar­tor­til­lugu qiim­mas­saqatigiin­nis­sar­put suli pingaaruteqar­nerulis­saaq. (Hebr 10:25) Paulusip siun­nersuineratut iliorut­ta nuan­naas­saagut: “Tup­pal­lersaqatigiigitsi ineriar­tor­teqatigiigitsilu – soorlut­taaq taamaalior­tar­tusi.” – 1 Th 5:11.