ILIMASUTTUARITSI!
Upperisarsiorneq Ukrainemilu sorsunneq – Biibilimi qanoq allassimasoqarpa?
Upperisarsiornikkut siulersuisut nuimasut Ukrainemilu sorsunneq pillugit oqaaseqaatit uku eqqarsaatigikkit:
“Ruslandimi ilagiit ortodoksit qullersaata, patriarkip Kirillip, russit saassussinerat assuarisimanngilaa. … Ilagiivisa Ukraine pillugu oqaluttuanik ilumuunngitsunik siammarteriuarnerat Putinip sorsunnissamut patsisiliussimavaa.” – EUobserver, marsip 7-at 2022.
“Patriarkip Kirillip … nunagisami Ukrainemut saassussinera erseqqilluinnartumik eqqortuunerarpaa oqarluni akersuunneq ajortip akiorniarneranut ilaaginnartoq.” – AP News, marsip 8-at 2022.
“Ataasinngormat Ukrainemi ilagiit ortodoksit siulersortaata, ærkebiskoppip Epifaniosip, ‘russit saassussisut akiornissaannut’ innuttani pilluaqquai … Aamma oqarpoq russit sakkutuuinik toqutsineq ajortuliornerunngitsoq.” – Jerusalem Post, marsip 16-iat 2022.
“Uagut [UCCRO] sakkutuut Ukrainemiut illersortigullu tamaasa tapersersorpagut. Saassussisunut illersuisut taakku pilluaqqullugillu qinnuppagut.” – UCCRO-mita nalunaarut, februaarip 24-at 2022.
Qanoq isumaqarpit? Upperisarsioqatigiit Jiisusimik Kristusimik malinninnerartut ilaasortatik sorsugiaqqussavaat? Biibilimi qanoq allassimasoqarpa?
Upperisarsiornerit sorsunnernut akuliuttarnerisa oqaluttuarisaanerat
Oqaluttuarisaanermit erserpoq upperisarsioqatigiit eqqissinermik suliniuteqarneraraluarlutik sorsunnerit akuersaartarsimagaat, eqqortuunerartarsimagaat allaallu tapersersortarlugit. Ukiorpassuarni Jehovap Nalunaajaasuisa taama upperisarsiornikkut ilumoortuusaarniarneq qulaartarsimavaat. Saqqummersimasut ilaat aajuku:
Ilagiit katuullit Romalerisut Guutip aqqani Kristusillu aqqani toqoraanernut akisussaanerat uani allaatigineqarpoq: “Korstogene – en ‘tragisk illusion’”.
Naggueqatigiit sorsuunnerat, allaallu inuiannik toqoraaneq, upperisarsioqatigiinnit qanoq pinngitsoortinneqarsimanngitsoq uani atuarneqarsinnaavoq: “Den katolske kirke i Afrika”.
Palasit katuullit, ortodoksit naaggaartullu sorsunnerni amerlasuuni illuatungiliuttunik tamanik tapersersuisimanerat pillugu ukunani paasissutissaqarpoq: “Kristumiuuneraqatigiit guutisioriaasiat Guutip qanoq isigaa?”, “Religionens rolle i krige” aamma “Oqaluffeqarfiit sorsunnersuarmut kingullermut sunniutaat”.
Upperisarsioqatigiit kristumiut sorsunnermik tapersersuissappat?
Jiisusip ilinniartitsissutaa: “Inoqatit imminut asanittut asassavat.” (Matiusi 22:39) “Ilissinnut akeraasut asajuarsigit.” – Matiusi 5:44-47.
Eqqarsaatigiuk: Oqartoqarsinnaava upperisarsioqatigiit ilaasortatik sorsugiaqqullugillu toqutseqquppatigit Jiisusip asanninnissamik inassutaanik maleruaasut? Akissutaa allaaserisami uani atuarsinnaavat: “Sooq Jehovap Nalunaajaasui sorsoqataaneq ajorpat?”
Jiisusi qanoq oqartoq: “Kunngeqarfimma nunarsuarmi naalagaaffiit assiginngilai. Kunngeqarfimma nunarsuarmi naalagaaffiit assigisimagaluarpagit juutinut pisinneqaqqunanga malinnitsikka akiuussimassagaluarput.” (Johannesi 18:36) “[Panalersortut] tamarmik panamik toqunneqassapput.” – Matiusi 26:47-52.
Eqqarsaatigiuk: Kristumiut allaat Jiisusi illersorniarlugu sakkulersorsinnaanngikkunik taava allamik pissuteqarlutik sakkulersussappat? Kristumiut siulliit Jiisusip maligassiaanik ilinniartitsissutigisaanillu maleruaanerat uani allaatigineqarpoq: “Er krig forenelig med kristendom?”
Upperisarsioqatigiit sorsunnernik tapersersuisut qanoq pineqassappat?
Biibilimi ersersinneqarpoq upperisarsioqatigiit Jiisusimik malinninnerartut taassumalu ilinniartitsissutaanik maleruaanngitsut Guutip akuerinngikkai. – Matiusi 7:21-23; Tittusi 1:16.
Biibilimi Saqqummersitani allaatigineqarpoq upperisarsioqatigiit taamaattut “[nunarsuarmi] toqunneqartut tamarmik aavisa kuineqarnerannut” Guutip akisussaatikkumaarai. (Saqqummersitat 18:21, 24) Tamatuma nassuiarneqarnera allaaserisami uani atuarsinnaavat: “‘Eqqartuussiffik’ aallartereerpoq”, qulequtaaraq: “Babylonersuaq sunaagami?”
Jiisusi oqarpoq upperisarsioqatigiit Guutip akuerinngisai tamarmik ajortumik iliuuseqartarnerat pissutigalugu peerneqassasut, soorlu orpik ajortoq ajunngitsunik inerititaqanngitsoq ‘kipineqartartoq qisugineqartarlunilu’. (Matiusi 7:15-20) Paasisaqarnerujumallutit allaaserisaq “Upperisarsiorneq eqqunngitsoq qanittukkut peerutissaaq!” atuaruk.
Assit, saamerlermiit: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a UCCRO (Ukrainian Council of Churches and Religious Organizations) isumalioqatigiiupput upperisarsioqatigiinnik 15-inik ilaasortallit. Ortodoksit, katuullit grækerilerisut aamma Romalerisut, naaggaartut, iivangkiiliusiortut, juutit musliimillu taakkununnga ilaapput.