Arnat isumannaatsuutin­neqarnerat – Biibilimi qanoq allassimasoqartoq

“Meeraallunga anima timikkut oqaatsitigullu ullut tamaviisa nikanarsar­tarpaanga. Aamma katereerlunga sakinniit nikanarsagaasalerpunga. Sakima uiatalu inussiaatitut pisarpaannga. Imminut toqunnissara eqqarsaatigisarpara.” – Madhu,a India.

Nunarsuaq tamakkerlugu peqqinnissamik suliniaqatigiiffik (WHO) nalunaarpoq “arnanik persuttaasarneq nunarsuaq tamakkerlugu atugarineqartoq”. Aamma missilior­neqarpoq arnat pingasuugaangata ataaseq timikkut persuttagaasartoq kinguaas­siuutitigul­luunniit kanngut­taatsuliorfigineqartartoq.

Illit taamatut pineqarsimaguit oqaatsitigut timikkul­luunniit saassun­neqariataarnissat kinguaas­siuutitigul­luunniit atornerlun­neqarnissat aarleris­sutigiuar­tarsimassavat. Suiaassuseq tunngavigalugu persuttagaasarnerup naakkit­taatsumillu pineqar­tarnerup kingunerisaanik immaqa eqqarsarputit inuit amerlanersaasa arnat soqutaan­ngitsutut isigigaat. Arnalli Guutimit soqutaan­ngitsutut isigineqarpat?

Guuti arnanut qanoq isiginnit­taaseqarpa?

Allassimaffik: “[Guutip] pinngortippai tassaatillugit angut arnarlu.” – Mosesimik 1. 1:27.

Nassuiaat: Guutip angut aamma arnaq pinngortippai. Naligiittut pinngortippai. Allaat uiusoq piumaffigaa ‘imminut asanermisut nuliani asassagaa’, naalagaaniarfigis­sanngikkaa, sakkortuumik oqaluffigisas­sanngikkaa persuttar­tassanaguluunniit. (Efesossimiut 5:33; Kolossimiut 3:19) Ersarippoq arnat isumannaatsuunissaat Guutip pingaartikkaa.

“Meeraallunga ilaquttannit kinguaas­siuutitigut atornerlun­neqartarpunga. 17-inik ukioqarlunga sulisitsisuma atoqatigin­ngikkunni ikuallan­niarlunga sioorasaarpaanga. Inersimasutut uinniit, angajoq­qaanniit eqqaamiutsinniillu soqqusaaf­figineqar­tarpunga. Taava Pinngor­titsisoq, Jehovab, pillugu ilikkagaqarpunga. Taassuma arnat ataqqin­nittumik isiginnit­taaseqarfigai. Tamanna qularun­naassutigaara Guutip asagaanga naleqar­tillungalu.” – Maria, Argentina.

Misigis­sutsikkut suut katsorsaatigisin­naavigit?

Allassimaffik: ‘Ikinngutaasoqartarpoq qatanngummit unneqqarin­nerusunik.’ – Ussatit 18:24.

Nassuiaat: Ikinngut ilumoortoq tapersersor­tigisinnaavat. Tamanna iluaqutigis­sasorigukku qanoq misiginerlutit tatigisat oqaluttuus­sinnaavat.

“Kinguaas­siuutitigut atornerlun­neqarnikuunera ukiuni 20-ni oqaluttuarin­ngisaan­narnikuuara. Nuannaarun­naarneq, ersineq ernumatsaq­qarujus­suarnerlu atugaraakka. Kiisami tusarnaarusuttumut oqaluttuarama iluaallarujus­suarpunga.” – Elif, Tyrkia.

Allassimaffik: “[Guutip] isumassormasi isumakuluutisi tamaasa taassumunnga miloriussigit.” – Petrusimit 1. 5:7.

Nassuiaat: Qinugaangavit Guuti tusarnaartarpoq. (Tussiaat 55:23; 65:3) Tassa isumassoramitit paasitis­sinnaavaatit qanoq naleqar­tigisutit.

“Jehova pillugu ilinnialernera misigis­sutsikkut innarler­neqarujus­suarsimaninnut iluaqutigeqaara. Ullumikkut Guutimut qinunikkut suut tamaasa oqaluttuarisin­naavakka. Uannut ikinngutitut misigis­sutsinnik paasinnis­sinnaasutut ippoq.” – Ana, Belize.

Arnat nikanarsagaanerat Guutip unitsil­luinnarsinnaavaa?

Allassimaffik: “Iliarsuk qunutitaasorlu pinngitsuutik­kumavatit inuit nunami nakuuserun­naaqqullugit.” – Tussiaat 10:18.

Nassuiaat: Guutip naapertuil­luannginnerit arnanullu nikanarsaanerit nakuuser­nerillu qanittukkut unitsil­luinnassavai.

“Arnanut niviarsiaq­qanullu nikanarsaanerit Jehovap qanittukkut qanoq iliuuseqarfigiumaarai paasillugu uannut katsorsaatitut ippoq. Qamuuna eqqissial­laatigeqara.” – Roberta, Mexico.

Biibilip neriuuteqalersitsinera, neriorsuutillu sooq upperisin­naanerlugit aamma Jehovap Nalunaajaasui Biibili atorlugu eqqugaasimasunut qanoq ikuisartut paaserusukkukku akeqanngitsumik pulaarneqarnissat allaaserisamik matuminnga pajuttumit piumasaqaatigiuk. Tamanna akeqanngilaq.

Allaaserisaq una anillatsitassaq aajuk.