Biibili qanoq iluaqutigisin­naavara? – Immik­koortoq 1: Biibili misissoruk

“Biibili atuarlugu misilik­kaluarpara, issungaarmalli merserilerpara!” – Briana, 15.

Illit taama misigivit? Allaaserisaq una iluaqutigisin­naavat.

• Sooq Biibili atuassavara?

• Biibili qanoq atuassavara?

• Inuusuttoqativit isumaat

Sooq Biibili atuassavara?

Isumaqarpit Biibilimik atuarnissaq pik­kunaat­soq? Taama misigiguit paasinarpoq. Immaqa qup­pernerpas­suit tuusintillit assiliar­taqan­ngitsut eqqar­saatigiin­nartar­patit. TV filmillu soqutiginar­nerungaar­pasipput.

Unali eqqarsaatigeriaruk: Illerfis­suaq erlin­nartuusivik nassaarigukku suut imarinerai paaserusus­sagaluarpiuk?

Biibili erlinnartuusivittut ippoq. Silatusaar­nis­samut erlin­nar­torpas­suarnik imaqarpoq, taak­kulu iluaqutigalugit

• aalajangiilluarsinnaavutit

• angajoqqaatit attaveqarfigil­luarsin­naavatit

• ikinngutaalluartunik ikinnguteqalersinnaavutit

• stressi anigorluarsinnaavat

Sooq nalitsinni atuagaq taama pisoqaatigisoq iluaqutaasin­naava? Allakkat tamarmik Guutimit isumas­sarsiaagamik. (2 Timotheusi 3:16) Tassa Biibilimi siun­nersuutit allanit tamanit silatunerpaamit pipput.

Biibili qanoq atuassavara?

Biibilip atuagartai tulleriiaarlugit atuarsin­naavatit. Taamaalil­lutit Biibilip oqariartuutaa paasilissavat. Biibili assigiinngit­sutigut atuarneqar­sinnaavoq. Siunnersuutit marluk ukuupput:

• Biibilip atuagartai 66-t tulleriiaarneri malillugit, tassa Mosesimik allakkat siulliit aallarner­figalugit Saq­qum­mersitanut, atuarsin­naavatit.

• Oqaluttuarineqartut qanga pisimaneri malil­lugit Biibili atuarsin­naavat.

Siunnersuut: Quppersakkami Guutip oqaasianik misis­sueq­qissaarut-mi takusin­naavatit “Jiisusip nunarsuar­miin­nerani pisimasut pingaarnerit”, tassa Jiisusip inuunerani pisut pisimaneri malillugit tulleriiaakkat.

Biibilimik atuariaaseq alla tassa oqalut­tuap illit nalaat­takkanni iluaqutigisin­naasavit atuarnissaa. Assersuutigalugu:

• Tatiginartunik ikinnguteqarusuppit? Jonatani Daavilu pillugu oqalut­tuaq atuaruk. (Samuelimik allak­kat siulliit, kapitali 18-20) Daavip pissusii Jonatanip nuan­narisimagunagai maluginiakkit.

• Ussernar­torsiornermi nak­kaannan­nginnis­saq sulis­sutiginero­rusuppiuk? Josefi ussernar­tumut nak­kaannan­ngitsoq pillugu oqalut­tuaq atuaruk. (Mosesimik allakkat siulliit, kapitali 39) Qup­pernerit “Ussernar­tut qanoq akiorneqar­sinnaasut ... Josefi – Immikkoortoq 1” aamma “Eqqunngit­sumik unnerluutigineqar­neq! Josefi – Immikkoortoq 2” atorlugit oqalut­tuaq qanoq ilin­niarfigisin­naanerlugu paasiguk.

• Qinuneq qanoq iluaqutigisin­naanerlugu ilin­niarusup­piuk? Nehemiap misigisaa atuaruk. (Nehemiap allagai, kapitali 2) Qinnutaasalu sun­niuteqar­luarsimaneran­nut uppernarsaatit maluginiakkit.

Siunnersuut: Biibili atuaraangakku eqqar­sarluarsin­naajumal­lutit eqqissil­lutit atuar­figisin­naasan­nut inissigit.

Biibilimik atuarninni aamma oqalut­tuaq tussiaal­luunniit atuarsin­naavat taavalu qanoq ator­sinnaaner­lugu eqqar­saatigalugu. Atuareerlutit apeqqutit soorlu uku eqqar­saatigisin­naavatit:

• Sooq Jehovap tamanna Biibilimi allat­sippaa?

• Atuakkama Jehova taassumalu iliuuserisai pil­lugit sumik paasitip­paannga?

• Atuakkakka inuuninni qanoq ator­sin­naavakka?

Siunnersuut: Anguniagaqarit! Ulloq Biibilimik atuar­tarnis­sannik aallartif­fik allaguk. Biibilimik atuarnis­samut pilersaarut nittartak­katsinniit­toq atorsinnaavat.