Orpigaq ikumasoq

Moorsisi ukiuni 40-ni Midjanimi najugaqarpoq. Katippoq meerartaarlunilu. Ullut ilaanni qaqqap Siinaajip eqqaani savanik paarsitilluni tupinnartumik takusaqarpoq. Orpigaq kapinartulik ikumavoq nungukkiar­tornanili! Moorsisip misissorumallugu qanilligamiuk nipi orpikkap iluanin­ngaanneersoq tusarpaa: ‘Moorsisi! Qanilleqinak. Nikorfaf­figisat illernar­tuummat aloqutitit piikkit.’ Oqaluttoq inngiliuvoq Jehovamin­ngaanneersoq.

Moorsisip ersilerami kiinnani asserpaa. Nipilu oqarpoq: ‘Israalikkut naalliutsitaanerat takuara. Egyptenimiunit aniguisis­savakka nunamullu ajunngitsumukaallugit. Illit innuttakka siulersus­savatit.’ Moorsisip tamanna tupigusuutigisimassaqaa, ilaa!

Moorsisi akivoq: ‘Taavami inuit aperippannga kia aallartis­simaneraanga qanoq oqassaanga?’ Guuti akivoq: ‘Oqarfigis­savatit Jehovap – Aaperaap, Iisaap Jaakullu Guutiata – aallartikkaatit.’ Taava Moorsisi oqarpoq: ‘Upperiuman­ngippanngami?’ Jehovap Moorsisi paasitippaa ikiorumaarlugu. Taava ajaappiaa nunamut milorioqquaa. Nunamullu miloriummagu pulateriaarsun­ngorpoq! Moorsisillu pulateriaarsuk pamiuatigut tigummagu ajaappian­ngoqqippoq. Jehova oqarpoq: ‘Taama tupinnar­tulioruit uannit aallartitaaninnut uppernarsaataassaaq.’

Moorsisi oqarpoq: ‘Kisianni oqallorin­ngilanga.’ Jehovalli neriorsorpaa: ‘Qanoq oqarnissannik ikiussavakkit, qatanngutillu Aaronni ikiornias­sammatit ilinnukar­tissavara.’ Moorsisip paasigamiuk Jehovap najoraani nuliani erninilu Egyptenimut uteqatigai.