Inoqatitit ataqqivigit?

NERSUTITUT qilersorlugit tupinnaannartumillu ipertullunilu tipittumiitillugit Afrikamiut sutut assartugassatut itillugit umiarsuarmik Amerikamukaanneqarsimapput. Minnerpaamik affaasa suli apuutsinnatik toqunissaat naatsorsuutigineqarsimavoq. Ilaqutariit peqqarniitsumik avissaartinneqarput, imminnut takoqqittussaajunnaarlugit. Inussiaateqarneq inuit inoqatiminnut peqqarniitsuliortarnerisa peqqarniinnerpaat ilagaat. Ajugaasut pissaanillit inunnut nunaqavissunut peqqarniitsumik naalaganngoraangata assingusunik pisoqartarsimavoq.

Inummik ataqqinaataajaaneq timikkut anniartitsinermit peqqarniinnerusinnaasarpoq. Taamaaliorneq inuup tarnaanik innarliineruvoq. Naak inussiaateqarneq nunat amerlanersaanni atorunnaarsinneqareeraluartoq inuup ataqqinassusianik aserorterisarneq ingerlajuarsinnarpoq, immaqa malunnannginnerusumik.

Tamatuma akerlianik kristumiut ilumoortut ’tullermik immisut asanninnissamik’ Jesus Kristusip oqaaqqissaarutaa ilungersorlutik malinniarsaraat. Taamaattumik imminnut ima aperisariaqarput: ’Allat inuttut ataqqinassusiat akueraara?’ — Lúkarse 10:27.

Ataqqinninnikkut maligassat

Oqaaseq „ataqqinassuseq“ oqaatsinik ujarlerfissiami tassaanerarneqarpoq qinngaqqunnanngissuseq, ataqqisassaassuseq pingaassuserlu, imaluunniit taamatut isigineqarneq. Nassuiaat tamanna qilammi nunamilu naalagaanerpaamut, Jehova Guutimut, ila naleqqummat! Biibilimimi Jehova naalagaanerpaassusialu ataqqinassutsimut atassuserneqartuartarput. Moses, Esajas, Ezekiel, Daniel, apustili Johannes allallu immikkut pisinnaatitaallutik takorruuisitaanikkut Qutsinnerussaartumik taassumalu qilammi najugaanik takunnissimapput, takusaminnillu allaatiginninnerat ataqqinnippalulluinnarpoq. (2 Moses 24:9-11; Jesaja 6:1; Hesekiel 1:26-28; Daniel 7:9; sarĸúmersitat 4:1-3) Qinunikkut unnersiutiginnilluni kunngi David ima oqarsimavoq: „[Jehova], illit pigaatit angingaassuseq, pissaaneq, naalannassuseq, ataqqinassuseq qutsinnerussuserlu; tassami qilammiittut nunamiittullu tamaasa pigaatit.“ (1 Israelikkut 29:11) Ilumummi Jehova Guutimit ataqqinarnerusoqanngilaq.

Jehovap imminut assililluni inuit pinngortinneratigut naleqassutsimik, imminut ataqqinermik ataqqinassutsimillu tunisimavai. (1 Moses 1:26) Taamaattumik allanut iliuuseqarfiginnittarnitsinni kikkut tamaasa naleqquttumik ataqqinnittumik pisariaqarpavut. Taamaalioraangatta Jehova Guuti inummik ataqqinassusiliisimasutut akuerisarparput. — Tussiaat 8:5-10.

Ilaqutariinni ataqqeqatigiinneq

Apustili Peterip, nammineq uiusup, isumassarsisitaalluni kristumiut uiusut oqaaqqissaarsimavai nuliatik ’pisattatut qajannarnerusutut iliorfigisassagaat’. (1 Pîtruse 3:7; Matîuse 8:14) Apustililu Paulus ima unnersuussisimavoq: ’Arnap uini mianeriniarliuk,’ tassa ataqqiniarliuk. (Evfisumiut 5:33) Taamaattumik aappariit inuttut ataqqeqatigiinnissaat Biibilimi piumasarineqarpoq. Sutigut tamanna ersersinneqarsinnaava?

Soorlu imeq naasumik alliartortitsisartoq, taamatut uiusup nuliaasullu akornanni, marluinnaatillutik inuillu allat akornanni, saamasumik oqalunneq inussiarnerpaluttumillu pissuseqarneq qanimut attavigiinnerannik uummarissaasarpoq. Akerlianilli sakkortuumik ajuallannartumillu oqalunneq imaluunniit oqarilluni mitallerpaluttumik tusangiasaarineq, TV-kkut quiasaarusiani pissuserineqartartoq, aserornartuuvoq. Oqaatsit taama ittut naleqanngitsutut misiginermik, nikallornermik ajuallannermillu kinguneqarsinnaapput, allaallu misigissutsikkut ikiliisinnaallutik iluarsiuminaaqisumik.

Allat inuttut ataqqinassusiannik akuerinninnerup ilagaattaaq inuttut pissusiviannik akuerinninneq, aalajangersimasumik pissuseqalersinniarsarinagit allanulluunniit naapertuilluanngitsumik naleqqiuttarnagit. Tamanna ingammik uiusup nuliaasullu akornanni pingaaruteqarpoq. Aappariit ammasumik oqaloqatigiittarpata misigissutsiminnillu nangaanatik ersersitsivigeqatigiittarpata, arlaannaalluunniillu isornartorsiorneqarnissaminik akipiloorneqarnissaminillu ersissuteqarnissaminut pissutissaqanngippat, qanimut attavigiinnerat ingerlalluassaaq. Inuk pissusivimmigut naqisimaneqanngippat angerlarsimaffik silarsuarmit avataaniittumit peqqarniitsumit qimarnguiussaaq toqqissisimanartoq.

Meeqqat Biibilimi peqquneqarput angajoqqaaminnut ataqqinnittuullutillu naalattuussasut. Akerlianillu angajoqqaat silatuut asannittullu meeqqamik ataqqinassusiannik paasinninnissaat pisariaqarpoq. Pissuserissaarneq pillugu asannittumik nersualaarisarneq, pisariaqaraangallu kamagittarluni perorsaaneq, ’Jehovamit inerterisarnermi’ iluaqutaalluartarput. Isornartorsiuiuarneq, suanngassisarneq nikanarsaataasunillu taaguusersuineq, soorlu „sianiik“ imaluunniit „naalanngi“, meeqqanik uumitsatsitsiinnartarput. — Evfisumiut 6:4.

Kristumiu utoqqaanertaq ataataasorlu, pingasunik ernilik pingasunillu panilik, oqarpoq: „Naalagaaffilersaartarfimmi pisariaqaraangat sapinngisamik nipaarsaarluta meeqqavut naveertarpavut. Tinnersilaarneq imaluunniit sukannerpaluttumik mianersoqquserpaluttumillu qiviarneq amerlasuutigut naammattarpoq. Sukannernerusumik naveerneqartariaqarpata angerlarsimaffitsinni meeqqanillu allanik isigisoqannginnerani taamaaliortarpugut. Maanna meeqqat allinerummata asannittumik silatuumillu Guutip oqaasianit unnersuussinikkut perorsartarpavut, tamarmik immikkut pisariaqartitaat naapertorlugit. Taamaaliortarnitsinni tatigeqatigiinneq atatinniartarparput, taamaalilluta meeqqat tamarmik immikkut namminerisaminnik inuunerannut naleqassusiannullu ataqqinninnermik ersersitsisarpugut.“

Ilaqutariit iluanni oqaatsikkut iliuutsikkullu ileqqorissaarnissaq puiorneqartariaqanngilaq. Ilaqutariinnerput piinnarlugu inussiarnersumik aperisarnissaq, qujasarnissaq utoqqatsertarnissarlu sumiginnartariaqanngilavut. Ileqqorissaarneq nammineq ataqqinassutsimik ataannartitsinissamut allallu ataqqinassusiannik akuerinninnissamut pingaaruteqarluinnarpoq.

Ilagiinni kristumiuni

’Ornissinga tamassi erloqisusi nanertugaasusilu, qasuersissavassi,’ Jesus oqarsimavoq. (Matîuse 11:28) Naqisimaneqartut nikallungasullu, allaat meeraaqqat, Jesusimut kajungerluinnarsimapput. Taamanikkut palasinit siuttuusunillu makitasuunit imminullu iluartuutittunit asissorneqartarput, Jesusimilli ataqqinninnermik pisassaminnik ersersitsivigineqartarlutik.

Uaguttaaq Jesus malillugu uppeqatitsinnut qiimmassaasariaqarpugut. Tassa oqaatsitsigut iliuutsitsigullu taakkununnga ineriartuutaasussanik eqqumaffiginnittariaqarpugut. Oqaloqatigiinnermi ilumoorluni inussiarnersumik isumalluartumillu oqaaseqarnissaq pitsaasuujuaannarpoq. (Rûmamiut 1:11, 12; 1 Tásalûníkamiut 5:11) Allat misigissusiinik qajassuussinerput ersersittarparput oqaasissatta qanorlu oqaatiginissaata mianersuutiginerisigut. (Kulorsamiut 4:6) Kristumiuttaaq ataatsimiinnerini naleqquttunik atisaqarnitsigut ileqqorissaarnitsigullu takutittarparput Guuterput, taassuminnga pallorfiginninneq uppeqativullu ataqqillugit.

Jesusip allaat inunnik allanik kiffartuussinermini taakkua ataqqinassusiannik akuerinninnini ersersittarsimavaa. Allanut ajoqutaasumik iliornikkut allanilluunniit nikassaanikkut imminut qaffatsinniartarsimanngilaq. Pupissoq ajorunnaarseqqulluni ornigummat minguttuutut naleqanngitsutulluunniit ajattunngilaa, imaluunniit imminut pingaartorsiutigitinniarluni malugeqqusaarnani. Pupissulli ilungersorluni ima qinnuigimmani: ’Naalagaq, piumaguit pupeerutissinnaavarma,’ ataqqinnippalulluni akivaa: ’Piumavunga, pupeerugit.’ (Lúkarse 5:12, 13) Uaguttaaq nuannaartaqaagut pisariaqartitsisunik ikiuiinnarata misigititsigaangatta uagutsinnut nammakkersuutaanngitsut, kisianni soqutigalugillu asagivut! Inuit ittoortut, nikallungasut sanngiitsut pisinnaanngitsullu silarsuarmi qaangiinnarneqarlutillu, ajattugaallutillu nikagineqartarput. Kristumiutulli qatanngutimik angutit arnallu akornanni ilumoortumik ilagiumaneqartutut akuerineqartutullu misigitinneqartariaqarput. Anersaap taama ittup atuutitinneqarnissaanut suleqataasariaqarpugut.

Jesusip ajoqersukkani kukkusaraluartut inuttullu eqqumeeriartaraluartut ’ilamisut’ asasimavai ’naggatissamullu allaat asallugit’. (Juánase 13:1) Uummataat minguitsut Ataataminullu tarnimikkut iluunngarlutik tunniusimanerat takusinnaavaa. Uaguttaaq uppeqativut uagutsitut periaaseqannginnerat imaluunniit uagut nammineq iluarinngisatsinnik ileqqoqarnerat inuttulluunniit pissuseqarnerat piinnarlugu ajortumik isummersunngisaannassavavut. Qatanngutitta ataqqinassusiat akuerigutsigu inuttut pissusiviatigut asallugillu akuerissavavut, qularinagu aamma taakkua Jehova asagaat minguitsumillu pissuteqarlutik kiffartorfigigaat. — 1 Pîtruse 4:8-10.

Ingammik utoqqaanertat paarisaminnut pisariaqanngitsumik isumakuluutissiinnginnissartik mianersuutigisariaqarpaat. (1 Pîtruse 5:2, 3) Utoqqaanertat ilagiinnut ilaasut ilaannik ajortuliortoorsimasumik oqaloqateqaraangamik oqaatsit saamasut isumassuerpaluttullu atortariaqarpaat pisariaqanngitsumillu peqqusiileqititsisinnaasunik aperinaveersaarlutik. (Galâsiamiut 6:1) Sukannersumik oqaanneqartariaqaraluarpalluunniit imaluunniit perorsaatissinneqartariaqaraluarpalluunniit ajortuliorsimasup ataqqinassusia imminullu ataqqinera akuerisariaqarpaat. — 1 Timûtiuse 5:1, 2.

Inuttut ataqqinassutsimik atatitsineq

Guuti assilillugu pinngortitaagatta Guutip pissusii nuanningaartut — aamma ataqqinassusia — ulluinnarni inuunitsinni sapinngisarput tamaat ilaarniartussaavavut. (1 Moses 1:26) Taamatuttaaq ’tullermik uatsitut asanninnissamik’ peqqussutip ersersippaa inuttut ataqqinassuseqartugut imminullu ataqqissuseqarluta. (Matîuse 22:39) Tassa imaappoq, kissaatigigutsigu allat ataqqinninnermik ersersitsivigisassagaatigut, ersersittariaqarparput tamatumunnga qinngaqqunnarnata.

Imminut ataqqineq inuttullu ataqqinassuseq pigiinnassagaanni ilerasuuteqannginnissaq pingaaruteqartorujussuuvoq. Ilerasuuteqarneq imminullu pisuutinneq naleqanngitsutut neriuutaaruttutullu misiginermik aammalu ernumajualernermik kinguneqaqqajaasarput. Taamaattumik annertuumik ajortuliorsimagaanni iliuuseqarasuartariaqarpoq isumataarniarluni, utoqqaanertanut anersaakkut ikiortissarsiorluni ’ullut inuummarissiviusut Jehovap kiinaanit nalliuteqqullugit’. Taamaalilluni ajortuliorsimasup ataqqinassuseq imminullu ataqqineq pigileqqissinnaavai. — apustilit suliait 3:19.

Nalunngeqatiginnissutsitta Biibilimit ajoqersorneqarsimasup sernissortuarnissaa pisariaqarpoq, sumilluunniit innarlerneqaqqunagu misikkarlussisinneqaqqunagulu. Ulluinnarni inuunitsinni sutigut tamatigut — nerinermi, imernermi, niuernermi, aliikkusersornermi angutaagaannilu arnanut arnaagaannilu angutinut attaveqarnermi — imminut naalakkersinnaanermik ersersitsisarutta ilerasuuteqanngittuarsinnaavugut Guutillu naalannassusia ataqqinassusialu inuunitsinni ersersissinnaassallugit. — 1 Korintumiut 10:31.

Kukkussutigisimasavulli pillugit imminut pisuutittuaannalerutta? Imaluunniit pinerlineqartarsimaneq puiorneq ajulerlugu naalliuutigiuarutsigu? Misigissutsit taama ittut inuttut ataqqinassutsitsinnik aseruiartuaarsinnaapput isumakkullu annertuumik naalliuutaalersinnaallutik. Kunngi Davidip oqaasii Tussiaat 34:19-imiittut tamatumani assut tuppallernarput: „[Jehovap] qanippai neriuutaarussimasut, annaattarpai sapiissuseerutitaasimasut.“ Kiffani isumakkut naalliuuteqaraangata naleqanngitsutullu misigigaangata aniguiniarneranni annertoqqusersornissaannut Jehova piareersimasarpoq piumassuseqartarlunilu. Taassumunnga torlorfiginnittarneq anersaakkullu inersimalluartunut, soorlu kristumiunut angajoqqaanut, utoqqaanertanut inersimasunullu allanut ilagiinniittunut ikiortissarsiortarneq imminut ataqqileqqinnissamut inuttullu ataqqinassuseqaleqqinnissamut iluaqutissaapput. — Jâko 5:13-15.

Aappaatigulli inuttut ataqqinassuseq makitasuunerlu immikkoortissinnaasariaqarpavut. Biibilimi unnersuussutigineqartutut ’immitsinnik isumassaq qaangerlugu isumaqarfiginaveersaartariaqarpugut, kisianni immitsinnik annerunianngitsumik upperneq Guutip kimulluunniit agguutigititaa missiliorlugu isumaqarfigisariaqarpugut’. (Rûmamiut 12:3) Imminut ataqqinermik ineriartortitsineq ajortuunngilaq, namminerli naleqassutsitta ingasattajaarunnissaa imaluunniit inuttut ataqqinassutsip allat qaangerniarlugit namminissarsiortumik ilungersornernut paarlaattoornissaa kissaatiginngilarput.

Aap, allanik ataqqinninnissaq kristumiunut tamanut piumasaqaataavoq. Ilaquttavut uppeqativullu tamaasa ataqqillugillu nalilittut isigisariaqarpavut. Jehovap tamatta immikkut naleqassutsimik ataqqinassutsimillu tunisimavaatigut akueralugillu atatinniartariaqakkatsinnik. Tamanilli annermik Ataatatta qilammiusup, Jehova Guutip, ataqqinassusianut nallernissaqanngitsumut ataqqinnilluinnarnermik ineriartortitsiniartariaqarpugut. (wE 1/4 98)

[Qupp. 30-mi assiliartaq]

Meeqqat innarluutilinnut ataqqinninnermik ersersitsisinnaapput