Asanninnermut ajunngitsuliornermullu kajumissaaqatigiinneq — qanoq ililluni?

’Misissoqatigiinniarta asanninnermut ajunngitsuliornermullu kajumissaaqatigiilluta, . . . oqaaqqissaaqatigiilluta pisa; annerusumillu taamaassaagut ullussaq qanillilersoq malugilerassiuk.’ — EPRÎARIT 10:24, 25.

1, 2. (a) Sooq kristumiut siulliit ataatsimeeqatigiinnerminni tuppallersaqatigiillutillu qiimmassaqatigiinnissaat pingaartuusimava? (b) Paulusip oqaaqqissaarutaa suna katisimaqatigiittarnissap pisariaqassusianut tunngava?

ISERTORTUMIK naapeqatigiipput, matut parnaarsorlugit. Silataanni sumi tamaani navianartoqarpoq. Siuttuat, Jesus, kikkut tamarmik takkuanni toqutaaqqammerpoq, taassumalu malitsini mianersoqqusimavai nammineq pineqarsimanerminit pitsaanerusumik pineqarnavianngitsut. (Juánase 15:20; 20:19) Nipaarsaarlutilli asasartik Jesus eqqartortillugu ataatsimoornertik toqqissisimassutigisimassavaat.

² Ukiut ingerlaneranni kristumiut misilinneqarnerit qinugineqarnerillu assigiinngitsorpassuit nalaattarsimavaat. Ajoqersukkat siulliit soorlu taama pisarsimasut naapeqatigiittarnertik tuppallersarneqaatigalugulu qiimmassaatigisarsimavaat. Taamaattuminguna apustili Paulus Eprîarit 10:24, 25-mi ima allassimasoq: ’Misissoqatigiinniarta asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq qanillilersoq malugilerassiuk.’

3. Sooq oqartoqarsinnaava Eprîarit 10:24, 25 tassaannaanngitsoq kristumiut ataatsimiittarnissaannik peqqussut?

³ Oqaatsit naapeqatigiittuartarnissamik peqqussutaannaanngillat. Kristumiut ataatsimiittarnerinut tamanut — aammami kristumiut katisimasarnerinut sunulluunniit tamanut — Guutimeersumik najoqqutassiipput. Ingammik ullumikkut, Jehovap ullussaata qanilliartuinnarnera takusinnaatillugu, aaqqissuussaanerup ajortup tatisinerisa ulorianartorsiortitsinerisalu pisariaqarluinnalersippaat ataatsimiittarnitta tassaanissaat qimarnguiit isumannaatsut, tamanut nakussatsinnartut qiimmannartullu. Qanoq ililluta taamaannissaa qulakkeersinnaavarput? Atagu Paulusip oqaasii misissoqqissaariartigik pingaarnertut makku paasiniarlugit: ’Misissoqatigiinneq’ qanoq isumaqarpa? ’Asanninnermut ajunngitsuliornermullu kajumissaaqatigiinneq’ qanoq paasisariaqarpa? Kiisalu, qanoq ililluta ulluni erloqinartuni makkunani ’oqaaqqissaaqatigiissinnaavugut’?

’Misissoqatigiinniarta’

4. ’Misissoqatigiinneq’ qanoq paasisariaqarpa?

⁴ Paulusip kristumiut ’misissoqatigiinnissaannik’ kajumissaaramigit atorpaa oqaaseq griikerisooq ka·ta·no·eʹo, oqaaseq sakkortusisaq „malugaa“-mik nagguilik. Atuakkiami Theological Dictionary of the New Testament-imi oqaatigineqarpoq isumaqartoq „isumani tamaat aalajangersimasumut sammitippaa“. Aamma W. E. Vine naapertussagaanni aamma isumaqarsinnaavoq „tamakkiisumik paasivaa, eqqarsaatigeqqissaarpaa“. Taamaattumik kristumiut ’misissoqatigiikkaangamik’ qallikkuinnaq pissutsit isiginiartassanngilaat eqqarsartaatsikkulli piginnaanertik tamaat atorlugu itinerusumut isiginiarsarisassallutik. — Eprîarit 3:1.

5. Inuup qallikkut pissusiata ataani pissutsit suut issinnaappat, aamma sooq tamakku eqqarsaatigisariaqarpavut?

⁵ Eqqaamasariaqarparput inuk qallikkut isikkuminit, suliaminit inuttulluunniit pissutsiminit annerujussuarmik imaqarmat. (1 Samuel 16:7) Qallikkut nipaassutsip tunuaniissinnaapput misigissutsit itisuut imaluunniit quiasaariallaqqissuseq nuannersoq. Aammalu tunuliaqutarisat assigiinngiiaartorujussuupput. Inuit ilaat ajortorujussuarnik atugaqarsimapput; allallu massakkorpiaq naalliunnartunik takorloorsinnaanngisatsinnilluunniit atugaqarput. Amerlasuutigut qatanngutitta angutit arnallu eqqumeequtaat uagutsinnut ersigunnaartarput tunuliaqutaat atugaalluunniit itinerusumik ilikkaraangatsigik. — Ussatit 19:11.

6. Ilisarisimaqatigiinnerulerniarluta sutigut iliuuseqarsinnaavugut, tamannalu qanoq ajunngitsumik kinguneqarsinnaava?

⁶ Soorunami tamanna isumaqanngilaq inunnut allanut tunngasut susassarinngisavut akuerineqarata alapernaasissagivut. (1 Tásalûníkamiut 4:11) Kisianni tamatta inuttut soqutiginninnermik ersersitsivigeqatigiittariaqarpugut. Tamanna tassaannaanngilaq naalagaaffilersaartarfimmi ilasseqatigiinneq. Ilisarisimanerulerusutannik qinersisinnaavutit ataatsimiinnerullu siorna kingornalu oqaloqatiginerinut minutsialuit atortarnissaat anguniagarisinnaavat. Sulilu pitsaaneruvoq ’illusisitsisarnissamik’ kajumissaarut malillugu angerlarsimaffinnut qaaqqusissaguit sumininnguartortortitsiartorlutit. (Rûmamiut 12:13) Soqutiginninnermik ersersitsisarit. Tusarnaartarit. Oqaluussamik qanoq ililluni Jehova ilikkarlugulu asalersimaneraa aperiinnarneq annertuumik qulaarisinnaavoq. Sulilu ilisarisimanerulersinnaavat illumiit ilumut oqaluussinermi suleqatigalugu. Tamakkunuunatigut ’misissoqatigiinneq’ ikinngutigiittut misigissutsinik piviusunik, imaluunniit misiginneqataanermik, ineriartortitsinissatsinnut iluaqutigisinnaavarput. — Filípimiut 2:4; 1 Pîtruse 3:8.

’Kajumissaaqatigiitta’

7. (a) Jesusip ajoqersuinera qanoq inunnut sunniuttarsimava? (b) Sooq ajoqersuinera taama pissanganartigaa?

⁷ Immitsinnut ’misissoqatigiittarutta’ iliuuseqarnissamut kajumissaarinissamut kaammattuinisamullu piareersimanerusassaagut. Ingammik kristumiut utoqqaanertat tamatumani pingaaruteqarput. Jesusip tamanut oqaluussinera pillugu ima allassimasoqarpoq: ’Ajoqersuutai inuit tupigusuutigeqaat.’ (Matîuse 7:28, NV) Sakkutuut Jesusimik tigusarinnikkiartortitaagalugit ima oqarsimapput: ’Inummik taassumatut oqaluttoqanngisaannarpoq.’ (Juánase 7:46) Sunaana pissutigalugu Jesusip ajoqersuutai taama pissangartigisut? Misigissutsikkut sunniiniutaagamik? Naagga, Jesus ataqqinassuseqarluni ajoqersuisarsimagami. Taamaattorli tusarnaartimi uummataat tamatigut anguniartarsimavai. Inuit misissortaramigit nalunngilluinnarpaa qanoq ililluni kajumissuseqalersissinnaallugit. Ulluinnarni inuit nalunngisaat uumassuseqarpaluttumik paasiuminartumillu assersuusiarisarsimavai. (Matîuse 13:34) Taamatut ataatsimiittarnitsinni pisassaqartartut asannippaluttumik angorniortumillu kajumissinartumik saqqummiussisariaqarput. Jesusitut iliorluta assersuutinik tusarnaartitsinnut naleqquttunik uummataannillu attuisunik atuisariaqarpugut.

8. Jesus maligassiuinermigut qanoq ililluni kajumissaarisarsimava, tamatumanilu qanoq ililluta ilaarsinnaavarput?

⁸ Guutimut kiffartornitsinni maligassiuinitsigut tamatta allanut kajumissaataasinnaavugut. Jesusip tusarnaartini kajumissisilluartarsimavai. Kristumiutut kiffartorneq nuannaralugulu pingaartilluinnarsimavaa. Oqarsimavoq tamanna nerisassatut imminut ittoq. (Juánase 4:34; Rûmamiut 11:13) Angorniorneq taama ittoq tuniluussinnaavoq. Aamma illit oqaluussinermik angorniuutiginninnerit allanut ersersissinnaaviuk? Tulluusimaapiluttutut nipeqarneq pinaveersaaqqissaarlugu misigisimasatit ilagiinniittunut allanut oqaluttuarisakkit. Allat oqaluussiartoqatigigaangakkit Pinngortitsisorsuarput, Jehova, pillugu oqaluussinermik nuannarinnilluinnalernissaannik ikiorniartakkit. — Ussatit 25:25.

9. (a) Allanik kajumissaareriaatsit suut ingalattariaqarpavut, aamma sooq? (b) Jehovamut kiffartornermi imminut tunniunnissatsinnut suna kajumississutigisariaqarparput?

⁹ Mianersuutigiulli allat kukkusumik kajumissaartoornissaat. Assersuutigalugu piniarnata allat suliniutikinnerminnik ajorusuutiginnitsilersoorsinnaavavut. Allanut malunnartumik suliniarnerusunut naleqqiunnerisigut piaarinata kanngusutsittoorsinnaavavut, imaluunniit allaat sukannersunik maleruagassaliortoorsinnaavugut tamakkuninngalu eqqortitsinngitsunik isornartorsiuisoorsinnaalluta. Periaatsit taama ittut immaqa sulinialersitsigallarsinnaapput, kisianni Paulus oqanngilaq ’pisuutitsiniarnissamut ajunngitsuliornissamullu kajumissaaqatigiissasugut’. Aap, asanninnermut kajumissaaqatigiittussaavugut, taamaappallu suliniarnerit ajunngitsumik pissuteqassapput. Suliniarnermut pissutaasariaqanngilaq naatsorsuutigisaasunik naammassinninngikkaanni allat qanoq eqqarsassanerannik isumakuluutiginninneq. — 2 Korintumiut 9:6, 7.

10. Sooq eqqaamasariaqarparput allat uppernerannut naalagaasussaanngitsugut?

¹⁰ Kajumissaaqatigiinneq isumaqanngilaq nakkutigeqatigiinneq. Naak Guutimit annertuumik oqartussaaffeqartitaagaluarluni apustilip Paulusip Korinthimi ilagiit ima eqqaasissimavai: ’Uppersutsissinnut naalagaanianngikkaluarpugut.’ (2 Korintumiut 1:24) Aamma uagut maniguulluta paasigutsigu allat Jehovamut kiffartornerminni qanoq annertutigisumik suliniarnissaat aalajangigassarinngikkipput, inuttut aalajangigassaanni allani nalunngeqatiginnissutaannik aqutsiniartussaanngitsugut, taava ’iluarniarpallaartuuneq’, nuannaassuseqannginneq, sukannersuuneq, isumalluanngissuseq imaluunniit maleruagassiorniarnersuaq pinngitsoortissavavut. (Nalunaajaasup oqaasii 7:16) Pissutsit taama ittut kajumissisitsineq ajorput; akerlianilli nanertuutaasarput.

11. Israelikkut nalaanni illernartuutiliornermi inuit anersaamik qanoq ittumik pigisaqarlutik tunissuteqarsimappat, ullutsinnilu tamanna qanoq atorneqarsinnaava?

¹¹ Itsaq Israelikkut illernartuutiliortoqarnialernerani tunissutinik pisariaqartitsisoqalermat pissuserisaattut uagut Jehovamut kiffartornitsinni pissuseqarumalluta sapinngisarput tamaat ilungersorumavugut. 2 Moses 35:21-mi ima allassimavoq: „Uummatimikkut kajumissisineqartut tamarmik aggiussipput toqqup naapeqatigiittarfiup sananeqarnissaanut sanaassartaanullu tamanut atisanullu illernartunut atugassanik [Jehovamut] pigititassanik.“ Qallikkut pissutsinit pinngitsaalineqanngillat, qamuunali, uummatiminnit, kajumissisinneqarlutik. Oqaaseq hebriiarisooq tassani atorneqartoq isumaqavippoq „uummatiminnit kivinneqartut tamarmik“ tunissuteqarsimasut. (Uagut uingasunngortippavut.) Taamaattumik sumiluunniit katisimagaangatta uummatikkut ’kivinneqarnartumik’ iliorfigeqatigiittarniarta.

’Oqaaqqissaaqatigiilluta pisa’

12. (a) Oqaaseq griikerisooq ’oqaaqqissaaqatigiinnermik’ nutserneqarsimasoq aamma qanoq isumaqarpa? (b) Jobip ’tuppallersaasui’ qanoq taassuminnga qiimmassaarinngitsoorpat? (c) Sooq allanik eqqartuussinaveersaartariaqarpugut?

¹² Paulusip ’oqaaqqissaaqatigiittarnissamik’, tassa qiimmassaqatigiittarnissamik, kajumissarinermini atorpaa griikerit oqaasiat pa·ra·ka·leʹo, aamma isumaqarsinnaasoq ’nakussatsippaa, tuppallersarpaa’. Septuagintami griikerisuumi oqaaseq tamanna Job 29:25-mi atorneqarpoq, tassani Job aliasuttunik tuppallersaasartutut eqqartorneqarluni. Taamaattorli Job nammineq annertuumik atugarliulerami assingusumik qiimmassarneqanngilaq. ’Tuppallersaasuisa’ pingasut eqqartuutingaaramikku oqalugiarfigingaaramikkulu paasinniffiginissaa misigeqatiginissaaluunniit puiorpaat. Ilami taama oqaluffigitigalugu ataasiaannarlutilluunniit Job aqqatigut taanngilaat. (Naleqqiuguk Job 33:1, 31.) Soorlumi tassa inuttut isiginagu ajornartorsiutitut isiginerugaat. Taamaattumik tupinnanngilaq ilungersuummerluni Jobip ima oqarfigimmagit: ’Ilissi uattut atugaqassagaluarassi!’ (Job 16:4) Ullumikkuttaaq arlaannik qiimmassaassaguit misiginneqataaniarit! Eqqartuussinak. Soorlumi Rûmamiut 14:4-mi ima allassimasoqartoq: ’Kinaagavit allap kiffaa eqqartuuniarpiuk? Qeqartorluunniit orlusorluunniit naalagaata pigaa. Qeqartuartitaasinnaagaluarporli Jehovap qeqartuartinneq sapinngimmani.’

13, 14. (a) Qatanngutivut angutit arnallu tuppallersarniarlugit ilumoortumik tunngaviusumik sumik uppernarsaavigisariaqarpavut? (b) Daniel qanoq ililluni inngilimit nakussatsinneqarsimava?

¹³ Oqaaseq pa·ra·ka·leʹo aamma Tásalûníkamiunut agdlagkat áipait 2:16, 17-imi ’tuppallersaanermik’ nutserneqarsimavoq: ’Taassumali Naalakkatta Jesus Kristusip Guutillu Ataatatta asagamisigut naassaanngitsumillu tuppallersaatissaqartilluta ajunngitsumillu saammaannermit neriugisaqartilluta, taassuma uummatisi tuppallersarligit suliassanullu oqaasissanullu ajunngitsunut tamanut nakussatsillusi.’ Malugiuk uummatitsigut tuppallersarneqarnerput Jehovap uagutsinnut asanninneranik sallusuissummut tunngaviusumut Paulusip atassuseraa. Taamaattumik sallusuissutip pingaartup tamatuma uppernarsarneratigut allanik oqaaqqissaarillutalu tuppallersaasinnaavugut.

¹⁴ Ilaanni pruffiiti Daniel tataatsannartumik takusaqareerluni annilaarsimaqaluni ima oqarsimavoq: „Nukillaavippunga, taattorlerlungalu nukeerulluinnarpunga.“ Jehova arlaleriarluni inngilimik aallartitsivoq Daniel eqqaasinniarlugu Guutip isaani „nuannarineqangaartoq“. Tamanna qanoq kinguneqarpa? Danielip inngili ima oqarfigaa: „Pissatsipparma.“ — Daniel 10:8, 11, 19.

15. Utoqqaanertat nakkutilliisullu angalasartut nersualaarineq ilungersortumillu oqaassineq qanoq oqimaaqatigiissaarniartariaqarpaat?

¹⁵ Aamma allakkut allanik qiimmassaasoqarsinnaavoq. Nersualaarisarit! Isornartorsiueqqajaanarsinnaallunilu sukannerfiginneqqajaanarsinnaavoq. Ilaannikkut ilungersortumik oqaanneqarnissaq pisariaqarsinnaasarpoq, ingammik utoqqaanertamit imaluunniit nakkutilliisumit angalasartumit. Pitsaassaarli asannittumik qiimmassaasartutut, eqqartuussiumatuutuunngitsoq, eqqaamaneqassappata.

16. (a) Isumatsassimasumik qiimmassaaniaraanni sooq naammanngila kajumissaaginnassallugu Jehovamut kiffartornermi suliniuteqarnerunissaanik? (b) Elia isumatsassimasoq Jehovamit qanoq ikiorneqarsimava?

¹⁶ Ingammik isumatsaqqasut qiimmassarneqarnissaminnik pisariaqartitsisarput, Jehovallu naatsorsuutigaa uagut kristumioqataasutut — ingammik utoqqaanertaagutta — ikiuisarnissarput. (Ussatit 21:13) Qanoq iliorsinnaavugut? Iluaqutaanngilaq oqarfigiinnassallugit Jehovamut kiffartornerminni iliuuseqarnerulerunik iluarsissasut. Sooq? Isumatsassimanerat naammanngitsumik suliniuteqartutut misiginerannik pissuteqarsinnaammat. Tamanna qaqutigoortuunngilaq. Pruffiiti Elias ilaanni ima isumatsassimatigaaq allaat toqunissani kissaatigalugu; tamannali pisimavoq Jehovamut kiffartornermini ulapileruttorfimmini. Jehovap qanoq iliuuseqarfigaa? Inngili ikiuiartortillugu aallartippaa. Eliasip uummammiuni tamaasa Jehovamut anippai, nassuerluni siulimisulli toqusimasutut naleqanngitsigaluni misigaluni, suliani tamarmik asuliinnaasut kisimiilluinnarlunilu. Jehova tusarnaarpoq tuppallersarlugulu pissaaneqassutsiminik tupinnartumik takutitsivigalugu uppernarsaavigalugulu kisimiinngillunnartoq suliarlu aallartissimasaa naammassineqarumaartoq. Jehovallu Elias neriorsorpaa suleqatitaartikkumaarlugu sungiusagassaanik. — 1 Kunngit 19:1-21.

17. Imminut sukannerfigivallaartoq utoqqaanertap qanoq qiimmassarsinnaavaa?

¹⁷ Ila qiimmaallannarunassusia! Uaguttaaq misigissutsikkut artorsaateqartut qiimmassartarniartigik. Tusarnaarnerisigut paasinissaat anguniartartigu! (Jâko 1:19) Inunnut ataasiakkaanut naleqqussakkanik Biibiliminngaanniit tuppallersaasarta. (Ussatit 25:11; 1 Tásalûníkamiut 5:14) Imminut isornartorsiorpallaartut qiimmassarniarlugit utoqqaanertat inussiarnersumik Biibilimi uppernarsaatissanik takutissinnaavaat Jehovap asagai pingaartikkaalu.a Utertitsissummik eqqartuineq naleqanngitsutut misigisunut assut qiimmassaataasinnaavoq. Qangali ajortuliarisimasaminik aliasuutiginnittup pisariaqartissinnaavaa ersersitsivigineqassalluni ilumoorluni peqqissimisimaguni iliuutsinillu taama ittunik tunussilluinnarsimaguni utertitsissutip ajortuliani piiarluinnarsimagaa. — Jesaja 1:18.

18. Pinerlineqarsimasoq, soorlu pinngitsaalisaalluni arneriffigineqarsimasoq, qiimmassarniarlugu qanoq ililluni utertitsissutissamik ajoqersuut atorneqarsinnaava?

¹⁸ Soorunami utoqqaanertaq eqqarsarluaqqaartariaqarpoq ataasiakkaanut naleqquttumik ajoqersuisinnaajumalluni. Assersuutigalugu, Mosesip inatsisaasa atuunneranni uumasunik pilliuteqartarnikkut, ajortulianik isumakkeerfigineqassagaanni pisariaqartukkut, Kristusip pilliutaa utertitsissutaasoq siumut tikkuartorneqarsimavoq. (3 Moses 4:27, 28) Pinngitsaalisaallunili arneriffigitissimasup taamatut pilliuteqartarnissaanik aalajangersagaqanngilaq. Inatsisini allassimavoq taama pitissimasoq pillarniarlugu ’qanoq pineqassanngitsoq’. (5 Moses 22:25-27) Ullumikkut qatanngut arnaq pinerlineqarsimasoq pinngitsaalineqarlunilu arneriffigineqarsimasoq imminut minguttuutut naleqanngitsutullu isigisoq ajortuliaq tamanna salinniarlugu utertitsissutissamik pisariaqarneranik erseqqissaavigissallugu nalequppa? Naamerluinnaq. Pinerlineqarnermigummi ajortuliunngilaq. Pinerliisoruna ajortuliortoq minguiarneqarnissaminillu pisariaqartitsisoq. Taamaattorli asanninneq Jehovap Kristusillu utertitsissummik pilersitsinermikkut ersersitaat uppernarsaatitut atortariaqarpoq pinerlineqarsimasup allap ajortuliaa pissutigalugu Guutip isaani minguttuunngorsimannginneranut, Jehovallu isaani naleqarneranut taassumanngalu suli asaneqarneranut. — Naleqqiuguk Mákorse 7:18-23; 1 Juánase 4:16.

19. Sooq ilimagisinnaanngilarput qatanngutitsinnik angutinik arnanillu katisimaqateqarnerit tamakkeratik ineriartornartuussasut, sunali aalajangiusimasariaqarparput?

¹⁹ Aap, ataasiakkaat inuunerminni qanorluunniit atugaqaraluarunik, atugarisimasatillu qanorluunniit avaanngusuutigitigigaluarunikkik, Jehovap innuttaasa ilagiivini qiimmassarneqarsinnaasariaqarput. Taamaaliorfigineqarsinnaassappullu misissoqatigiinnissarput, kajumissaaqatigiinnissarput qiimmassaqatigiinnissarpullu sumiluunniit ataatsimooraangatta ilungersuutigiuarutsigik. Naammalluinnanngitsuugattali tamatta ilaannikkut tassuunakkut qarsupissinnaasarpugut. Pinngitsooratalu ilaannikkooriarluta pakatsisitsisoorsinnaasarpugut allaallu aliasutsitsisoorsinnaalluta. Tassuunakkut allat kukkussutaat isiginiarpallaassanngilatit. Kukkuluttornerit isiginiarpallaarukkit ilagiinnik isornartorsiuivallaalersoorsinnaavutit allaallu nakkarfissamut ingasattumut Paulusip ilungersorluni ingalassimaqqusaanut nakkartoorsinnaallutit, tassa katisimasarnissatsinnik kajumissaarutaanik maleruaanngitsoorlutit. Tamatuma pinngisaannarnissaa isumaginiartigu! Aaqqissuussaanitoqaq manna navianarsiartuinnartillugu tatisiartuinnartillugulu aalajaalluta aalajangiusimaniartigu ataatsimiinnerni katisimasarnivut ineriartornartuutinniarlugit sapinngisarput tamaat iliuuseqarnissarput — ingammillu malugileratsigu Jehovap ullussaa qanilliartuinnartoq! (wE 1/4 95)

[Quppernerup ataani ilanngussaq]

Qanoq akissavit?

□ Sooq ulluni kingullerni makkunani ataatsimiittarnitta katisimasarnittalu qiimmannartuunissaat taama pingaartigaa?

□ Misissoqatigiinneq qanoq paasisariaqarpa?

□ Kajumissaaqatigiinneq qanoq paasisariaqarpa?

□ Qiimmassaqatigiinnik sunik ilaqarpa?

□ Isumatsassimasut nanertisimasullu qanoq qiimmassarneqarsinnaappat?

[Qupp. 16-mi assiliartaq]

Inoroorsaartuugutta qatanngutivut ilisarisimanerulissavavut

[Qupp. 18-mi assiliartaq]

Elias isumatsissimasoq Jehovap saamalluni tuppallersarpaa