Tunuarsimaaqinak
1. Sunissamut sapiissuseqartoqartariaqarpa, aamma sooq?
1 Illaruaatigineqarnissat annilaanngatigalugu atuarfimmi oqaluussinissannut tunuarsimaarnikuuit? Isummanik annissinissamut sapiissuseqartariaqarpoq, pingaartumik ittoortuulluni. Suna iluaqutigissinnaaviuk?
2. Sooq atuarfimmi oqaluussiniarnermi naliliisinnaassuseq pisariaqarpa?
2 Naliliisinnaassuseqarit: Naak atuarfik illit namminerisamik angalaarfigisartakkattut isigisinnaagaluarit, imaanngilaq illumiit illumut angalaartarnertut kikkut tamaasa anersaakkut tunngasunik oqaloqatiginiassagitit. Oqaluussinissamut periarfissarsiornerni naliliisinnaassuseqarit. (Oqal 3:1, 7) Klassinni sammisaqaqatigiinnermi imaluunniit suliakkerneqarninni upperisat pillugu immaqa saqqummiisinnaavutit. Atuaqativilluunniit aperisinnaavaatit sooq sammisaqartitsinernut aalajangersimasunut peqataaneq ajortutit. Ukiup atualerfiusup aallartinnerani kristumiut ilaasa ilinniartitsisutik Jehovamut Nalunaajaasuunerminnik ilisimatittarpaat atuagassiaaqqanillu upperisatsinnik nassuiaasunik tunillugit. Allat atuagassianik nerrivimminnut ilisisarput atuaqatitik apeqquteqarsinnaanissaannik kajumissaarisunik.
3. Atuarfimmi oqaluussinermut qanoq piareersarsinnaavit?
3 Piareersarit: Piareersarsimaguit sapiissuseqarnerussaatit. (1 Petr 3:15) Qanoq aperineqariataarnissat takorlooruk qanorlu akissanerlutit eqqarsaatigalugu. (Uss 15:28) Ajornanngippat, Biibilit biibililersaarutinillu, assersuutigalugit ‘Ræsonnerebogen’ atuakkallu Unge spørger aamma pinngortitsinermut tunngasunik atuarfimmiititaqarit pisariaqaraangat takutissinnaasannik. Angajoqqaatit qinnuigikkit unnummi ilaqutariittut sammisaqarfimmi piviusuusaartitsineq ilannguteqqullugu.
4. Sooq atuarfimmi oqaluussiuaannassavit?
4 Isumalluarit: Eqqarsassanngilatit sallusuissut eqqartoraangakku atuaqatinnit tamatigut illaatigineqartassallutit. Ilaasa immaqa sapiissusinnik nersualaassavaatsit immaqalu tusarnaarlutik. Qisuariartoqanngippat nikalloqinak. Misiliinerit Jehovap nuannaarutigissavaa. (Hebr 13:15, 16) Qinnuigiuaannaruk ‘siooranngivillutit oqalussinnaaqqullutit’. (ApS 4:29; 2 Tim 1:7, 8) Tusarnaartoqarpat qanoq nuannertigissanersoq takorlooruk. Inuk taanna Jehovamut kiffartortunngoratarsinnaavoq!