Nutaarsiassap nuannersup tusarliunneqarneranut naqitaaqqat atortakkit
1. Guutip innuttaasa naqitaaqqat qanoq atortarsimavaat?
1 Jehovap innuttaasa naqitaaqqat Biibililersaarutit atorlugit qangali nutaarsiassaq nuannersoq siaruartertalersimavaat. 1880-imi C. T. Russellip suleqataasalu Bible Students’ Tracts (Biibilimik Atuaqqissaartartut Naqitaaraataat) Watch Tower-imik atuartartut agguaatassaattut saqqummersittalerpaat. Naqitaaqqat pingaartinneqangaarmata 1884-imi C. T. Russellip, peqatigiiffik pisortanit akuerisaasoq, Zion’s Watch Tower Tract Society, maanna Watch Tower Bible and Tract Society of Pennsylvania-mik taaneqartartoq, iluanaarniarnermik siunertaqarani Guutip naalagaaffiata soqutigisaanik siunertalik pilersikkamiuk oqaaseq “tract” (naqitaaraq) peqatigiiffiup taaguutaanut ilannguppaa. 1918 tikillugu naqitaaqqat 300 millioninik amerlanerusut Biibilimik Atuaqqissaartartunit agguaanneqarsimapput. Taamanimiilli naqitaaqqat oqaluussinermi sunniuteqarluartumik atorneqartuartarput.
2. Sooq naqitaaqqat sunniuteqarluartarpat?
2 Sooq sunniuteqarluartartut: Naqitaaqqat qalipaatigissuullutillu takujuminartuupput. Naqitaaqqani naatsunnguamik allataapput soqutiginartuullutillu pissarsiaqarnarput. Inunnut atuagassianik atuakkanilluunniit atuarnissaminnut merserinnittunut naleqqussagaapput. Naqitaaqqat tamanit, allaat oqaluussisartunngorlaanit meeqqanillu, neqeroorutigineqariaannaapput. Tamatuma saniatigut naqitaaqqat anginngillat nassatariuminartuullutillu.
3. Nammineq misigisimasat atuagassianiluunniit atuarsimasaq naqitaaqqat pingaaruteqassusiannik ersersitsisoq oqaluttuariuk.
3 Inuppassuit naqitaaraq aqqutigalugu sallusuissut tusaqqaarsimavaat. Assersuutigalugu arnap Haitimiup naqitaaraq aqqusinermiittoq siumorsimavaa. Tigoriarlugu atuareeramiuk oqarpoq: “Sallusuissut nassaaraara!” Kingornatigut naalagaaffilersaarfimmukartalerpoq Biibilimillu atuaqqissaartalerluni naggataatigullu kuisilluni — Guutip oqaasia pissaangaartoq naqitaaqqamiittoq pissutaalluni taamaattoqarpoq.
4. Naqitaaqqat qaammammi neqeroorutaagaangata suna anguniagarisassavarput?
4 Illumiit illumut: Oqaluussinermi naqitaaqqat sunniuteqarluartarnerat pissutigalugu qaammatit ilaanni, novembari aallarnerfigalugu, neqeroorutaasalissapput. Naqitaaqqat tunniutiinnartarnissaat anguniagarinngilarput, anguniagaraarpulli naqitaaqqat oqaloqatigiinermut aallarniutissatut atornissaat. Pulaagaq pulaaqqittagarluunniit soqutiginnippat atuagaq Biibilimi ajoqersuutigineqartut Biibililersaarutilluunniit allat atorlugit Biibilimik atuaqqissaaqateqarneq qanoq ingerlanneqartartoq takutissinnaavarput. Illumiit illumut oqaluussinermi naqitaaqqat qanoq neqeroorutigisinnaavavut? Naqitaaqqat tamarmik assigiinngitsuummata neqeroorutiginiakkavut ilisimalluartariaqarpavut.
5. Illumiit illumut angalaarnermi naqitaaqqat qanoq neqeroorutigisinnaavavut?
5 Aallarneeriaaserput angalaarfigisartakkatsinnut naqitaaqqamullu agguaatatsinnut naleqqussartariaqarparput. Oqaloqatigiinneq aallartinniarlugu naqitaaraq pulaakkamut tunniuteqqaarsinnaavarput. Saqqaata takorannernera pulaakkap soqutiginnilissutigisinnaavaa. Aamma naqitaaqqat arlallit pulaakkamut takutissinnaavavut soqutigisaanillu toqqaasillugu. Angalaarfigisartakkatsinni inuit ammaassinissaminnut nangaappata naqitaaqqap saqqaa pulaakkamit takuneqarsinnaasunngorlugu tigummisinnaavarput imaluunniit allakkanut nakkartitsivimmut isummerfigisassaanik ikisisinnaanerluta aperisinnaavarput. Naqitaaqqap qulequtaani apeqquteqarpat qanoq isumaqarfigineraa aperisinnaavarput. Nammineerlutaluunniit soqutiginnilissutigissinnaasaanik oqaloqatigiinnermillu aallartissutaasinnaasumik aperisinnaavarput. Taava pulaagaq naqitaaqqami immikkoortumik atuaqatigisinnaavarput atuakkatsinnilu apeqquteqaraangat unikkallartarsinnaavugut pulaagarlu isummersoqqullugu. Allassimaffiit pingaarnerit Biibilimi atuarneqarsinnaapput. Naqitaaqqap ilaat sammereerutsigu oqaloqatigiinneq naggasersinnaavarput qaqugulu pulaaqqissinnaanerlugu isumaqatigiisuteqarfigalugu. Angerlarsimanngitsut Biibililersaarutinik qimatsivigineqartarnerat ilagiinni ileqqorineqarpat angerlarsimasoqanngippallu naqitaaraq allanik takuneqarsinnaanngitsumut ilineqarsinnaavoq.
6. Aqqusinermi oqaluussinermi naqitaaqqat qanoq atorneqarsinnaappat?
6 Aqqusinermi oqaluussineq: Aqqusinermi oqaluussinermi naqitaaqqat atornikuuigit? Inuit ilaat ulapputeqarnertik pissutigalugu oqaloqatigerusulluta unikkusunneq ajorput. Inuit qanoq soqutiginnitsiginersut nalileruminaassinnaavoq. Atuagassiat nutaat atuassaneraat nalugutsigu tuninagit, soormi naqitaaqqamik tuniinnarutsigit? Saqqaa soqutiginarpasimmat allassimasullu takivallaanngimmata piffissaqalerunik naqitaaraq atuarusulersinnaavaat. Ulapippasippallaanngippata naqitaaqqani allassimasut ilaat pillugit soorunami oqaloqatigisinnaavavut.
7. Torrutiinnarlugu oqaluussinermi naqitaaqqat qanoq atorneqarsimanerinik misilittakkat oqaluttuarikkit.
7 Torrutiinnarlugu oqaluussineq: Naqitaaqqat atorlugit torrutiinnarlugu oqaluussinissaq ajornanngitsuararsuuvoq. Qatanngut angut naqitaaqqanik arlalialunnik kaasarfimmiulisarluni anisarpoq. Naapitani, soorlu pisiniartitsisoq, atuagassaanik neqeroorfigisarpaa naqitaaqqamillu tunillugu. Aappariit New York Citymut takornariarnerminni allamiorpassuarnik naapitaqarnissartik ilimagaat. Taamaattumik atuagassiaaraq Godt nyt til folk af alle nationer aamma naqitaaqqat allamiusoortut arlallit nassarpaat. Aqqusinermi sukujunnik tuniniaasartoq, naatsiiviliarsuarmi imaluunniit neriniartarfimmi eqqaminni issiasoq allamiutut oqaluttoq tusaagaangamikku naqitaaqqamik oqaaserisaatut allanneqarsimasumik neqeroorfigisarpaat.
8. Sooq naqitaaqqat naatsiiassanut assersuunneqarsinnaappat?
8 Naatsiiassat siaruartikkit: Naqitaaqqat naatsiiassanut assersuunneqarsinnaapput. Naasorissaasoq naatsiiassanik naammattunik siaruarterisarpoq nalugamiuk siaruartikkami ilaat sorleq inerititaqarumaarnersoq. Oqaluussisartup oqaasii 11:6-imi ima allassimasoqarpoq: “Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq imaluunniit marluk tamarmik iluatsikkumaarnersut.” Taamaattumik naqitaaqqat sunniuteqarluartut atorlugit ‘ilisimasassanik siaruarterisariaqarpugut’. — Uss 15:7.
[Qupp. 3-mi issuagaq]
Oqaluussinermi naqitaaqqat sunniuteqarluartarmata qaammatit ilaanni, novembari aallarnerfigalugu, neqeroorutaasassapput.