Ajornartorsiutinik aaqqiiniarnermut ilinniut

INUIT ikittuinnaat Jobitut ajornartorsiortigisimapput. Taassuma piffissap sivikitsuinnaap ingerlanerani pisuussutini, inuussutissarsiutini meeqqanilu alianartumik toquneratigut annaasimavai naalliunnangaartumillu nappaateqalerluni. Ikinngutiminik qanigisaminillu ilagineqarumajunnaarpoq, nuliatalu oqarfigisimavaa: „Guuti perloqquinnaruk, toquinnaruit pitsaanerummat.“ — Job 2:9; 19:13, 14.

Taamatut assingusumik misigisaqartut Jobimik pisimasoq Biibilimi atuarneratigut tuppallersaatissarsiffigalugulu qiimmassaatigisinnaavat. Misilinneqarnera ajunngitsumik kinguneqarmat takusinnaavarput atugarliorneq naammagittarluni atoraanni Jehovap uummataa nuannaartinneqartartoq, Guutimut tunniusimanermik ilumoortumik namminissarsiortuunngitsumik kajumissuseqaraanni. — Job kapitali 1, 2; Job 42:10-17; Ussatit 27:11.

Oqaluttuap Biibilimeersup tamatuma ajornartorsiutinik aaqqiiniarnermi ilinniut pingaartoq aamma imaraa. Misilinneqartut qanoq unnersuunneqartarnissaannik — qanorlu unnersuunneqartannginnissaannik — assersuutinik ersarissunik imaqarpoq. Aammattaaq Jobip nammineerluni misigisaata atugarliulissagaluarutta oqimaaqatigiissumik qisuariarnissatsinnik ikiorsinnaavaatigut.

Unnersuussinerlunneq

Oqariaaseq „Jobip tuppallersaasui“ tuluttut atorneqarajuttarpoq inunnut misiginneqataanngitsunut, ikimilli taratsumik tanitsisunut. Naak Jobip ikinngutai pingasut nuannarineqarunnaarnerminnut namminneq pisuugaluartut isumaqassanngilagut pissutigisaat tamarmik ajortuusut. Isumartik naapertorlugu arlaatigut Job ikiorusussimassavaat. Soorli iluatsitsinngillat? Qanoq ilillutik Satanimut, Jobip assuarnaassusianut akornusiiniartumut, sakkuulersimappat?

Unnersuussutaat tamangajammik eqqunngitsumik tunngaveqarput: Ajortuliortut kisimik naalliuttarput. Oqalunnermini siullermi Elifas oqarpoq: „Ajortuliaqanngitsumik toqutitaasoqartarnerpa, assuarnaatsunillu nungutitaasoqartarnerpa? Takusartakkakka malillugit imaappoq: Assallatserillutik ajussusermik nunamut matoorussisut ajunaarutissanillu siaruarterisut nammineq tamakkorpiaat katersoraraat.“ (Job 4:7, 8) Elifas eqqunngitsumik isumaqarpoq ajortuliorsimanngitsut ajunaarnernik eqqugaaneq ajortut. Isumaqarpoq Jobip ajornartorsiungaarnera Guutimut ajortuliorsimaneranik pissuteqarsimassasoq.a Bildad Sofarilu marluullutik isumaqarput Job ajortuliani peqqissimissutigisariaqarai. — Job 8:5, 6; 11:13-15.

Ikinngutaasa pingasut Guutip ilisimassusia pinnagu namminneq isummaminnik ersersitsinermikkut Job nikallortippaat. Allaat Elifas oqarpoq ’Guutip allaat nammineq kiffani tatigisinnaanngikkai’, Jobilu assuarnaatsuunersoq assuarnaatsuunnginnersorluunniit Guutimut soqutaanngitsoq. (Job 4:18; 22:2, 3) Oqaatsinik taamatut nikallornartigisunik ilumuunngitsigisunilluunniit takorluuineq ajornarpoq. Tupinnanngilaq Jehovap Elifas ikinngutaalu Guutimik mitallerneri pillugit assuarimmagit. ’Eqqortumik oqaluuserinngilarsinga’, oqarpoq. (Job 42:7) Ajoqutaanerpaasumilli isummerneq aatsaat tikipparput.

Naggataatigut Elifas toqqartumik unnerluussivoq. Job pisuussuteqartutut nassueruteqartissinnaannginnamiuk Elifas Jobip ajortuliarisimasinnaasaanik isummersulerpoq. „Taamaaliortoruna ajussutsit angeqimmat kipisuitsumillu iluaatsuliortaravit,“ Elifas oqarpoq. „Qatanngutitit sallunaveeqqummik tigusiffigisarakkit pissutissaqarnak, inuit atisaqanngingajattut atisaannik piiaaffigisarakkit, qasusoq immisinngisaannarakku kaattorlu nerisassaanik tuninngisaannarlugu.“ (Job 22:5-7) Unnerluussineq tamanna tunngavissaqanngivippoq. Jehovap nammineerluni Job ’assuarnaatsutut peqqusersuitsutullu’ taasimavaa. — Job 1:8.

Assuarnaassutsiminik saassussisut Jobip qanoq qisuariarfigai? Narrutsassimammat nikallorlunilu paasinarpoq, aalajangersimavorli unnerluutigineqarnermi ilumuunnginnerat uppernarsarniarlugu. Allaammi imminut illersorniangaarami ajornartorsiornerminut Guuti ilaatigut pisuutilerpaa. (Job 6:4; 9:16-18; 16:11, 12) Pingaarnerusoq tunulliunneqalerpoq, Jobilu assuarnaatsuunersoq assuarnaatsuunnginnersorluunniit piunngitsumik oqaloqatigiissutigineqalerluni. Unnersuussutit ajoqutaangaartut taakkua kristumiut qanoq ilinniarfigisinnaavaat?

1. Kristumiup asannittup qatanngunni ajornartorsiulerpat nammineq pisuussuutiginerai pasillissanngilaa. Siornagut kukkussutigisimasat — ilumut kukkussutaappata pasinerluinerinnaappataluunniit — sukannersumik isornartorsiuineq tamaviaarluni ingerlaniarsarisumut nikallortitsingaarsinnaavoq. Nikallungasut naveerneqarnissaq pinnagu ’tuppallersarneqarnissaq’ pisariaqartippaat. (1 Tásalûníkamiut 5:14) Jehovap nakkutilliisut ’anorersuarmut oqquiffioqquvai’, Elifasitut, Bildaditut Sofaritullu ’tuppallersaasutut erloqisitsiinnartutut’ pinnatik. — Jesaja 32:2; Job 16:2.

2. Nalunaatsumik uppernarsaatissaqartinnata unnerluussinngisaannassaagut. Tusatsiakkat ilimagisalluunnit — soorlu Elifasip ilimagisai — avoqqaarliutissatut tunngavissaalluanngillat. Utoqqaanertaq eqqunngitsumik unnerluussiguni tatigineqarnini annaasinnaavaa misigissutsikkullu ilungersortitsisinnaalluni. Unnersuussinerlunnerit tusaallugit Job qanoq misigisimassava? Annikilliornini tusangiasaarinermut sangutippaa: „Ila ikiorluarsimaqaat angut nukillaangasoq najummisimallugulu nukeeruttoq!“ (Job 26:2) Nakkutilliisut misiginneqataasut ’assannik qasusunik pissatsitsisarput’, ajornartorsiutinik annerulersitsinatik. — Eprîarit 12:12.

3. Unnersuussineq Guutip oqaasianik tunngaveqartariaqarpoq, nammineq isummanik pinnani. Jobip ikinngutaasa tunngaviginiagaat eqqunngitsuullutillu aserornartuupput. Job Jehovamut qaninnerulersinnagu, Ataataminut qilammiusumut avissaaruteqarsorilersippaat. (Job 19:2, 6, 8) Biibilimik atuilluarnikkut pissutsinik inissitsiterisoqarsinnaavoq, pissatsitsisoqarsinnaalluni piviusumillu tuppallersaasoqarsinnaalluni. — Lúkarse 24:32; Rûmamiut 15:4; 2 Timûtiuse 3:16; 4:2.

Nakkarfissaasut assigiinngitsut Jobimik allakkani takutinneqarput, aammattaaq qanoq ililluni unnersuussilluarnissamik ilinniutaavoq.

Qanoq unnersuussisoqarsinnaasoq

Elihup unnersuussinera imarisamigut Jobimullu pissuserisamigut Jobip ikinngutaasa unnersuussinerinit allaanerulluinnarpoq. Jobip aqqa atorpaa ikinngutitullu oqaluffigalugu eqqartuussisutuunngitsoq. „Maannali oqaaseriumasakka tusakkit, Job, oqaasissakka tamaasa tusarnaarniakkit! Takuat, marluulluta Guutimut assigiippugut, uangattaaq marrarmit sanaajuvunga.“ (Job 33:1, 6) Aamma Elihup Job eqqortuliorniartarneranik nersualaartarpaa. „Oqalunniarit ilumoornerarusukkaluarakkit“, Job eqqissisarpaa. (Job 33:32) Inussiarnersumik unnersuussinermi saniatigut aamma alla pissutigalugu Elihu iluatsitsivoq.

Allat nipangernissaat naammagittarluni utaqqigamiuk Elihup unnersuussinnginnermini ajornartorsiutaasoq paasilluarsinnaaneruvaa. Job assuarnaatsuuppat Jehovap pillassavaa? „Guuti ajortumik iliunngisaannarpoq, Ajugaqanngitsoq eqqunngitsumik iliorneq ajorpoq,“ Elihu oqarpoq. „Iluarsuseqartut alarneq ajorpai.“ — Job 34:10; 36:7.

Jobip assuarnaatsuunera apeqqutini ilumut pingaarnersaava? Oqimaaqatigiinngitsumik isumaqarneq Elihup Jobimut uparuarpaa: „Illit ima oqarputit: ’Guutip takkuani iluassuseqartuuvunga.’ Isitit qilammut aarlortikkit takusassarsiorlutillu, malugeriakkit nuissat pavanersuaq ittut!“ (Job 35:2, 5) Soorlu nuissat uatsinnit qutsinnerungaartut, taamatut Jehovap aqqutai uagut aqqutitsinnit qutsinnerungaarput. Qanoq iliornera uagut eqqartuussassarinngilarput. „Taamaattumik inunnut mianernangaarpoq, qiviarnerli ajorpai imminnut ilisimatuutittut,“ Elihu oqarpoq. — Job 37:24; Jesaja 55:9.

Elihup unnersuussilluarnera Jehovap nammineerluni ajoqersuinissaanut Jobimut aqqutissiuivoq. Elihup ’Guutip tupinnartuliaanik’ isiginninnera, kapitali 37-miittoq, Jehovallu nammineerluni Jobimut oqaasii, kapitali 38-miit 41 ilanngullugu allassimasut, ersarissumik assigiissuteqarput. Elihup pissutsit Jehovap isiginnittaasiatut isigisimagunarpai. (Job 37:14) Kristumiup qanoq ililluni Elihu ilaarniarsinnaavaa?

Nakkutilliisut Elihutulli ingammik misiginneqataasinnaaneq inussiarnersinnaanerlu kissaatigaat, eqqaamallugu aamma nammineq naammalluinnanngitsuullutik. Unnersuussinnginnerminni pissutsit sunalu pineqarnersoq paasiniarlugit tusarnaaqqissaartariaqarput. (Ussatit 18:13) Biibili atuagassiallu Biibililersaarutit atornerisigut qulakkeerneqarsinnaavoq Jehovap isiginnittaasia salliutinneqarnersoq. — Rûmamiut 3:4.

Utoqqaanertanut atoriaannaasunik ilinniutaanermi saniatigut Jobimik allakkat ajornartorsiutit oqimaaqatigiissumik isigineqarnissaannik ilinniartippaatigut.

Atugarliorneq qanoq qisuariarfigineqassanngitsoq

Naalliunnermik ikinngutaasuusaartunillu pakatsisinneqarnermik nikanarsisitaalluinnarluni Job isumatsangaarpoq. „Peerlit ulloq inunngorfiga. . . Inuunera qatsuteqaara,“ nimaarpoq. (Job 3:3; 10:1) Satan pisuusoq nalullugu, isumaqarpoq ajornartorsiutiminut Guuti pisuusoq. Angutip assuarnaatsup naalliuuteqarnera eqqunngitsuliorfigineqarnertut isikkoqarpoq. (Job 23:10, 11; 27:2; 30:20, 21) Jobip taamatut isumaqarnerata pissutsinut allanut tappiillisippaa Guutillu inuiannut iliuuseqarnera isornartorsiulerlugu. Jehova aperivoq: „Naapertuilluartuunera qularutigisaatikkumaviuk? Uanga pisuutinniarpinga illit nammineq pinngitsuutitaaqqullutit?“ — Job 40:3.

Ajunaarnernik eqqugaagaangatta immaqa pillagaasutut misigeqqaartarpugut, soorlu Job taamaassimagunartoq. Ima aperineq nalinginnaavoq: ’Sooq uanga? Sooq allat — uannit ajornerusut ajornartorsiuteqanngingajallutik inuusinnaappat?’ Taamaattut eqqarsaatit ajortut Guutip oqaasiinik eqqarsaatiginneqqissaarnikkut pinngitsoorneqarsinnaapput.

Apeqqut akerleriissutaasoq annerusoq uagut nalunngilarput, Jobip tamanna nalusimavaa. Nalunngilarput ’Diaavulu liiuvertut uiannisaartutut angalasartoq iisassarsiorluni’. (1 Pîtruse 5:8) Soorlu Jobimik allakkat ersersikkaat Diaavulup assuarnaassuserput ajoquserniarsaraa, oqaatilliinini aatsaat atugarissaaraangatta Jehovamut nalunaajaasuusartugut uppernarsarniarlugu aalajangiusimavaa. (Job 1:9-11; 2:3-5) Jehovap kisimi oqartussaaneranik tapersersuinissarput sapiissuseqarfigisinnaavarput taamaalillutalu Diaavulup sallunera uppernarsarsinnaallugu?

Jesusip Jehovallu kiffaasa allarpassuit maligassiunerisa takutippaat aaqqissuussaanermi maanna atuuttumi ajornartorsiutit ilaasa pinngitsoornissaat ajornakusoortoq. Jesus oqarsimavoq ajoqersukkami imminik malinnikkumasut ’nappagaq naalliutsitaaffik’ ersuttariaqaraat. (Lúkarse 9:23, NV) Jobip atugarliuutaasa assinginik — nappaateqarnermik, asasanik toqusoornermik, isumatsannermik, aningaasat tungaatigut ajornartorsiornermik uppinngitsunilluunniit akerlilersorneqarnermik — arlaannik arlalinnilluunniit nalaataqarneq uagutsinnut ’nappagaq naalliutsitaaffiusinnaavoq’. Qanorluunniit ittunik ajornartorsiuteqaraluaraanni isumalluarfissaqarpoq. Ajornartorsiuteqarnerput naammagittarsinnaanermik Jehovamullu ilumoorluinnarnermik takutitsinissamut periarfissatut isigisinnaavarput. — Jâko 1:2, 3.

Jesusip apustilii taamatut isumaqarsimapput. Ukiumi 33-mi piinsip ulluata kinguninngua Jesus pillugu oqaluussisarnertik pissutigalugu iperartorneqarput. Taamaaliorneqareeramik nikallornatik ’tipaatsullutik’ aallarput. Nuannaarput naalliunnertik pissutiginagu, kisianni ’aqqa pillugu mitaatigineqaqqusaagamik’. — apustilit suliait 5:40, 41.

Soorunami ajornartorsiutivut tamarmik Jehovamut kiffartornitsinnik pissuteqanngillat. Ilaatigut ajornartorsiutivut nammineq pisuussutigisarpavut. Immaqaluunniit nammineq pisuussutiginagu ajornartorsiutip anersaakkut oqimaaqatigiissaarisinnaanerput ajoqusersinnaavaa. Sunaluunniit pissutaagaluarpat Jobitut maniguukkutta suna ajoqutaanersoq takusinnaanerussavarput. Job Jehovamut nassuerpoq: „Uanga oqaluuserisimavakka paasinngisakka.“ (Job 42:3) Kukkussutigisaminik nassuerutiginnittup siunissami taamatut ajornartorsiornissaraluani pinngitsoortissinnaavaa. Ussatini ima allassimavoq: „Silatuup perluk qanilliartortoq malugisarpaa qimarnguffissarsiortarlunilu.“ — Ussatit 22:3.

Pingaarnerpaavoq Jobimik allakkat eqqaasimmatigut ajornartorsiutivut naassaanngitsumut atassanngitsut. Biibilimi allassimavoq: ’Ata, ilalaartut pilluarneraraavut; Jobip ilalaarsusianik tusarsimavusi, Naalakkallu aniguiffigititaa ilisimavarsi, Naalagaq nallittuillunilu isumassuinertoqimmat.’ (Jâko 5:11) Qularutigissanngilarput Jehovap ullumikkut kiffani aalajaatsut taamatut akissarsisikkumaarai.

Qilanaarutigaarput ajornartorsiutaasinnaasut tamarmik — ’siulliit’ — peernissaat. (sarĸúmersitat 21:4) Ullup tamatuma nalliunnissaata tungaanut Jobimik allakkat ajornartorsiutitta ilisimassusilimmik sapiissuseqartumillu ajugaaffiginissaannik ikiussavaatigut. (wD 15/2 95)

[Quppernerup ataani ilanngussaq]

[Qupp. 29-mi assiliartaq]

„Malugeriakkit nuissat pavanersuaq ittut.“ Elihup Job paasitippaa Guutip aqqutai inuit aqqutaannik qutsinnerusut