Pingaarnerit salliutikkit!

Ataatsimiittoqartussaavoq, suliassaqaqaatilli. Suna pingaarnerutissaviuk?

UIULLUTILLU ataataavutit. Suliffinni ulloq suleruloorfik naajartortillugu unnugu ilagiit ataatsimiinnissaat eqqaallattaavat. Soraaruit ingerlaannaq angerlaruit ataatsimiigiannginninni uffarnissat, atisavit tarsernissaat neripallannissallu angumerisinnaassavatit. Taavali sulisitsisuit ornippaatit qaangiuttoorlutillu sulinissannik qinnuigalutit. Akilerluarumavaatit. Aningaasallu pisariaqarpatit.

Imaluunniit nuliaavutit anaanaallutillu. Unnukkorsiutissanik nerisassiuleruttorlutit naammattoorpatit atisat qaleriiaat manissagassat, ilaat aqagu atorneqartussat. Imminut ima aperivutit: ’Unnugu ataatsimiigiassaguma, taava manissaanissannut qaqugu piffissaqassaanga?’ Qanittukkut ulloq naallugu suliffeqalersimagavit paasisimavat suliffeqaatigaluni illumi suliassanik naammassinninniarneq qanoq ajornakusoortigisoq.

Imaluunniit atuartuuvutit. Ininni allaffiit ilinniagassannik ulikkaarpoq. Amerlanerit qangangaatsiarli tigusimavatit, suliarinissaalli kinguarteqattaarsimagakku ataatsikkut utertitassatit arlalinngorsimapput. Ilinniagassatit suliariniassagakkit ataatsimiigianngitsoorsinnaanerlutit angajoqqaavit aperinissaat ussernartorsiorfigaat.

Illit suna pingaarnerutissagaluarpiuk: suliffinni qaangiuttoornissat, manissaanissat, ilinniagassalerinissat imaluunnit ilagiit ataatsimiinnerannut ornigunnissat? Pingaarnernik salliutitsineq, anersaamut tunngasut eqqarsaatigalugit, qanoq isumaqarpa? Jehova tamanna pillugu qanoq isumaqarpa?

Suut salliutittariaqarpat?

Israelikkut Inatsisinik Qulinik tunineqarnerata kinguninnguagut angut sabbatimi qisussanik katersuisoq naammattoorneqarpoq, massa taamaaliornissaq inatsisini taakkunani inerteqqutigilluinnarneqartoq. (4 Moses 15:32-34; 5 Moses 5:12-15) Illit tamatumani qanoq eqqartuussissagaluarpit? Angut pinngitsuutissagaluarpiuk, oqarlutit piisaarniarluni sulinngitsoq, kisianni ilaquttani pisariaqartunik pissaqartinniarlugit sulisoq? Tunngavilersuutitut oqaatigissagaluarpiuk ukiup ingerlanerani sabbatisiornissamut periarfissarpassuaqartoq, ataasiaannarlunilu sabbatisiunngitsoorneq tamanna, immaqa angutip siumut pilersaarusiorsimannginneranik pissuteqartoq, isumakkeerfigineqarluarsinnaasoq?

Jehovalli taama isiginngilaa. Biibilimi ima allassimavoq: „[Jehova] Mosesimut oqarpoq: ’Angut toqusariaqarpoq.’“ (4 Moses 15:35) Sooruna angutip iliuusia Jehovap taama ajoritigigaa?

Inuit qisussanik katersuinissamut taamatuttaarlu nerisassanik, atisassanik assigisaannillu imminnut pilersornissaminnut ullunik arfinilinnik atugassaqarput. Ullut arfineq aappaat anersaakkut pisariaqartitanik isumaginninnissamut immikkoortinneqarsimavoq. Naak qisussanik katersuineq immini ajortuunngikkaluartoq piffissamik Jehovamut pallorfiginninnermut atugassatut immikkoortitamik tamatumunnga atuineq kukkuneruvoq. Naak kristumiut Mosesip inatsisaasa ataanniinngikkaluartut pisimasoq tamanna ullumikkut eqqortumik tulleriiaarinissaq eqqarsaatigalugu ilinniarfigisinnaannginnerparput? — Filípimiut 1:10.

Israelikkut ukiuni 40-ni inoqajuitsumeereerlutik nunamut neriorsuutigisamut isernissaminnut piareerput. Ilaasa inoqajuitsumiinnertik mannanillu Guutip tunniussaanik nerisaqarnertik qatsussimavaat qularnanngitsumillu nerisamik allanngornissaat erinigalugu. Nunamulli „immummik tungusunnitsuummillu kuuttumut“ isernerminni eqqortumik isiginnittaaseqarnissaannik ikiorniarlugit Jehovap ima eqqaasippai: ’Inuup iffiaannaq inuussutiginngilaa, oqaaserli sunaluunniit Guutip qarnanit anisoq inuussutigisarpaa.’ — 2 Moses 3:8; 5 Moses 8:3.

Israelikkut ’immummik tungusunnitsuummillu’ pissarsissagunik ilungersortariaqarput. Sakkutuunik ajorsarteqqaagassaqarput, illulioqqaartariaqarput narsaatinillu naggorissaaqqaartariaqarlutik. Taamaakkaluartorli Jehovap peqquai ullut tamaasa anersaamut tunngasunik isumaliutiginneqqissaarnissamut piffissamik immikkortitsisassasut. Aammattaaq Guutip aqqutigeqqusai meeqqaminnut ilinniartitsissutigisariaqarpaat. Jehova oqarpoq: „[Inassutikka] qitornassinnut ilinniartitsissutigisarsigit oqaluuserisarlugillu illussinni issiasaraangassi aqqusinermilu angalaaraangassi, innaraangassi makikkaangassilu.“ — 5 Moses 11:19.

Israelikkut taakkununngalu ilanngussimasut angutitaat peqquneqarput ukiumut pingasoriarlutik Jehovamut sassartassasut. Ilaqutariinnut ittuusut ilarpassuisa nalunnginnamikku tamanna ilaquttaminnut anersaakkut iluaqutaassasoq, nuliatik meeqqatillu taamaaliornerminni ilagisarpaat. Ilaqutariilli peqannginneranni kia angerlarsimaffik narsaatillu saassussinianut illersussavai? Jehova ima neriorsuivoq: „Ukiumut pingasoriarlusi kiinnama saavanut sassariartorsimatillusi nunassinnik tiguaaniartoqassanngilaq.“ (2 Moses 34:24) Israelikkut anersaamut tunngasunik salliutitsinermikkut timikkut amigaateqalinnginnissartik tatigisinnaassagunikku uppissuseqartariaqarput. Jehovap oqaatsini eqqortippai? Ilaana!

Guutip naalagaaffia salliutittuaannaruk

Jesusip ajoqersukkani anersaakkut nalilinnik allanit tamanit pingaarnerutitsinissaannik ajoqersorsimavai. Qaqqami oqaluutsimini ima siunnersorsimavai: ’Taamaattumik isumakulussanngilasi oqarlusi: „Suna nerissavarput?“ „Suna imissavarput?“ „Suna atissavarput?“ Guutilli naalagaaffia iluarnerlu taassuma pia piniaqqaarsigik, taava tamakku tamaasa [timikkut pisariaqartut] ilanngullugit piumaarpasi.’ (Matîuse 6:31, 33) Jesusip toqunerata kinguninnguagut kristumiut kuiserlaat siunnersuut tamanna maleruarpaat. Taakkua ilarpassui tassaapput juutit imaluunniit juutinut ilanngussimasut ukiumi 33-mi piinsisioriartorlutik Jerusalemimukarsimasut. Tamaaniitillugit ilimaginngisaannik pisoqarsimavoq. Messias pillugu nutaarsiassamik nuannersumik tusarlerneqarsimapput, tamatuminngalu ilassinnissimallutik. Upperisartaartik pillugu ilinniarnerorusukkamik Jerusalemimiiginnarsimapput. Maannalu timikkut isumalluutaat nungungajalerput, tamakkuli pingaannginnerupput. Messiasimi nanisimavaat! Kristumiutut qatanngutaasa timikkut piminnik aveqatigisarpaat tamarmik ’apustilit ajoqersuinerinik qinusarnernillu’ aallussiuaannarsinnaaqqullugit. — ap. sul. 2:42.

Ataatsimiinnernut tamanut orniguttarnerup pisariaqassusia kristumiut ilaasa piffissap ingerlanerani pingaartikkunnaariartorsimavaat. (Eprîarit 10:23-25) Immaqa imminnut ilaquttatilllu aningaasatigut pilersorniarneranni pigisanik pingaartitsivallaalersimapput anersaamullu tunngasunik sumiginnaalerlutik. Paulusip qatanngutini ataatsimiigiartuaannarnissaannik kajumissaareeramigit ima allaffigai: ’Inuugitsi aningaaserituunasi pigisasi naammagalugit, nammineq oqarmat: „Iperassanngilakkit qimassanatillu.“’ — Eprîarit 13:5.

Paulusip unnersuussutaa piffissaalluartukkut takkuppoq. Taassuma hebriiarinut allanneranit ukiut tallimat missaanniittut qaangiuttut Romamiut sakkutuuisa Cestius Gallusimit siulersorneqartut Jerusalem ungusaraat. Kristumiut aalajaatsut Jesusip mianersoqqussutigisimasaa manna eqqaamavaat: ’Maajunnartoq nungutitsisoq inissarinngisaraluaminiittoq takulerussiuk . . . illup qaavaniittoq illumut aqqanngikkili isernanilu sumik illuminit aallerumalluni, nunaatiminiittorlu utinngikkili annorassani aajumallugit.’ (Mákorse 13:14-16) Nalunngilaat timikkut pigisatik imaluunniit suliffigissaarnertik annannissaminnut aalajangiisuunngitsut, kisianni Jesusip ilitsersuussutaanut naalannertik tamatumunnga aalajangiisuusoq. Paulusip unnersuussutaa maleruarlugu anersaamut tunngasunik salliutitsisut angerlarsimaffitsik, suliffitsik, atisatik pigisatillu allat qimallugit qaqqamut qimaanialeramik qularnanngitsumik aningaaserituunit artornartorsiunnginnerupput.

Ullumikkut ilaat qanoq ilillutik pingaarnernik salliutitsisut

Ullumikkut kristumiut aalajaatsut qatanngutiminnik aalajangersimasumik katerisimaaqateqartarnertik pingaartippaat, ilarpassuilu ataatsimiigiarniarlutik annertuumik pilliuteqartarput. Sumiiffiit ilaanni taamaallaat paarlakaajaaffiusumik suliffissarsinissaq ajornanngilaq, qatanngutillu angutip taamatut suliffillip suleqatini neqeroorfigisarpai unnunni ataatsimiiffiusuni nammineq suliassaraluani tigussappatigik nammineq taakkua arfininngornermi unnukkut, inuit amerlanerit sulinngiffigerusuttagaanni, suliassaat tigusassallugit. Qatanngutit allat piffissani nikerartuni suliffillit ilagiit ilaaffigisamik ataatsimiinnerinut aggersinnaanngikkaangamik ilagiit allat ataatsimiinnerinut aggertarput. Taamaalillutik ataatsimiinnerit ilaaffiginngitsuunngisaannangajappaat. Canadami arnap soqutiginnilerlaap erniinnaq paasisimavaa Teokratiimik Atuarfiup kiffartornerlu pillugu ataatsimiinnerup najuuffigisarnissaat qanoq pingaaruteqartigisoq. Ataatsimiinnerilli nalaanni sulisarpoq. Taamaattumik suleqatini akilerlugu unnunni ataatsimiiffiusussani suliffissaraluamini sulisittarpaa.

Katsorsarneqarsinnaanngitsumik nappaatilippassuit ataatsimiinnernik annaasaqanngisaannangajapput. Angerlarsimaffimminni telefonip aqqutaatigut ataatsimiinneq malinnaaffigisarpaat, imaluunniit ataatsimiinnermik immiussat tusarnaartarlugit. Jehovap ’kiffaq ilumoorlunilu silatooq’ aqqutigalugu innuttaminut anersaakkut nerisassiissutaanik pingaartitsinertik pillugu nersortariaqarput! (Matîuse 24:45) Kristumiut angajoqqaaminnik utoqqarnik nakkutiginnittuartariaqartut qujamasuttaqaat ataatsimiigiarsinnaaqqullutik qatanngutip angutip arnalluunniit taarsernissaminnik neqeroorfigigaangatik.

Pilersaarusiorneq pingaaqaaq!

Angajoqqaat anersaakkut pisariaqartitaqarnerminnik miserratiginninngitsut meeqqatik kristumiut ataatsimiinnerinik pingaartitsinissamik ilinniartittarpaat. Pingaartillugu naatsorsuutigisarpaat meeqqatik ilinniagassaminnik ingerlaannaq suliarinnittassasut, kinguartitiinnarnagit. Ullormi ataatsimiiffiusussami meeqqat angerlarniariarlutik ilinniagassalerisarput. Sammisassat allat ilagiit ataatsimiinnerinut aggernissamut akornutaatinneqarneq ajorput.

Uiusutut ataataasutullu ataatsimiinnerit pingaarluinnartutut isigaagit? Illumi ningiuusutut ataatsimiigiarnissatit eqqarsaatigalugit illumi suliassat pilersaarusiortarpigit? Inuusuttuaqqatut ilinniagassatit ataatsimiinernit pingaarnerutippigit imaluunniit ataatsimiinnerit ilinniagassannit pingaarnerutippigit?

Ilagiit ataatsimiinneri pisariaqartitatsinnik Jehovap asannittumik matussutissiissutigisartagaasa ilagaat. Taamaattumik najuunniarluta sapinngisarput tamaat iliortariaqarpugut. Pingaarnerit salliutikkutsigik Jehovap pilluaqqungaassavaatigut. (wE 1/9 98)