Ingasat­tumik ajortu­lioruit qanoq ikiorneqar­sinnaavit?

Jehova asagaluarlugu aliasuutigisaanillu iliuuseqar­naveersaar­taraluarlutit kukkusarumaarputit. Ajortulior­nerilli ilaat ingasattumik ajortulior­nerupput. (Korintimiunut 1. 6:9, 10) Ingasattumik ajortulioruit eqqaamassavat Jehovap suli asagaatit aamma isumakkeerfigerusul­lutillu ikiorusukkaatit.

1. Jehovamit isumakkeerfigineqaq­qulluta susariaqarpugut?

Jehovamik asannittut ingasattumik ajortuliorsimallutik paasigaangamikku aliasungaartarput. Jehovalli oqaasii uku tuppallersaatigisarpaat: “Ajortuliasi aappallaris­sakkatut aappalutsigigaluarunik aputitut qaqortigilissapput.” (Esaja 1:18) Tassa peqqissimigutta Jehovap ilumoorluni isumakkeerfigis­savaatigut. Peqqissimineq qanoq paasisariaqarpa? Peqqissimisoq ajortulior­tarunnaarluni Jehovamut qamannga pisumik isumakkeerfigeq­qusarpoq. Aamma ajortuliornermik kinguneqartumik eqqarsartaaseq eqqunngitsoq allanngor­tittarpaa ileqqupalaarluunniit ileqqoriun­naarlugu. Jehovallu maleruaqqusai minguitsut maleruaq­qilertarpai. – Esaja 55:6, 7 atuarsigit.

2. Ajortuliorsimagutta Jehovap ikiorumalluta utoqqaanertat qanoq atussavai?

Ingasattumik ajortuliorsimasut peqquneqarput ‘ilagiinni utoqqaanertanik aggeqqusissasut’. (Jaaku 5:14, 15 atuarsigit). Utoqqaanertat Jehova taassumunngalu kiffartortut asavaat. Ajortuliorsimasunik ikiuinis­saminnut ilinniar­tinneqarmata utoqqaanertat ikiuinerisigut Jehova ikinngutigileq­qissinnaavarput. – Galaatiamiut 6:1.

Utoqqaanertat ingasattumik ajortuliorsimasoq qanoq ikiortarpaat? Utoqqaanertat marluk pingasul­luunniit Biibili atorlugu ajortuliorsimasumut takutissavaat sooq iliuuserisimasaa eqqunngitsulior­nerusoq. Aamma ajortulioq­qeqqunagu siunnersuuteqassapput. Ilagiit ajortumik sunnerneqaq­qunagit ajortuliorsimasoq peqqissimin­ngitsoq utoqqaanertanit peersin­neqassaaq.

ITISILIINEQ

3. Nassuerutiginninneq iluaqutigisarparput

Ajortuliagut Jehovap aliasuutigisarmagit taassumunnga nassuerutigisariaqarpagut. Tussiaat 32:1-5 atuarsigit apeqqullu una eqqartorlugu:

• Sooq ajortuliagut isertornagit Jehovamut oqaatiginissaat iluaqutigis­savarput?

VIDEO: ‘Jehovap asasani perorsaatis­sittarpai’ (3:01)

• Canon Jehovamut uteqqin­nermini utoqqaanertanit qanoq ikiorneqarpa?

Utoqqaanertat ikiuerusummata ammaffigalugillu unneqqarif­figisariaqarpagut. Jaaku 5:16 atuarsiuk apeqqullu una eqqartorlugu:

• Utoqqaanertat unneqqarif­figigutsigit sooq ikioriaan­naanerus­savaatigut?

4. Jehova ajortuliortunik nallit­tuisarpoq

Ingasattumik ajortuliorsimasoq Jehovap inatsisaanik maleruaajuman­ngikkuni ilagiin­nit peerneqassaaq, uagullu peqatigisarun­naassavarput. Korintimiunut 1. 5:6, 11 atuarsigit apeqqullu una eqqartorlugu:

• Seernarsaatip naqittagaq tamaat sunnertarpaa. Ajortuliorsimasoq peqqissimin­ngitsoq peqatigisarutsigu ilagiinnut qanoq sunniuteqassava?

Jehovap ajortuliortunik pinnittarneranit qanoq erserpa taanna ingasaas­sinianngitsuusoq, nallittuisuusoq asannittuusorlu?

5. Peqqissimigutta Jehovap isumakkeerfigis­savaatigut

Jiisusip assersuusiorluni paasinarsisippaa Jehova inuk peqqissimisoq pillugu qanoq misigisartoq. Lukkarsi 15:1-7 atuarsigit apeqqullu una eqqartorlugu:

• Assersuusiaq Jehova pillugu qanoq ilinniarfigaajuk?

Ezekieli 33:11 atuarsiuk apeqqullu una eqqartorlugu:

• Peqqissimisoq susariaqarpa?

EQIKKAANEQ

Ingasattumik ajortuliorsimasoq taamaalioq­qinngin­nissani aalajangiusimaguniuk ilumoorlunilu peqqissimiguni Jehovamit isumakkeerfigineqassaaq.

Uteqqiineq

• Sooq ajortuliagut Jehovamut oqaatigigutsigit iluaqutigis­savarput?

• Ajortuliatsinnik isumakkeerfigineqaq­qulluta susariaqarpugut?

• Ingasattumik ajortuliorsimagutta sooq utoqqaanertanut ikioqqussaagut?

NAMMINEQ MISISSUGASSATIT

Jehovap Esaja 1:18-imi allaatigineqartut angut qanoq nallittoraa takuuk.

Jehovap nallittuinera qularin­ngisaannaruk (5:02)

Utoqqaanertat ingasattumik ajortuliortunik qanoq ikiuisarpat?

“Ajortuliortut qanoq asannittumik nallittorneqartartut” (Napasuliaq Alapernaarsuiffik, aggusti 2024)

Ajortuliortut peqqissimin­ngitsut qanoq asanninnermik nalllit­tuinermillu ersersitsivigineqar­tartut paasiniaruk.

“Ilagiinnit peerneqartut qanoq utoqqaanertanit ikiorneqarsinnaasut” (Napasuliaq Alapernaarsuiffik, aggusti 2024)

Oqaluttuami “Jehovamut utertariaqarsimavunga”-mi atuaruk angut sooq misigisoq Jehovap uteqqugaani.

“Biibili inuit inuunerannik allannguisitsisarpoq” (Napasuliaq Alapernaarsuiffik-mi allaaserisaq)