Akaarinninneq – Biibili qanoq iluaqutigineqarsinnaava?
“Silarsuarmi eqqissineqassappat inuit akaarinnittuusariaqarput.” – UNESCO Declaration of Principles on Tolerance, 1995.
Akerliali akaarinnittuunnginneq ataqqinninnginnermik allaallu uumissuinermik pilersitsisarpoq. Inuit taamatut isiginnittaasillit oqaatsinik uumissuerpalaartunik aniatitsineq, siumut isummiussereerlutik assigiinngisitsineq nakuusernerlu iliuuserigajuttarpaat.
Akaarinninneq inuit assigiinngitsunik isumaqartittarpaat. Ilaat isumaqarput inuit akaarinnittut tassaasut allat iliuusiinut qanoq ikkaluartunulluunniit isumaqataasartut. Allat Biibilimut naapertuuttumik isumaqarput, tassa inuit akaarinnittut kialuunniit nammineq aalajangersinnaatitaanera ataqqisaraat, pingaartitaanut isumaanullu isumaqataanngikkaluarlutilluunniit.
Akaarinnittuunissamut ullutsinni Biibili iluaqutigineqarsinnaava?
Akaarinninneq Biibili naapertorlugu
Akaarinnittuunissaq Biibilimi kaammattuutigineqarpoq. Ima allassimasoqarpoq: “Uteriitsuunnginnersi tamanit ilisimaneqalerli.” (Filippimiut 4:5) Biibilimi kajumissaarneqarpugut inussiarnersumik, qajassuartumik naapertuilluartumillu allat pissusilersorfigisassagigut. Siunnersuummik tamatuminnga maleruaasut allat pingaartitaannut isumaqataanngikkaluarlutik namminneq qanoq iliorusunnerlutik aalajangigaat ataqqisarpaat.
Biibilimili Guuti inuit qanoq pissusilersornissaannut najoqqutassiaqartitsivoq. Ima allassimasoqarpoq: “Illit inuk, [Guutimit] ilisimatinneqareerputit suna ajunngitsuusoq.” (Mika 6:8) Inuit pitsaanerpaamik inooriaaseqarsinnaaqqullugit Guutip najoqqutassiai Biibilimi allanneqarsimapput. – Esaja 48:17, 18.
Allat eqqartuutissallugit Guutip pisinnaatitaaffilinngilaatigut. Biibilimi allassimavoq: “Ataasiinnarmik Inatsisiliortoqarlunilu Eqqartuussisoqarpoq … Illilli kinaagavit inoqatit isornartorsiussaviuk?” (Jaaku 4:12) Guutip tamatta immikkut nammineq aalajangiisinnaatippaatigut, aalajangikkattalu kinguneri nammineq akisussaaffigissavagut. – Mosesimik 5. 30:19.
Ataqqinninneq pillugu Biibilimi qanoq allassimasoqartoq
Biibilimi allassimavoq ‘inuit tamalaat ataqqissagigut’. (Petrusimit 1. 2:17) Taamaattumik Biibilimik maleruaasut inuit tamaasa ataqqisarpaat, upperisaat inooriaasialluunniit apeqqutaatinnagu. (Lukkarsi 6:31) Tamanna isumaqanngilaq Biibilimik maleruaasut allat upperisaat isumaallu qanoq ikkaluartulluunniit isumaqataaffigissagaat imaluunniit aalajangigaat tamaasa tapersersussagaat. Sorraatsumik ataqqinninngitsumillu pissusilersorfiginagit sapinngisaminnik Jiisusip allanik pinnittarnera ilaarniartarpaat.
Assersuutigalugu Jiisusip arnaq isumaqataaffiginngisaminik allamik upperisalik naapippaa. Aamma arnaq taanna uiginngisaminik inooqateqarpoq – taamatullu inooriaaseqarneq Jiisusip akuersaanngilaa. Taamaakkaluartorli ataqqinnilluni arnaq oqaloqatigaa. – Johannesi 4:9, 17-24.
Jiisusi ilaarlugu kristumiut upperisaminnut tunngavilersuutit tusaarusuttunut nassuiarusuttarpaat, taamaaliortarpullu ataqqinningaarlutik. (Petrusimit 1. 3:15) Biibilimi kristumiut ilinniartinneqarput allat namminermissut isumaqaleqqullugit pinngitsaalissanngikkaat. Allassimavoq kristumiu “allanik assortuinani tamanut”, aamma allamik upperisalinnut, ‘inussiarnersuussasoq’. – Timuutiusimut 2. 2:24.
Uumissuineq pillugu Biibilimi qanoq allassimasoqartoq
Biibilimi allassimavoq ‘inuit tamaasa eqqisseqatiginiartuassagigut’. (Hebræerit 12:14) Inuk eqqissisitsiniartoq uumissuineq ajorpoq. Nammineq pingaartitani sumiginnanngikkaluarlugit allanik eqqisseqateqarniarluni ilungersortarpoq. (Matiusi 5:9) Kristumiut Biibilimi kajumissaarneqarput imminnut akeraasut asaqqullugit, tassa imminnut ajortumik pinnittut inussiarnisaarfigissagaat. – Matiusi 5:44.
Ilumoorpoq Biibilimi allassimasoq Guuti ‘uumigisaqarlunilu qinngarsugaqartoq’. Tassani iliuutsit inunnut nikassaasut ajoqusiisullu pineqarput. (Ussatit 6:16-19) Biibilimi uani oqaaseq “uumigai” atorneqarmat iliuutsinik ajortunik iluarinninngilluinnarneq pineqarpoq. Biibilimi allassimavoq inuit inooriaatsiminnik Biibilimullu naapertuuttumik allannguerusuttut Guutip isumakkeerfigalugillu ikiorusukkai. – Esaja 55:7.
Biibilimi allassimaffiit akaarinninnermut ataqqinninnermullu tunngasut
Tittusi 3:2: ‘Uteriitsuunasi kikkunnut tamanut saamasuugitsi.’
Inuk uteriitsuunngitsoq allamik isumalimmut saamasumik akisarpoq ataqqeqatigiinnissarlu anguniartarlugu.
Matiusi 7:12: “Sunut tamanut tunngatillugu qanoq pineqarusunnissitut allat iliorfigisassavasi.”
Allat ataqqinnittumik pigaangatigut aamma isummagut misigissutsigullu soqutigalugit ersersitsigaangata tamatta tamanna nuannaarutigisarparput. Peqqussut Jiisusip ilinniartitsissutigisaa atortuujuaannartoq taanna pillugu paasisaqarnerorusukkuit allaaserisaq “Hvad er Den Gyldne Regel” takuuk.
Josva 24:15: “Ullumi aalajangerniaritsi sorliit guutisiorfigiumagisi.”
Allat namminneq aalajangiisinnaatitaanerat ataqqigutsigu eqqissinermik siuarsaassaagut.
Apustilit Suliaat 10:34: ‘Guutip kikkut tamaasa assigiimmik pisarpai.’
Kulturi, suiaassuseq, sumiuussuseq, ammip qalipaataa tunuliaqutaallu apeqqutaatinnagit Guutip inuit tamaasa assigiimmik pisarpai. Guutimik ilaarsiumasut kikkuugaluartunilluunniit ataqqinnittuupput.
Habakkuki 1:12, 13: ‘Guuti ajunaarnermik ilaginnaaginnarneq saperpoq.’
Guutip akaarinninnera killeqarpoq. Inuit iliuusii ajortut qaqugorsuarmut akuersaaginnarnavianngilai. Paasisaqarnerorusukkuit video Sooq Guutip naalliunnerit akuerai? isiginnaaruk.
Romamiut 12:19: “Kamannissarli Guutimut isumagitissiuk, allassimavormi: ‘Akiniut pigaara, uanga pillaajumaarpunga,’ taama Jehova oqarpoq.”a
Jehovap Guutip kinaluunniit akiniaasussaatinngilaa. Kikkut tamarmik naapertuilluartumik pineqarnissaat piffissani nallerpat isumagissavaa. Paasisaqarnerorusukkuit allaaserisaq “Vil vi nogensinde komme til at opleve fuldstændig retfærdighed?” atuaruk.
a Guuti Jehovamik ateqarpoq. (Saqqummersitat 4:11) Allaaserisaq “Jehova kinaava?” takuuk.