Qanoq ilillutik oqaluttoq qarnagut isigiinnaarlugu paasiniaasarpat?
ITERITSI!-P TULUIT NUNAANNI ILANNGUTASSIORTUANIT
ANGUTIT MARLUK pinerliiniatut pasineqartut, naatsiivissuarmi tamanut ammasumi oqaloqatigiitsillugit videofilmiliarineqarsimapput. Oqaloqatigiissutaat kialuunniit tusaasinnaanngilaa — kisianni politiinit tigusarineqarput kingornatigullu ukiorpassuarni parnaarussassanngortinneqarlutik. Pinerliiniat marluk taakkua oqaloqatigiinnerat qarnagut isigiinnarlugu paasiniaasartumit, pisortanit akuerisaasumit ilisimasaqarluartumit Tuluit Nunaanneersumit tuluillu politiivinit „sakkutut isertortutut sunniuteqarluartutullu“ oqaatigineqarsimasumit, paasineqarsimavoq.
Oqaluttoq qarnagut isigiinnarlugu paasiniaaneq paasisaqarfiginerulaarniarlugu, Mike aamma Christina pulaarpakka. Christina pingasunilli ukioqarluni tusilartuuvoq. Kingornatigut tusilartut atuarfianni atuarsimavoq oqaluttoq qarnagut isigiinnarlugu paasiniaaneq ilinniarlugu. Mikep oqaluttoq qarnagut isigiinnarlugu paasiniaaneq nammineq ilinniarpaa Christina katereeramiuk.
Oqaluttoq qarnagut isigiinnarlugu paasiniaasarneq qanoq ajornartigiva? „Qarngup isikkua aalaneralu aamma oqqap qanoq inissisimanera isigeqqissaartariaqarpaat,“ Mike oqarpoq. Christina nangippoq: „Inuk ilinnut oqaluttoq isigiuartariaqarpat, oqaluttoq qarnagut isigiinnarlugu paasiniaanermut pikkorinnerujartortillutit aamma kiinnap isikkua pissusilersornerlu maluginiarnerussavatit.“
Paasitinneqarpunga inuit tusilartunik oqaloqateqaraangamik kukkussutigisartagaat anneq tassaasoq nilliasarnertik imaluunniit qarngup aalaneranik ingasaassisarnertik. Tamanna iluaqutaaneraninngarnit paatsiveerunnarneruvoq. Ilaat oqaluttoq qarnagut isigiinnarlugu paasiniaanermut ima pikkoritsigilertarput allaat sumiorpaluutsit assigiinngitsut immikkoortissinnaalertarlugit. Soorunalimi ajornaatsuinnaanngilaq. Hearing Concern, peqatigiiffik oqaluttoq qarnagut isigiinnarlugu paasiniaanermik ilinniartitsinermik immikkut ingerlataqarsimasoq, toqqaannartumik nalunaaruteqarpoq: „Oqaluttoq qarnagut isigiinnarlugu paasiniaaneq sungiusartariaqarpoq, sungiusartariaqarpoq aamma sungiusartariaqarpoq.“
Christina nassuerpoq ilaatigut peqqusiileqisarluni paasigaangamiuk piaarinaatsoorluni „tusarnaaqataalluni“ allat bussini imaluunniit qimuttuitsuni oqaloqatigiikkaangata. Iliuuserisinnaasatuaa tassaavoq allamut qiviarneq. Aammali oqaluttoq qarnagut isigiinnarlugu paasiniaanermut piginnaaneqarnini illersuutigisinnaavaa. Christina tv-mi arsartunik isiginnaassaarnikuuvoq. Arlaleriarlunimi arsaattut ilaasa qanoq oqarnerat takusinnaagamiuk, narrujuummissutigisarsimavaa.
Amerlanngitsut Tuluit Nunaanni politiit „isertortukkut sakkuattut“ piginnaaneqalersinnaapput. Tusillakkaannili, oqaluttoq qarnagut isigiinnarlugu paasiniaanermik paasisaqalaarsinnaanerluunniit naleqangaarpoq. (gE 10/8 02)
[Qupp. 31-mi assiliartaq]
Christina
[Qupp. 31-mi assiliartaq]
Mike