Alianartumik pisoqaraangat

Aappariittut ilaqutariittullu pilluartuarnissarsi ilungersuutigigaluarit nalaatsornikkut akornuserneqaratarsinnaavoq. (Oqaluussisartup oqaasii 9:11, 1990) Alianartunik eqqorneqaraangatta Guutip asannittumik ikiortarpaatigut. Ajornerpaamik pisoqassagaluarpalluunniit naammagalugu atornissaanut immikkoortumi matumani najoqqutassiat Biibilimeersut iluaqutigisinnaavasi.

1 JEHOVA TATIGIUK

BIIBILIMI QANOQ ALLASSIMASOQARTOQ: ‘Isumakuluutisi tamaasa taassumunnga pisissigit isumassormasi.’ (1 Petrusi 5:7) Eqqaamajuartaruk Guuti ajornartorsiutinnut pisuussuteqartanngimmat. (Jobi 34:10) Jehova qanittumik attaveqarfigiuarukku ajunnginnerpaamik ikiortuassavaatit. (Esaja 41:10) “Uummammiugisasi tamaasa taassumunnga saqqummiussigit.” — Tussiaat 62:9.

Ullut tamaasa Biibilimik atuaqqissaartaruit tuppallersarneqassaatit, paasilissavallu Jehova “annikilliuuteqarnitsinni tamani uatsinnik tuppallersaasartoq”. (2 Korinthimiut 1:3, 4; Romamiut 15:4) Neriorsorpaatit ‘eqqissinermik siuneqassusernit tamanit annerungaartumik’ tuniumaarlutit. — Filippimiut 4:6, 7, 13.

SIUNNERSUUTIT:

• Eqqissisimanissannik eqqarsarluarsinnaanissannillu ikioqqullutit Jehova qinnuigiuk

• Periarfissatit tamaasa eqqarsaatigereerlugit ilinnut pitsaanerusoq toqqaruk

2 NAMMINEQ ILAQUTTATILLU PISARIAQARTITASI EQQARSAATIGIKKIT

BIIBILIMI QANOQ ALLASSIMASOQARTOQ: “Silassorissup uummataa ilisimassusermik pissarsisarpoq, ilisimasup siutaata ilisimasaqarneq ujartarpaa.” (Ussatit 18:15) Qanoq pisoqarsimanersoq paasiniaqqissaartaruk. Ilaquttavit immikkut tamarmik pisariaqartitaat paasiniakkit. Oqaloqatigikkit tusarnaarlugillu. — Ussatit 20:5.

Taavami asasamik toqusoqarpat? Misigissutsitit nunoqinagit. Eqqaamajuk allaat Jiisusi asasaminik annaasaqarnermini ‘qissasermat’. (Johannesi 11:35; Oqaluussisartup oqaasii 3:4) Qasuersaarluartarnissaq sinilluartarnissarlu aamma pingaaruteqarput. (Markusi 6:31) Pisimasup artornartup naammagalugu atornissaanut tamakku tamaasa iluaqutigisinnaavatit.

SIUNNERSUUTIT:

• Ilaqutariittut ammaffigeqatigiilluartarussi alianartumik pisoqassagaluarpat oqaloqatigiinnissarsi ajornannginnerussaaq

• Allat assingusumik nalaataqarsimasut oqaloqatigisigit

3 IKIORTISSARSIORIT

BIIBILIMI QANOQ ALLASSIMASOQARTOQ: “Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.” (Ussatit 17:17) Ikinngutivit ikiorusuppaatsit, qanorli ikioriassallutit nalornissutigisinnaallugu. Suna pisariaqartinnerlugu ilisimatittakkit. (Ussatit 12:25) Aamma Biibilimi najoqqutassiat qanoq atornissaannut Biibilimik paasisimasaqarluartunut ikiortissarsiorit. Siunnersuutaat Biibilimeersut iluaqutigissavatit. — Jaaku 5:14.

Inuit Guutimik taassumalu neriorsuutaanik upperinnittut ilagikulasarukkit pisariaqartitannik ikorfartorneqassaatit. Aamma allanik kaammattorneqarnissaminnik pisariaqartitsisunik ikiuinerit nammineq iluaqutigingaassavat. Taakku Jehovamut uppernerit taassumalu neriorsuutai pillugit oqaluttuuttakkit. Inunnik pisariaqartitsisunik ikiuillutit ulapputeqarit, ilinnillu asannittut isumassuiniartullu ajattoqinagit. — Ussatit 18:1; 1 Korinthimiut 15:58.

SIUNNERSUUTIT:

• Ikinngutigilluakkat annissuiffigiuk ikiuiniarneralu akueralugu

• Pisariaqartitatit pillugit ammasuugit