‘Qanoq inuusariaqartugut!’

“Tamakku tamarmik suujunnaartussaammata taava tamatigut illernartuullusilu Guutimillu mianerinnillusi inuusariaqarpusi.” — 2 PETRUSI 3:11.

1. Sooq Petrusip allagaasa aappaat kristumiunut taassuma inuunerata nalaani inuusunut piffissaasukkut kajumissaarutaappat?

APUSTILIP Petrusip allakkami isumassarsiarititaasut aappaat allammagit ilagiit kristumiut malersorneqangaatsiareerput, kristumiulli tamanna eqiasuikkunnaassutiginagulu amerliartorunnaassutiginngilaat. Taava Diaavulu allamik periusissarsivoq siornatigut arlaleriarujussuarluni iluatsittarsimasumik. Soorlu Petrusip paasissutissiissutigereeraa, Saatani Guutip innuttaanik ajortunngortitsiniarsarivoq eqqunngitsumik ilinniartitsisut ‘arnarsiortuartartunik isillit’ ‘piumatussusermullu sungiussisimasunik uummatillit’ iluaqutigalugit. (2 Petrusi 2:1-3, 14; Judasi 4) Taamaattumik Petrusip allagaasa aappaat Guutimut aalajaattuarnissamut qamannga pisumik kajumissaarutaapput.

2. Petrusip allakkami aappaanni kapitali 3-mi suut pingaarnerpaatippai, imminullu qanoq aperisinnaavugut?

² Petrusi ima allappoq: “Eqqortuusoraara tupermi [imaluunniit, timimi] matumani najugaqarallartillunga eqeersassallusi oqaaqqissaarutinnik eqqaasillusi. Nalunngilara tupera erniinnaq qimassallugu, . . . uangattaarli ilungersussaanga ilississaaq peerunnerma kingorna ilissinnut oqaaserisimasannik eqqaaqqiisartuaqqullusi.” (2 Petrusi 1:13-15) Aap, Petrusip nalunngilaa toqungajalerluni, piffissaasukkulli eqqaasitsissutimi eqqaamaneqarnissaat kissaatigaa. Aammami taakku Biibilimut ilaalerput ullumikkullu tamatsinnit atuarneqarsinnaallutik. Petrusip allagaasa aappaanni kapitali 3 uagutsinnut immikkut soqutiginaateqarpoq, tamatumanimi pingaarnersaapput pissutsit aaqqissuussaanerata ‘ullui kingulliit’ aamma qilaat nunallu assersuutaasut suujunnaarsinneqarnissaat. (2 Petrusi 3:3, 7, 10) Petrusip qanoq siunnersorpaatigut? Taassuma siunnersuutaanik malinninneq Jehovamit akuerisaalernissatsinnut qanoq iluaqutigissavarput?

3, 4. (a) Petrusi qanoq kajumissaariva, qanorlu mianersoqqusiva? (b) Pingasut suut misissussavavut?

³ Petrusi Saatanip silarsuaata suujunnaartussaanera eqqaareerlugu ima allappoq: “Tamatigut illernartuullusilu Guutimillu mianerinnillusi inuusariaqarpusi.” (2 Petrusi 3:11, 12) Petrusip nalunngilaa Jehovap piumasaatut iliortut pissuserineqartussanillu taassuma iluarisaanik ersersitsisut kisimik ‘ullormit akiniaaffimmit’ nalliuttussamit aniguisitaajumaartut. (Esaja 61:2) Taamaattumik apustili taanna ima nangippoq: “Asasakka, tamakku ilisimareerassigit mianersoritsi soqqusaatsut [eqqunngitsumik ilinniartitsisut] tammartarnerini peqataaqqunasi tunngavissinnillu kataqqunasi.” — 2 Petrusi 3:17.

⁴ Petrusi ‘ilisimasaqareersut’ ilagaat, taamaattumillu taassuma nalunngilaa kristumiut ilumoorfiginnittuarumallutik ulluni kingullerni immikkut eqqumaniartariaqartut. Kingusinnerusukkut apustili Johannesi nassuiaavoq sooq immikkut eqqumaniartariaqartut. Siulittuivoq Saatani qilammit igitaajumaartoq ‘Guutillu inassutaanik Jiisusillu nalunaajaataanik aalajangiussisunut’ ‘kamattorsuujumaartoq’. (Saqqummersitat 12:9, 12, 17) Guutip kiffai tanitat ilumoorfiginnittut taakkualu suleqataat, ‘savat allat’ aalajaatsut, ajugaajumaarput. (Johannesi 10:16) Uagummi tamatta immikkut? Ilumoorfiginnittuarumaarpugut? Ilumoorfiginnittuarnissamut ikiorneqarumaarpugut ilungersorutta (1) pissuserineqartussanik Guutip iluarisaanik ineriartortitsiniarluta, (2) ileqqussatigut anersaakkullu minguitsuujuarniarluta assuarnaatsuujuarniarlutalu aamma (3) misilinneqaatinut eqqortumik isiginnittaaseqarniarluta. Taakku pingasut misissoriartigit.

Pissuserineqartussanik Guutip iluarisaanik ineriartortitsigit

5, 6. Pissuserineqartussat suut ineriartortittariaqarpavut, aamma sooq ‘ilungersungaarnissaq’ pisariaqarpa?

⁵ Petrusip allakkami aappaata aallaqqaataatungaani ima allappoq: “Ilungersungaarlusi uppernissinnut ilanngussiuk ileqqorinneq, ileqqorinnermut ilisarsineq, ilisarsinermut imminut naalakkersinnaaneq, imminut naalakkersinnaanermut nikallujuinneq, nikallujuinnermut Guutimik mianerinninneq, Guutimik mianerinninnermut qatanngutigiittut pissuseqarneq, qatanngutigiittut pissuseqarnermut asanninneq. Tamakkumi ilissinniippata ineriartorlutillu ilatsiinnartuussanngilasi inerititaqanngitsuussanasilu Naalakkatsinnik Jiisusi-Kristusimik ilisarsinissinni.” — 2 Petrusi 1:5-8.

⁶ Ilumoorpoq pissuserineqartussanik Guutip iluarisaanik pigiliussinissamut iluaqutigisinnaasatsinnik sammisaqaqataajumalluni ‘ilungersungaarnissaq’ pisariaqartoq. Assersuutigalugu kristumiut ataatsimiinnerinut tamanut najuuttarniarluni, ullut tamaasa Biibilimik atuartarniarluni namminerlu atuaqqissaarnissamut pitsaasumik pilersaarummik malitaqarniarluni iliuuseqarnissaq pisariaqarpoq. Aamma unnuk ilaqutariittut anersaakkut ittunik sammisaqarfik aalajangersimasuullunilu nuannersuullunilu isumaqarluartuussappat ilungersortariaqarlunilu pilersaarusiorluartariaqarpoq. Ileqquliussilluareeruttali taakkua attattuarnissaat ajornannginnerulissaaq — pingaartumik taakkua iluaqutaanerat malugigutsigu.

7, 8. (a) Unnuk ilaqutariittut anersaakkut ittunik sammisaqarfik pillugu qanoq oqartoqarsimava? (b) Unnuk ilaqutariittut anersaakkut ittunik sammisaqarfik illit qanoq iluaqutigaajuk?

⁷ Unnuk ilaqutariittut pallorfiginneqatigiiffik pillugu qatanngut arnaq ima allappoq: “Assigiinngitsorpassuit pillugit ilinniarnissamut periarfissaqalissutigaarput.” Alla ima oqarpoq: “Ilumoorlunga oqassaguma, gruppeni atuakkamik atuaqqissaaqatigiittarunnaarnerput ajuusaarutigaara. Taamatut atuaqqissaartarnerput nuannarinerpaagaluarpara. Maannali unnuk ilaqutariittut anersaakkut ittunik sammisaqarfik pilersinneqarmat paasilerpara Jehovap nalunngikkaa suut pisariaqartinnerivut qaqugukkullu pisariaqartittarnerivut.” Ilaqutariinni ittuusoq ima oqarpoq: “Unnuk ilaqutariittut anersaakkut ittunik sammisaqarfik assorsuaq iluaqutigaarput. Nuanneqaaq aappariittut immikkut pisariaqartitatsinnik isumaginniffigisinnaasatsinnik atuaqqissaaqatigiittaleratta. Marluulluta isumaqarpugut anersaap inerititaanik ersersitsineq pikkoriffigineruleraluttuinnarlugu, aamma kiffartornitsinni aatsaat taama nuannaartigaagut.” Ilaqutariinni ittuusoq alla ima oqarpoq: “Meeqqat namminneq assigiinngitsunik misissuisarnertik ilikkagarpassuaqarnertillu nuannarisarpaat. Aaqqissuussaq tamanna Jehovap pisariaqartitatsinnik ilisimanninneranik qinnutitsinnillu akisisarneranik qularutiginninnginnerulissutigaarput.” Aaqqissuussaq Guutimeersoq nuanningaartoq tamanna pillugu illit aamma taamatut misigivit?

⁸ Pingaaruteqanngitsut unnummut ilaqutariittut anersaakkut ittunik sammisaqarfissinnut akornutaateqinagit. Aappariit ima oqarput: “Sapaatit-akunnerini sisamani kingullerni sisamanngornerit tamaasa ilaqutariit iluanni arlaannik pisoqartaraluartoq tamakku akornutaatinnagit atuaqqissaartuaannarpugut.” Soorunami ilaannikkut pilersaarutissinnik allannguisariaqarsinnaavusi. Aalajangiusimasiulli sapaatit-akunneri tamaviisa ilaqutariittut anersaakkut ittunik sammisaqartarnissarsi!

9. Jehovap Jeremia qanoq ikiorpaa, Jeremiallu maligassiaa sumik ilinniarfigisinnaavarput?

⁹ Pruffiiti Jeremia uagutsinnut maligassaalluarpoq. Anersaakkut inuussutissat Jehovamit pisartakkani pisariaqartippai, qujamasuutigingaarpaalu. Anersaakkut inuussutissat inunnut akuersaanngitsunut pinertusaarluni oqaluussisinnaannguutigai. Jeremia ima oqarpoq: “[Jehovap] oqaasii . . . soorlu ilunni [inneq ikumasoq], soorlu saanikka ikuallanneqartut.” (Jeremia 20:8, 9) Aamma anersaakkut inuussutissat taakku Jerusalemip piuneerussaanissaata tungaanut piffissami artornartorsiungaarfiusumi pinertusaarnissamut iluaqutigai. Ullumikkut Guutip oqaasia allanneqarsimasoq tamaat pigaarput. Taanna peqqissaarluta atuaqqissaartarutsigu Guutillu pissutsinik isiginnittaasiatut isiginnittaaseqalerniarutta, Jeremiap pisimaneratut oqaluussinermi nuannaarluta pinertusaarsinnaalissaagut, misilinneqarnerni aalajaassinnaalissaagut ileqqussatigullu anersaakkullu minguittuarsinnaalissalluta. — Jaaku 5:10.

‘Minguitsuujuarlusilu assuarnaatsuujuaritsi’

10, 11. Sooq ‘minguitsuujuarniarluta assuarnaatsuujuarniarlutalu’ ilungersortariaqarpugut, qanorlu iliortariaqarpugut?

¹⁰ Kristumiuugatta nalunngilarput naggatissap nalaani inuulluta. Taamaattumik tupiginngilarput silarsuaq piumatunermik, kinguaassiuutitigut ileqqorlunnermik, nakuusernermik allarpassuarnillu Jehovap maajugisaanik ulikkaarmat. Oqaatsit Saqqummersitat 2:13, 14-imiittut naapertorlugit Saatanip periaasia ima eqikkarneqarsinnaavoq: ‘Guutip kiffai qunulersinneqarsinnaanngippata immaqa ileqqorluttunngortinneqarsinnaapput.’ Taamaattumik Petrusip asannilluni oqaaqqissaarutaa una uummammiuliuguk: “Ilungersuutiginiarsiuk [Guutimut] minguitsuullusilu assuarnaatsuunissarsi eqqissillusi.” — 2 Petrusi 3:14.

¹¹ Oqaaseq “ilungersuutiginiarsiuk” Petrusip siusinnerusukkut ‘ilungersungaarnissamik’ oqaaqqissaarutaanut assinguvoq. Erseqqippoq Jehovap — eqqarsaatinik tamakkuninnga ersersitsinissamut Petrusimik isumassarsisitsisup — nalunngikkaa ‘minguitsuujuarniarluta assuarnaatsuujuarniarlutalu’, Saatanip silarsuaanit mingutsinneqatsaaliniarluta, ilungersortariaqartugut. Ilungersornitsinnut ilaavoq uummatitsinnik illersuinissarput, taanna kissaatigisapilunnit ajugaaffigineqaqqunagu. (Atuakkit Ussatit 4:23; Jaaku 1:14, 15). Aamma kristumiutut inuunitsinnik tupigusuutiginnittut uagutsinnillu ‘mitaatiginnittuartut’ qanorluunniit iliussagaluarpata aalajaattariaqarpugut. — 1 Petrusi 4:4.

12. Lukasi 11:13-imi qanoq neriorsoqqissaarneqarpugut?

¹² Eqqortuliorumalluta naammalluinnanngissuserput pissutigalugu akiuuttariaqartarpugut. (Romamiut 7:21-25) Jehova, imminut ilumoorlutik qinusunut anersaaminik illernartumik tukkorluni tunisisartoq, saaffigigutsigu aatsaat akiuunnermi tamatumani ajugaanissarput neriuutigisinnaavarput. (Lukasi 11:13) Anersaaq taanna pissuserineqartussanik Guutip akuerisaanik ineriartortitsinissamut iluaqutigissavarput. Taamaalillutami ussernartut nalaatavut akiuinnarnagit aammali misilinneqarnernik Jehovap ullussaa qanilliartortillugu amerligaluttuinnartussaagunartunik akiuisinnaassaagut.

Misilinneqaatit nakussatsissutigisinnaavatit

13. Misilinneqaleraangatta suna pinertusaarnissamut iluaqutigisinnaavarput?

¹³ Silarsuatoqqami matumani inuutilluta arlaatigut misilinneqanngitsoorsinnaanngilagut. Tamannali nikalluutiginagu soormi misilinneqaatit Guutimik asanninninnik uppernarsaanissamut aamma taassumunnga oqaasianullu upperninnik nakussatsitsinissamut periarfissatut isigigukkit? Ajoqersugaq Jaaku ima allappoq: “Qatanngutikka, tamalaanik misilinneqartarnisi nuannaarutigiinnartassavasi; nalunngilarsimi uppernersi misilinneqaraangami nikallujuitsunngortitsisartoq.” (Jaaku 1:2-4) Aamma eqqaamajuk ‘Jehovap mianerinnitsini ussernartunit aniguisinneq sapinngikkai’. — 2 Petrusi 2:9.

14. Josefi ilinnut qanoq maligassaalluarpa?

¹⁴ Assersuutigalugu eqqarsaatigeriaruk Jaakup ernera Josefi, qatanngutiminit inussiatut tunisaasoq. (1 Mosesi 37:23-28; 42:21) Josefi naakkittaatsumik pineqarnini tamanna pissutigalugu uppernikilliva? Guuti naapertuilluanngitsumik pineqarnerminik akuerinnimmat Josefip kamaappaa? Naamerluinnaq. Josefip misilinneqaatit suli allat naammagalugit atortariaqarpai. Kingusinnerusukkut pinngitsaaliilluni arnereriaraluarsimasutut eqqunngitsumik unnerluutigineqarpoq parnaarussaallunilu. Pisimasumi tamatumanissaaq Guutimut tunniusimajuarpoq. (1 Mosesi 39:9-21) Misilinneqarnini nakussatsissutissamisut isiginiarlugit aalajangerpoq, tamannalu pillugu pilluaqqusaangaarpoq.

15. No’omip maligassiaa sumik ilinniarfigisinnaavarput?

¹⁵ Ilumoorpoq misilinneqarnerit aliasuutigisinnaagivut, allaammi nikalluutigisinnaavavut. Josefi immaqa ilaannikkut taama misigisarsimassaaq. Guutip kiffai allat taama misigisarsimapput. No’omi, uiminik ernerminillu marlunnik toqukkut annaasaqartoq, eqqarsaatigeriaruk. Taanna ima oqarpoq: “No’omimik taananga Maramik [‘narrutsassimasumik’ isumaqartumik] taasalerniarsinga Ajugaqanngitsup narrutsatsissimammanga.” (Ruthi 1:20, 21, quppernerup ataani ilanngussaq) No’omip periarnera pissusissamisoorlunilu paasinarpoq. Josefilli pisimaneratut Guutimut uppertuarlunilu taassuminnga ilumoorfiginnittuarpoq. Jehovap arnaq ilumoorfiginnittoq taanna akissarsisippaa. (Ruthi 4:13-17, 22) Aamma Jehova nunami paratiisissami Saatanip taassumalu silarsuaata ajortup ajoqusiinerinik iluarsiiumaarpoq. “Pereersut eqqaamaneerutissapput eqqaaqqinneqarnatillu.” — Esaja 65:17.

16. Qinunermut qanoq isiginnittaaseqartariaqarpugut, aamma sooq?

¹⁶ Qanorluunniit misilinneqassagaluarutta Guutip asanninnera pinertusaarnissamut iluaqutigissavarput. (Atuakkit Romamiut 8:35-39). Saatanip nikallortinniarsariuarumaarpaatigut, iluatsinnavianngilarli ‘silatusaartuarutta qinusarsinnaaqqullutalu eqiinganiartuarutta’. (1 Petrusi 4:7) Jiisusi ima oqarpoq: “Eqqumajuarniaritsi, qinugitsilu nukissaqartitaaqqullusi pisussat suut tamaasa qimarratigisinnaaqqullugit Inuullu Ernerata saavani atasinnaaqqullusi.” (Lukasi 21:36) Jiisusip matumani oqaaseq ‘qinugitsi’ atoramiuk, allassimaqqaarfiit naapertorlugit “ilungersorluni qinuneq” pivaa. Jiisusip taamatut kajumissaarinermigut ersersippaa imminut Ataataminullu attaveqarnitsinnik pimoorussinissamut piffissaasoq. Jehovamit akuerisaasut kisimik Jehovap ullussaanit aniguinissamut periarfissaqarumaarput.

Jehovamut kiffartornermi suliniuteqartuarit

17. Oqaluussiffigiuminaatsumiikkutta itsaq Jehovap kiffaasa maligassiuilluarnerat sumik ilinniarfigisinnaavarput?

¹⁷ Anersaakkut ittunik sammisaqaqataanerput nakussatsissutigisarparput. Tamatumunnga tunngasumik Petrusi ima allappoq: “Tamatigut illernartuullusilu Guutimillu mianerinnillusi inuusariaqarpusi.” (2 Petrusi 3:11) Matumannga paasivarput anersaakkut sammisaqartarneq inuunitsinnut ilaasariaqavissoq. Sammisassat taakkua pingaarnerpaartaat tassaavoq nutaarsiassamik nuannersumik oqaluussissutiginninneq. (Matthæusi 24:14) Angalaarfigisartakkalli ilaanni oqaluussineq unamminiarnartuusinnaavoq. Tamatumunnga pissutaasinnaasut tassaapput inuppassuit soqutiginninnatilluunniit akerlilersuinerat imaluunniit ulluinnarni isumakuluutinik ulapputiginninnerat. Itsaq Jehovap kiffai tamatumunnga assingusunik misigisaqarput. Taamaakkaluartorli uniinnanngisaannarlutik tusarliussaq Guutimeersoq oqaluussissutigiuarpaat. (Atuakkit 2 Nalunaarsuutit 36:15, 16; Jeremia 7:24-26). Sooq oqaluussiuarpat? Suliassartik inuit silarsuarmiittut isiginnittaasiannit isiginagu Jehovap isiginnittaasianit isigigamikku. Aamma Guutip aqqanik taaguuteqarneq ataqqinaataanerpaatut isigigamikku. — Jeremia 15:16.

18. Siunissami Guutip aqqanik qutsissisitsinissaq eqqarsaatigalugu Guutip naalagaaffianik oqaluussissutiginninneq qanoq sunniuteqassava?

¹⁸ Jehovap aqqanik siunertaanillu oqaluussissutiginninneq uaguttaaq immikkut pisinnaatitaaffigaarput. Eqqarsaatigeriaruk — oqaluussinerput pissutigerpiarlugu Guutip akerai taassumalu ullussarsuani taassumunnga akisussaatinneqarunik utoqqatsissutissaqarsinnaassanngillat. Itsaq Faraop pisimaneratut nalunavianngilaat Jehova akuliuttoq. (2 Mosesi 7:26; 8:16; 14:25) Tamanna ilutigalugu Jehovap kiffani aalajaatsut ataqqinartissavai taakkuninnga ilumut sinniiseqarnerminik erseqqissaanermigut. — Atuakkit Ezekieli 2:5; 33:33.

19. Qanoq ililluta ersersissinnaavarput Jehovap erinitsajuissusia iluaqutigerusullutigu?

¹⁹ Petrusip allakkami aappaata naggataatungaani uppeqatini ima allaffigai: “[Paasiniarsiuk] Naalakkatta erinitsajuissusia ilissi annassutissarigissi.” (2 Petrusi 3:15) Aap, Jehovap erinitsajuissusia iluaqutigiuartigu. Qanoq? Pissuserineqartussanik taassuma iluarisaanik ineriartortitsinitsigut, ‘minguitsuujuarlutalu assuarnaatsuujuarnitsigut’, misilinneqaatinut eqqortumik isiginnittaaseqarnitsigut oqaluussinermillu ulapputiginnittuarnitsigut. Taamaaliortarutta ‘qilaat nutaat nunallu nutaap’ naassaanngitsumik pilluaqqussutissartaasa misiginissaannut periarfissaqassaagut. — 2 Petrusi 3:13.

Eqqaamavigit?

• Pissuserineqartussanik Guutip iluarisaanik qanoq ililluta ineriartortitsisinnaavugut?

• Qanoq ililluta ‘minguitsuujuarlutalu assuarnaatsuujuarsinnaavugut’?

• Josefi No’omilu sumik ilinniarfigisinnaavavut?

• Oqaluusseqataaneq sooq immikkut pisinnaatitaaffiua?

[Qupp. 17-mi assiliartaq]

Illit uiusutut suut iluaqutigisinnaavigit illit ilaquttavillu Guutip iluarisaanik pissuseqalernissassinnut?

[Qupp. 18-mi assiliartat]

Josefip misilinneqarnerminut isiginnittaasia sumik ilinniarfigisinnaavarput?