Inuttut qanoq ittuusariaqarpisi?
1 Inuiannut tamanut naatsorsuiffissaq qanilliartorpoq. Biibilimi ’Jehovap ullussaa’-tut eqqartorneqartarpoq. Guutip ajortunut eqqartuussutini naammassissavaa peqqusersuitsullu aniguisissallugit. Taamanikkussamut inuusut tamarmik inuunerminnik qanoq atuisimanertik pillugu naatsorsuiffigineqassapput. Eqqarsaatit tamakku tunngavigalugit Peterip apeqqut imminut misiligutissaasoq apeqqutigaa: ’Inuttut qanoq ittuusariaqannginnerpisi?’ [NV] Pingaarnertut erseqqissaavigaa ’iluartumik ileqqoqarluta mianerinnittariaqartugut’, aammalu ’Jehovap ullussaata nalliuffissaa ilimagalugu qilanaaralugulu’, aammalu ’innarluilluta assuarnaallutalu eqqissilluta.’ — 2 Pît. 3:11-14.
2 ’Iluartumik ileqqoqarlusi mianerinnittariaqarpusi’: Iluartumik ileqqoqarnerup maligassaalluartunik iliorneq Biibilillu najoqqutassiaanut ataqqinninneq nassatarai. (Tít. 2:7, 8) Kristumiut ilumoortut ileqqut silamiorpaluttut namminissarsiornermik uingullu pilerissusaanik iliuuseqalersitsisartut ingalassimaniartariaqarpaat. — Rûm. 13:11, 14.
3 ’Mianerinninneq’ ima allaatigineqarpoq: „Guutip kinaassusianut qamannga pisumik itisuumik pingaartitsilluni qanittumik Guutimut attaveqarneq“. Ileqqoq tamanna ersersissinnaavarput eqiasuilluta kiffartornitsigut. Oqaluussiartortarnerput pisussaaffiuinnarani isumaqarnerujussuuvoq; tamanna Jehovamut qamanngavik asanninnitsinnut ersiutaavoq. (Mák. 12:29, 30) Asanninnerup taamaattup iliuuseqalersissavaatigut pissutissaqarluartumik mianerinninnissatsinnut. Mianerinninnerput atajuaannartariaqarpoq, taamaapportaaq aamma oqaluussiartortarnitsinni iliuuserisartakkagut. Sapaatillu akunneranut aalajangersimasuusariaqarluni. — Epr. 13:15.
4 Jehovap ullussaa ’qilanaaralugu’ isumaqarpoq isummatsinni salliutittariaqaripput, pingaaruteqanngitsutullu tunuartinngisaannarlugu. Tassa imaappoq Naalagaaffik inuunitsinni salliutittariaqaripput. — Mat. 6:33.
5 Innarluilluta assuarnaallutalu eqqissilluta: Amerlangaartut ilaattut ’atisavut takisuut savaaqqap aavanik errorsimavavut qaqorsarlugillu’. (sar. 7:14) ’Innarluitsuuneq’ isumaqarpoq minguitsuunerput inuunitsinni attatsittuaannarlugu tunniulluinnarsimanerput silarsuarmit mingutsinnaveersaarlugu. ’Assuarnaatsuunerpullu’ attatsittuaannarparput guutiitsutut pigisaleritunermik kristumiuussuserput takussunarsiseqqunagu. (Jâk. 1:27; 1 Juá. 2:15-17) Takutipparput ’eqqissilluta’ inuulluta ’Guuti eqqissisaasoq’ assilillugu inoqatitsinnut iliuuserisartakkatsigut. — Fil. 4:7; Rûm. 12:18; 14:19.
6 Eqqortumik iliuuseqarnikkut mianersorluta silarsuarmit mingutsinnaveersaarutta, silarsuup aaqqissuussaaneranit Jehovamit eqqartuutsitinneqareersimasumit ’ilusilersorneqassanngilagut’. Ajunngitsumik iliuuseqartarnitsigut allat ikiorneqarsinnaapput takusinnaassallugu „Guutillu kiffartuussisaasa kiffartuussisiginngisaasalu atugaqartitaaneri qanoq assigiinngitsigisut“. — Rûm. 12:2; Mal. 3:18.
7 Amerlanersatta ataatsimeersuarneq „Unnersiutinginnittut nuannaartut“ peqataaffigisimavaat, anersaakkullu nerisassat pisimasavut inuummarissiallaataasut qularnanngitsumik annertunerusumik mianerinninnissatsinnut kissaateqalersissimavaatigut. Nutaarpassuit aamma taama kissaateqarput. Taakkununnga pilluaqqussutaasinnaavugut aggustimi kiffartuussinermut peqataalluta ikiuinitsigut.
8 Peqqissaarluarluta ingerlatiinnarutsigu ’ajunngitsuliorluta’ allat iluaqutigissavaat, ilagiit nukittorsarneqassapput Jehovallu aqqa qutsissitinneqassalluni. (1 Pît. 2:12) Qanortoq inuttut taama ittuujuaannarisa. (kmD 95/8 Hvilken slags mennesker bør I være?)