Sooq Guutip atia atussavarput?

Allaaserisami matumani immaqa apeqqutigisarnikuusatit taakkualu akissutaat illit nammineq Biibilinni sumi takusinnaaneritit sammineqassapput. Akissutissarsiorninni Jehovap Nalunaajaasuisa ikiorusuppaatsit.

1. Sooq Guuti imminut atsersimava?

Immaqa illit taaguummik, soorlu ‘arnamik’ imaluunniit ‘angummik’, taaneqarnak atit atorlugu taaneqartarnissat kissaatigineruat. Ateq atoraanni kinarpiaq pineqarnersoq paasineqarsinnaasarpoq. Guuti pillugu taaguutit soorlu “Naalagaq Guuti”, “Guuti Ajugaqanngitsoq” aamma ‘Pinngortitsisoq’ atorneqartarput. (1 Mosesi 15:2; 17:1; Oqaluussisartup oqaasii 12:1) Imminulli aamma atsersimavoq imminut attaveqarlualersinnaaqqulluta. Guuti Jehovamik ateqarpoq, imaluunniit Biibilimik nutsikkat ilaat naapertorlugit Jahvemik. — Atuaruk Esaja 42:8.

Biibilimik nutserisorpassuit Guutip atia taaguutinik soorlu “Guuti”-mik aamma “Naalagaq”-mik taarsertarpaat, Allakkalli Hebræerisuut allassimaqqaarfiini atia 7000-ingajannik atorneqarpoq. Erseqqippoq Guutip atermi ilisimaneqalernissaa kissaatigigaa. — Atuaruk Esaja 12:4.

2. Sooq Guutip atianik ilisimanninnissaq pingaaruteqarpa?

Guutip atianik ilisimanninneq qanoq taaneqarnissaanik ilisimanninnerinnaanngilaq, tamatumunnga ilaavoq taassumunnga attaveqarluarneq. Ateq Jehova isumaqarpoq “-nngortippoq” (imaluunniit: “-tippaa”). Taamaattumik Guutip siunertani naammassiniarlugu pisariaqarnera naapertorlugu sunngorsinnaavorluunniit. Tassa Guutip atianik ilisimanninnermut aamma ilaavoq Guutip neriorsuutiminik piviusunngortitsiumaarneranik upperinninneq. (Tussiaat 9:11) Upperamik inuit Guutip atianik ilisimannillutillu atuisut Jehovamik tatiginnillutillu inuunerminni taassuminnga pingaarnerpaatitsipput. Guutip taakku sernisussavai. — Atuaruk Tussiaat 91:14.

3. Sooq Guutip atermi ilisimaneqalersineqarnissaa kissaatigaa?

Guutip atermi isumaata inunnit paasineqarnissaa kissaatigaa taakkununnga iluaqutaammat. Guutimut ikinngutaalersinnaallutillu naassaanngitsumik inuulersinnaapput. Taamaattumik paasinarpoq Guutip kissaatigimmagu aterminik ilisimannilersitsinissarput! — Atuakkit Johannesi 17:3; Romamiut 10:13, 14.

Jiisusi Guutip aqqutigeqqusai, inatsisai neriorsuutaalu pillugit inunnik ilinniartitsinermigut Guutip atianik ilisimannilersitsisarpoq. Ullumikkut aamma Jiisusip ajoqersugai Guutip atianik inuiannut tamanut ilisimannilersitsisarput. Taamaaliortarput ataasioqatigiillutik ‘Guutip atianut innuttassarsiaagamik’. — Apustilit Suliaat 15:14, 1936; atuaruk Johannesi 17:26.

4. Guuti aterminik qanoq naalannarsisitsissava?

Jehovap atini narrunarsarneqarmat naalannarsisissavaa. Inuimmi ilaat oqartarput Guuti uumasusilinnik tamanik pinngortitsisuunngitsoq uagullu naalattariaqanngikkipput. Allat oqartarput soqutiginngikkaatigut naalliunnartoqarneranullu pisuusoq. Taama oqartartut Guutip atianik mitaatiginnittarput. Taamaaliortuarsinnaatitaassanngillalli. Guutimmi aterminik nikanarsaasartut suujunnaarsissavai. — Atuakkit Tussiaat 83:18, 19.

Jehovap atini naalannarsisissavaa naalagaaffimmigut inuit naalakkersueriaasii tamaasa sujunnaarsikkunigit inuiannullu eqqissineq atuutilerseqqikkuniuk. (Danieli 2:44) Qanittukkut inuit tamarmik paasilissavaat Jehova Guutiusoq ilumoortoq. — Atuakkit Ezekieli 36:23; Matthæusi 6:9.

Qanoq iliortariaqarpit? Guutimut attaveqarlualerit oqaasianik atuaqqissaartarnikkut Guutimillu asannittunik peqateqartarnikkut. Jehovap atini naalannarsisikkuniuk kiffani aalajaatsut eqqaamassavai. — Malaki 3:16.

Paasisaqarnerorusukkuit atuaruk kapitali 1 atuakkami uani, Biibilimi sorpiaat ajoqersuutigineqarpat? Jehovap Nalunaajaasuinit saqqummersinneqartoq.

[Qupp. 10-mi assiliartaq]

Guutip aqqa assammik allakkani pisoqqani hebræerisuuni allanneqarsimasoq