Sooq Guutip inuit sanngisuut sanngiitsunik naqisimannit­tarnerat akueraa?

Sanngisuup sanngiitsumik naqisimannittarnera pillugu oqaluttuat isumakululernartut Biibilimi allaatigineqarput. Nabotimik oqaluttuaq assersuutigisinnaavarput.a Akabip, 900-kkunni kr.in.si. Israelikkunnut kunngiusup, Nabotip viinnequteqarfia piniassagamiuk Nabotimik taassumalu ernerinik nuliami Jezabelip toqutsinissaa akueraa. (1 Kunngit 21:1-16; 2 Kunngit 9:26) Sooq Guutip taama sualutsigisumik pissaanermik atornerluisoqarnera akueraa?

Pissutaasoq pingaarutilik sammeriartigu: Guuti sallusin­naanngilaq. (Titusi 1:2) Tamanna naakkittaatsumik naqisiman­ninnermut qanoq attuumassuteqarami? Guutip imminerminut pikitsitsinerup ajortorujussuarmik — toqumik — kinguneqaru­maarnera aallaqqaammulli inunnut mianersoq­qussutigaa. Guutillu oqarneratut pisoqarpoq. Edenimi pikitsitsi­soqarmalli inuit toqusalerput. Inuk siulleq toqusoq naqisimaneqarnini pissutigalugu toquvoq — tassa Abeli qatanngumminit Kainimit toqutaammat. — 1 Mosesi 2:16, 17; 4:8.

Taamanimiilli inuiaat oqaluttuarisaanerat Guutip oqaasiani ima naalisarneqarpoq: “Inuit ilaat ataaseq inoqatiminut ajoqutaasumik pissaaneqarpallaartarpoq.” (Oqaluussi­sartup oqaasii 8:9) Oqaatsit taakku ilumoorpat? Jehovap innuttani Israelikkut oqarfigai kunngiminnit naqisimaneqarnertik pissutigalugu imminut ikioqqullutik torlulasarumaartut. (1 Samueli 8:11-18) Allaat kunngi Salomo silatooq akileraartitsisarnermigut innuttaminik naqisimannippoq. (1 Kunngit 11:43; 12:3, 4) Kunngit ajortut, soorlu Akabi, suli naqisimanninnerullutik naalakkersuipput. Una eqqarsaatigiuk: Guuti naqisimannittarnerit taamaattut tamaasa pinngitsoortittarsimasuugunigit sallulluni oqalussimassagaluarpoq, ilaa?

Aamma eqqaamassavat Saatanip inuit namminissarsiornertik pissutigiinnarlugu Guutimut kiffartornerarnikuummagit. (Jobi 1:9, 10; 2:4) Guuti kiffaminik tamanik naqisimannitsaalisarsimasuuppat Saatanip unnerluussutaanik tapersersuisimassagaluarpoq, ilaa? Aamma Guutip inuit tamaasa naqisimanninnermut sumulluunniit illersortarsimasuuppagit sallorujussuarsimassagaluarpoq, ilaa? Taamatut sernissuisimasuuppat immaqa inuppassuit isummissagaluarput Guutimit siulersorneqaratik nunarsuarmut naalakkersuilluarsinnaallutik. Tamatumali akerlerluinnaa — tassa inuit namminneq naalakkersuisinnaanngilluinnarnerat — Biibilimi allassimavoq. (Tussiaat 146:3) Guutip naalagaaffiata tikiunnissaa pisariaqartipparput; aatsaallu tikiukkuni naqisimanninnerit tamaasa atuukkunnaarsissavai.

Imaappa Guutip naqisimannittarneq isiginngitsuusaartaraa? Naamik. Iliuuserisartagai marluk eqqarsaatigikkit: Siullertut, naqisimanninnerup suunera qulaarpaa. Assersuutigalugu Jezabelip Nabotimut tunngatillugu pilersaarutipiloqarnera Guutip oqaasianit sukumiisumik qulaarneqarpoq. Iliuutsit ajortut taamaattut naalakkersuisumit pissaanilimmit kinaassutsiminillu isertuiniartumit siuarsarneqartarneri Biibilimi aamma ersersinneqarpoq. (Johannesi 14:30; 2 Korinthimiut 11:14) Taanna tassaasoq Saatani Diaavulu Biibilimi qulaarneqarpoq. Guutip kina ajussutsimut naqisimanninnermullu pisuunersoq qulaaramiuk ajortuliunnginnissamut iluaqutissippaatigut. Taamaalillunilu naassaanngitsumik atugarissaarnissatsinnik pingaartitsinini ersersippaa.

Aappaattut, Guutip naqisimanninnerit suulluunniit atuukkunnaarsinneqarumaarnerannik tutsuiginartumik neriuutissippaatigut. Akabimik Jezabelimillu — inuppassuarnillu taakkunatut pissusilinnik — qulaarseriaasia, eqqartuusseriaasia pillaariaasialu ullut ilaanni inunnik ajortunik tamanik pillaajumaarnerminik neriorsuutaanik upperinninnerulissutigaarput. (Tussiaat 52:3-7) Guuti aamma ajussuseq naqisimanninnerlu sunaluunniit asannitsimi misiginikuusaat qanittukkut aaqqinniarlugit neriorsueqqissaarpoq.b Taamaattumik Naboti aalajaatsoq erninilu nunarsuarmi paratiisiusumi naqisimanniffiunngitsumilu naassaanngitsumik inuulernissamut periarfissaqassapput. — Tussiaat 37:34.