1921 – Ukiut hundredit matuma siorna

NAPASULIAQ ALAPERNAARSUIFFIK-MI januaarip aallaqqaataa 1921-moortumi ilaatigut una apeqqutigineqarpoq: “Suliassaq suna ukioq manna qilanaarisinnaavarput?” Taava oqaluussinissamut peqqussut eqqaasitsissutiginiarlugu Esaja 61:1, 2-lu issuarneqarpoq: ‘[Jehovap] tanippaanga naalliuttut tusarnersumik oqaqqullugit, ... torlulaatigeqqullugu Naalakkap ukiua saammaassivik, Guutittalu ullua akiniaaffik.’

OQALUUSSISARTUT SAPIITSUT

Biibilimik atuaqqissaartartut peqquneqarnermissut oqaluussissagunik sapiitsuusariaqarput. ‘Tusarnersoq’ oqaluussissutigiinnarnagu aamma ‘ulloq akiniaaffissaq’ oqaluussissutigisussaavaat.

Qatanngut J. H. Hoskin Canadami najugalik akerlilersorneqaraluarluni sapiilluni oqaluussiuarpoq. 1921-mi upernaakkut oqaluussitilluni Metodistit palasiat naapikkamiuk oqaloqatigiinnertik aallarnerlugu ima oqarfigaa: “Biibili pillugu eqqartueqatigiitta. Isumaqatigiinngissutigisinnaasagullu eqqissisimasumik oqaloqatigiissutigitigit.” Taamatulli pisoqanngilaq. Qatanngut Hoskin ima oqaluttuarpoq: “Minutsialunnguit oqaloqatigeereerluta palasip matu matorlungaarmagu isumaqaleraluarpunga matup igalaarsua sequmissasoq.”

Matu matorluutigalugu palasi ima suaarpoq: “Kristumiuunngitsut oqaluussiffigiartorniakkit!” Qatanngut Hoskin nipangersimaannarpoq imali eqqarsarluni: “Assaa, pissusilersornera kristumiorpalaanngingaarami.”

Palasip aqaguani naalagiartitsinermini naalagiat mianersoqquai. Qatanngut Hoskin ima oqaluttuarpoq: “Palasip sallutuujunerarsimavaanga, allaallu toqutassaanerarlunga.” Qatannguterpulli qunulernani oqaluussiuarpoq, inuppassuillu tusarnaartarput. Qatanngut Hoskin ima nangippoq: “Oqaluussininni angusaqarluarpunga, allaallumi inuit ilaasa ima oqarfigisarpaannga: ‘Nalunngilara Guutimut kiffaasutit.’ Ilaasalumi arlaannik amigaateqarnersunga aperisarpaannga.”

NAMMINEQ ILAQUTARIITTULLU ATUAQQISSAARTARNEQ

Soqutiginnittut siuariartornissaannut ikiorniarlugit Biibilimik atuaqqissaartartut atuagassiaq ullumikkut Iteritsi!-tut ilisimaneqartoq saqqummersittalerpaat. Atuagassiami tamatumani apeqqutit angajoqqaat meeqqaminnik ilinniartitsinerminni atorsinnaasaat sammineqartarput. Angajoqqaallu kajumissaarneqartarput meeqqatik Biibilimiit akissutissarsiornissaannut ikiortaqqullugit. Apeqqutit ilaat Biibilimi ilinniartitsissutigineqartunut tunngaviusunut tunngapput. Allallu inuusuttut sapiillutik oqaluussisalernissaannut piareersaataapput.

Aamma Biibili pillugu apeqqutinik ilisimasaqareersut nuannaarutigisinnaasaannik allassimasoqarpoq. Apeqqutit akissutaat Studier i Skriften-ip atuagartaani siullermi nassaarineqarsinnaapput. Apeqqutit taakku atuartartorpassuit iluaqutigisimaqaat. Kingornali nalunaarutigineqarpoq saqqummersinneqartarunnaassasut. Sooq?

ATUAGAQ NUTAAQ!

Atuagaq *Guds Harpe*

Allagartaaraq atuaqqissaagassamut innersuut

Allagartaaqqat apeqqutitallit

Qatanngutit paasivaat atuaqqissaartartut aaqqissuulluagaanerusumik ilinniartinneqartariaqartut. Taamaattumik atuagaq Guds Harpe saqqummersinneqarpoq. Atuagaq taanna atorlugu soqutiginnittut namminneq atuaqqissaarsinnaapput. Inuppassuillumi taamaaliornermikkut paasivaat Guuti inuunermik naassaanngitsumik inunnut siunertaqartoq. Nammineq atuaqqissaarneq qanoq ingerlasarpa?

Atuakkamik tigusisoqaraangat allagartaaraq ilanngullugu tunniunneqartarpoq. Tassani allaqqasarpoq quppernerit sorliit atuarneqassanersut. Sapaatip-akunnera ataaseq qaangiukkaangat atuakkamik tigusisoq allagartaaqqamik allamik atuariigai pillugit apeqqutitalimmik tunineqartarpoq. Tassani sapaatip-akunnerani aggersumi atuagassai allassimasarput.

Atuaqqissaartartoq sapaatip-akunnerisa aqqaneq-marluk ingerlanerini allagartaaqqamik sapaatip-akunneri tamaasa nassinneqartarpoq. Ilagiinni utoqqaat allallu illumiit illumut angalaarsinnaanngitsut allagartaaqqanik nassiussisuusarput. Anna K. Gardner, USA-mi najugalik, ima oqaluttuarpoq: “Guds Harpe saqqummersinneqarmat angajora pitsorluttoq, Thayle, allagartaaqqanik sapaatip-akunneri tamaasa nassiussisalerami oqaluussinerusalerpoq.” Kingorna atuaqqissaartartup atuagaq naagaangagu orninneqarluni Biibili pillugu sukumiinerusumik ilinniartinneqartarpoq.

SULIASSAQ TULLIUTTOQ

Qatanngut J. F. Rutherford ukiup naanerani ilagiinnut tamanut ima allappoq: “Ukioq manna Kunngeqarfik pillugu oqaluussisoqarnerummat inuit amerlanerusut anguneqarlutillu ikiorneqarsimapput.” Taava ima nangippoq: “Suli suliassaqaqaagut. Amerlanerit oqaluusseqataasalernissaannut kajumissaarniartigit.” Tamanna kajumississutigalugu Biibilimik Atuaqqissaartartut 1922-mi aatsaat taama oqaluussitigaat.

Ikinngutit sapiitsut

Biibilimik Atuaqqissaartartut qatanngutigiittut asaqatigiipput. Maannalu takussavarput sapiitsuullutillu ‘erniarititaasimasut annikilliornartussaq pillugu’. – Uss 17:17.

1921-mi maajip ulluisa 31-anni USA-mi illoqarfimmi Tulsami naggueqatigiit assigiinngitsut akersuutilerput. Angutip taartumik amillip parnaarussaanerata arnamillu qaamasumik amilimmik saassussisimasutut unnerluussaanerata kingunerisaanik qaamasumik amillit 1.000-nit amerlanerusut taartumillu amillit amerlanngitsut aporaatilerput. Aporaanneq taartumik amillit najugaqarfiannut Greenwoodimut siaruaatipallappoq. Tamatumani illut niuertarfiillu 1.400-nit amerlanerusut ujajaaffigineqarput ikuallanneqarlutillu. Nalunaarutigineqartut naapertorlugit inuit 36-t toqutaapput, ilimagineqarporli 300-t missaat toqusut.

Qatanngut taartumik amilik Greenwoodimilu najugalik Richard J. Hill ima oqaluttuarpoq: “Aporaannerup unnukkuani pisarnitsitut ataatsimiippugut. Ataatsimeereerluta illoqarfiup qeqqani igeriartoqarpaluttartoq tusaavarput. Suli taamaattoq innarpugut.” Aqaguani ullaakkut pissutsit ajorseriarsimapput. Nangipporlu: “Oqarfigineqarpugut illersorneqarusukkutta ingerlaannaq illoqarfiup katersortarfissuanukassasugut.” Taamaattumik qatanngut Hill nuliani meeqqatillu tallimat ilagalugit tassunga qimaapput. Inuit 3.000-t missaat tassaniittut sakkutuunit aggersarneqarsimasunit paarineqarput.

Taamatut pisoqarnerata nalaani qatanngut qaamasumik amilik Arthur Claus sapiitsuliorluni ima aalajangerpoq: “Tusarakku aporaattut Greenwoodimi ujajaallutillu illunik ikuallaasartut aalajangerpunga ikinngutigilluagara, qatanngut Hill, takusarniarlugu.”

Qatanngutip Arthur Clausip atuagaq Guds Harpe atorlugu meeqqat 14-it Biibili pillugu ilinniartissimavai

Arthur qatanngutip Hillip angerlarsimaffianut apuukkami taassuma sanilia aallaammik tigummiartoq naapippaa. Taanna qatanngutip Hillip ikinngutigaa, Arthurilu eqqissiviilliortunut ilaasorigaluarpaa. Ima suaarpoq: “Sooq maannarpit?”

Arthur ima oqaluttuarpoq: “Akissutiga naammagisimanngitsuuguniuk aallaasimassagaluarpaanga. Oqarfigaara qatanngut Hill ikinngutigalugu aamma amerlasoorpassuariarlunga pulaartarnikuullugu.” Ujajaasut illumut isernissaraluat angutip taassuma Arthurillu pinngitsoortippaat.

Arthurip paasivaa qatanngut Hill ilaquttanilu katersortarfissuarmiittut. Oqarfigineqarpoq generali Barrett akuersiteqqaarnagu katersortarfissuaq qimanneqarsinnaanngitsoq. Arthur nangilluni oqaluttuarpoq: “Generali naapikkuminaappoq. Qanoq pilersaaruteqarlunga oqarfigigakku ima aperivoq: ‘Ilaqutariit taakku paarissavigit pisariaqartitaannillu isumassorlugit?’ Soorunami taamaaliorumaarlunga oqarfigaara.”

Taava Arthur generalip akuersissutaa nassarlugu katersortarfissualiarpoq. Nassatani sakkutuut naalagaannut takutikkamiuk taanna tupaallalluni ima nillerpoq: “Generalip nammineq atsiorsimavaa! Nalunngiliuk illit siullersaallutit taamatut akuerineqartutit?” Sivitsunngitsoq Arthurip qatanngut Hill ilaqutaalu takuai. Taava tamarmik biilinut ikeriarlutik qatanngutip Hillip angerlarsimaffianukarput.

Qatanngutip Hillip ilaqutaasalu isumannaatsumiinnissaat Arthurip isumagaa. Taassuma sapiitsuunera qatanngutinullu asanninnera allanut sunniuteqarluarpoq. Arthur ima oqaluttuarpoq: “Qatanngutip Hillip sanilia eqqaaneqareersoq Jehovamik Nalunaajaasunik ataqqinninnerulerpoq. Allallu soqutiginninnerulerput paasigamikku Guutip innuttai ammip qalipaataa tunngavigalugu immikkoortitsineq ajortut aamma allanit pitsaanerusorinngitsut.”