Guutimit sallusuitsumit napatinneqarneq

OQALUTTUARTOQ: MARY WILLIS

Silarsuarmi ajornartorsiornersuaq 1932-mi Australiap kitaani inuilaamut anngussimavoq. Ukioq tamanna 19-iinnarnik ukioqarlunga Ellen Daviesilu oqaluuffissatsinnik 100.000 km-isut isorartussusilimmik tunineqarpugut. Illoqarfeeraq Wiluna najugaqarfitsinnit Perthimit, Australiap kitaani illoqarfiit pingaarnersaannit, 950 km-isut ungasitsigisumiittoq aallartiffigaarput.

AQQUTAANI Ellenilu qimuttuitsuni nakkutilliisoq inussiarnersoq ineqatigaarput. Qimuttuitsut unikkaangata nakkutilliisup inussiarnerluni oqarfigisarpaatigut qanoq sivisutigisumik uninngassasugut. Taamaalilluta qinuttuitsut unittarfiini avinngarusimasuni inunnut oqaluussinissatsinnut periarfissaqartarpugut. Naggataatigut sioqqanik persup ataani illoqarfimmut Wilunamut piiaaffimmi sulisuunerusunik inulimmut apuuppugut.

Wilunalli qimuttuitsunut unittarfia illoqarfimmit 3 km-isut ungasitsigisumiippoq. Arlaannarpulluunniit nukittoorsuunngilaq,, karsillu atuagassianik imallit oqimaaqisut kuffertivullu marluk nassataraavut. Qanoruna iliorniassaagut? Karsit ataasiakkaarlugit qisuminermut nivinngariarlugit ingerlateqattaarpavut. Taamaaliorluta karsit ataasiakkaarlugit ingerlappavut. Illoqarfiup tungaanut arfineq-marloriarluta uteqattaartariaqarpugut karsit nassatavullu apuunniarlugit. Akulikitsumik unittarpugut qasuerserniarluta, assavummi annernarsisaqimmata.

Naak pujoralakkaluaqisoq, assavut annernaraluaqisut nissuvullu qasugaluaqisut ilungersuanerput nikallungassutiginngilarput. Marluulluta misigaagut Jehovap ilagigaatigut, avinngarusimasumi oqaluussiffissatsinnut apuunnitsinni aqqut siulleq maniitsoq anigorsinnaaqqullugu napatikkaatigut. Aamma sivitsunngitsoq suliatsinnik pilluaqqusinera paasivarput, angalanitsinnimi ilungersornivut inuusuttuaqqap Bob Hornip Biibilimi sallusuissummik ilassinninneranik kinguneqarput. Nuannaarutigaarput kingorna Bob ukiualunni Betelimi kiffartormat 1982-imilu toqussi tikillugu ukiuni 50-ini aalajaalluni Jehova kiffartuuttuarsimammagu.

Wilunamiit sineriammi 725 km-isut ungasitsigisumiittumut Geraldtonimut angalanitsinni najugaqarfinni assigiinngitsuni oqaluussisarpugut. Taavanngaanniit Perthimut uterpugut. Ilaannikkut qimuttuitsunik utaqqisarfinni ammaannartuni sinittarpugut, ataasiarlutalu qimuttuitsut aqqutaata sinaani ivikkani panertuni sinippugut.

Pooqattamik nammineq iffiukkanik imalimmik nassarpugut. Angalanitta affaani siullermi taakku nerisaraavut. Ilaannikkooriarluta akunnittarfinni erruisarnitsigut asaasarnitsigullu nerisassavut pissarsiarisarpuvut. Ilaannikkullu kiassuup ataani eertanik assigiinngitsunik katersuilluta sulisarpugut. Soqutiginnittut atuagassianik Biibililersaarutinik pisimasut tunissutaat aamma inuussutigisarpavut.

Ulluni tamakkunani Jehovamut uppernerma atatittuarnissaanut pissutsillu ajornakusoortut anigornissaannut nakuussutiga tassaavoq anaanama maligassiusimanera siusissukkullu ajoqersuisimanera.

Kristumiutut kingornussaq

Anaanaga Pinngortitsisumut upperluartuusimavoq, kingumullu eqqaamasinnaanera tamaat tikillugu taanna pillugu oqaluttuuttuartarsimavaatigut. Uppernerali sakkortuumik misilinneqarsimavoq aniga arfineq-marlunnik ukioqarluni atuarfimmi ajunaarmat. Tamannali pillugu aliasunnini Guutimut tutsinnagu ilumoorluni Biibili atuaqqissaalersimavaa. Ajunaarnernut taama ittunut pissutaasut ajornanngippat paaserussimagamigit. Biibilip sallusuissutaanik ujartuinera akilerneqarpoq, 1920-milu siusissukkut Guutimut ilumoortumut, Jehovamut, tunniulluinnarnini takutinniarlugu imermi kuisissimalluni.

Taamanimiilli Guutip neriorsuutaasa qularnanngitsigissusiat uagutsinnut eqqartortuartarsimavaa. Kajumissaartuartarpaatigut eqqaamaqqullugu qanorluunniit pisoqassagaluarpat ’Guuti sallusuitsuummat’. (Títuse 1:2) Tamatuma kingunerisaanik ullumikkut nukara uangalu anivullu marluk, kiisalu ilaquttavut ernguttavullu, Jehova Guutimik unnersiutiginnittuuvugut. Jorngukka marluk, Alan aamma Paul Mason, nakkutilliisutut angalasartutut kiffartorput.

Siusissukkut oqaluusserusussuseqalersimavunga

Atuarfimmi pikkorissorsuusimanngilanga, 1926-milu 13-inik ukioqarlunga atuarfimmit anivunga. Biibilimili ilikkakkama inunnut allanut ingerlateqqinnissaannut kissaateqaleriartuaarsimavunga. Ataataga isumaqarpoq inunnik allanik ikiuinissamut ilinniagakippallaartunga, anaanali oqarpoq: „Harmagedonimi sorsunnissaq inuillu qanilaartut nunarsuarmik kingornussinissaat kisiisaluunniit oqaluttuarisinnaagunigit Guutip Naalagaaffia pillugu tusarliisinnaassaaq.“ Taamaattumik naak aatsaat 1930-mi kuisikkaluarlunga inuusuttuaraallungali illumiit illumut oqaluusseqataasalerpunga. Sivitsunngitsoq Perthimi eqqaanilu piffissara tamaat oqaluussinermut atortalerpara.

Aappaaguani, 1931-mi, Jehovap Nalunaajaasuinik taaguuteqalerpugut. Angerlarsimaffinnili ittuusut ilarpassuisa atermik illernartumik atuilernerput akerlerisorujussuuaat kamaatigalugulu. Akerlilersorneqaraluaqalutali oqaluussisarnera ingerlatiinnarpara. Qularutiginngilluinnarpara Guuti sallunngitsoq neriorsuigami kiffami ’nakussatsitsinini’ tunaartarisinnaagaat. — 1 Pîtruse 4:11; Filípimiut 4:13.

’Amerlangaartut’ kinaassusersineqarput

1935-mi Australiap nunatarsuata illua’tungaani oqaluussiffissannik tunineqarpunga. Taamaalillunga ukiuni tulliuttuni pioneritut New Englandimi New South Walesimiittumi, najugaqarfinnit 4000 km-isut ungasitsigisumiittumi kiffartorpunga.

1935 tikillugu Jesusip toquanik eqqaaniaanermi assersuutinik iffiamik viinnimillu ilangeeqataasarsimavunga. Tamanna eqqortutut isigineqaraluartoq, ingammik piffissara tamaat kiffartortuunera eqqarsaatigalugu, qilammi inuunissamik neriugisaqarnerlunga qulakkeersimanngisaannarpara. Taavali paasitinneqarpugut inuit ’amerlangaartut’ nunarsuarmi naassaanngitsumik inuunissaminnik neriugisaqartut katersorneqarsimasut. Amerlaqaluta nuannaaqaagut paasigatsigu amerlangaartunut ilaalluta, assersuutinillu ilangiisarunnaarpugut. (Juánase 10:16; sarĸúmersitat 7:9) Biibilimi sallusuissut Jehovap neriorsuisimaneratorluinnaq qaammarissiartuinnarpoq. — Ussatit 4:18.

Oqalusseriaatsit nutaat

1930-kkut qiteqqunneranni oqaluttartut oqaluussinitsinni atortalerpavut. Taamaammat sikkilivut qajannaatsut siuatigut aquatigullu usisarfilerpavut oqaluttartoq oqimaatsoq aammali nuutai atuagassiaativullu nassatarisinnaajumallugit. Uanga sianigeqqissaartariaqarpunga, sikkilerami ulikkaarluinnartoq uppikkaluarpat taama oqimaatsigisoq nappartissinnaanaviannginnakku!

Aamma tamatuma nalaani paasititsiniaalluni ingerlaaqatigiinnermik taasavut ingerlattalerpavut. Illoqarfiit aqqusinersuisigut allagartarsuarnik maluginiarnartunik allagartalinnik tigumiarluta, imaluunniit allagartarsuarnik ’atisilluta’, ingerlaartarpugut. Taamaaliortarnerput uppernikkut misilinneqaatitut sakkortuutut isigaara, ingammik eqqarsaatigalugu illoqarfimmi Lismoremi unnuk ataaseq parnaarussaanera. Peqqusiileqinaqaaq aqaguani nutsakkaluunniit illaarneqanngitsut eqqartuussisunut sassartinneqarama! Jehovalli aamma tamatumuunakkut neriorsuisimanermisut napatippaanga. Suliassaq taamaatitinneqarpoq politiip uannik tigusisup unnerluussutaa tassaaginnarmat allagartarsuup tigumiama nammineq upperisaminut saassussisuunera.

Kitaanut uterneq

1940-kkut aallartinneranni Australiap kitaani illoqarfinni nunaannarmiittuni pioneritut kiffartortussanngortitaavunga. Tamaani puiunaatsunik misigisaqartuarpunga anersaakkut pilluaqqusaajuarlunga. Northamimi oqaluuffigisartakkanniitillunga illumi ningiu ulapittoq, Flo Timmins, illoqarfimmit 11 km-isut ungasitsigisumiittumi naapippara. Atuakkamik Forligelse-mik pivoq, sivitsunngitsorlu Jehova Guutimut nalunaajaasunngorpoq tunniulluinnarsimasoq. Suli Naalagaaffimmut kiffartorluartuuvoq, panialu, taamanikkut sisamaannarnik ukioqartoq, alliartorami kingorna specialpionerinngorpoq.

Aammali tamaani allanik puiunaatsunik misigisaqartarpunga. Ilaanni oqaluusseqatigalu Northamimi ikaartarfikkut qamutinik hestimik qimuttulimmik kuussuaq Avon River qulaateqalugu ingerlaartilluta hesti pangalluseriataarpoq. Kilometerip ataatsip missaani taamatut ingerlareerluni kiisami hesti arriillivoq.

Katinneq ilaqutaqalernerlu

1950-imi Arthur Willis aamma ukiorpassuarni pioneriusimasoq katippara. Australiap kitaani nunaannarmi illoqarfimmut Pingellymut najugassippugut, tassanilu ernertaarpugut Bentleymik atsikkatsinnik panissaarlutalu Eunicemik atsikkatsinnik. Meeqqavut atuarfimmi naammassingajalermata Arthur aalajangerpoq pionerinngoqqinniarluni. Ataatamik maligassiuilluarneratigut meeqqavut tamarmik pisinnaanngoramik ingerlaannaq pionerinngorput.

Arthurip meeqqavut nunaannarmi avinngarusimasunut oqaluussiartoqatigikulasarpai. Ilaannikkut sapaatip akunnera naallugu sinnerluguluunniit oqaluussiartoqatigisarpai tammaarsimaffimmi unnueqatigisarlugit. Taamatut peqannginnerini uanga angerlarsimasarpunga pequtaarniarfipput paaralugu, taakku pingasut tamarmik pioneriusinnaaniassammata.

Nunap inuiisa akornanni oqaluussineq

Ullaat ilaanni ilaquttakka nunaannarmi oqaluussisimanerminnit angerlaqqammersut ilimaginngisatsinnik pulaartoqarpugut. Pulaartorput tassaavoq Australiap inuiisa ilaat. Ima aperaatigut: „Utissaguma qanoq iliortariaqarpunga?“ Paatsuungaqqaarpugut. Taava Arthurip ilisarilerpaa tassaasoq angut ukiorpassuit tamatuma siornagut imerajuttuuneq pissutigalugu ilagiinnut kristumiunut ilaasortaajunnaarsitaasimasoq. Taamanimiilli imerajuttutut akiligassalissuartullu tusaamasaalersimavoq.

Arthurip nassuiaappaa Jehovap peqatigiissortaanut minguitsunut uterumaguni qanoq iliortariaqartoq. Oqaaseqarpiaranilu anivoq, qanorlu iliorumaarnersoq eqqarsaatigaarput. Qaammatini tulliuttuni qanoq pisoqarsimanera tupaallaatigeqaarput. Angutip allanngorluinnarsimanera upperiuminaapporluunniit! Imigassamik ajornartorsiutini qaangiinnarsimanngilaa aammali inunnut pulaaqattaarsimavoq akiitsuminik eqqaasillugit akiliiffigalugillu! Ullumikkut qatanngutinngoqqissimavoq, pioneritullu kiffartorsimalluni.

Pingellymi nunap inuii amerlasuut najugaqarput, inuillu maniguuttut taakku akornanni kiffartornerput nuannaarutigaarput, Guutip oqaasianik ilumoortumik ilinniartillugit akuerinninnissaannillu ikiorlugit. Nunap inuiinik amerlasuunik sallusuissummik ilinniartitsisimanera uannut uppernikkut nakussatsissutaasimaqaaq!

Pingellymi ilagiiliortoqarsimavoq, aallaqqaataanilu ingammik nunap inuiinik ilaasortaqarpoq. Taakku ilarpassui atuarnermik allannermillu ilinniartittariaqarsimavavut. Ukiuni siullerni tamakkunani assut paqumisuffigineqartarput, piffissarli ingerlatillugu nunap inuii nalunaajaasuusut minguitsumik inooriaaseqarnertik innuttaalluartuunertillu pillugit ataqqineqaleriartorsimapput.

Jehovap ikiuinera pakatsisitsinngisaannartoq

Uiga asasara, Arthur, aalajaalluni ukiuni 57-ini Guutimut kiffartorsimasoq, 1986-imi siusissukkut toquvoq. Pingellymi niuertunit tamaanilu inunnit ataqqisaalluarsimavoq. Aamma tamatumuunakkut Jehovap napatippaanga, annaasaqariataarninni nukissannik tunillunga.

Ernera, Bentley, Australiap kitaata avannarpasinnerusortaani utoqqaanertatut kiffartorpoq, nulianilu, Lorna, ilaqutaqalersimallutik sallusuissummi perorsakkaminnik. Nuannaarutiga alla tassa paniga, Eunice, ulloq manna tikillugu piffissani tamaat atorlugu kiffartormat. Uinilu Jeff pioneritut kiffartorput. Maanna taakku inooqatigaakka aalajangersimasumillu ikiorti-pioneriullunga.

Ukiuni 60-init amerlanerusuni Jehovap kiffani nakussatsissallugit pissutsillu qanorluunniit ittut anigornissaannut ikiussallugit asannittumik neriorsuutaata eqquunnera misigiuarsimavara. Qularfiginngisaannarutsigu uagutsinnullu iliuusii taamaattussaannartut isigilinngisaannarutsigu pisariaqartitatsinnik tamanik tunissavaatigut. Guutip sulinera misigiuartartillugu uppernikkut nakussatsissimaqaanga, takusimavaralu paasisinnaasavut qaangerlugit pilluaqqusaraatigut. (Malaki 3:10) Ilumut Guuti sallusuitsuuvoq! (wD 1/5 94)

[Qupp. 27-mi assiliartaq]

Mary 1933-mi

[Qupp. 29-mi assiliartaq]

Mary Arthurilu kingusinnerusukkut