“Nunarsuarmik tamarmik eqqartuus­sisuusoq” nallittuisoq tatigiuk!

1. Jehova pillugu ilumoortoq suna Aaperaap paasivaa?

ITSAQ inngili aqqutigalugu Jehovap Aaperaat paasitippaa illoqarfiit Soodoma Gomooralu suujunnaarsin­niarlugit. Guutimut upperluar­tuugaluarluni Aaperaap tamanna paasiuminaatsippaa. Ima aperivoq: “Ilumut iluartut piiassanerpigit iluaatsunut ilanngullugit? … Nunarsuarmik tamarmik eqqartuus­sisuusoq eqqortulius­sannginnerpa?” Jehovap naammagit­tarluni ikinngunni asasani ilumoortup pingaarutillip paasinissaanut ikiorpaa. Tassa Guutip inuit naapertuil­luartut suujunnaarsin­ngisaannarpai. Ilumoortorlu taanna aamma uagutsinnut tuppallernarpoq. – Mos 1. 18:23-33.

2. Sooq qularin­ngilarput Jehova eqqartuus­sigaangami naapertuil­luartuullunilu nallittuisartoq?

² Sooq qularin­ngilarput Jehova eqqortulior­tuarlunilu naapertuil­luartuullunilu nallittuisartoq? Nalunngin­natsigu Jehovap ‘inuup uummataa isigisaraa’. (Sam 1. 16:7) Aap, Jehovap “inuit tamarmik uummammiugisaat” ilisimavai. (Kng 1. 8:39; Nal 1. 28:9) Ilaa tupinnassusia! Jehova uagutsinniit ilisimas­suseqangaar­nerummat eqqartuussutai paasisin­naasatta inorpai. Taamaattumik Paulusi Jehova Guuti pillugu ima allappoq: “Eqqartuussineri … tamakkiisumik paasineqarsin­naanngillat!” – Rom 11:33.

3-4. Suut eqqarsaatigisarsin­naavagut, aamma allaaserisami matumani suut sammissavagut? (Johannesi 5:28, 29)

³ Jehova eqqortulior­tuaannartoq nalunngik­kaluarlutigu Aaperaap apeqqutaanut assingusunik apeqqutis­saqarsin­naavugut. Immaqa ima eqqarsarpugut: ‘Inuit Jehovap suujunnaarsitai, soorlu Soodomamiut Gomooramiullu, inuuleq­qinnissaminnut periarfis­sinneqassappat? Imaassinnaava taakkua ilaat “naapertuil­luanngitsut makititaasussat” ilagissagaat?’ – ApS 24:15.

⁴ Makititaanissaq pillugu suna nalunngilarput? Inuunissamut makititaanissaq eqqartuun­neqarnis­samullu makititaanissaq pillugit paasinnit­taaserput qanittukkut allanngor­tinneqarpoq.a (Johannesi 5:28, 29 atuakkit). Taamaattumik paasinnit­taatsitsinnik aamma allanik allannguisoqarpoq. Allannguinerillu taakku allaaserisami matumani tulliuttumilu sammissavagut. Jehovap eqqartuussineri naapertuil­luartut pillugit ilisiman­ngisagut taavalu ilisimasagut sammeriartigit.

ILISIMAN­NGISAGUT

5. Soodomamiut Gomooramiullu Jehovap suujunnaarsitai pillugit siornatigut qanoq isumaqarsimavugut?

⁵ Siornatigut Biibililersaarutitsinni allassimasar­nikuuvoq Jehovap suujunnaarsitai, soorlu Soodomamiut Gomooramiullu, makititaanavian­ngitsut. Jehovalli siulersuinera qinnutigereerlugulu misissueq­qissaareerluni inussiap aalajaallunilu silatuup paasivaa qulakkiivillugu taama isummersin­naanngitsugut.

6. (a) Jehovap inunnik ajortunik eqqartuus­sineranik assersuuteqarit. (b) Suna ilisiman­ngilarput?

⁶ Jehovap inunnik ajortunik eqqartuus­sineranik oqaluttuat allat eqqarsaatigikkit. Assersuutigalugu ulersuarmi Jehovap kikkut tamaasa, Nooa ilaqutaalu minillugit, suujunnaarsippai. Aamma Israalikkut peqquai inuiaat arfineq-marluk nunami neriorsuutigisamiittut suujunnaarsissagaat. Jehovallu inngiliata unnuami ataatsimi sakkutuut Assyriamiut 185.000-t toquppai. (Mos 1. 7:23; Mos 5. 7:1-3; Es 37:36, 37) Imaappa Biibilimi oqaluttuani taakkunani ersarissumik paasitin­neqartugut Jehova aalajangersimasoq taakku tamaasa naassaan­ngitsumik piujunnaarsin­niarlugit, taakkualu arlaannaal­luunniit makititaanissamik neriuutis­saqanngitsoq? Naamik, paasissutissat ilisimasagut naapertorlugit taama isummersin­naanngilagut.

7. Ulersuarmi toqusut Kaanaanillu tiguarneqarnerani inuit suujunnaarsin­neqartut pillugit suna ilisiman­ngilarput? (Asseq takuuk).

⁷ Jehovap taakku eqimattatut suujunnaarsikkai nalunngik­kaluarlutigu naluarput taakku inuttut ataasiakkaatut qanoq isiginerai. Aamma naluarput toqunngin­nerminni Jehova pillugu ilinniar­nissamut peqqissiminis­samullu periarfis­saqarsimanersut. Biibilimi allassimavoq ulersuan­nginnerani ‘Nooa naapertuil­luassutsimik oqaluus­sisartuusoq’. (Pet 2. 2:5) Oqaluttuarineqan­ngilarli umiarsuaq sanatillugu Nooap inuit ataasiakkaat tamaasa oqaluus­siffiginiarlugit anguniarsarinerai. Aamma naluarput inuit ajortut Kaanaanimi najugallit Jehova pillugu ilinniar­nissamut inooriaatsiminnillu allannguinissamut periarfis­saqarsimanersut.

8. Soodomamiut Gomooramiullu pillugit suna ilisiman­ngilarput?

⁸ Taavami Soodomamiut Gomooramiullu? Angut naapertuil­luartoq Lotsimik atilik Soodomami najugaqarpoq. Lotsili Soodomamiunut tamanut oqaluussiva? Ilisiman­ngilarput. Ilisimaan­narparput inuit taakku ajortuusut, kisianni suna eqqortuunersoq sunalu eqqunngitsuunersoq ilinniar­nissamut periarfis­saqarsimappat? Eqqarsaatigiuk Soodomamiut peroriar­tortillutik inuunerluttunit sunnerneqarsimassasut. Soodomamiut Lotsip tikeraartuinik pinngitsaaliiniarsaralutik atoqateqar­niarsarisut ilaat nukappiaraan­naapput. (Mos 1. 19:4; Pet 2. 2:7) Nalunngilarput Jehovap nallittuisuusup aalajangersimagaa taakkua ilaannaal­luunniit makititaas­sanngitsoq? Naamik, naluarput. Jehovap Aaperaat qularun­naarsippaa Soodomami naapertuil­luartut quliunngitsul­luunniit. (Mos 1. 18:32) Tassa Jehovap ajortuliaannut akisussaatillugit suujunnaarsik­kamigit eqqortuliorpoq. Qulakkeerluguli oqarsin­naavugut taakkua ilaannaal­luunniit naapertuil­luanngitsut makititaasussat ilagissan­ngikkaat? Naamik, naluarput!

9. Saalumuut pillugu suna ilisiman­ngilarput?

⁹ Biibilimi aamma oqaluttuarineqarput inuit aallaqqaammut eqqortuliortut piffissallu ingerlanerani ingasattumik ajortulior­talersut. Kunngi Saalumuut taakkua ilagaat. Jehova inatsisaalu ilisimal­luarpai Jehovamillu pilluaq­quneqangaarluni. Kingusin­nerusukkulli guutipiluit guutisiorfigisalerpai. Jehovap kamaatingaarpaa, ajortuliaalu pissutigalugit inuiaqatigiit Israalikkut ukiorpassuarni naalliupput. (Kng 1. 11:5-9; Kng 2. 23:13) Ukiorpassuarni isumaqarsimavugut Saalumuut makititaajumaartoq, tunngavilersuutiginikuugatsigumi Biibilimi allassimasoq Saalumuut ‘siuaasamini qasuersaalersoq’. Angutillu aalajaatsut, soorlu kunngi Daavi, aamma taama allaatigineqarput. (Kng 1. 11:21, 43) Taamatulli allassimanera Jehovap Saalumuumik makititsinissaanut qulakkeerutaava? Biibilimi allassimanngilaq. Imaassin­naavorli ilaat ima eqqarsartut: ‘Biibilimi allassiman­nginnerpa “toqusoq ajortuliani pillugit pinngitsuutitaasoq”?’ (Rom 6:7) Aap, kisianni tamanna isumaqanngilaq toqusimasut tamarmik inuuleq­qissasut makititaanis­sartillu pisinnaatitaaf­figalugu. Toqusunit makititaaneq Guutimit asannittumit tunissutaavoq. Jehovallu imminut kiffartor­nissamut periarfis­sikkusutaminut tunissutigissavaa. (Job 14:13, 14; Joh 6:44) Saalumuup tunissut taanna pissavaa? Naluarput, Jehovap kisimi akissutaa nalunngilaa. Nalunngilarpulli Jehova eqqortulior­tuaannartoq.

ILISIMASAGUT

10. Inuit suujunnaarsitaanissaat Jehovap iluaraa? Nassuiaruk. (Ezekieli 33:11) (Aamma asseq takuuk).

¹⁰ Ezekieli 33:11 atuaruk. Jehovap asannittumik paasitip­paatigut inunnik eqqartuus­sisarnini pillugu qanoq misiginerluni. Pruffiitip Ezekielip allataanut assingusumik apustili Petrusi allappoq Jehovap kialuunniit suujunnaarsitaanissaa kissaatigin­ngikkaa. (Pet 2. 3:9) Tamanna nalunagu tuppallernaqaaq. Nalunngilarput Jehova aatsaat pissutis­saqarluaraangami makititaanissamik neriuuteqar­titsinani inunnik piuneerus­sisartoq. Inuit asangaaramigit nallittuinis­saminut periarfis­saqaraangami taamaaliortarpoq.

11. Kikkut makititaanavian­ngillat, tamannalu qanoq nalunngilarput?

¹¹ Makititaanavian­ngitsut pillugit qanoq ilisimasaqarpugut? Biibilimi makititaanavian­ngitsut ikittuinnaat eqqaaneqarput.b Jiisusi oqamisaarpoq Juudarsi Iskaariuuti makititaanavian­ngitsoq. (Mak 14:21; takuuk Johannesi 17:12).c Juudarsimi piaaraluni sianigalugulu Jehovamut Jiisusimullu akerliusumik iliorpoq. (Takukkit Makkorsi 3:29 aamma nassuiaatit).d Jiisusi aamma oqarpoq juutit upperisarsiornikkut siuttuisa ilaat imminut akerlilersuisimasut makititaanavian­ngitsut. (Mat 23:33; takuuk Johannesi 19:11).e Aamma apustili Paulusi allappoq tunussisut peqqissimin­ngitsut makititaanavian­ngitsut. – Hebr 6:4-8; 10:29.

12. Jehovap nallittuinera pillugu qanoq ilisimasaqarpugut? Assersuuteqarit.

¹² Eqqaaneqareersutut Jehova nallittuingaarpoq kialuunniillu suujunnaarsitaanissaa kissaatiginagu. Ingasattumik ajortuliorsimasut qanoq nallittorsimavai? Kunngi Daavi ingasattumik ajortuliorsimavoq allasiorluni inummillu toqutsilluni. Ilumoorlunili peqqissimigami Jehovamit nallittor­neqarluni isumakkeerfigineqarpoq. (Sam 2. 12:1-13) Kunngi Mannarsi inuunermi annersaani ingasat­torujus­suarmik ajortuliortarpoq. Taama ingasatsigigaluartoq peqqissimimmat Jehovap nallittuingaarluni isumakkeerfigaa. (Nal 2. 33:9-16) Oqaluttuat taakkua marluk eqqaasip­paatigut Jehova pissutis­saqaraangami nallittuisartoq. Inuillu ajortuliungaarsimanerminnik paasinnil­lutillu peqqissimisut makitissavai.

13. (a) Sooq Jehovap Niinivimiut nallittorpai? (b) Jiisusi Niinivimiut pillugit qanoq oqarpa?

¹³ Aamma Niinivimiut Jehovamit nallittor­neqarput. Jehovap Juuna oqarfigaa ‘ajussusiat arajutsisimanagu’, peqqissimimmatali Jehovap asannilluni isumakkeerfigai. Tamanna Juunap paasinngilaa kamattorujus­suanngorlunilu. Jehovallu eqqaasippaa Niinivimiut ‘talerpimmik saamimmillu paatsiveqar­titsinngitsut’, tassa eqqortumik eqqunngitsumillu immikkoor­titsisin­naanngitsut. (Jon 1:1, 2; 3:10; 4:9-11) Jehova Juunamiit nallittuingaar­neruvoq. Jiisusip kingusin­nerusukkut Jehovap naapertuil­luarnera nallittuineralu pillugit ilinniar­titsilluni Niinivimiut eqqaavai. Oqarpoq ‘Niinivimiut peqqissimigamik eqqartuus­sinermi makititaassasut’. – Mat 12:41.

14. Niinivimiut ‘eqqartuus­sinermi makititaanissaat’ qanoq isumaqarpa?

¹⁴ Niinivimiut ‘eqqartuus­sinermi makititaanissaat’ qanoq isumaqarpa? Jiisusip ukiuni 1.000-ni naalakkersuinerani toqusimasunik “naapertuil­luartunik naapertuil­luanngitsunillu” makititaasoqassaaq. (ApS 24:15) Tamatuma nalaani Jiisusip oqarneratut naapertuil­luanngitsut makititaasut eqqartuun­neqassapput. (Joh 5:29) Eqqartuun­neqarnissaat isumaqarpoq taamanik­kussamut pissusilersornerat ilikkak­kaminnullu qanoq qisuariarnerat Jehovap aamma Jiisusip nakkutigalugillu nalilersorumaaraat. Niinivimiu toqusunit makititaasoq Jehovamut kiffartoruman­ngikkuni inuuinnar­tinneqar­navianngilaq. (Es 65:20) Kisianni Jehova guutisiorfiginiarlugu aalajangertut tamarmik naassaan­ngitsumik inuusin­naatitaassapput! – Dan 12:2.

15. (a) Sooq oqarsin­naanngilagut Soodomamiut Gomooramiullu suujunnaarsitaasimasut arlaannaal­luunniit makititaas­sanngitsoq? (b) Juudarsi 7-imi allassimasut qanoq paasineqarsin­naappat? (Ungalusaq “Juudarsi qanoq isumaqarpa?” takuuk).

¹⁵ Jiisusi oqarpoq “ullormi eqqartuus­siffimmi” Soodomamiut Gomooramiullu inunnit imminik ilinniar­titsissutiminillu itigartitsisunit ‘atussaanerusumik pineqassasut’. (Mat 10:14, 15; 11:23, 24; Luk 10:12) Jiisusi taama oqarami nalimini inuusut Soodomamiunit Gomooramiunillu ajornerusut ersersin­niaannarlugu ingasat­tajaarluni assersuusiorpa? Jiisusip Niinivimiut makititaanissaat assersuutaan­ngitsumik piviusun­ngortus­satulli oqaatigimmagu ilimanarpoq aamma Soodomamiut Gomooramiullu pillugit oqaasii assersuutaagin­nanngitsut. Niinivimiunut tunngatillugu ‘eqqartuussineq’ aamma Soodomamiunut Gomooramiunullu tunngatillugu ‘ulloq eqqartuussiffik’ Jiisusip eqqartugai assigiipput. Niinivimiut, Soodomamiut Gomooramiullu tamarmik ajortorujus­suarmik iliuuseqarput. Niinivimiulli assiginagit Soodomamiut Gomooramiullu peqqissiminis­saminnut periarfis­sinneqan­ngillat. Eqqaamajuk Jiisusip makititaasussat eqqartuun­neqartussat ‘ajortuliorsimasutut’ eqqaammagit. (Joh 5:29) Tassa imaassinnaavoq Soodomamiunut Gomooramiunullu neriuutis­saqartoq taakkualu ilaat makitin­neqassasut. Taamaappallu Jehova Jiisusilu pillugit ilinniar­tissinnaas­savagut.

16. Kikkut toqusunit makitis­sanerlugit Jehova qanoq aalajangertarpa? (Jeremia 17:10)

¹⁶ Jeremia 17:10 atuaruk. Versi taanna iluaqutigalugu ilisimasagut eqikkarsin­naavagut: Jehovap tamatigut “uummatit” misissuif­figisarpai “tartullu”, tassa eqqarsaatit, ilisimallugit. Siunissami inuit makitik­kunigit ‘kinaluunniit inuuserisaa suliaalu’ naapertorlugit nalilissavaa. Jehova nallittuingaarpoq, aatsaallu pisariaqaraangat sukannersumik iliuuseqartarpoq. Tassa Biibilimi allatut allassimasoqan­ngippat isummis­sanngilagut inuk makititaanissamut neriuutis­saqanngitsoq!

“NUNARSUARMIK TAMARMIK EQQARTUUS­SISUUSOQ” EQQORTULIUSSAAQ

17. Inuit toqusimasut qanoq pineqassappat?

¹⁷ Adamip Evallu Saatani Jehovamut pikitsitseqatiginiarlugu aalajangermatali inuit milliardillit toqusimapput. Ilumut toqu akeraavoq! (Kor 1. 15:26) Toqusut qanoq pineqassappat? Jiisusip malinnittaasa ilaat, katillugit 144.000-t, toqujuitsun­ngorlutik qilaliar­titaassapput. (Saqq 14:1) Jehovamut kiffartortut aalajaatsorpassuit ‘naapertuil­luartunik makititsinissami’ nunarsuarmi makitin­neqassapput. Jiisusillu ukiuni 1.000-ni naalakkersuinerani inaarutaasumillu misilin­neqarnermi aalajaat­tuarunik tassani naassaan­ngitsumik inuussapput. (Dan 12:13; Hebr 12:1) Aamma ukiuni 1.000-ni naalakkersuinerani naapertuil­luanngitsut – ilaatigut Jehovamut kiffartorsiman­ngitsut allaallu ajortorujus­suarmik iliorsimasut – allannguinissamut Jehovamullu kiffartuler­nissamut periarfis­sinneqassapput. (Luk 23:42, 43) Inuilli ilaat ajortut Jehovamut naalakkusun­natillu ima inupiluusimatigisimammata Jehova aalajangersimavoq taakku makititaanavian­ngitsut. – Luk 12:4, 5.

18-19. (a) Sooq Jehova Eqqartuus­sisuusoq tatigil­luinnarsin­naavarput? (Esaja 55:8, 9) (b) Allaaserisap tulliani suna sammissavarput?

¹⁸ Jehova Eqqartuus­sisuusoq tamatigut eqqortumik aalajangiisarnera upperil­luinnarsin­naavarput? Aap! Soorlu Aaperaap paasigaa Jehova ‘nunarsuarmik tamarmik eqqartuus­sisuuvoq’ naammal­luinnartoq, sunik tamanik ilisimasaqartoq nallittuisorlu. Ernini ilinniar­tillugu eqqartuus­sinermik suliassat tamaasa taassumunnga isumagisas­sanngortippai. (Joh 5:22) Taakkua marluullutik inuit uummammiugisaat tamaasa nalunngilaat. (Mat 9:4) Taamaattumik eqqartuus­sigaangamik eqqortulior­tuaannarput!

¹⁹ Jehovap eqqortumik aalajangiisarnera tamatigut tatigisigu! Nalunngilarput eqqartuus­sinissamut piukkunaateqarata Jehovali eqqartuus­sisuusoq naammal­luinnartoq. (Esaja 55:8, 9 atuakkit). Taamaattumik eqqartuus­sissanngilagut, Jehovalli eqqartuus­sisuunera aamma Jiisusip, Ataatami naapertuil­luarneranik nallittuineranillu ersersitsil­luinnartup, eqqartuus­sisuunera ataqqivagut. (Es 11:3, 4) Taavami Jehovap Jiisusillu annikil­liornar­tussarsuarmi eqqartuus­sinissaat? Taakku pillugit suut ilisiman­ngilagut? Aamma suut ilisimavagut? Allaaserisap tulliani tamakku akineqassapput.