Jehovap isaani naleqangaarputit!

1-2. Qanoq ililluta qulakkeersin­naavarput Jehovamit naleqar­tinneqarluta?

JEHOVAP kiffaasa ilaat naleqan­ngitsutut misigisarput. Immaqa allanit nikagisaasarsimagamik taamatut misigisarput. Illit naleqan­ngitsutut misigisarpit? Taamaappat qanoq ilillutit qulakkeersin­naaviuk Jehovamit naleqar­tinneqarlutit?

² Biibilimi oqaluttuat misissor­nerisigut paasisinnaavat Jehovap isumaa naapertorlugu inuit qanoq pineqar­tariaqarnersut. Jehovap ernerata, Jiisusip, inuit ataqqin­nittumik asannit­tumillu pisarpai. Taamaalior­nermigut ersersittarpaa Ataatanilu inunnik maniguuttunik naleqan­ngitsutullu misigisunik pingaar­titsillutik. (Joh 5:19; Hebr 1:3) Allaaserisami matumani sammissavarput (1) Jiisusip inuit naleqartutut misigiler­nissaannut qanoq ikiorai aamma (2) qanoq uagut nammineq qulariun­naarsin­naagipput Guutimit ilumut naleqar­tinneqangaarluta. – Hagg 2:7.

JIISUSIP INUIT NALEQARTUTUT MISIGILER­NISSAANNUT QANOQ IKIORAI

3. Jiisusip Galiliiamiut qanoq ikiorpai?

³ Jiisusi Galiliiami pingajussaanik oqaluus­siartor­tillugu inuppassuit ornippaat tusarnaariar­torlugu ajorunnaarsin­neqarnis­sartillu neriuutigalugu. Jiisusip maluginiarpaa ‘savatut paarsisoqan­ngitsutut naalliutsin­neqarsimasutut imminiigin­nakkatullu ittut’. (Mat 9:36) Upperisarsiornikkut siuttunit ammut isigineqartarput allaallu ‘perloqqusaallutik’. (Joh 7:47-49) Jiisusilli ilinniar­tinnissaannut piffissaqarfigigamigit nappaataannillu ajorunnaarsik­kamigit takutippai pingaar­tillugit. (Mat 9:35) Aamma amerlanerusut ikiorneqar­niassammata apustilini oqaluus­siartor­tillugit aallartippai ajorunnaarsitsisin­naanngor­tillugillu. – Mat 10:5-8.

4. Jiisusip tusarnaar­timinik maniguuttunik pinnittarnera qanoq ilinniarfigisin­naavarput?

⁴ Jiisusip tusarnaar­timinik ataqqin­ninnermigut inussiar­nisaarfigin­ninnermigullu ersersippaa Ataatanilu inunnik allanit nikagisaasunik pingaar­titsillutik. Jehovamut kiffartor­tuusutit naleqarnerit qularutigigukku Jiisusip inunnik maniguuttunik tusaarusuttunik pingaar­titsinera eqqarsaatigeq­qissaaruk. Taamaalioruit Jehovap isaani qanoq naleqar­tiginerlutit paasilissavat.

5. Galiliiami arnaq Jiisusimut orniguttoq sumik ilisimasaqarfigaarput?

⁵ Jiisusip inuit eqimattatut ikiuinnarnagit aammali inuit ataasiakkaat ikiortarpai. Assersuutigalugu Jiisusi Galiliiamiitillugu arnap ukiuni aqqaneq-marlunni aaqartuarsimasup ornippaa. (Mak 5:25) Moorsisip inatsisai naapertorlugit minguttuujuvoq, taassumanngalu attuisoq kinaluunniit nammineq minguttuun­ngortarpoq. Kiserlior­narsimassaqaaq. Aamma allat peqatigalugit guutisioqataasin­naanngilaq. (Mos 3. 15:19, 25) Arnaq taanna timikkut misigis­sutsikkullu erloqisimassaqaaq. – Mak 5:26.

6. Arnaq aaqartuarsimasoq qanoq ajorunnaarsin­neqarpa?

⁶ Arnap napparsimasup Jiisusimit ajorunnaarsin­neqarnissani kissaatigaa. Kisianni toqqaan­narlugu saaffiginngilaa. Sooq? Immaqa nappaatini kanngusuutigigamiuk. Imaluunniit Jiisusimit itigartin­neqarnissani isumakuluutigisimasinnaavaa. Minguttuujugamimi inuppassuit akornan­niissin­naanngilaq. Taamaattumik qallersaataatiguinnaq attorpaa upperigamiuk taamaalioruni ajorunnaas­salluni. (Mak 5:27, 28) Upperluarnera kinguneqarluarpoq – tassami ajorunnaarsin­neqarpoq! Jiisusi aperimmat kimit attorneqarluni arnap qanoq iliornini nassuerutigaa. Taava Jiisusip arnaq qanoq pivaa?

7. Jiisusip arnaq naalliuuteqartoq qanoq pivaa? (Makkorsi 5:34)

⁷ Jiisusip arnaq asannittumik ataqqin­nittumillu pivaa. Maluginiarpaa ‘annilaangalluni sajullunilu orniguttoq’. (Mak 5:33) Misigissusii soqutigigamigit asannilluni saamallunilu oqaluuppaa. Allaat ‘paninnguaminik’ taavaa – taamaalilluni inussiar­nisaarfigiin­narnagu aammali asanninnermik ersersitsivigaa. (Makkorsi 5:34 atuaruk). Jiisusip arnamik ‘paninnguaminik’ taasinera Biibilimi taannatuaavoq. Imaassinnaavoq Jiisusip arnaq taanna ‘sajuttoq’ takugamiuk taamatut taagaa. Arnap qanoq oqilial­latsigisimanera takorlooruk! Jiisusip asannittumik oqarfigisiman­ngitsuuppagu timikkut ajorunnaarsin­neqaraluarluni ilerasus­simassagaluarpoq misigis­sutsikkullu erloqisimas­sagaluarluni. Jiisusilli ajorunnaarsiin­narnagu aammali paasitippaa Ataatamit qilammiusumit asannittumit pingaar­tinneqangaartoq.

8. Arnaq Brasiliamiu sumik unamminiagaqarpa?

⁸ Nalitsinni Guutip kiffaasa ilaat aamma peqqissutsimikkut erloqis­suteqartarput misigis­sutsiminnut sunniuteqartumik. Assersuutigalugu Maria,a Brasiliami pioneriusoq, inunngorami nioqarnanilu saamerlermik assaqanngilaq. Ima nassuiaavoq: “Innarluutiga pissutigalugu atuarfim­miikkallarama pimmatigineqar­taqaanga qamuunalu anneringaakkannik taaguusersor­neqartarlunga. Allaat ilaquttama nikanarsar­tarpaannga.”

9. Mariap Jehovamit pingaar­tinneqangaar­nerminik paasinnin­nissaminut suna iluaqutigaa?

⁹ Mariap suna iluaqutigaa? Jehovamik Nalunaajaasun­ngorami uppeqatiminit tuppallersar­neqartarpoq Jehovamillu pingaar­tinneqar­nerminik paasinnin­nissaminut ikiorneqar­tarluni. Ima oqarpoq: “Ilagiinni qatannguterpas­suarnit ikiorneqar­taqaanga! Jehova qutsavigisarpara anersaakkut ilaqutariis­suarnut akuutilermanga.” Qatanngutit taakkua Maria Guutip isaani naleqangaartutut misigiler­nissaanut ikiorpaat.

10. Mariia Mattaliit sumik erloqis­suteqarpa? (Aamma assit takukkit).

¹⁰ Mariia Mattaliit Jiisusimit qanoq ikiorneqartoq eqqarsaatigiuk. Arfineq-marlunnik anersaapiloqarpoq! (Luk 8:2) Anersaapiluit sunniineratigut amiilaar­nartumik pissuseqar­tarsimassaaq taamaat­tumillu allanit qanillinaveersaar­neqartarsimas­salluni. Naalliuuteqangaarlunilu annilaangasarsimassaaq asaneqan­ngitsutullu misigisarluni. Jiisusimilli anersaapiloqarun­naarsin­neqarpoq kingusin­nerusukkullu Jiisusimik malinnit­tunngorluni. Taava Jiisusip Mariia Mattaliit Guutip isaani naleqangaartutut misigiler­nissaanut qanoq ikiorpaa?

11. Jiisusip Mariia Mattaliit Guutip isaani naleqangaartutut misigiler­nissaanut qanoq ikiorpaa? (Aamma assit takukkit).

¹¹ Jiisusip oqaluus­siartor­nermini Mariia Mattaliit ilaserigamiuk immikkuul­larissumik periarfissippaa.b Jiisusi allanik ilinniar­titsigaangat tusarnaartarpoq. Aamma Mariia Jiisusip ullormi makititaaf­fimmini oqaloqatigisaasa siulliit ilagaat. Allaallumi apustiliminut makititaasimanini pillugu oqariar­tortippaa. Taamaalilluni arlalitsigut uppernarsar­neqarpoq Jehovap ilumut naleqangaartikkaa! – Joh 20:11-18.

12. Sooq Lidia asaneqan­ngitsutut misigiva?

¹² Nalitsinni inuppassuit Mariia Mattaliit assigalugu asaneqan­ngitsutut misigisarput. Lidia qatanngut arnaq Spaniamiu oqarpoq anaanami naartugilermani peersin­niarsimagaluaraa. Eqqaamavaa mikisuullunili anaanaminit soqutigineqarnanilu annernartunik oqaaseqarfigineqar­tarsimalluni. Ima oqarpoq: “Anguniagariuaan­narsimavara allanit asaneqar­nissara akuerineqar­nissaralu. Ernumas­sutigisar­nikuuara qanorluunniit ilioraluaruma asaneqaler­naviarnanga, anaanamami uppernarsisin­nikuummanga inuttut ajortuusunga.”

13. Lidiap Jehovamit naleqar­tinneqar­nerminut suna qularun­naassutigaa?

¹³ Lidiap Biibilimi ilumoortoq ilikkareerlugu qinusarneq, nammineq Biibilimik misissueq­qissaartarneq uppeqatimilu asannittumik oqaasii iliuusiilu iluaqutigalugit paasivaa Jehovap isaani naleqangaarluni. Ima oqarpoq: “Uima oqarfigikulasarpaanga assut asallunga. Pissuserisakka nuannersut pillugit eqqaasit­tuartarpaanga. Uppeqatima aamma taamatut pisarpaannga.” Illit ilagiinni Lidiatut ittoqarpa? Taamaappat taakku paasitis­sinnaavatit Jehovap isaani qanoq naleqar­tiginersut.

JEHOVAP ILINNUT ISIGINNIT­TAASIATUT IMMINUT ISIGINNIT­TAASEQARIT

14. Samuelimik allakkat siulliit 16:7 qanoq Jehovap uagutsinnut isiginnit­taasiatut isiginnit­taaseqaler­nissatsinnut iluaqutigisin­naavarput? (Takuuk ungalusaq “Sooq Jehovap innuttani naleqartippai?”)

¹⁴ Eqqaamajuk Jehovap inuit isiginnit­taasiattut isiginngimmatit. (Samuelimik 1. 16:7 atuaruk). Jehovap qanoq isikkoqarnerit, inuiaqatigiinni inissisimanerit ilinniagaqar­nerilluunniit naapertorlugu nalilersorneq ajorpaatit. (Es 55:8, 9) Taamaattumik inuit nalilersoriaasiat naapertornagu Jehovap ilinnut isiginnit­taasiatut imminut isigigit. Biibilimi imminut naleqan­ngitsutut misigisimasut, soorlu Elia, No’omi Hannalu, allaatigineqarput. Jehovap taakku qanoq naleqar­titsiginerai atuarninni maluginiarsin­naavatit. Aamma nammineq misigisimasatit Jehovap ilinnik asannin­neranik naleqar­titsineranillu ersersitsisut allattorsin­naavatit. Aammattaaq Biibililersaarutitsinni imminut naleqartinneq pillugu paasissutissat misissuataarsin­naavatit.c

15. Sooq Jehovap Danieli ‘nuannarineqangaartutut’ taavaa? (Danieli 9:23)

¹⁵ Eqqaamajuk aalajaannerit pissutigalugu Jehovap naleqar­timmatit. Pruffiiti Danieli 100-ngajannik ukioqarluni nikallungarujus­suarpoq. (Dan 9:20, 21) Jehovap qanoq qiimmassarpaa? Guutip inngili Gabrieli aallartippaa Danieli eqqaasin­niarlugu “nuannarineqangaartoq” qinnutaalu tusarneqarsimasoq. (Danieli 9:23 atuaruk). Sooq Danieli Guutimit nuannarineqangaarpa? Pissusii nuannersut pissutigalugit – soorlu eqqortuliornermik nuannarin­ninnera aalajaanneralu. (Ez 14:14) Jehovap tamakku uagutsinnut tuppallersaatissatut allanneqar­tissimavai. (Rom 15:4) Jehovap aamma illit qinnutitit tusarnaarlugillu eqqortuliornermik nuannarisaqarnerit aalajaal­lutillu kiffartornerit pissutigalugit pingaar­tippaatit. – Mika 6:8; Hebr 6:10.

16. Jehova Ataatatut asannittutut isigiler­niarlugu qanoq iliorsinnaavit?

¹⁶ Jehova Ataatatut ilinnik asannittutut isigiuk. Jehovap kukkunersiornak ikiorusuppaatit. (Tuss 130:3; Mat 7:11; Luk 12:6, 7) Imminut naleqan­ngitsutut isigisut amerlasuut tamatuminnga eqqarsaatigin­neqqissaarnertik iluaqutigisarsimavaat. Assersuutigalugu qatanngut arnaq Spaniamiu ukiorpassuarni uiminit oqaatsikkut nikanarsar­neqartarsimagami asaneqan­ngitsutut naleqan­ngitsutullu misigivoq. Ima oqarpoq: “Atorneqarsin­naanngitsutut misigigaangama takorloor­niarsarisarpara Jehovap kissumiaraanga, asallunga illersorlungalu.” (Tuss 28:9) Qatanngut arnaq Sydafrikamiu Lauren ima eqqarsartarpoq: “Jehovap imminut kajumilersis­simappanga, ukiorpassuarni paaralunga allanullu ilinniar­titsinissamut atorsin­naallunga, taava soorunami naleqartutut atorsin­naasutullu isigisimas­savaanga.” – Joh 6:44.

17. Qanoq qulariun­naarsinnaviuk Jehovamit akuerineqarlutit? (Tussiaat 5:13) (Aamma asseq takuuk).

¹⁷ Jehovamit akuerineqarnerit qulariunnaaruk. (Tussiaat 5:13 atuaruk). Daavip Jehovamit akuerisaaneq ‘eqqortin­naveeqqutitut’ inunnut naapertuil­luartunut illersuutaasutut assersuuppaa. Jehovamit akuerineqarlutillu tapersersor­neqarnerit nalunnginnakku imminut ajortutut isiginngin­nissannut illersuutigisinnaavat. Qanoq ilillutit paasisin­naaviuk Jehovamit akuerineqarlutit? Sammeriik­katsitut Jehovap oqaatsini atorlugu tamatuminnga qularun­naarsippaatit. Aamma utoqqaanertat, qanigisatit allallu aqqutigalugit eqqaasin­neqartarputit Jehovamit naleqar­tinneqarlutit. Taamatut qiimmas­sarneqarnerit qanoq qisuariarfigissaviuk?

18. Sooq ilinnut oqaatigineqartut ajunngitsut upperisas­savigit?

¹⁸ Ilisarisimasavit asannitsivillu qiimmas­saraangamitsit akuerisas­savatit. Imaassin­naavormi taakku aqqutigalugit Jehovap akueralutit qulakkeer­tinniarsarigaatit. Michelle, siusinnerusukkut eqqaaneqartoq, ima oqarpoq: “Allat uanga pillunga oqaaserisartagaat qiimmaal­lannartut upperiuminaatsik­kaluarlugit akueriar­tuaarpakka. Oqitsuin­naanngik­kaluartoq nalunngilarali tamanna Jehovap kissaatigigaa.” Michellep utoqqaanertat asannillutik ikiuinerat iluaqutigaa. Maanna pioneriuvoq Betelimilu kajumis­sutsiminik angerlarsimaf­fimminiit suleqataasarluni.

19. Sooq Guutip isaani naleqangaarnerit upperil­luinnarsin­naaviuk?

¹⁹ Ataatatta qilammiusup isaani naleqangaar­nitsinnik Jiisusip asannilluni eqqaasip­paatigut. (Luk 12:24) Taamaattumik upperil­luinnarsin­naavarput Jehovamit pingaar­tinneqangaarluta. Tamanna puiunngisaan­nartigu! Aamma allat Guutip isaani qanoq naleqar­tiginerannik paasinnin­nissaannut sapinngisatsinnik ikiortartigit!