Jiisusi palasiuneraarput sanngiis­sutitsinnik paasinnis­sinnaasoq

1-2. (a) Sooq Jehovap ernituani nunarsuarmut aallartippaa? (b) Allaaserisami matumani suna sammissavarput? (Hebræerit 5:7-9)

UKIUT 2.000-t missaasa matuma siorna Jehovap ernituani asasani nunarsuarmut aallartippaa. Sooq? Pissutaasut ilagaat inuit ajortimit toqumillu aniguisin­neqarnissaat Saatanillu ajoqusiinerisa tamaasa aaqqinnissaat. (Joh 3:16; Joh 1. 3:8) Jehovap aamma nalunngilaa Jiisusip inuttut misigisimasani palasiunertut nallittuisutut kiffartor­nissaminut piareersaatigisin­naassagai. Ukiumi 29-mi imermut morsutsitaanermi kingorna Jiisusi palasiunertut kiffartulerpoq.a

² Palasiunertut nallittuisutut kiffartuler­niassagami Jiisusip nunarsuarmiin­nermini misigisani qanoq iluaqutigigai allaaserisami matumani sammissavarput. Jiisusip kiffartor­nissaminut taamatut ‘naammal­luinnar­tunngor­tinneqarsimanera’ paasilluarutsigu Jehovamut qanillinissarput qinusar­nerpullu ajornan­nginnerulissaaq, ingammik ajortuliornigut sanngiis­sutigullu pissutigalugit nikallungagaangatta. – Hebræerit 5:7-9 atuakkit.

GUUTIP ERNERA ASASAA NUNARSUARMUT AALLARTIN­NEQARTOQ

3-4. Jiisusip nunarsuarmukar­nermigut allannguutit annertuut suut misigai?

³ Ilarpassuatta inuunermi allannguutit, soorlu ikinngutit ilaquttallu qimallugit allamut nuunneq, misiginikuuaat. Tamanna imaannaan­ngitsuusinnaavoq. Kinaluunniilli Jiisusip misigisaatut allannguutinik misigisaqarneq ajorpoq. Jiisusi nunarsuarmukan­nginnermini qilammi inngiliunikuuvoq pingaar­nerpaaq. Jehovap asangaarpaa, Jiisusillu Guutip assaata talerpiata tungaani kiffartornini nuannaarutigaa. (Tuss 16:11; Uss 8:30) Taamaattoq Filippimiut 2:7-imi allassimaneratut kajumilluni qilammi “suut tamaasa qimallugit” nunarsuarmi inuit naammal­luinnan­ngitsut akornanni inuttut inuulerpoq.

⁴ Jiisusip nunarsuarmi inuunerani ukiut siulliit qanoq innersut eqqarsaatigiuk. Jiisusip angajoqqaavi piitsuupput. Tamanna nalunngilarput piitsut pilliutigisas­saannut taamaallaat akissaqarmata. (Mos 3. 12:8; Luk 2:24) Kunngip Herodasip paasigamiuk Jiisusi inunngorsimasoq toqunniaraluarpaa. Jiisusi annaakkumallugu Egyptenimi qimaasutut inuugal­lartariaqarput. (Mat 2:13, 15) Inuuneq Jiisusip qilammiis­simaneraniit allaalluin­nassusia!

5. Jiisusip nunarsuarmiin­nermini suut misigai, misigisanilu palasiunertut kiffartor­nermini qanoq iluaqutigai? (Aamma asseq takuuk).

⁵ Nunarsuarmiitilluni Jiisusip inuppassuit naalliuutillit takusimavai. Aamma asasamik toqusoorneq inuttut qanoq annernar­tigisoq nammineq misigaa. Qularnan­ngitsumik ilisarisimasani arlallit, aamma immaqa ataatarsiani, toqukkut annaavai. Kiffartor­nermini Jiisusip pupissut, tappiitsut, nukillaarsimasut meeqqaminnillu toqusoortut naapitani misigin­neqatigingaartarpai. (Mat 9:2, 6; 15:30; 20:34; Mak 1:40, 41; Luk 7:13) Soorunami inuit naalliuutaat tamaasa qilammiit takoreersimavai. Naalliuuteqartulli qanorpiaq misiginersut nunarsuarmiin­nermini nammineq maluginiaq­qissaarpai. (Es 53:4) Inuttut misigisani inuit misigis­susiinik ajornar­torsiutaannillu paasinnil­luarneruler­nissaminut iluaqutigai. Aamma qasusarneq, isumakulunneq aliasunnerlu – inuit tamarmik misigisartagaat – nammineq misigivai.

JIISUSIP INUIT MISIGIN­NEQATIGISARPAI

6. Iisaajap siulittuutaani Jiisusip inunnik nallittuinera qanoq assersuusiorluni allaatigineqarpa? (Esaja 42:3)

⁶ Inuit allanit ajortumik pineqartut Jiisusip asannittumik pisarpai. Taamaalior­nermigut Biibilimi siulittuut eqquutsippaa. Inuit nukittuut ilaannikkut Hebræerisut Allakkani Illernartuni naatsiivimmut naggorissumut orperujus­suarmul­luunniit assersuun­neqartarput. (Tuss 92:13; Es 61:3; Jer 31:12) Piitsulli nikanarsagaasullu ivigarsuarmut napingajas­simasumut imaluunniit ipeqqamut qamilersumut assersuun­neqarput. (Esaja 42:3 atuaruk). Jiisusip inuit naleqan­ngitsutut isigineqartartut asassagai nallittorlugillu Iisaajap isumassarsisitaalluni siulittuutigaa.

7-8. Iisaajap siulittuutaa Jiisusip qanoq eqquutsippaa?

⁷ Matiusip erseqqissarpaa Iisaajap oqaasii Jiisusip eqquutsikkai ima allakkami: “Ivigarsuaq napingajas­simasoq napivis­sanngilaa iperarlu qamilerluni aamaartoq qamissanagu.” (Mat 12:20) Jiisusip allanit nikanar­titaasut atugarliortullu neriuuteqan­ngitsutut misigisut tupinnar­tuliorfigisarpai. Taakkua ilagaat angut pupittorujussuaq. Ajorunnaar­nissamut ilaquttamilu ikinngutimilu ilageqqiler­nissaannut neriuuteqan­ngitsutut misigisimassaaq. (Luk 5:12, 13) Jiisusip aamma angut tusilartoq oqalunneq sapingajattoq naapippaa. Takorlooruk inuit allat oqaloqatigiittut takugaangamigit paasisin­naanagilli qanoq misigisarsimassasoq. (Mak 7:32, 33) Tamannaan­naanngilarli.

⁸ Jiisusip nalaani juuterpassuit isumaqarput nappaatillit innarluutillillu ajortuliorsimanertik pissutigalugu imaluunniit angajoqqaamik ajortuliai pissutigalugit taamatut atugaqaramik pillagaasut. (Joh 9:2) Taamaattumik allanit ajortumik pineqartarput nikanarsar­neqartarlutillu. Iisaajap siulittuutigisaatut Jiisusip naalliuuteqartut ajorunnaarsippai uppernikkullu nakussatsillugit. Tamanna uagut qanoq qularun­naassutigaarput?

9. Hebræerit 4:15, 16 naapertorlugit qanoq nalunngilarput palasiunerput qilammiusoq inunnik ajortilinnik paasinnis­sinnaasoq?

⁹ Hebræerit 4:15, 16 atuakkit. Nalunngilarput Jiisusi inuit misigis­susiinik paasinnis­sinnaasoq. Tamanna qanoq paasisariaqarpa? Grækerisut oqaaseq uani ‘paasinnis­sinnaasumik’ nutserneqartoq allat aliasun­nerannik anniarnerannillu paasinnil­luarnermik isumaqarpoq. Soqutiginarpoq grækerisut oqaaseq tamannarpiaq Paulusip atoraa Hebræerit 10:34-mi ‘parnaarus­saaqqasut misigin­neqatigisarlugit’ allakkami. Jiisusip inunnik pinnittar­neranit erserpoq taakku asangaarai. Pisussaasutut misigiin­narnani ilumoorlunili ikiorusungaarpai. Assersuutigalugu pupissoq ajorunnaarsikkamiuk attortariaqanngilaa, taamaaliorporli. Imaassinnaavoq pupissoq taanna ukiorpassuarni inunnit allanit attorneqarsiman­ngitsoq! Aamma tusilartoq ajorunnaarsileramiuk soqutigit­tarluni nipaatsumut inoqanngitsumut avinngaruppaa. Eqqarsaatigiuttaaq arnap peqqissimisup Jiisusip isigai qulliminik masatserlugillu nutsaminik allarterai. Farisiiarip suutiginagu isigimmagu Jiisusip arnaq taanna illersorluarpaa. (Mat 8:3; Mak 7:33; Luk 7:44) Nappaatillit ingasat­tumillu ajortuliorsimasut ingalas­simaniarneq ajorpai. Paarlattuanik ilassiorlugillu asannit­tuliorfigisarpai. Upperil­luinnarsin­naavarput taamatut paasinnilluni asannillunilu pissagaatigut.

PALASIUNERPUT ULLUMIKKUT ILAARTARPARPUT

10. Suut iluaqutigalugit tusilartut tappiitsullu qanoq ikiorsin­naavagut? (Aamma assit takukkit).

¹⁰ Jiisusimik malinnit­tuugatta asannin­neratigut nallittuineratigullu sapinngisatsinnik taanna ilaartarparput. (Pet 1. 2:21; 3:8) Tusilartut tappiitsullu ajorunnaarsis­sinnaan­ngikkaluarlutigit anersaakkut ikiorsin­naavagut. Assersuutigalugu Biibililersaarutigut ussersorluni oqaatsini 100-nit amerlanerusuni saqqumersin­neqartarput. Tappiitsullu inussat atorlugit atuarsin­naasaat oqaatsini 60-init amerlanerusuni saqqummersin­neqarsimapput. Videullu isiginnaagassiani qanoq pisoqar­neranik nassuiaatitallit tappiitsut iluaqutigisin­naasaat oqaatsini 100-nit amerlanerusuni saqqummersin­neqarsimapput. Taakku tamaasa iluaqutigalugit tusilartut tappiitsullu Jehovamut erneranullu qanillisin­naapput.

11. Jiisusip inunnut tamalaanut asanninnera Jehovap peqatigiis­sortaanit qanoq ersersin­neqartarpa? (Apustilit Suliaat 2:5-7, 33) (Aamma assit takukkit).

¹¹ Inuit tamalaat ikiorniarlugit Jehovap peqatigiissortai iliuuseqangaartarput. Eqqaamajuk Jiisusip makititaanermi kingorna anersaaq illernartoq kristumiunut kuimmagu ullormi piinsimi katersuuttut tamarmik “immikkut oqaatsitik atorlugit” nutaarsiassat nuannersut tusarsin­naanias­sammatigit. (Apustilit Suliaat 2:5-7, 33 atuakkit). Jiisusip siulersuineratigut peqatigiiffipput oqaatsini 1.000-nit amerlanerusuni Biibililersaarutinik saqqummersitsisarpoq. Oqaatsillu taakkua ilaat ikittuinnaat atortarpaat. Assersuutigalugu Amerikami Avannarlermi Kujallermilu oqaatsit ilaanni 160-ini inuit amerlaval­laanngitsut atortagaanni Biibililersaaruteqarpugut. Taamaalilluni inuit amerlanerusut nutaarsiassat nuannersut paasisin­naavaat. Biibililersaarutit aamma romanit oqaasiini 20-nit amerlanerusuni nutserneqartarput. Taakkua oqaasiinik oqaluttartut tuusintilik­kuutaat Jehovamut kiffartor­tunngorsimapput.

12. Jehovap peqatigiissortai aqqutigalugit inuit qanoq ikiorneqartarpat?

¹² Nutaarsiassat nuannersut pillugit ilinniar­titsinerup saniatigut ajunaar­nersuarnit eqqugaasunik ikiuiniarnernik Jehovap peqatigiissortai aamma aaqqissuus­sisarput. Kajumis­sutsimik sulisut tuusintilik­kuutaat qatanngutitik ikiorniarlugit peqataasarput. Inuit Guutip asannin­neranik paasisaqar­nerusin­naaqqullugit aamma ataatsimiit­tarfiit pisariitsumik sanaat sananeqartarput.

PALASIUNITTA IKIORSIN­NAAVAATIT

13. Jiisusip ilaatigut qanoq ikiortarpaatigut?

¹³ Jiisusi paarsisuul­luartuugami immikkut tamatta anersaakkut pisariaqar­titagut eqqumaffigai. (Joh 10:14; Ef 4:7) Ilaannikkut pissutsit atukkagut pissutigalugit ivikkatut napingajas­simasutut iperatul­luunniit qamilersutut misigisin­naavugut. Perulun­nartumik nappaateqarutta, ajortuliorsimagutta qatanngul­luunniit isumaqatigiin­ngissuteqarfigigutsigu nikallungasin­naavugut. Maanna naalliuutigut ajornar­torsiutigullu pissutigalugit siunissamut neriuuterput upperiuminaatsis­sinnaavarput. Eqqaamajulli Jiisusip isumakuluutitit ilisimagai paasinnit­tuullunilu. Jiisusi nallittuingaarami illit pillutit iliuuseqarusuppoq. Assersuutigalugu sanngiikkuit anersaaq illernartoq atorlugu nakussatsis­sinnaavaatit. (Joh 16:7; Tit 3:6) Aamma ilagiinni utoqqaanertat qatanngutillu allat aqqutigalugit tuppallersarlutillu ikiorsin­naavaatit. – Ef 4:8.

14. Nikallungagaangatta susarsin­naavugut?

¹⁴ Nikallungaguit Jiisusip palasiunertut kiffartornera eqqarsaatigeq­qissaarsinnaavat. Eqqaamajuk Jehovap Jiisusi pilliutissatut nunarsuarmut aallartiin­narnagu aammali inuit naammal­luinnan­ngitsut ajornar­torsiutaannik paasinnil­luarnerusin­naaleqqullugu aallartikkaa. Taamaattumik ajortuliagut sanngiis­sutigul­luunniit pissutigalugit nikallungagaangatta “pisariaqar­titsinermi” ikiuisar­nissamut Jiisusi kajumilluni piareeqqavoq. – Hebr 4:15, 16.

15. Qatanngutip angutip ilagiinnut uternis­saminut suna iluaqutigaa?

¹⁵ Jehovap savaataanit tammarsimasut ujarneranni Jiisusip aamma siulersor­tarpaatigut. (Mat 18:12, 13) Maluginiaruk Stefano qanoq misigisaqartoq.b Ukiuni aqqaneq-marlunni ilagiit qimaqqareerlugit aalajangerpoq ataatsimiigiar­niarluni. Ima oqarpoq: “Ajukkuttutut misigaanga, kisianni Jehovap ilaqutariis­sortaanut ilaaleq­qikkusuppunga. Utoqqaanertat naapeqatigigakkit tikilluaq­qusaasutut misigitip­paannga. Ilaannikkut naleqan­ngitsutut misigisarpunga tunniutiin­narusul­lungalu. Utoqqaanertalli eqqaasip­paannga Jehovap Jiisusillu kissaatigigaat pinertusaas­sasunga. Ilagiinnut ilaalerseq­qinneqarama qatanngutit tamarmik ilaquttakkalu tikilluaq­quaatigut. Kingusin­nerusukkut nuliara Biibilimik misissueqatigineqar­talerpoq. Maannalu ilaqutariittut Jehovamut kiffartoqatigiippugut.” Palasiunerput asannittoq nuannaangaartarpoq peqqissimisut ilagiinnut uternis­saannut ikioraangatsigit!

16. Sooq palasiunerput sanngiis­sutitsinnik paasinnis­sinnaasoq qujamasuutigaajuk?

¹⁶ Jiisusip nunarsuarmiik­kallarami inuppassuit pisariaqar­titsineranni ikiortarpai. Ullumik­kuttaaq piffissaq eqqorlugu ikiuinissaa upperil­luinnarsin­naavarput. Qanittukkullu paratiisimi inuit naalattut ajortip naammal­luinnan­ngissutsillu sunniutaannit aniguisissavai. Guuterput Jehova qutsavigingaarparput asammatigut erninilu palasiunertut sanngiis­sutitsinnik paasinnis­sinnaasutut kiffartor­tunngor­timmagu!