Atuartartut apeqqutaat

Qanittukkut Jehovap inuiaat ‘eqqarsaatimisut ilioqqullugit’ sunnerpagit qanoq iliussappat?

Annikil­liornar­tussarsuup aallartinnerata nalaani pisussat Saqqummersitat 17:16, 17-imilu ima allaatigineqarput: “Nassuit qulit uumasullu nujuartap takusavit arnaq atortittartoq uumissorlugulu pigisaanik tamanik, allaat atisaanik, arsaassavaat. Neqaa nungullugu nerissallugulu innermik nungutil­luinnassavaat. Guutimmi eqqarsaatimisut ilioqqullutik sunnissammatik assigiimmik eqqarsaateqalissapput – tassa Guutip oqaasiata naammas­sineqar­nissaata tungaanut oqartus­saassusertik uumasumut nujuartamut tunniuk­kallassavaat.” Biibililersaarutitsinni allassimanikuuvoq inuiaat Jehovap “eqqarsaatimisut” ilioqqullutik sunnissammatik upperisarsiornerit eqqunngitsut nungutissagaat.

Kisianni paasinnit­taatsitsinnik allannguinissaq pisariaqarpoq. Inuiaat Jehovap “eqqarsaatimisut” ilioqqullutik sunnerpatik “oqartus­saassusertik uumasumut nujuartamut tunniuk­kallassavaat”. Tamanna qanoq eqquukkumaartoq paasiumallugu apeqqutit uku eqqarsaatigikkit.

Siulittuummi kikkut eqqartor­neqarpat? “Arnaq atortittartoq”, aamma ‘Babylon­nersuarmik’ taaneqartoq, upperisarsiornernut eqqunngitsunut tamanut assersuutaavoq. “Uumasoq nujuartaq aappallarissoq” tassaavoq Naalagaaffiit Peqatigiit. Nunarsuaq tamakkerlugu eqqissineq angujumallugu taanna 1919-imi, Folkeforbundimik taaguuteqar­tillugu, pilersin­neqarpoq. (Saqq 17:3-5) “Nassuit qulit” naalakkersuisunut uumasumik nujuartamik tapersersuisunut tamanut assersuutaapput.

Arnap atortittartup uumasoq nujuartaq aappallarissoq qanoq iliorfigaa? Arnap atortittartup uumasoq nujuartaq ‘issiaffigaa’ – tassa pilluaqquaa, sunnerniarpaa allaallu naalagaaniarfigalugu.

Arnaq atortittartoq qanoq pineqassava? Uumasup nujuartap nassuillu qulit arnaq atortittartoq uumissoramikku ‘pigisaanik tamanik arsaassavaat’ ajortuuneralu allanut tamanut takutis­sallugu. Arnallu nungutil­luinnar­neratigut Jehovap taassumunnga eqqartuussutaa naammas­sissavaat. (Saqq 17:1; 18:8) Taamaalilluni upperisarsiornerit eqqunngitsut tamarmik piuneerutissapput. Tamatumali pinissaata siornatigut Jehovap inuiaat iliuuserisiman­ngisaannik iliuuseqaq­qullugit sunnissavai.

Jehovap inuiaat soqqullugit sunnissavai? Guutip “eqqarsaatimisut” ilioqqullutik sunnissammatik “pissaanertik oqartus­saassusertillu uumasumut nujuartamut” aappallarissumut, tassa Naalagaaffinnut Peqatigiinnut, tunniutissavaat. (Saqq 17:13) Naalakkersuisut namminneerlutik aalajangiissappat pissaanertik oqartus­saassusertillu tunniun­niarlugit? Naamik! Siulittuummi ersarippoq Guutip taamaalior­nissaannut sunnissagai. (Uss 21:1; aamma takuuk Esaja 44:28). Imaappa piffissap ingerlanerani ataasiak­kaarlutik pissaanertik tunniutissagaat? Naamik! Tassanngaannaq allannguineqassaaq. Taava uumasoq nujuartaq pissaaneqaleq­qammersoq Jehovap eqqartuus­sutaatut upperisarsiornernik eqqunngitsunik tamakkiisumik piiaassaaq.

Siunissami qanoq pisoqarnissaa ilimagisin­naavarput? Naalakkersuisut Naalagaaffinnik Peqatigiinnik tapersersuiar­tuaarnerannik nutaarsias­saqarnissaa utaqqisariaqan­ngilarput. Inuiaat Jehovamit sunnerneqarlutik tassanngaannaq pissaanertik oqartus­saassusertillu uumasumut nujuartamut tunniutissavaat. Taamanik­kussamut nalussan­ngilarput annikil­liornar­tussarsuaq aallartilersoq. Maannali “eqqumasa silatusaarlutalu”, qanittukkummi tassanngaannaq allanngor­toqassammat! – Tes 1. 5:6.