២៥ ពេល​ពួក​គេ​មក​រស់​នៅ​ដំបូង ពួក​គេ​មិន​បាន​កោត​ខ្លាច*ព្រះ​យេហូវ៉ា​ទេ។ ដូច្នេះ ព្រះ​យេហូវ៉ា​ប្រើ​សត្វ​តោ​ឲ្យ​ទៅ​ប្រហារ​ពួក​គេ​អស់​មួយ​ចំនួន​ទៅ។+ ២៦ ក្រោយ​មក មាន​គេ​ទៅ​ជម្រាប​ស្ដេច​ស្រុក​អាស៊ីរី​ថា​៖ ​«​ជន​ជាតិ​ដទៃ​ដែល​លោក​បាន​ឲ្យ​ទៅ​រស់​នៅ​តាម​បណ្ដា​ក្រុង​ក្នុង​ស្រុក​សាម៉ារី​នោះ ពួក​គេ​មិន​ស្គាល់​ទំនៀម​ទម្លាប់​សាសនា និង​ព្រះ​នៃ​ស្រុក​នោះ​ទេ។ ហេតុ​នេះ​ហើយ​បាន​ជា​ព្រះ​នៃ​ស្រុក​នោះ​ប្រើ​សត្វ​តោ​ឲ្យ​ទៅ​ប្រហារ​ពួក​គេ​»។