-
យ៉ូស្វេ ១០:៨-១៤គម្ពីរបរិសុទ្ធសេចក្ដីបកប្រែពិភពលោកថ្មី
-
-
៨ ពេលនោះ ព្រះយេហូវ៉ាមានប្រសាសន៍ទៅយ៉ូស្វេថា៖ «កុំភ័យខ្លាចឡើយ+ ព្រោះខ្ញុំបានប្រគល់ពួកគេទៅក្នុងកណ្ដាប់ដៃរបស់អ្នក។+ គ្មានអ្នកណាម្នាក់អាចឈ្នះអ្នកបានទេ»។+ ៩ យ៉ូស្វេបានធ្វើដំណើរពេញមួយយប់ពីក្រុងគីលកាលដើម្បីប្រយុទ្ធនឹងពួកគេ ដោយមិនឲ្យពួកគេដឹងខ្លួនជាមុន។ ១០ លុះទៅដល់ហើយ ព្រះយេហូវ៉ាបានធ្វើឲ្យពួកសត្រូវច្របូកច្របល់នៅមុខកងទ័ពអ៊ីស្រាអែល។+ កងទ័ពអ៊ីស្រាអែលបានសម្លាប់ពួកគេយ៉ាងរង្គាលនៅក្រុងគីបៀន និងដេញប្រហារពួកគេតាមផ្លូវឡើងទៅក្រុងបេតហូរ៉ុន ហើយសម្លាប់ពួកគេរហូតដល់ក្រុងអាសេកា និងក្រុងម៉ាកេដា។ ១១ កាលដែលពួកគេរត់គេចពីកងទ័ពអ៊ីស្រាអែលតាមផ្លូវចុះពីក្រុងបេតហូរ៉ុន នោះព្រះយេហូវ៉ាបានទម្លាក់ដុំទឹកកកយ៉ាងច្រើនពីលើមេឃមកសម្លាប់ពួកគេ រហូតដល់ក្រុងអាសេកា។ អ្នកដែលស្លាប់ដោយសារដុំទឹកកក មានចំនួនច្រើនជាងអ្នកដែលស្លាប់ដោយសារដាវរបស់កងទ័ពអ៊ីស្រាអែលទៅទៀត។
១២ នៅថ្ងៃនោះឯង ព្រះយេហូវ៉ាធ្វើឲ្យជនជាតិអាម៉ូរីរត់បាក់ទ័ពពីមុខកងទ័ពអ៊ីស្រាអែល។ ពេលនោះ យ៉ូស្វេនិយាយទៅព្រះយេហូវ៉ានៅចំពោះមុខកងទ័ពអ៊ីស្រាអែលថា៖
«សូមឲ្យដួងអាទិត្យនៅទ្រឹង+លើក្រុងគីបៀន+
ហើយសូមឲ្យដួងខែនៅទ្រឹងលើជ្រលងភ្នំ*ជិតក្រុងអៃយ៉ាឡូន!»។
១៣ ដូច្នេះ ដួងអាទិត្យបាននៅទ្រឹង ហើយដួងខែនៅនឹងថ្កល់ រហូតដល់ប្រជាជាតិអ៊ីស្រាអែលបានច្បាំងឈ្នះសត្រូវ។ រឿងនេះបានត្រូវសរសេរទុកក្នុងសៀវភៅយ៉ាសា។+ នៅថ្ងៃនោះ ដួងអាទិត្យបាននៅទ្រឹងកណ្ដាលមេឃ ហើយនៅភ្លឺរហូតស្ទើរតែពេញមួយថ្ងៃ។ ១៤ មិនដែលមានថ្ងៃណាដូចថ្ងៃនោះឡើយ គឺមានតែថ្ងៃនោះប៉ុណ្ណោះដែលព្រះយេហូវ៉ាធ្វើការអស្ចារ្យបែបនោះតាមសំណូមពររបស់បុរសម្នាក់+ ព្រោះព្រះយេហូវ៉ាបានច្បាំងដើម្បីអ៊ីស្រាអែល។+
-
-
ប្រវត្តិហេតុទី១ ១៤:១០-១៦គម្ពីរបរិសុទ្ធសេចក្ដីបកប្រែពិភពលោកថ្មី
-
-
១០ ពេលនោះ ដាវីឌបានសួរព្រះយេហូវ៉ាថា៖ «តើខ្ញុំគួរទៅច្បាំងនឹងពួកភីលីស្ទីនឬទេ? តើលោកនឹងប្រគល់ពួកគេមកក្នុងកណ្ដាប់ដៃខ្ញុំឬ?»។ លោកក៏តបឆ្លើយទៅវិញថា៖ «ចូរទៅចុះ! ខ្ញុំនឹងប្រគល់ពួកគេទៅក្នុងកណ្ដាប់ដៃអ្នកជាប្រាកដ»។+ ១១ ដូច្នេះ ដាវីឌបានទៅវាយប្រហារពួកភីលីស្ទីននៅឯបាលពេរ៉ាស៊ីម។+ បន្ទាប់មក ដាវីឌបាននិយាយថា៖ «ព្រះពិតបានជួយខ្ញុំវាយប្រហារពួកសត្រូវរហូតដល់ពួកគេបាក់ទ័ព ដូចជាទឹកបាក់ទំនប់»។ ហេតុនេះហើយបានជាគេហៅកន្លែងនោះថាបាលពេរ៉ាស៊ីម។* ១២ ពួកភីលីស្ទីនបានបោះបង់ចោលរូបព្រះរបស់ពួកគេនៅទីនោះ។ រួចមក ដាវីឌក៏បានបង្គាប់ឲ្យគេដុតបំផ្លាញរូបព្រះទាំងនោះចោល។+
១៣ ក្រោយមក ពួកភីលីស្ទីនបានចូលទៅវាយលុកនៅឯជ្រលងនោះម្ដងទៀត។+ ១៤ នៅពេលនោះ ដាវីឌបានសួរព្រះពិត តែលោកប្រាប់ថា៖ «កុំទៅច្បាំងនឹងពួកគេពីមុខឡើយ តែចូរវាងពីក្រោយ ហើយវាយឆ្មក់ពួកគេនៅមុខព្រៃគុម្ពោតបេកាវិញ។+ ១៥ ពេលដែលអ្នកឮសន្ធឹកជើងមកជិតដល់ព្រៃគុម្ពោតបេកា ចូរចេញទៅច្បាំងនឹងពួកគេទៅ ព្រោះព្រះពិតនឹងចេញទៅវាយប្រហារកងទ័ពភីលីស្ទីនមុនអ្នកហើយ»។+ ១៦ ដាវីឌបានធ្វើតាមបង្គាប់របស់ព្រះពិត+ ហើយគាត់បានសម្លាប់ពួកភីលីស្ទីនចាប់ពីក្រុងគីបៀនរហូតទៅដល់ក្រុងគីសឺ។+
-