-
ម៉ាថាយ ១៤:១៥-២១គម្ពីរបរិសុទ្ធសេចក្ដីបកប្រែពិភពលោកថ្មី
-
-
១៥ ប៉ុន្តែពេលល្ងាច ពួកអ្នកកាន់តាមបានមកឯលោក ហើយជម្រាបថា៖ «កន្លែងនេះនៅដាច់ឆ្ងាយពីគេ ថ្ងៃក៏កាន់តែជ្រេដែរ។ សូមឲ្យបណ្ដាជនត្រឡប់ទៅវិញ ដើម្បីពួកគេអាចទិញអាហារនៅតាមភូមិ»។+ ១៦ ក៏ប៉ុន្តែ លោកយេស៊ូមានប្រសាសន៍ទៅពួកគាត់ថា៖ «ពួកគេមិនចាំបាច់ទៅទេ ចូរអ្នករាល់គ្នាឲ្យអាហារពួកគេបរិភោគទៅ»។ ១៧ ពួកគាត់ជម្រាបលោកថា៖ «នៅទីនេះយើងគ្មានអ្វីទេ ក្រៅពីនំប៉័ងប្រាំដុំនិងត្រីពីរកន្ទុយ»។ ១៨ លោកមានប្រសាសន៍ថា៖ «យកនំប៉័ងនិងត្រីទាំងនោះមកឲ្យខ្ញុំ»។ ១៩ បន្ទាប់មក លោកប្រាប់បណ្ដាជនឲ្យអង្គុយលើស្មៅ។ លោកក៏បានយកនំប៉័ងប្រាំដុំនិងត្រីពីរកន្ទុយនោះ ហើយងើយភ្នែកមើលទៅស្ថានសួគ៌ រួចអធិដ្ឋាន។+ ក្រោយនោះ លោកកាច់នំប៉័ង ចែកឲ្យពួកអ្នកកាន់តាម ហើយពួកគាត់ក៏ចែកឲ្យបណ្ដាជន។ ២០ ដូច្នេះ គ្រប់គ្នាបានបរិភោគឆ្អែត ហើយពួកគាត់បានប្រមូលអាហារដែលនៅសល់បាន១២កញ្ជើ។+ ២១ ឯអ្នកដែលបានបរិភោគ មានបុរសប្រហែល៥.០០០នាក់ ដោយមិនរាប់ស្ត្រីនិងកូនក្មេងទេ។+
-
-
លូកា ៩:១២-១៧គម្ពីរបរិសុទ្ធសេចក្ដីបកប្រែពិភពលោកថ្មី
-
-
១២ លុះថ្ងៃកាន់តែជ្រេហើយ សាវ័កទាំង១២នាក់បានចូលទៅជិតលោក ក៏ជម្រាបថា៖ «សូមឲ្យបណ្ដាជនត្រឡប់ទៅវិញ ដើម្បីពួកគេអាចរកកន្លែងស្នាក់នៅនិងស្បៀងអាហារនៅភូមិនិងជនបទជិតៗនេះ ពីព្រោះយើងនៅកន្លែងដាច់ឆ្ងាយពីគេ»។+ ១៣ ប៉ុន្តែ លោកមានប្រសាសន៍ទៅពួកគាត់ថា៖ «ចូរអ្នករាល់គ្នាឲ្យអាហារពួកគេបរិភោគចុះ»។+ ពួកគាត់ជម្រាបថា៖ «យើងមានតែនំប៉័ងប្រាំដុំ និងត្រីពីរកន្ទុយប៉ុណ្ណោះ ប្រហែលជាយើងត្រូវទៅទិញស្បៀងអាហារសម្រាប់មនុស្សទាំងអស់នេះដោយខ្លួនយើងហើយ»។ ១៤ នៅទីនោះ មានបុរសប្រហែល៥.០០០នាក់។ ប៉ុន្តែ លោកមានប្រសាសន៍ទៅពួកអ្នកកាន់តាមលោកថា៖ «ចូរឲ្យពួកគេអង្គុយជាក្រុមៗ ក្នុងមួយក្រុម៥០នាក់»។ ១៥ រួចពួកអ្នកកាន់តាមក៏ធ្វើតាម ដោយឲ្យមនុស្សទាំងនោះអង្គុយ។ ១៦ បន្ទាប់មក លោកយកនំប៉័ងប្រាំដុំនិងត្រីពីរកន្ទុយនោះ ងើយភ្នែកមើលទៅស្ថានសួគ៌ អធិដ្ឋាន* រួចកាច់ ហើយឲ្យអ្នកកាន់តាមចែកដល់បណ្ដាជន។ ១៧ ដូច្នេះ គ្រប់គ្នាបានបរិភោគឆ្អែត។ បន្ទាប់មក ពួកគាត់ប្រមូលអាហារដែលនៅសល់ បាន១២កញ្ជើ។+
-