-
ម៉ាថាយ ២១:២៣-២៧គម្ពីរបរិសុទ្ធសេចក្ដីបកប្រែពិភពលោកថ្មី
-
-
២៣ បន្ទាប់ពីលោកចូលទៅក្នុងវិហារ ហើយកំពុងបង្រៀន នោះពួកសង្ឃនាយកនិងពួកអ្នកចាស់ទុំបានចូលមកជិតលោក ហើយសួរថា៖ «តើលោកធ្វើអ្វីៗទាំងនេះដោយអាងសិទ្ធិអំណាចអ្វី? ហើយតើអ្នកណាបានប្រគល់សិទ្ធិអំណាចនេះឲ្យអ្នក?»។+ ២៤ លោកយេស៊ូតបថា៖ «ខ្ញុំក៏សួរអ្នករាល់គ្នារឿងមួយដែរ។ ប្រសិនបើអ្នកអាចឆ្លើយបាន ខ្ញុំនឹងប្រាប់អ្នកថាខ្ញុំធ្វើអ្វីៗទាំងនេះដោយអាងសិទ្ធិអំណាចអ្វី។ ២៥ តើយ៉ូហានបានទទួលសិទ្ធិអំណាចជ្រមុជទឹកឲ្យគេពីណាមក? ពីស្ថានសួគ៌ ឬពីមនុស្ស?»។ ប៉ុន្តែ ពួកគេចាប់ផ្ដើមជជែកវែកញែកគ្នាថា៖ «ប្រសិនបើយើងឆ្លើយថា៖ ‹ពីស្ថានសួគ៌› នោះគាត់នឹងសួរថា៖ ‹ចុះហេតុអ្វីបានជាអ្នករាល់គ្នាមិនជឿយ៉ូហាន?›។+ ២៦ ប៉ុន្តែ បើយើងឆ្លើយថា៖ ‹ពីមនុស្ស›វិញ យើងខ្លាចបណ្ដាជនខឹង ពីព្រោះពួកគេចាត់ទុកយ៉ូហានជាអ្នកប្រកាសទំនាយ»។ ២៧ ដូច្នេះ ពួកគេឆ្លើយទៅលោកយេស៊ូថា៖ «យើងមិនដឹងទេ»។ លោកមានប្រសាសន៍តបទៅវិញថា៖ «ខ្ញុំក៏មិនប្រាប់អ្នករាល់គ្នាថា ខ្ញុំធ្វើអ្វីៗទាំងនេះដោយអាងសិទ្ធិអំណាចអ្វីដែរ។
-
-
លូកា ២០:១-៨គម្ពីរបរិសុទ្ធសេចក្ដីបកប្រែពិភពលោកថ្មី
-
-
២០ នៅថ្ងៃមួយ ពេលដែលលោកកំពុងបង្រៀនបណ្ដាជនក្នុងវិហារ ហើយប្រកាសដំណឹងល្អ នោះពួកសង្ឃនាយក ពួកអ្នកជំនាញខាងច្បាប់ និងពួកអ្នកចាស់ទុំបានចូលមកឯលោក ២ ហើយសួរលោកថា៖ «ចូរប្រាប់យើងមក តើអ្នកធ្វើអ្វីៗទាំងនេះដោយអាងសិទ្ធិអំណាចអ្វី? ឬតើអ្នកណាបានប្រគល់សិទ្ធិអំណាចនេះឲ្យអ្នក?»។+ ៣ លោកតបឆ្លើយថា៖ «ខ្ញុំក៏សួរអ្នករាល់គ្នាសំណួរមួយដែរ។ ចូរឆ្លើយប្រាប់ខ្ញុំថា ៤ តើយ៉ូហានបានទទួលសិទ្ធិអំណាចជ្រមុជទឹក*ឲ្យគេ ពីស្ថានសួគ៌ ឬពីមនុស្ស?»។ ៥ រួចមក ពួកគេជជែកវែកញែកគ្នាថា៖ «ប្រសិនបើយើងឆ្លើយថា‹ពីស្ថានសួគ៌› នោះគាត់នឹងសួរថា‹ចុះហេតុអ្វីបានជាអ្នករាល់គ្នាមិនជឿយ៉ូហាន?›។ ៦ ប៉ុន្តែ បើយើងឆ្លើយថា‹ពីមនុស្ស›វិញ នោះបណ្ដាជនគ្រប់រូបនឹងយកថ្មគប់សម្លាប់យើង ព្រោះពួកគេជឿជាក់ថាយ៉ូហានជាអ្នកប្រកាសទំនាយ»។+ ៧ ដូច្នេះ ពួកគេឆ្លើយថា មិនដឹងថាយ៉ូហានបានទទួលសិទ្ធិអំណាចមកពីណាទេ។ ៨ រួចលោកយេស៊ូមានប្រសាសន៍ទៅពួកគេថា៖ «ខ្ញុំក៏មិនប្រាប់អ្នករាល់គ្នាថា ខ្ញុំធ្វើអ្វីៗទាំងនេះដោយអាងសិទ្ធិអំណាចអ្វីដែរ»។
-