ជូនចំពោះគ្រិស្តសាសនិកនៅខេត្តកាឡាទី
១ ពីខ្ញុំ ប៉ូល ដែលជាសាវ័ក* មិនមែនជាសាវ័ករបស់មនុស្ស ឬតាមរយៈមនុស្សឡើយ តែតាមរយៈលោកយេស៊ូគ្រិស្ត+និងព្រះដែលជាបិតា+ ដែលបានប្រោសលោកឲ្យរស់ពីស្លាប់ឡើងវិញ។ ២ ខ្ញុំនិងបងប្អូនទាំងអស់ដែលនៅជាមួយនឹងខ្ញុំ សូមសរសេរទៅកាន់ក្រុមជំនុំទាំងឡាយនៅខេត្តកាឡាទី៖
៣ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់ និងសេចក្ដីសុខសាន្តពីព្រះជាបិតារបស់យើង និងពីលោកម្ចាស់យេស៊ូគ្រិស្ត។ ៤ លោកបានប្រគល់ខ្លួនលោកជាថ្នូរនឹងការខុសឆ្គង*របស់យើង+ ដើម្បីសង្គ្រោះយើងពីរបៀបរបបពិភពលោក*អាក្រក់នៅសម័យនេះ+ ស្របតាមបំណងប្រាថ្នារបស់ព្រះដែលជាបិតារបស់យើង+ ៥ ជាព្រះដែលគួរនឹងទទួលការសរសើរតម្កើងជារៀងរហូត។ អាមេន។
៦ ខ្ញុំឆ្ងល់ណាស់ដែលអ្នករាល់គ្នាឆាប់ងាកចេញពីលោកដែលបានហៅអ្នករាល់គ្នាដោយគុណដ៏វិសេសលើសលប់របស់គ្រិស្ត ហើយបែរទៅស្ដាប់ដំណឹងល្អបែបផ្សេងវិញ។+ ៧ តាមការពិត នោះមិនមែនជាដំណឹងល្អបែបផ្សេងទេ តែគឺមានមនុស្សខ្លះដែលនាំឲ្យអ្នករាល់គ្នាមានបញ្ហា+ ហើយចង់បង្ខុសដំណឹងល្អអំពីគ្រិស្ត។ ៨ ក៏ប៉ុន្តែ បើយើងណាម្នាក់ឬទេវតាណាមួយពីស្ថានសួគ៌ប្រកាសប្រាប់អ្នករាល់គ្នាអំពីដំណឹងល្អផ្សេង ខុសពីដំណឹងល្អដែលយើងបានប្រកាសប្រាប់អ្នករាល់គ្នា ចូរឲ្យអ្នកនោះត្រូវបណ្ដាសា។ ៩ ដូចយើងបាននិយាយរួចហើយ តែខ្ញុំសុំនិយាយម្ដងទៀតថា អ្នកណាក៏ដោយដែលកំពុងប្រកាសប្រាប់ដំណឹងល្អដល់អ្នករាល់គ្នា ខុសពីអ្វីដែលអ្នករាល់គ្នាបានជឿ ចូរឲ្យអ្នកនោះត្រូវបណ្ដាសា។
១០ តើខ្ញុំកំពុងព្យាយាមធ្វើឲ្យមនុស្សពេញចិត្ត ឬធ្វើឲ្យព្រះពេញចិត្ត? តើខ្ញុំកំពុងព្យាយាមផ្គាប់ចិត្តមនុស្សឬ? ប្រសិនបើខ្ញុំនៅតែព្យាយាមផ្គាប់ចិត្តមនុស្ស ខ្ញុំមិនមែនជាខ្ញុំបម្រើរបស់គ្រិស្តទេ។ ១១ បងប្អូនអើយ ខ្ញុំចង់ឲ្យអ្នករាល់គ្នាដឹងថា ដំណឹងល្អដែលខ្ញុំបានប្រកាស មិនមែនមកពីមនុស្សទេ+ ១២ ព្រោះខ្ញុំមិនបានទទួលដំណឹងនោះពីមនុស្សឡើយ ហើយក៏មិនបានទទួលការបង្រៀនអំពីដំណឹងនោះដែរ តែលោកយេស៊ូគ្រិស្តបានបើកបង្ហាញដំណឹងនោះដល់ខ្ញុំ។
១៣ អ្នករាល់គ្នាច្បាស់ជាបានឮអំពីការប្រព្រឹត្តរបស់ខ្ញុំពីមុន ពេលដែលខ្ញុំកាន់សាសនាយូដា+ គឺថាខ្ញុំបានបៀតបៀនយ៉ាងខ្លាំងដល់ក្រុមជំនុំរបស់ព្រះ ថែមទាំងព្យាយាមបំផ្លាញក្រុមជំនុំនោះទៀតផង+ ១៤ ហើយខ្ញុំកាន់តាមសាសនាយូដាបានប្រសើរជាងជនរួមជាតិជាច្រើនដែលមានអាយុស្រករខ្ញុំ ដោយសារខ្ញុំខ្នះខ្នែងខ្លាំងជាងពួកគេឆ្ងាយណាស់ក្នុងការធ្វើតាមទំនៀមទម្លាប់នៃពួកបុព្វបុរសរបស់ខ្ញុំ។+ ១៥ ក៏ប៉ុន្តែ ព្រះដែលបានអនុញ្ញាតឲ្យខ្ញុំកើតមក និងដែលបានហៅខ្ញុំតាមរយៈគុណដ៏វិសេសលើសលប់របស់លោក+ បានពេញចិត្ត ១៦ បើកបង្ហាញបុត្ររបស់លោកតាមរយៈខ្ញុំ ដើម្បីឲ្យខ្ញុំប្រកាសដំណឹងល្អអំពីលោកដល់ជនជាតិដទៃ+ ពេលនោះខ្ញុំមិនបានទៅសួរយោបល់ពីអ្នកឯទៀតភ្លាមៗទេ។ ១៧ ខ្ញុំក៏មិនបានឡើងទៅក្រុងយេរូសាឡិមដើម្បីជួបអ្នកដែលជាសាវ័កមុនខ្ញុំដែរ តែខ្ញុំបានចេញទៅស្រុកអារ៉ាប់ រួចខ្ញុំត្រឡប់មកក្រុងដាម៉ាស់វិញ។+
១៨ លុះបីឆ្នាំក្រោយមក ខ្ញុំឡើងទៅក្រុងយេរូសាឡិម+ដើម្បីជួបកេផាស*+ ហើយបានស្នាក់នៅជាមួយនឹងគាត់អស់១៥ថ្ងៃ។ ១៩ ប៉ុន្តែ ខ្ញុំមិនបានជួបសាវ័កណាទៀតទេ ក្រៅពីយ៉ាកុប+ដែលជាប្អូនប្រុសរបស់លោកម្ចាស់ប៉ុណ្ណោះ។ ២០ ឥឡូវ មើល! ខ្ញុំសូមប្រាប់នៅចំពោះមុខព្រះថា អ្វីៗដែលខ្ញុំកំពុងសរសេរទៅកាន់អ្នករាល់គ្នា មិនមែនជាសេចក្ដីភូតភរទេ។
២១ បន្ទាប់ពីនោះ ខ្ញុំបានទៅតំបន់ស៊ីរីនិងស៊ីលីស៊ី។+ ២២ ប៉ុន្តែ បណ្ដាក្រុមជំនុំគ្រិស្តសាសនិកនៅតំបន់យូឌា មិនបានស្គាល់មុខខ្ញុំទេ។ ២៣ ពួកគាត់គ្រាន់តែបានឮថា៖ «ឥឡូវ បុរសដែលធ្លាប់បៀតបៀនយើង+ កំពុងប្រកាសដំណឹងល្អអំពីសាសនាដែលគាត់ធ្លាប់បំផ្លាញ»។+ ២៤ ដូច្នេះ ពួកគាត់ចាប់ផ្ដើមសរសើរតម្កើងព្រះដោយសារខ្ញុំ។
២ លុះ១៤ឆ្នាំក្រោយមក ខ្ញុំបានឡើងទៅក្រុងយេរូសាឡិមម្ដងទៀតជាមួយនិងបាណាបាស+ ហើយខ្ញុំក៏បាននាំទីតុសទៅជាមួយដែរ។+ ២ ខ្ញុំបានឡើងទៅដោយសារអ្វីដែលបានត្រូវបើកបង្ហាញដល់ខ្ញុំ។ រួចមក ខ្ញុំបានរៀបរាប់ប្រាប់ពួកបុរសដែលនាំមុខក្នុងក្រុមជំនុំអំពីដំណឹងល្អដែលខ្ញុំផ្សព្វផ្សាយដល់ជនជាតិដទៃ។ ខ្ញុំបានប្រាប់ពួកគាត់ដោយឡែកពីគេ ដើម្បីឲ្យប្រាកដថាកិច្ចបម្រើដែលខ្ញុំបានបំពេញ និងកំពុងបំពេញ មិនមែនឥតប្រយោជន៍ឡើយ។ ៣ នៅពេលនោះ សូម្បីតែទីតុស+ដែលនៅជាមួយនឹងខ្ញុំ ក៏មិនបានត្រូវបង្ខំឲ្យទទួលការកាត់ចុងស្បែក*ដែរ+ ទោះជាគាត់ជាជនជាតិក្រិចក៏ដោយ។ ៤ ប៉ុន្តែ បញ្ហានេះកើតឡើងដោយសារបងប្អូនក្លែងក្លាយដែលបានចូលមកដោយសម្ងាត់+ គឺពួកគេបានលួចបន្លំចូលឃ្លាំមើលក្នុងបំណងរកវិធីបំផ្លាញសេរីភាព+ដែលយើងមានក្នុងនាមជាអ្នកកាន់តាមគ្រិស្តយេស៊ូ ដើម្បីធ្វើឲ្យយើងទៅជាខ្ញុំបម្រើដាច់ថ្លៃ។+ ៥ ប៉ុន្តែ យើងមិនព្រមចុះចូលនឹងពួកគេឡើយ+ សូម្បីតែមួយភ្លែត ព្រោះយើងចង់ឲ្យសេចក្ដីពិតនៃដំណឹងល្អនៅជាប់ជាមួយនឹងអ្នករាល់គ្នាជានិច្ច។
៦ ចំណែកពួកអ្នកដែលមើលទៅដូចជាមនុស្សសំខាន់ក្នុងក្រុមជំនុំ+ តាមពិតពួកគាត់មិនបានបន្ថែមចំណេះឲ្យខ្ញុំសោះ។ ទោះជាពីមុនពួកគាត់ជាអ្វីក៏ដោយ នោះមិនសំខាន់ចំពោះខ្ញុំទេ ពីព្រោះព្រះមិនរើសមុខអ្នកណាម្នាក់ឡើយ។* ៧ ផ្ទុយទៅវិញ ពួកគាត់បានឃើញថាដំណឹងល្អសម្រាប់ជនជាតិដទៃ*+បានត្រូវប្រគល់មកខ្ញុំ ដូចដំណឹងល្អសម្រាប់ជនជាតិយូដា*បានត្រូវប្រគល់ទៅពេត្រុសដែរ ៨ ព្រោះលោកដែលបានឲ្យអំណាចដល់ពេត្រុសដើម្បីធ្វើជាសាវ័កសម្រាប់ពួកអ្នកដែលបានទទួលការកាត់ចុងស្បែក ក៏បានឲ្យអំណាចដល់ខ្ញុំដើម្បីធ្វើជាសាវ័កសម្រាប់ជនជាតិដទៃដែរ។+ ៩ ដូច្នេះ ពួកគាត់បានទទួលស្គាល់អំពីគុណដ៏វិសេសលើសលប់ដែលខ្ញុំបានទទួល+ ពេលនោះយ៉ាកុប+ កេផាស* និងយ៉ូហាន ជាពួកអ្នកដែលត្រូវគេចាត់ទុកជាសសរនៃក្រុមជំនុំ បានហុចដៃស្ដាំមកយើងដើម្បីបញ្ជាក់ការយល់ព្រមថា ខ្ញុំនិងបាណាបាស+គួរទៅឯជនជាតិដទៃ តែពួកគាត់នឹងទៅឯអស់អ្នកដែលបានទទួលការកាត់ចុងស្បែក។ ១០ ពួកគាត់បានសុំយើងរឿងមួយគឺ កុំឲ្យភ្លេចគិតដល់បងប្អូនក្រីក្រ ហើយខ្ញុំក៏បានព្យាយាមធ្វើការនោះដោយស្មោះអស់ពីចិត្តដែរ។+
១១ ក៏ប៉ុន្តែ ពេលកេផាស*+មកដល់ក្រុងអាន់ទីយ៉ូក+ ខ្ញុំបានស្ដីបន្ទោសគាត់នៅចំពោះមុខតែម្ដង ពីព្រោះគាត់ពិតជាបានធ្វើខុសមែន។* ១២ ព្រោះយ៉ាកុប+បានចាត់បុរសខ្លះឲ្យមក ហើយមុនពេលពួកគេមកដល់ កេផាសតែងតែបរិភោគជាមួយនឹងជនជាតិដទៃ។+ ប៉ុន្តែ ពេលដែលបុរសទាំងនោះមកដល់ កេផាសឈប់ធ្វើដូច្នោះទៀត ហើយនៅដោយឡែកពីជនជាតិដទៃវិញ ដោយសារគាត់ខ្លាចពួកអ្នកដែលគាំទ្រការកាត់ចុងស្បែក។+ ១៣ រីឯជនជាតិយូដាឯទៀតបានធ្វើពើ*ជាមួយនឹងគាត់ សូម្បីតែបាណាបាសក៏បានបណ្ដែតបណ្ដោយខ្លួនទៅតាមពួកគាត់ក្នុងការធ្វើពើនោះដែរ។ ១៤ ប៉ុន្តែ ពេលដែលខ្ញុំឃើញថាពួកគាត់មិនដើរតាមសេចក្ដីពិតនៃដំណឹងល្អ+ នោះខ្ញុំនិយាយទៅកេផាសនៅមុខពួកគាត់ទាំងអស់គ្នាថា៖ «ទោះជាអ្នកជាជនជាតិយូដាក៏ដោយ តែបើអ្នកមិនរស់នៅដូចជនជាតិយូដាទេ គឺរស់នៅដូចជនជាតិដទៃ ហេតុអ្វីអ្នកកំពុងជំរុញចិត្តជនជាតិដទៃឲ្យរស់នៅតាមទំនៀមទម្លាប់យូដា?»។+
១៥ ចំណែកយើងដែលមានដើមកំណើតជាជនជាតិយូដា យើងមិនមែនជាអ្នកប្រព្រឹត្តអំពើខុសឆ្គង*ដូចជនជាតិដទៃទេ ១៦ ហើយយើងដឹងថាមនុស្សបានត្រូវប្រកាសថាជាមនុស្សសុចរិត មិនមែនដោយអាងលើការប្រព្រឹត្តតាមច្បាប់ទេ តែតាមរយៈជំនឿ+លើគ្រិស្តយេស៊ូប៉ុណ្ណោះ។+ ដូច្នេះ យើងបានជឿគ្រិស្តយេស៊ូ ដើម្បីយើងអាចត្រូវប្រកាសថាជាមនុស្សសុចរិតដោយសារជំនឿលើគ្រិស្ត មិនមែនដោយអាងលើការប្រព្រឹត្តតាមច្បាប់ទេ ពីព្រោះគ្មានអ្នកណាអាចត្រូវប្រកាសថាជាមនុស្សសុចរិតដោយអាងលើការប្រព្រឹត្តតាមច្បាប់ឡើយ។+ ១៧ ប្រសិនបើយើងដែលកំពុងព្យាយាមធ្វើជាអ្នកដែលនឹងត្រូវប្រកាសថាជាមនុស្សសុចរិតតាមរយៈគ្រិស្ត បានត្រូវគេចាត់ទុកជាអ្នកប្រព្រឹត្តអំពើខុសឆ្គងវិញ តើនេះមានន័យថាគ្រិស្តលើកទឹកចិត្តយើងឲ្យធ្វើខុសឬ? មិនអាចទេ! ១៨ ប្រសិនបើខ្ញុំយកអ្វីៗដែលខ្ញុំបានរំលំចោល ហើយមកសង់ឡើងវិញ នោះបង្ហាញថាខ្ញុំជាអ្នកប្រព្រឹត្តអំពើរំលង។ ១៩ ព្រោះតាមរយៈច្បាប់ ខ្ញុំបានរួចពីច្បាប់*+ ដូច្នេះខ្ញុំអាចរស់ដើម្បីព្រះ។ ២០ ខ្ញុំបានត្រូវព្យួរ*ជាមួយនឹងគ្រិស្ត។+ មិនមែនខ្ញុំទៀតទេដែលរស់ តែគឺគ្រិស្តដែលកំពុងរស់+ ហើយលោករួបរួមជាមួយនឹងខ្ញុំ។ ឥឡូវនេះ ខ្ញុំរស់នៅស្របតាមជំនឿលើបុត្ររបស់ព្រះ+ដែលបានស្រឡាញ់ខ្ញុំ និងដែលបានបូជាជីវិតដើម្បីខ្ញុំ។+ ២១ ខ្ញុំមិនច្រានចោលគុណដ៏វិសេសលើសលប់របស់ព្រះឡើយ+ ព្រោះប្រសិនបើសេចក្ដីសុចរិតគឺតាមរយៈច្បាប់ នោះគ្រិស្តបានស្លាប់គឺជាការឥតប្រយោជន៍ទទេ។+
៣ ឱអ្នកខេត្តកាឡាទីដែលមិនចេះពិចារណាអើយ! តើអ្នកណាបានបញ្ឆោតអ្នករាល់គ្នា?+ ព្រោះអ្នករាល់គ្នាបានត្រូវពន្យល់យ៉ាងច្បាស់អំពីការស្លាប់របស់លោកយេស៊ូគ្រិស្តលើបង្គោលឈើ*រួចហើយ។+ ២ ខ្ញុំចង់សួរមួយថា តើអ្នករាល់គ្នាបានទទួលឫទ្ធានុភាពរបស់ព្រះដោយសារអ្នករាល់គ្នាប្រព្រឹត្តតាមច្បាប់ ឬដោយសារមានជំនឿលើអ្វីដែលអ្នករាល់គ្នាបានឮ?+ ៣ តើអ្នករាល់គ្នាពិតជាមិនចេះពិចារណាដល់ថ្នាក់នេះឬ? អ្នករាល់គ្នាបានចាប់ផ្ដើមដោយផ្អែកលើឫទ្ធានុភាពរបស់ព្រះ តែឥឡូវ តើអ្នករាល់គ្នាបែរជាបញ្ចប់ដោយផ្អែកលើអ្វីៗដែលមកពីមនុស្សមិនល្អឥតខ្ចោះឬ?+ ៤ តើអ្នករាល់គ្នាបានរងទុក្ខលំបាកជាច្រើនដោយឥតអំពើឬ? ខ្ញុំប្រាកដថាការនោះមិនមែនឥតអំពើទេ។ ៥ ចុះអ្នកដែលឲ្យឫទ្ធានុភាពរបស់ព្រះដល់អ្នករាល់គ្នា ហើយធ្វើការដែលប្រកបដោយឫទ្ធានុភាព+ក្នុងចំណោមអ្នករាល់គ្នា តើអ្នកនោះធ្វើការទាំងនោះដោយសារអ្នករាល់គ្នាប្រព្រឹត្តតាមច្បាប់ ឬក៏ដោយសារអ្នករាល់គ្នាមានជំនឿលើអ្វីដែលអ្នករាល់គ្នាបានឮ? ៦ ដូចអាប្រាហាំ«បានជឿព្រះយេហូវ៉ា* ហើយគាត់បានត្រូវចាត់ទុកថាជាមនុស្សសុចរិត»។+
៧ អ្នករាល់គ្នាច្បាស់ជាដឹងថា អ្នកណាដែលធ្វើតាមជំនឿ អ្នកនោះជាកូនអាប្រាហាំ។+ ៨ បទគម្ពីរបានចែងទុកតាំងពីយូរមកហើយថា ព្រះនឹងប្រកាសថាជនជាតិដទៃជាមនុស្សសុចរិតដោយសារជំនឿរបស់ពួកគេ ហើយបទគម្ពីរបានប្រកាសដំណឹងល្អដល់អាប្រាហាំជាមុនថា៖ «តាមរយៈអ្នក ប្រជាជាតិទាំងអស់នឹងទទួលពរ»។+ ៩ ហេតុនេះ អស់អ្នកដែលធ្វើតាមជំនឿកំពុងទទួលពរជាមួយនឹងអាប្រាហាំដែលជាអ្នកមានជំនឿ។+
១០ អស់អ្នកដែលអាងលើការប្រព្រឹត្តតាមច្បាប់ អ្នកទាំងនោះត្រូវបណ្ដាសាហើយ ព្រោះបទគម្ពីរចែងថា៖ «អស់អ្នកណាដែលមិនធ្វើតាមជានិច្ចនូវអ្វីៗទាំងអស់ដែលបានត្រូវសរសេរក្នុងរមូរច្បាប់* អ្នកនោះត្រូវបណ្ដាសាហើយ»។+ ១១ ម្យ៉ាងទៀត យើងឃើញច្បាស់ថាព្រះមិនប្រកាសថាអ្នកណាជាមនុស្សសុចរិតដោយសារច្បាប់ទេ+ ពីព្រោះ«មនុស្សសុចរិតនឹងរស់ដោយសារជំនឿ»។+ ១២ ឯច្បាប់មិនតម្រូវឲ្យមានជំនឿទេ ប៉ុន្តែ«អ្នកដែលប្រព្រឹត្តតាមបញ្ញត្ដិទាំងនោះ នឹងរស់ដោយសារបញ្ញត្ដិទាំងនោះ»។+ ១៣ ដោយសារគ្រិស្តបានទិញយើង+ នោះលោកបានរំដោះយើង+ឲ្យរួចពីបណ្ដាសានៃច្បាប់ ដោយធ្វើជាអ្នកត្រូវបណ្ដាសាជំនួសយើង ពីព្រោះបទគម្ពីរចែងថា៖ «អ្នកណាដែលត្រូវព្យួរលើបង្គោលឈើ អ្នកនោះត្រូវបណ្ដាសាហើយ»។+ ១៤ ការនោះបានកើតឡើងដើម្បីឲ្យជនជាតិដទៃបានពររបស់អាប្រាហាំតាមរយៈលោកយេស៊ូគ្រិស្ត។+ យ៉ាងនេះ យើងអាចទទួលឫទ្ធានុភាពរបស់ព្រះតាមសេចក្ដីសន្យារបស់លោក+ ដោយសារជំនឿរបស់យើង។
១៥ បងប្អូនអើយ ខ្ញុំសូមលើកឧទាហរណ៍មួយអំពីជីវិតប្រចាំថ្ងៃ៖ ពេលកិច្ចព្រមព្រៀងមួយមានសុពលភាព នោះគ្មានអ្នកណាអាចលើកចោលឬបន្ថែមអ្វីក្នុងកិច្ចព្រមព្រៀងនោះបានទេ។ ១៦ អាប្រាហាំនិងកូនចៅ*របស់គាត់បានទទួលសេចក្ដីសន្យាទាំងនោះ។+ បទគម្ពីរមិនចែងថា៖ «ដល់កូនចៅ*ទាំងឡាយរបស់អ្នក»ទេ ព្រោះបើចែងដូច្នេះគឺសំដៅលើមនុស្សច្រើន។ ប៉ុន្តែ គម្ពីរចែងថា៖ «ដល់កូនចៅ*របស់អ្នក» គឺសំដៅលើមនុស្សតែម្នាក់វិញ គឺជាគ្រិស្ត។+ ១៧ ម្យ៉ាងទៀត ខ្ញុំសុំនិយាយថា៤៣០ឆ្នាំក្រោយមក+ ច្បាប់ម៉ូសេបានត្រូវបង្កើតឡើង តែច្បាប់នេះមិនអាចធ្វើឲ្យកិច្ចព្រមព្រៀងដែលព្រះបានធ្វើឲ្យមានសុពលភាពពីមុននោះទៅជាមោឃ ឬធ្វើឲ្យសេចក្ដីសន្យារបស់លោកផ្លាស់ប្ដូរនោះទេ។ ១៨ ព្រោះប្រសិនបើព្រះឲ្យមត៌កដោយសារច្បាប់ នោះលោកនឹងលែងឲ្យដោយសារសេចក្ដីសន្យាទៀតហើយ។ ក៏ប៉ុន្តែ ព្រះបានមេត្តាឲ្យមត៌កនោះដល់អាប្រាហាំ គឺតាមរយៈសេចក្ដីសន្យា។+
១៩ បើដូច្នេះ ហេតុអ្វីក៏មានច្បាប់? ច្បាប់នោះបានត្រូវបន្ថែមដើម្បីសឲ្យឃើញការរំលង+ រហូតដល់កូនចៅ*ដែលបានទទួលសេចក្ដីសន្យានោះលេចមក។+ ព្រះបានប្រើទេវតាឲ្យប្រគល់ច្បាប់នោះដល់បណ្ដាជន+ តាមរយៈអ្នកសម្រុះសម្រួល។+ ២០ ពេលដែលមានភាគីតែម្ខាង នោះមិនត្រូវការអ្នកសម្រុះសម្រួលទេ។ ដូចគ្នាដែរ ព្រះគឺជាភាគីតែម្ខាងដែលបានធ្វើសេចក្ដីសន្យានោះ។ ២១ បើដូច្នេះ តើច្បាប់ប្រឆាំងសេចក្ដីសន្យារបស់ព្រះឬ? ច្បាស់ជាមិនមែនទេ! ព្រោះប្រសិនបើមនុស្សបានទទួលច្បាប់មួយដែលអាចផ្ដល់ជីវិត នោះពួកគេនឹងត្រូវចាត់ទុកជាមនុស្សសុចរិតតាមរយៈច្បាប់នោះ។ ២២ ប៉ុន្តែ បទគម្ពីរបានបង្ហាញថាមនុស្សបាននៅក្រោមអំណាចនៃភាពខុសឆ្គង* ដើម្បីឲ្យអស់អ្នកដែលបង្ហាញជំនឿលើលោកយេស៊ូគ្រិស្ត អាចទទួលសេចក្ដីសន្យាពីព្រះ។
២៣ ក៏ប៉ុន្តែ មុនជំនឿនោះមកដល់ យើងបានត្រូវការពារនិងគ្រប់គ្រងដោយច្បាប់ ហើយយើងកំពុងរង់ចាំជំនឿដែលនឹងត្រូវបើកបង្ហាញ។+ ២៤ ហេតុនេះ ច្បាប់បានធ្វើជាអ្នកមើលថែរក្សា*ដែលនាំយើងទៅដល់គ្រិស្ត+ ដើម្បីឲ្យព្រះប្រកាសថាយើងជាមនុស្សសុចរិតដោយសារជំនឿ។+ ២៥ ប៉ុន្តែ ឥឡូវជំនឿនោះបានមកដល់ហើយ+ ដូច្នេះយើងលែងនៅក្រោមអំណាចអ្នកមើលថែរក្សាទៀត។+
២៦ តាមការពិត អ្នករាល់គ្នាជាកូនព្រះ+ ដោយសារអ្នករាល់គ្នាមានជំនឿលើគ្រិស្តយេស៊ូ។+ ២៧ ព្រោះអ្នករាល់គ្នាដែលបានទទួលការជ្រមុជទឹកដើម្បីរួបរួមជាមួយនឹងគ្រិស្ត បានបំពាក់ខ្លួនដោយគ្រិស្ត។+ ២៨ គ្មានជនជាតិយូដា ឬជនជាតិក្រិច+ គ្មានខ្ញុំបម្រើ ឬអ្នកដែលមានសេរីភាព+ គ្មានប្រុស ឬស្រីឡើយ+ ព្រោះអ្នករាល់គ្នារួបរួមគ្នាដូចជាបុគ្គលតែមួយក្នុងនាមជាអ្នកកាន់តាមគ្រិស្តយេស៊ូ។+ ២៩ ម្យ៉ាងទៀត ប្រសិនបើអ្នករាល់គ្នាជារបស់គ្រិស្ត អ្នករាល់គ្នាពិតជាកូនចៅ*អាប្រាហាំ+ដែលជាអ្នកទទួលមត៌ក+តាមសេចក្ដីសន្យា។+
៤ ឥឡូវ ខ្ញុំសុំប្រាប់ថា ដរាបណាអ្នកដែលទទួលមត៌កនៅជាក្មេងតូច ដរាបនោះគាត់មិនខុសពីខ្ញុំបម្រើទេ ទោះជាគាត់ជាម្ចាស់លើអ្វីៗទាំងអស់ក៏ដោយ។ ២ ផ្ទុយទៅវិញ គាត់នៅក្រោមអំណាចរបស់អ្នកមើលការខុសត្រូវនិងអ្នកចាត់ចែងកិច្ចការផ្ទះ រហូតដល់ថ្ងៃដែលឪពុករបស់គាត់បានកំណត់ទុក។ ៣ ដូចគ្នាដែរ កាលដែលយើងជាក្មេងតូចនៅឡើយ យើងជាខ្ញុំបម្រើនៃអ្វីៗរបស់ពិភពលោកនេះ។*+ ៤ ប៉ុន្តែ ពេលដល់គ្រាកំណត់ហើយ ព្រះបានចាត់បុត្ររបស់លោកឲ្យមក រួចបុត្រនោះបានកើតពីស្ត្រី+ ក៏បានទៅជាអ្នកដែលនៅក្រោមច្បាប់+ ៥ ដើម្បីបុត្រនោះអាចរំដោះដោយទិញអស់អ្នកដែលនៅក្រោមច្បាប់។+ ការធ្វើដូច្នេះនាំឲ្យព្រះទទួលយើងជាកូន។+
៦ ពីព្រោះយើងជាកូនព្រះ ព្រះបានចាត់ឫទ្ធានុភាពបរិសុទ្ធ+ដែលបុត្ររបស់លោកបានទទួល ឲ្យចូលក្នុងចិត្តយើង+ ហើយឫទ្ធានុភាពនោះស្រែកឡើងថា៖ «អប្បា* បិតាអើយ!»។+ ៧ ដូច្នេះ អ្នកមិនមែនជាខ្ញុំបម្រើទៀតទេ តែជាកូនព្រះ ហើយប្រសិនបើអ្នកជាកូនព្រះ នោះព្រះក៏បានឲ្យអ្នករាល់គ្នាធ្វើជាអ្នកទទួលមត៌កដែរ។+
៨ ទោះជាយ៉ាងនោះក៏ដោយ ពេលដែលអ្នករាល់គ្នាមិនទាន់ស្គាល់ព្រះ អ្នករាល់គ្នាធ្លាប់ធ្វើជាខ្ញុំបម្រើរបស់ព្រះនានាដែលមិនមែនជាព្រះពិត។ ៩ ប៉ុន្តែឥឡូវនេះ អ្នករាល់គ្នាស្គាល់ព្រះហើយ ឬអាចនិយាយថា ឥឡូវនេះព្រះស្គាល់អ្នករាល់គ្នាហើយ ដូច្នេះហេតុអ្វីអ្នករាល់គ្នាកំពុងត្រឡប់ទៅរកអ្វីៗដែលគ្មានប្រយោជន៍+និងគ្មានតម្លៃ ហើយចង់ធ្វើជាខ្ញុំបម្រើរបស់អ្វីៗទាំងនោះម្ដងទៀត?+ ១០ អ្នករាល់គ្នាកាន់តាមថ្ងៃ ខែ+ រដូវ និងឆ្នាំផ្សេងៗយ៉ាងផ្ចិតផ្ចង់។ ១១ ខ្ញុំបារម្ភអំពីអ្នករាល់គ្នា ព្រោះការខំប្រឹងរបស់ខ្ញុំដើម្បីជួយអ្នករាល់គ្នាប្រហែលជាឥតប្រយោជន៍។
១២ បងប្អូនអើយ ពីមុនខ្ញុំធ្លាប់ធ្វើដូចអ្នករាល់គ្នាដែរ ដូច្នេះខ្ញុំសូមអង្វរអ្នករាល់គ្នាឲ្យធ្វើដូចខ្ញុំធ្វើនៅឥឡូវនេះ។+ អ្នករាល់គ្នាមិនបានធ្វើអ្វីខុសចំពោះខ្ញុំទេ។ ១៣ ប៉ុន្តែអ្នករាល់គ្នាដឹងហើយ នៅលើកដំបូង ខ្ញុំមានឱកាសផ្សព្វផ្សាយដំណឹងល្អដល់អ្នករាល់គ្នា ដោយសារខ្ញុំឈឺ។ ១៤ ទោះជាជំងឺរបស់ខ្ញុំជាការល្បងលដល់អ្នករាល់គ្នាក៏ដោយ អ្នករាល់គ្នាមិនបានមើលងាយឬស្អប់ខ្ពើមខ្ញុំ*ទេ តែអ្នករាល់គ្នាបានទទួលខ្ញុំដូចជាទទួលទេវតារបស់ព្រះ ឬដូចទទួលគ្រិស្តយេស៊ូ។ ១៥ ដូច្នេះ តើសុភមង្គលដែលអ្នករាល់គ្នាធ្លាប់មានពីមុននៅឯណា? ព្រោះខ្ញុំជឿជាក់ថា នៅពេលនោះអ្នករាល់គ្នាមុខជានឹងខ្វេះភ្នែកខ្លួនឯងផ្ដល់ឲ្យខ្ញុំហើយ ប្រសិនបើអាចធ្វើបាន។+ ១៦ បើដូច្នេះ តើខ្ញុំបានទៅជាសត្រូវរបស់អ្នករាល់គ្នា ដោយសារខ្ញុំប្រាប់សេចក្ដីពិតដល់អ្នករាល់គ្នាឬ? ១៧ អ្នកទាំងនោះខំខ្នះខ្នែងឲ្យបានអ្នករាល់គ្នា ប៉ុន្តែមិនមែនដោយមានបំណងចិត្តល្អទេ តែពួកគេចង់ពង្រាត់អ្នករាល់គ្នាចេញពីខ្ញុំ ដើម្បីឲ្យអ្នករាល់គ្នាសង្វាតទៅតាមពួកគេវិញ។ ១៨ ក៏ប៉ុន្តែ ជាការល្អប្រសិនបើមានគេខ្នះខ្នែងឲ្យបានអ្នករាល់គ្នាដោយមានបំណងចិត្តល្អជានិច្ច មិនគ្រាន់តែពេលដែលខ្ញុំនៅជាមួយនឹងអ្នករាល់គ្នាប៉ុណ្ណោះទេ។ ១៩ កូនៗអើយ!+ ដោយសារអ្នករាល់គ្នា ខ្ញុំកំពុងឈឺចាប់ម្ដងទៀតដូចជាស្ត្រីដែលកំពុងកើតកូន ហើយខ្ញុំនឹងបន្តឈឺចាប់រហូតដល់អ្នករាល់គ្នាមានគុណសម្បត្តិដូចគ្រិស្ត។ ២០ ខ្ញុំចង់នៅជាមួយនឹងអ្នករាល់គ្នាឥឡូវនេះ ហើយនិយាយទៅអ្នករាល់គ្នាតាមរបៀបមួយផ្សេងទៀត ពីព្រោះខ្ញុំឆ្ងល់អំពីអ្នករាល់គ្នាណាស់។
២១ សូមប្រាប់ខ្ញុំ អ្នករាល់គ្នាដែលចង់នៅក្រោមច្បាប់* តើអ្នករាល់គ្នាមិនស្ដាប់អ្វីដែលច្បាប់ចែងទេឬ? ២២ ជាឧទាហរណ៍ បទគម្ពីរចែងថាអាប្រាហាំមានកូនប្រុសពីរនាក់ ម្នាក់កើតពីស្ត្រីដែលជាអ្នកបម្រើ+ ហើយម្នាក់ទៀតកើតពីស្ត្រីដែលមានសេរីភាព។+ ២៣ ប៉ុន្តែ កូនប្រុសដែលកើតពីស្ត្រីដែលជាអ្នកបម្រើ បានកើតមកដូចមនុស្សទូទៅ+ តែកូនប្រុសម្នាក់ទៀតដែលកើតពីស្ត្រីដែលមានសេរីភាព បានកើតមកដោយសារសេចក្ដីសន្យារបស់ព្រះ។+ ២៤ ព្រឹត្តិការណ៍ទាំងនេះមានអត្ថន័យជានិមិត្តរូប ព្រោះស្ត្រីទាំងពីរនេះជាតំណាងកិច្ចព្រមព្រៀងពីរ។ មួយជាកិច្ចព្រមព្រៀងដែលបានត្រូវធ្វើឡើងនៅភ្នំស៊ីណាយ+ ក៏បង្កើតកូនដែលត្រូវធ្វើជាខ្ញុំបម្រើ ហើយកិច្ចព្រមព្រៀងនេះគឺប្រៀបដូចជានាងហាកា។ ២៥ ឯហាកាគឺជាតំណាងភ្នំស៊ីណាយ+ ជាភ្នំមួយនៅស្រុកអារ៉ាប់ ហើយសព្វថ្ងៃនេះ នាងជាតំណាងក្រុងយេរូសាឡិម ព្រោះនាងនិងកូនរបស់នាងជាខ្ញុំបម្រើ។ ២៦ ប៉ុន្តែ ក្រុងយេរូសាឡិមនៅស្ថានលើមានសេរីភាព ហើយនាងជាម្ដាយរបស់យើង។
២៧ ព្រោះបទគម្ពីរចែងថា៖ «ស្ត្រីអារដែលមិនបង្កើតកូនអើយ! ចូរត្រេកអរឡើង! ស្ត្រីដែលមិនធ្លាប់ឈឺចាប់ដោយសម្រាលកូនអើយ! ចូរបន្លឺសំឡេង ហើយស្រែកឡើងដោយអំណរ! ព្រោះកូនរបស់ស្ត្រីអារ* គឺច្រើនជាងកូនរបស់ស្ត្រីដែលមានប្ដី»។+ ២៨ ចំណែកយើងវិញ បងប្អូនអើយ យើងជាកូននៃសេចក្ដីសន្យានោះ ដូចអ៊ីសាកដែរ។+ ២៩ ប៉ុន្តែ នៅពេលនោះក៏ដូចសព្វថ្ងៃនេះដែរ ព្រោះអ្នកដែលកើតដូចមនុស្សទូទៅចាប់ផ្ដើមបៀតបៀនអ្នកដែលកើតដោយសារឫទ្ធានុភាពរបស់ព្រះ។+ ៣០ ទោះជាយ៉ាងនោះក៏ដោយ តើបទគម្ពីរចែងយ៉ាងណា? បទគម្ពីរចែងថា៖ «ចូរបណ្ដេញស្ត្រីដែលជាអ្នកបម្រើនិងកូនប្រុសរបស់នាងចេញទៅ ព្រោះកូនរបស់ស្ត្រីជាអ្នកបម្រើនឹងមិនទទួលមត៌កជាមួយនឹងកូនរបស់ស្ត្រីដែលមានសេរីភាពឡើយ»។+ ៣១ ដូច្នេះ បងប្អូនអើយ យើងមិនមែនជាកូនរបស់ស្ត្រីជាអ្នកបម្រើទេ តែជាកូនរបស់ស្ត្រីដែលមានសេរីភាព។
៥ គ្រិស្តបានរំដោះយើង ដើម្បីឲ្យមានសេរីភាពបែបនោះ។ ម្ល៉ោះហើយ ចូរកាន់ជំហរមាំមួន+ កុំឲ្យអ្នកណាដាក់នឹមលើអ្នករាល់គ្នាឲ្យធ្វើជាខ្ញុំបម្រើម្ដងទៀតឡើយ។+
២ មើល! ខ្ញុំ ប៉ូល សូមប្រាប់អ្នករាល់គ្នាថា បើអ្នករាល់គ្នាទទួលការកាត់ចុងស្បែក* នោះអ្វីៗដែលគ្រិស្តបានធ្វើនឹងគ្មានប្រយោជន៍ចំពោះអ្នករាល់គ្នាទេ។+ ៣ ខ្ញុំសូមបញ្ជាក់ប្រាប់ម្ដងទៀតដល់បុរសទាំងអស់ដែលបានទទួលការកាត់ចុងស្បែកថា អ្នករាល់គ្នាក៏មានកាតព្វកិច្ចបំពេញតាមច្បាប់*ទាំងមូលដែរ។+ ៤ អ្នកណាដែលខំព្យាយាមឲ្យព្រះប្រកាសថាខ្លួនជាមនុស្សសុចរិត ដោយកាន់តាមច្បាប់+ អ្នកនោះបានឃ្លាតចេញពីគ្រិស្តនិងគុណដ៏វិសេសលើសលប់របស់លោកហើយ។ ៥ ចំណែកយើងវិញ ដោយឫទ្ធានុភាពរបស់ព្រះ យើងកំពុងទន្ទឹងចាំដោយចិត្តរំភើប ហើយយើងសង្ឃឹមថានឹងបានទទួលភាពសុចរិតទាំងស្រុងដោយសារជំនឿរបស់យើង។ ៦ ព្រោះក្នុងនាមជាអ្នកកាន់តាមគ្រិស្តយេស៊ូ ការកាត់ចុងស្បែកឬមិនកាត់ នោះមិនសំខាន់ចំពោះលោកឡើយ។+ ប៉ុន្តែ អ្វីដែលសំខាន់គឺជំនឿដែលផុសចេញពីសេចក្ដីស្រឡាញ់។
៧ កន្លងមកអ្នករាល់គ្នាបានប្រព្រឹត្តយ៉ាងល្អ។*+ តើអ្នកណាបានរារាំងអ្នករាល់គ្នាមិនឲ្យបន្តធ្វើតាមសេចក្ដីពិត? ៨ ការវែកញែកបែបនេះមិនមែនមកពីព្រះដែលកំពុងហៅអ្នករាល់គ្នាទេ។ ៩ ដំបែតែបន្តិចធ្វើឲ្យដុំម្សៅទាំងមូលដោរឡើង។+ ១០ ខ្ញុំជឿជាក់ថា អ្នករាល់គ្នាដែលជាអ្នកកាន់តាមលោកម្ចាស់+នឹងមិនមានគំនិតផ្សេងទេ។ ប៉ុន្តែ អ្នកណាដែលកំពុងធ្វើឲ្យអ្នករាល់គ្នាពិបាក+ អ្នកនោះនឹងទទួលការផ្ដន្ទាទោស ទោះជាអ្នកនោះជាអ្នកណាក៏ដោយ។ ១១ បងប្អូនអើយ ចំណែកខ្ញុំវិញ ប្រសិនបើខ្ញុំនៅតែប្រកាសឲ្យគេទទួលការកាត់ចុងស្បែក ហេតុអ្វីបានជាគេនៅតែបៀតបៀនខ្ញុំ? បើដូច្នោះ សេចក្ដីបង្រៀនអំពីបង្គោលទារុណកម្ម*+ មិនមែនជាឧបសគ្គដែលនាំឲ្យជំពប់ដួល*ទៀតទេ។ ១២ ខ្ញុំអរណាស់ បើបុរសទាំងនោះដែលកំពុងខំប្រឹងបង្វិលខួរអ្នករាល់គ្នា ប្រគល់ខ្លួនទៅឲ្យគេគ្រៀវ*នោះ។
១៣ ពិតមែនតែបងប្អូនបានត្រូវហៅមកដើម្បីឲ្យមានសេរីភាព តែកុំប្រើសេរីភាពនេះជាឱកាសដើម្បីបំពេញតាមសេចក្ដីប៉ងប្រាថ្នានៃរូបកាយឡើយ។+ ប៉ុន្តែ ចូរបម្រើគ្នាទៅវិញទៅមកដោយសេចក្ដីស្រឡាញ់។+ ១៤ ព្រោះច្បាប់ទាំងមូលបានត្រូវសម្រេច*ដោយបញ្ញត្ដិតែមួយ ពោលគឺ«អ្នកត្រូវស្រឡាញ់អ្នកជិតខាងដូចស្រឡាញ់ខ្លួនអ្នក»។+ ១៥ ប្រសិនបើអ្នករាល់គ្នាចេះតែប្រខាំនិងត្របាក់គ្នាទៅវិញទៅមក+ នោះចូរប្រយ័ត្ន ក្រែងលោត្រូវវិនាសដោយសារតែគ្នាឯង។+
១៦ ប៉ុន្តែ ខ្ញុំសុំប្រាប់អ្នករាល់គ្នាថា ចូរឲ្យឫទ្ធានុភាពរបស់ព្រះបន្តដឹកនាំអ្នករាល់គ្នា+ ហើយអ្នករាល់គ្នានឹងមិនបំពេញតាមសេចក្ដីប៉ងប្រាថ្នានៃរូបកាយឡើយ។+ ១៧ ព្រោះសេចក្ដីប៉ងប្រាថ្នានៃរូបកាយប្រឆាំងឫទ្ធានុភាពរបស់ព្រះ ហើយឫទ្ធានុភាពរបស់ព្រះប្រឆាំងសេចក្ដីប៉ងប្រាថ្នានៃរូបកាយ។ ទាំងពីរនេះគឺប្រទាំងគ្នាជានិច្ច។ ហេតុនេះ អ្វីៗដែលអ្នករាល់គ្នាចង់ធ្វើ អ្នកបែរជាមិនធ្វើទៅវិញ។+ ១៨ ម្យ៉ាងទៀត ប្រសិនបើឫទ្ធានុភាពរបស់ព្រះកំពុងដឹកនាំអ្នករាល់គ្នា នោះអ្នករាល់គ្នាមិននៅក្រោមច្បាប់ឡើយ។
១៩ ការប្រព្រឹត្តដែលផុសចេញពីភាពខុសឆ្គងគឺសឲ្យឃើញជាក់ស្ដែង ពោលគឺអំពើប្រាសចាកសីលធម៌ខាងផ្លូវភេទ*+ អំពើស្មោកគ្រោក ការប្រព្រឹត្តដោយឥតកោតក្រែង*+ ២០ ការគោរពបូជារូបព្រះ ការទាក់ទងនឹងពួកវិញ្ញាណអាក្រក់+ ការស្អប់គ្នា ការឈ្លោះប្រកែកគ្នា ការច្រណែន ការច្រឡោតខឹង ការទាស់ទែងគ្នា ការបែកបាក់គ្នា ការបែកជានិកាយផ្សេងៗ ២១ ការឈ្នានីស ការផឹកស្រាឲ្យស្រវឹង+ ការជប់លៀងសប្បាយឥតបើគិត ហើយអ្វីៗដែលស្រដៀងនឹងការទាំងនេះ។+ អំពីការទាំងនេះ ខ្ញុំកំពុងព្រមានអ្នករាល់គ្នាទុកជាមុន ដូចខ្ញុំបានព្រមានអ្នករាល់គ្នាហើយថា អស់អ្នកដែលប្រព្រឹត្ត*ការទាំងនេះនឹងមិនទទួលរាជាណាចក្ររបស់ព្រះជាមត៌កឡើយ។+
២២ ក៏ប៉ុន្តែ ផលដែលបង្កើតដោយឫទ្ធានុភាពរបស់ព្រះគឺ សេចក្ដីស្រឡាញ់ អំណរ សេចក្ដីសុខសាន្ត* ចិត្តអត់ធ្មត់* សេចក្ដីសប្បុរស គុណធម៌+ ជំនឿ ២៣ ចិត្តស្លូតបូត ការចេះទប់ចិត្ត។+ គ្មានច្បាប់ណាប្រឆាំងអ្វីៗបែបនេះឡើយ។ ២៤ ម្យ៉ាងទៀត អ្នកដែលជារបស់គ្រិស្តយេស៊ូបានព្យួររូបកាយ* និងសេចក្ដីប៉ងប្រាថ្នា ព្រមទាំងតណ្ហារបស់រូបកាយហើយ។+
២៥ ប្រសិនបើយើងកំពុងរស់នៅស្របតាមការដឹកនាំនៃឫទ្ធានុភាពរបស់ព្រះ ចូរយើងបន្តប្រព្រឹត្តតាមការដឹកនាំនៃឫទ្ធានុភាពនោះ។+ ២៦ កុំឲ្យយើងទៅជាមនុស្សដែលលើកខ្លួនហួសប្រមាណ+ ដោយបង្កើតឲ្យមានការប្រកួតប្រជែងគ្នា+ និងដោយឈ្នានីសគ្នាទៅវិញទៅមកឡើយ។
៦ បងប្អូនអើយ ទោះជាមនុស្សម្នាក់ចាប់ផ្ដើមដើរផ្លូវខុសដោយមិនដឹងខ្លួនក៏ដោយ ចូរអ្នករាល់គ្នាជាគ្រិស្តសាសនិកដែលមានគុណសម្បត្តិគ្រប់គ្រាន់ ព្យាយាមកែតម្រង់អ្នកនោះដោយចិត្តស្លូតបូត។+ ប៉ុន្តែ ចូរប្រយ័ត្នខ្លួនផង+ ក្រែងលោអ្នកត្រូវល្បួងដែរ។+ ២ ចូរបន្តរែកពុនបន្ទុកគ្នាទៅវិញទៅមក+ ធ្វើដូច្នេះអ្នករាល់គ្នានឹងបំពេញច្បាប់គ្រិស្តគ្រប់ជំពូក។+ ៣ ព្រោះប្រសិនបើអ្នកណាគិតថាខ្លួនសំខាន់ តែតាមពិតខ្លួនមិនមែនជាអ្វីសោះ+ អ្នកនោះកំពុងបញ្ឆោតខ្លួនហើយ។ ៤ ចូរឲ្យម្នាក់ៗពិនិត្យមើលការប្រព្រឹត្តរបស់ខ្លួន+ រួចគ្រប់គ្នានឹងមានហេតុត្រេកអរអំពីខ្លួនផ្ទាល់ ដោយមិនប្រៀបធៀបខ្លួននឹងអ្នកឯទៀត។+ ៥ ព្រោះម្នាក់ៗត្រូវទទួលភារៈរបស់ខ្លួន។*+
៦ ម្យ៉ាងទៀត ចូរឲ្យអ្នកណាដែលទទួលការបង្រៀន*ពីបណ្ដាំរបស់ព្រះ និងអ្នកដែលបានបង្រៀនសេចក្ដីនោះ ចែករំលែកអ្វីៗល្អទាំងអស់ជាមួយគ្នា។+
៧ កុំច្រឡំឡើយ បញ្ឆោតព្រះមិនបានទេ។ ព្រោះមនុស្សទទួលផលតាមតែអ្វីដែលគេសាបព្រោះ។+ ៨ ពីព្រោះអ្នកណាដែលសាបព្រោះដោយគិតអំពីសេចក្ដីប៉ងប្រាថ្នានៃរូបកាយ អ្នកនោះនឹងទទួលផលជាសេចក្ដីហិនវិនាសពីរូបកាយ។ ប៉ុន្តែ អ្នកណាដែលសាបព្រោះដោយគិតអំពីឫទ្ធានុភាពរបស់ព្រះ អ្នកនោះនឹងទទួលផលជាជីវិតដែលគ្មានទីបញ្ចប់ពីឫទ្ធានុភាពរបស់ព្រះ។+ ៩ ដូច្នេះ យើងមិនត្រូវឈប់ព្យាយាមធ្វើអ្វីដែលល្អប្រសើរឡើយ ព្រោះនៅពេលកំណត់យើងនឹងទទួលផល បើយើងមិនរសាយចិត្តទេ។*+ ១០ ម្ល៉ោះហើយ ដរាបណាយើងមានឱកាស នោះចូរយើងធ្វើល្អដល់មនុស្សទាំងអស់ ជាពិសេសដល់បងប្អូនរួមជំនឿ។
១១ មើល! ខ្ញុំបានសរសេរអក្សរធំៗទៅកាន់អ្នករាល់គ្នាដោយដៃខ្ញុំផ្ទាល់។
១២ អស់អ្នកដែលចង់ឲ្យអ្នកឯទៀតពេញចិត្តនឹងសម្បកក្រៅរបស់ពួកគេ គឺជាអ្នកដែលខំជំរុញឲ្យអ្នករាល់គ្នាទទួលការកាត់ចុងស្បែក ដើម្បីកុំឲ្យគេបៀតបៀនខ្លួនដោយសារបង្គោលទារុណកម្ម*របស់គ្រិស្ត។ ១៣ ព្រោះសូម្បីតែពួកអ្នកដែលទទួលការកាត់ចុងស្បែកក៏មិនធ្វើតាមច្បាប់ដែរ+ ប៉ុន្តែពួកគេចង់ឲ្យអ្នករាល់គ្នាទទួលការកាត់ចុងស្បែក ដើម្បីឲ្យពួកគេអាចអួតអំពីសម្បកក្រៅរបស់អ្នករាល់គ្នា។ ១៤ ក៏ប៉ុន្តែ ខ្ញុំនឹងមិនអួតអំពីអ្វីក្រៅពីបង្គោលទារុណកម្ម*របស់លោកយេស៊ូគ្រិស្តជាម្ចាស់របស់យើងឡើយ។+ ចំពោះខ្ញុំ ពិភពលោកបានស្លាប់ហើយ* ចំពោះពិភពលោក ខ្ញុំក៏បានស្លាប់ដែរ។ ១៥ ព្រោះការកាត់ចុងស្បែកឬមិនកាត់ នោះមិនសំខាន់ឡើយ+ តែអ្វីដែលពិតជាសំខាន់ គឺព្រះធ្វើឲ្យអ្នករាល់គ្នាទៅជាមនុស្សថ្មី។+ ១៦ ចំណែកអស់អ្នកដែលរស់នៅស្របតាមខ្នាតតម្រានៃការប្រព្រឹត្តនេះ ពោលគឺអ៊ីស្រាអែលនៃព្រះ សូមឲ្យបានប្រកបទៅដោយសេចក្ដីសុខសាន្តនិងសេចក្ដីមេត្តាករុណា។+
១៧ ចាប់ពីពេលនេះតទៅ កុំឲ្យអ្នកណាធ្វើឲ្យខ្ញុំមានបញ្ហាទៀត ព្រោះនៅលើរូបកាយខ្ញុំមានស្លាកស្នាមដែលសម្គាល់ថាខ្ញុំជាខ្ញុំបម្រើរបស់លោកយេស៊ូ។+
១៨ បងប្អូនអើយ សូមឲ្យគុណដ៏វិសេសលើសលប់របស់លោកយេស៊ូគ្រិស្តជាម្ចាស់របស់យើងនៅជាមួយនឹងអ្នករាល់គ្នា ពីព្រោះអ្នករាល់គ្នាមានចិត្តគំនិតត្រឹមត្រូវ។ អាមេន។
ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
មើលនិយមន័យពាក្យ«របៀបរបបពិភពលោក»
ក៏មានឈ្មោះថាពេត្រុសដែរ
មើលនិយមន័យពាក្យ«ការកាត់ចុងស្បែក»
ន័យត្រង់«ព្រះមិនមើលតែសម្បកក្រៅរបស់មនុស្សទេ»
ឬ«អ្នកដែលមិនបានទទួលការកាត់ចុងស្បែក»
ឬ«អ្នកដែលបានទទួលការកាត់ចុងស្បែក»
ក៏មានឈ្មោះថាពេត្រុសដែរ
ក៏មានឈ្មោះថាពេត្រុសដែរ
ឬ«គាត់គួរទទួលការផ្ដន្ទាទោស»
ឬ«លាក់ពុត»
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ន័យត្រង់«ខ្ញុំបានស្លាប់ចំពោះច្បាប់»
ឬ«បោះដែកគោលភ្ជាប់នឹងបង្គោលឈើ»
ឬ«ដែលបានត្រូវបោះដែកគោលភ្ជាប់នឹងបង្គោលឈើ»
មើលសេចក្ដីពន្យល់បន្ថែម ផ្នែកក៥
នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
ន័យត្រង់«ពូជ»
ន័យត្រង់«ពូជ»
ន័យត្រង់«ពូជ»
ន័យត្រង់«ពូជ»
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ឬ«ជាគ្រូ»
ន័យត្រង់«ពូជ»
ឬ«ខ្ញុំបម្រើនៃបឋមសេចក្ដីរបស់ពិភពលោកនេះ»
ភាសាអេរ៉ាម មានន័យថា«ឱលោកឪពុកអើយ!»
ឬ«ស្ដោះទឹកមាត់ដាក់ខ្ញុំ»
នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
ឬ«ស្ត្រីដែលបានត្រូវបោះបង់ចោល»
មើលនិយមន័យពាក្យ«ការកាត់ចុងស្បែក»
នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
ន័យត្រង់«អ្នករាល់គ្នាកំពុងរត់យ៉ាងល្អ»
មើលនិយមន័យពាក្យ«បង្គោលទារុណកម្ម»
សំដៅលើការភ្លាត់ធ្វើខុស ឬការជួបប្រទះឧបសគ្គចំពោះជំនឿ
ឬ«កាត់ប្រដាប់ភេទខ្លួនឯងចោល»។ នៅពេលធ្វើបែបនេះ គាត់នឹងលែងមានគុណសម្បត្តិគ្រប់គ្រាន់ដើម្បីបង្រៀនច្បាប់ម៉ូសេទៀត
ឬប្រហែលជាមានន័យថា«សរុបមក»
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«ប្រព្រឹត្តដោយឥតអៀនខ្មាស»។ ភាសាក្រិច«អាសិលគា»។ មើលនិយមន័យពាក្យ«ប្រព្រឹត្តដោយឥតកោតក្រែង»
សំដៅលើការប្រព្រឹត្តជាទម្លាប់
ឬ«សន្តិភាព»
ឬ«ចិត្តធ្ងន់»
ឬ«បានបោះដែកគោលភ្ជាប់រូបកាយនឹងបង្គោលឈើ»
ឬ«ត្រូវទទួលខុសត្រូវចំពោះការប្រព្រឹត្តរបស់ខ្លួន»
នេះសំដៅលើការបង្រៀនដោយមាត់ទទេ
ឬ«មិនឈប់ព្យាយាមទេ»
មើលនិយមន័យពាក្យ«បង្គោលទារុណកម្ម»
មើលនិយមន័យពាក្យ«បង្គោលទារុណកម្ម»
ឬ«បានត្រូវប្រហារជីវិតលើបង្គោលឈើហើយ»